No te aha e haapii ai i te Bibilia?
No te aha e haapii ai i te Bibilia?
E TAATA apî o Bill, e taata tuaro, te maramarama, e te taoˈa rahi. Aita râ oia e mauruuru ra. Aita e tumu to to ˈna oraraa, e ua ahoaho roa oia. No te tamata i te ite i te hoê tumu i roto i te oraraa, ua faahohonu oia e rave rau haapaoraa, aita râ i itea mai ia ˈna te mea ta ˈna e imi ra. I te matahiti 1991, ua farerei oia i te hoê Ite no Iehova o tei vaiiho mai i te hoê buka o te faataa ra i ta te Bibilia e parau ra no nia i te auraa o te oraraa. Ua faanahohia te hoê haapiiraa bibilia ia nehenehe o Bill e faahohonu i teie tumu parau e te vai ra ˈtu â.
Te haamanaˈo ra Bill e: “Ua faaterehia ta mâua haapiiraa matamua, e no te mea e mea pinepine roa mâua i te hiˈo i te Bibilia, ua ite aˈera vau e tera ta ˈu e imi ra. Mea anaanatae roa te mau pahonoraa i roto i te Bibilia. I muri aˈe i taua haapiiraa ra, ua tere au i nia i te mouˈa, ua pou mai to ˈu pereoo rahi mai, e ua tuô atura ma te oaoa. Ua oaoa roa vau, inaha ua itea mai ia ˈu te mau pahonoraa i ta ˈu mau uiraa.”
Parau mau, e ere o te taata atoa, o tei ite hoi i te parau mau bibilia, te tuô roa ma te oaoa. Tera râ, e tupuraa oaoa no te taata e rave rahi i to ratou iteraa i te mau pahonoraa i te mau uiraa faufaa o te oraraa. E au to ratou manaˈo i to te taata o te parabole a Iesu o tei itea mai te hoê taoˈa huna i roto i te aua. Ua na ô Iesu e: “No te oaoa i taua taoˈa ra, ua hoo atura i te mau taoˈa atoa na ˈna ra, e ua hoo atura i taua aua ra.”—Te ravea e fanaˈo ai i te hoê oraraa e auraa to te reira
I feruriruri na o Bill i te hoê uiraa faufaa, Eaha te tumu o te oraraa? Ua tutava rahi te mau philosopho, te feia maimi i te pae faaroo, e te mau aivanaa i te imi i te pahonoraa o taua uiraa ra ehia tausani matahiti i te maoro. Ehia buka ta te taata i papai no te tamataraa i te pahono i te reira. Aita ta ratou mau tutavaraa i manuïa, e mea rahi tei manaˈo e eita e tia ia pahono i te uiraa. Teie râ, te vai ra te pahonoraa. Mea hohonu te pahonoraa, e ere râ i te mea fifi roa. Te faataahia ra te reira i roto i te Bibilia. Te ravea e fanaˈo ai i te hoê oraraa oaoa e auraa to te reira, teie ïa: Mea titauhia ia faatupu tatou i te taairaa maitai e o Iehova, to tatou Atua Poiete e Metua i te raˈi. E nafea ïa tatou?
No te haafatata ˈtu i te Atua, te vai ra e piti tuhaa e au ra eita e tuati. Te feia e haafatata ˈtu i te Atua, e mǎtaˈu e e here ratou ia ˈna. E hiˈo mai tatou e piti irava o te turu i teie manaˈo. Mea maoro aˈenei, ua hiˈopoa maite te arii Solomona i te huitaata e ua papai oia i ta ˈna mau itearaa i roto i te buka bibilia o te Koheleta. Ei haapotoraa i ta ˈna mau tatararaa, ua papai oia e: “E faaroo na tatou i te faaotiraa o taua mau parau nei: o te Atua te mǎtaˈu atu, e haapao hoi i ta ˈna parau; o ta te taata atoa ïa e ati noa ˈˈe.” (Koheleta 12:13) Tau senekele i muri aˈe, i to ˈna uiraahia eaha te faaueraa rahi roa ˈˈe o te Ture i horoahia ia Mose ra, ua pahono Iesu e: “[Ia here] oe i to Atua ia Iehova ma to aau atoa, e ma to [nephe] atoa, e ma to manaˈo atoa.” (Mataio 22:37; MN) Mea huru ê anei no outou ia mǎtaˈu e ia here tatou i te Atua? E hiˈo mai tatou i te faufaaraa o te mǎtaˈu e te here e nafea te amuiraa i na mea e piti e tauturu ai i te hoê taata ia fanaˈo i te taairaa maitai e te Atua.
Te auraa e mǎtaˈu i te Atua
Mea faufaa roa te mǎtaˈu faatura mai te peu e e tia ia tatou ia haamori i te Atua ma te au. Te na ô ra te Bibilia e: “O te matamua o te paari ra, oia te mǎtaˈu ia Iehova ra.” (Salamo 111:10) Ua papai te aposetolo Paulo e: “E tapea maite tatou i taua maitai ra, ia haamori tatou i te Atua ma te itehia mai, ma te haehaa, e te paieti.” (Hebera 12:28) Oia atoa, ua haamata te hoê melahi i ropu i te reva ta te aposetolo Ioane i ite orama, i ta ˈna faaiteraa i te parau apî maitai mai teie: “A mǎtaˈu i te Atua, e faahanahana ˈtu ia ˈna.”—Apokalupo 14:6, 7.
E ere teie mǎtaˈu i te Atua, mea faufaa roa hoi e fanaˈo ai i te hoê oraraa e auraa to te reira, i te riaria ia ˈna. E riaria tatou mai te peu e te haamǎtaˈuhia ra tatou e te hoê taata ino atâta. Te mǎtaˈu râ i te Atua—aore ra te mǎtaˈu paieti—o te faatura hohonu ïa ma te tura i te Atua Poiete. Te auraa atoa, te mǎtaˈu tano e faariri i te Atua no te mea o o ˈna te Haava Teitei roa ˈˈe e te Manahope, e puai e e mana atoa to ˈna no te faautua i te feia eita e faaroo.
Te amuiraa i te mǎtaˈu e te here
Eita iho â râ Iehova e hinaaro ia tavini te taata ia ˈna no te mea noa te mǎtaˈu ra ratou ia ˈna. E Atua aroha roa ino o Iehova. Ua turaihia te aposetolo Ioane ia papai e: ‘E aroha te Atua.’ (Ioane 1, 4:8) E hamani maitai te Atua ra o Iehova i te huitaata ma te here rahi, e e hinaaro oia ia here atoa te taata ia ˈna. Nafea râ taua here ra e tuati ai i te mǎtaˈu paieti? Ua taai-roa-hia na huru e piti. Ua papai te fatu salamo e: “Te parau moe a Iehova ra, tei te feia ïa i mǎtaˈu ia ˈna ra.”—Salamo 25:14.
A feruri noa na i te huru faatura e te mǎtaˈu o te aau o te hoê tamarii i te hoê metua tane pautuutu e te paari. I te hoê â taime, e farii taua tamarii ra i te here o te metua tane. E tiaturi te tamarii i te metua tane e e fariu oia i nia ia ˈna ia arataihia oia, ua papu ia ˈna e e hopoi mai teie aratairaa i te mau maitai. Oia atoa, ia here e ia mǎtaˈu tatou ia Iehova, e pee ïa tatou i ta ˈna aratairaa, e e maitaihia tatou i te reira. A hiˈo na eaha ta Iehova i parau no nia i te mau Iseraela: “Ahiri e, o te huru ïa o to ratou aau i roto ia ratou, e aau mǎtaˈu mai ia ˈu, e te haapao tamau maite i ta ˈu parau, ia maitai ratou, e ia maitai hoi ta ratou mau tamarii e a muri noa ˈtu!”—Deuteronomi 5:29.
Oia, e aratai atu te mǎtaˈu paieti eiaha i te faatîtîraa ra, i te tiamâraa râ, eiaha i te oto ra, i te oaoa râ. Ua tohu Isaia no nia ia Iesu e: “E rahi hoi to ˈna ite i te mǎtaˈu ia Iehova.” (Isaia 11:3) E ua papai te fatu salamo e: “E ao to te taata i mǎtaˈu ia Iehova ra: tei riro roa to ˈna aau i ta ˈna parau.”—Salamo 112:1.
Papu maitai, eita ta tatou e nehenehe e mǎtaˈu e e here i te Atua mai te peu e aita tatou i ite ia ˈna. No reira, mea faufaa roa te hoê haapiiraa i te Bibilia. E tauturu mai taua haapiiraa ra ia taa ia tatou te huru o te Atua e ia farii ma te aau mehara e e haerea paari ia pee i ta ˈna aratairaa. A haafatata noa ˈtu ai tatou i te Atua, e hinaaro tatou e rave i to ˈna hinaaro e te turaihia ra tatou ia haapao i ta ˈna mau faaueraa, ua ite hoi tatou e e maitaihia tatou i te reira.—Ioane 1, 5:3.
Mea oaoa ia ite tatou e e oraraa maitai to te hoê. Mai tera ïa no Bill, tei faahitihia i te omuaraa. Ua parau oia aita i maoro aˈenei e: “I te roaraa o na matahiti e iva i mahemo mai ta ˈu haapiiraa bibilia matamua mai, ua maitai mai to ˈu taairaa e o Iehova. Ua riro mai to ˈu oaoa matamua ei huru oraraa oaoa mau. E tapea noa vau i te manaˈo maitai i te oraraa. Ua î to ˈu mau mahana i te mau ohipa faufaa, eiaha râ i te imiraa faufaa ore i te navenave. Ua riro o Iehova ei mea mau no ˈu, e ua ite au e te haapao mau ra oia i to ˈu maitai.”
I roto i te tumu parau i muri nei, e hiˈopoa atoa tatou nafea te ite ia Iehova e hopoi mai ai i te oaoa e te mau maitai na te feia e faaohipa i te reira i roto i to ratou oraraa.
[Parau iti faaôhia i te api 5]
Te auraa e haafatata ˈtu i te atua, e here e e mǎtaˈu tatou ia ˈna
[Hohoˈa i te api 6]
Mea oaoa o Iesu i roto i te mǎtaˈu ia Iehova