A faaruru i te mau haafifiraa i ta outou haereraa i mua!

A FERURI na e ua taui outou i te tere o to outou pereoo, e te haruru ra te matini, tera râ, eita te pereoo e tere. Ua ino anei te matini? Aita, e ofai rahi to mua i te hoê o te mau huira. E navai noa ïa ia tatara i te ofai e tere atu ai te pereoo.

Oia atoa, te farerei ra te tahi pae e haapii ra i te Bibilia e te mau Ite no Iehova i te mau haafifiraa o te nehenehe e tapea ia ratou eiaha e haere i mua. Ei hiˈoraa, ua faaara Iesu e e nehenehe e “hoene te parau” e e taupupu te haereraa i mua i te mau mea mai “te titau rahi i to teie nei ao ra, e te [mana] haavare o te taoˈa [rahi].”—Mataio 13:22; MN.

No te tahi atu, na te mau peu aore ra te mau paruparu i aˈa maitai e haafifi ra i ta ratou haereraa i mua. Ua au te hoê taata Tapone o Yutaka te iˈoa i te poroi o te Bibilia, o te pere râ to ˈna fifi rahi. E pinepine, ua tamata oia i te tinai i teie peu ino mau, aita râ oia i manuïa. Ua pau ta ˈna moni e rave rahi i ta ˈna peu, ua ere oia e toru fare, e te faatura o to ˈna utuafare, e to ˈna iho tura. E nehenehe anei ta ˈna e tatara i teie ofai turori e riro atu ai ei Kerisetiano?

Aore ra a hiˈo na i te hoê vahine o Keiko te iˈoa. Maoti te tauturu a te Bibilia, ua haapae oia i te mau peu iino mai te haamori idolo, te morare ore, e te peu tahutahu na roto i te pere. Te faˈi ra râ Keiko e: “To ˈu fifi rahi roa ˈˈe, o te avaava ïa. Ehia taime to ˈu faaoreraa i te avaava, aita râ i manuïa.”

 E fifi atoa paha to outou e au ra eita e matara o te faataupupu ia outou ia haere i mua. Noa ˈtu eaha te fifi, ia papu ia outou e e nehenehe te reira e matara maoti te tauturu a te Atua.

A haamanaˈo na i te aˈoraa a Iesu na ta ˈna mau pǐpǐ i muri aˈe i te oreraa i noaa ia ratou i te tiavaru i te hoê demoni i rapae i te hoê taata hopii. I muri aˈe i to Iesu raveraa i tei ore i maraa ia ratou, ua parau oia i ta ˈna mau pǐpǐ e: “Ahiri e faaroo to outou, e mai te hoê huero sinapi noa iho te rahi, e tia ïa ia outou ia parau noa ˈtu i teie nei mouˈa, A haere i ǒ atu, e na ˈna ïa e haere noa; e aita roa e mea e ore te tia ia outou.” (Mataio 17:14-20; Mareko 9:17-29) Oia, e au paha te hoê fifi i te hoê mouˈa i te rahi no tatou, area no to tatou Atua Poiete mana hope, mea haihai roa ïa.—Genese 18:14; Mareko 10:27.

Te taaraa eaha te mau haafifiraa i ta tatou haereraa i mua

Hou outou e nehenehe ai e faaruru i to outou mau fifi, mea titauhia ia ite outou eaha tera mau fifi. Nafea ïa? I te tahi taime, e huti te hoê melo o te amuiraa, mai te hoê matahiapo aore ra te taata e faatere ra i ta outou haapiiraa, i to outou ara-maite-raa i nia i te hoê mea. Eiaha e inoino i taua aˈoraa î i te here ra, e tia râ ia ‘faaroo outou ma te haehaa i te aˈo ia paari.’ (Maseli 8:33) I te tahi atu taime, e ite outou i to outou mau paruparu na roto i ta outou haapiiraa bibilia. Oia, ‘mea ora te parau a te Atua, e te puai rahi.’ (Hebera 4:12) E nehenehe te taioraa i te Bibilia e te mau papai niuhia i nia i te Bibilia e faaite mai eaha to outou mau manaˈo, mau huru o te aau, e mau hinaaro hohonu roa ˈˈe. E tauturu te reira ia outou ia faito ia outou ia au i te mau ture teitei a Iehova. E faaite e e faataa mai te reira i te mau mea e faataupupu ra i ta outou haereraa i mua i te pae varua.—Iakobo 1:23-25.

Ei hiˈoraa, a feruri na e e peu matau na te hoê taata haapii bibilia e manaˈonaˈo i te mau mea morare ore. Eita paha oia e ite i te ino o te reira, e manaˈo oia e e ere i te ohipa ino ta ˈna e rave ra. I roto i ta ˈna haapiiraa, e ite oia i te mau parau o te Iakobo 1:14, 15: “Ua haavarehia râ te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara; e ia rave-faahope-hia te hara ra, fanau maira ta ˈna, o te pohe.” I teie nei, ua ite oia e mea ino roa te rave-noa-raa i teie peu no ta ˈna haereraa i mua! Nafea oia e nehenehe ai e tinai i teie haafifiraa?—Mareko 7:21-23.

Te faarururaa i te mau haafifiraa

E nehenehe te hoê taata haapii, maoti te tauturu a te hoê Kerisetiano paari, e rave i te tahi mau maimiraa hau i roto i te Parau a te Atua, ma te faaohipa i te Index des publications de la Société Watch Tower. * E faahaere te upoo parau ra “Pensée” i te hoê taata taio i te tahi mau tumu parau i neneihia no nia i te ravea e tinai ai i te mau manaˈo iino. E haamahitihiti teie mau tumu parau i te mau irava bibilia faufaa, mai te Philipi 4:8, e na ô ra e: “Te mau mea haavare ore ra, te mau mea au maitai ra, te mau mea tia ra, te mau mea viivii ore ra, te mau mea popouhia ra, te mau mea roo maitatai ra; te vai na te tahi maitai e te tahi mea haamaitai ra, e haamanaˈo i taua mau mea ra.” Oia, mea titauhia ia monohia te mau manaˈo faufau e te mau manaˈo viivii ore o te patu!

I roto i ta ˈna maimiraa, eita e ore e e ite te taata haapii i te tahi atu mau faaueraa tumu bibilia o te tauturu ia ˈna ia ape i te faarahi i to ˈna fifi. Ei hiˈoraa, te faaara ra te Maseli 6:27 e te Mataio 5:28 no nia i te faaîraa i to ˈna feruriraa i te mau mea o te faaara i te hinaaro e taati. “E faafariu ê i tau mata ia ore ia hiˈo i te mea faufaa ore,” ta te papai salamo ïa i pure. (Salamo 119:37) Parau mau, eita e navai ia taio noa i teie mau irava bibilia. “Te imi ra te aau o te feia parau-tia ra i te parau,” ta te taata paari ïa e parau ra. (Maseli 15:28) Na roto i te feruriruriraa eiaha noa eaha ta te Atua e faaue ra, no te aha atoa râ oia e faaue ai, e nehenehe ïa te taata haapii e maramarama ˈtu â e e mau eˈa paari e te au noa to Iehova.

I te pae hopea, e tia ia hinaaro te taata o te tutava ra i te faaruru i te haafifiraa i ta ˈna  haereraa i mua, e imi i te tauturu a Iehova. O te Atua hoi tei ite maitai i to tatou hamaniraa, e mea tia ore tatou e e repo tatou. (Salamo 103:14) Inaha, e horoa mai te mau pure tuutuu ore i te Atua no te ani i te tauturu, e te mau tutavaraa puai no te ape i te manaˈonaˈo i te mau mea morare ore, i te hoê faahopearaa maitai roa—te hoê manaˈo haava mâmâ e te mâ.—Hebera 9:14.

Eiaha e tuu

Noa ˈtu eaha te fifi ta outou e faaruru ra, ia taa ia outou e e nehenehe outou e topa faahou i te tahi taime. Ia tupu te reira, e hepohepo e e peapea iho â tatou. Tera râ, a haamanaˈo i te mau parau o te Galatia 6:9: “Eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.” Ua topa faahou te tahi mau tavini itoito a te Atua mai ia Davida e ia Petero i te tahi taime. Aita râ ratou i tuu. Ua farii ratou ma te haehaa i te aˈoraa, ua rave i te mau tauiraa i hinaarohia, e ua faaite ratou e e mau tavini faahiahia ratou na te Atua. (Maseli 24:16) Noa ˈtu te mau hape a Davida, ua parau Iehova e “e taata e au [oia] i tau aau, e na ˈna e faatupu i tau mau hinaaro atoa.” (Ohipa 13:22) Ua tapoˈi atoa Petero i ta ˈna mau hape e ua riro mai ei pou i roto i te amuiraa Kerisetiano.

Mea rahi i teie mahana o te manuïa atoa ra i te faaruru i te mau haafifiraa. Ua farii o Yutaka, tei faahitihia i te omuaraa, i te hoê haapiiraa bibilia. Te faatia ra oia e: “Ua tauturu mai te turu a Iehova e ta ˈna haamaitairaa i nia i te mau haereraa i mua atoa ta ˈu i rave, ia matara to ˈu fifi o te pere. Te oaoa rahi ra vau i to ˈu iteraa e mea mau ta Iesu mau parau—oia hoi, maoti te faaroo, e nehenehe te ‘mouˈa’ e hopoi-ê-hia.” I muri aˈe, ua riro mai o Yutaka ei tavini tauturu i roto i te amuiraa.

E o Keiko ïa, tei matau i te puhipuhi i te avaava? Ua faaitoito te tuahine e haapii ra e o ˈna ia ˈna ia taio i te mau tumu parau rau o te A ara mai na! no nia i te peu matau o te avaava. Ua pia atoa o Keiko i te mau parau o te Korinetia 2, 7:1 i roto i to ˈna pereoo ei haamanaˈoraa i te mau mahana atoa ia vai mâ noa i te aro o Iehova. Tera râ, eita ta ˈna e nehenehe e tuu. “Mea ahoaho roa vau,” ta Keiko ïa e haamanaˈo ra. “No reira, ua haamata vau i te ui ia ˈu iho eaha ta ˈu e hinaaro mau ra—e hinaaro anei au e tavini ia Iehova aore ra ia Satani?” I to ˈna faaotiraa e o Iehova ta ˈna i hinaaro e tavini, ua pure oia ma te uˈanana no te ani i te tauturu. “Ua maere au,” ta ˈna ïa e haamanaˈo ra, “ua noaa ia ˈu i te faaore i te avaava ma te mauiui ore rahi. Ta ˈu noa e tatarahapa ra, aita vau i na reira oioi.”

E nehenehe atoa outou e manuïa i te faaruru i te mau haafifiraa i ta outou haereraa i mua. E rahi noa ˈtu â outou i te faaau i to outou mau manaˈo, mau hinaaro, mau parau, e mau ohipa i nia i te mau faito o te Bibilia, e rahi noa ˈtu â i te noaa ia outou te manaˈo faatura ia outou iho e te tiaturi. E tamǎrûhia e e faaitoitohia to outou mau taeae e mau tuahine pae varua, tae noa ˈtu te mau melo utuafare, ia apiti atu outou ia ratou. Te mea faufaa roa ˈtu â, e haapaari atu â outou i to outou taairaa e te Atua ra o Iehova. Ua fafau oia e e ‘hopoi ê oia i te tiaiaraa i te eˈa o to ˈna ra mau taata’ a ape ai ratou i te mana o Satani. (Isaia 57:14) E nehenehe e papu ia outou e mai te peu e e tutava outou i te haamatara i te mau haafifiraa i ta outou haereraa i mua i te pae varua, e haamaitai rahi mai Iehova ia outou.

[Nota i raro i te api]

[Hohoˈa i te api 28]

Ua fafau Iesu e maoti te faaroo e matara ˈi te mau haafifiraa e au i te mouˈa

[Hohoˈa i te api 30]

E haapuai te taioraa i te Bibilia i ta tatou tutavaraa i te faaruru i te mau paruparu pae varua