A vaiiho e ia maitaihia outou i te mau ohipa matau

I ORA na te taata i te hoê tuhaa oire no Ateno 12 matahiti i te maoro. I te mau mahana atoa, i rave na oia i te hoê â purumu no te hoˈi i te fare mai ta ˈna ohipa mai. I muri aˈe, ua haere oia e faaea i te tahi atu tuhaa i ǒ mai i te oire. I te hoê mahana i muri aˈe i te ohipa, te hoˈi ra oia i te fare. I to ˈna noa iteraa e to roto oia i to ˈna tuhaa oire tahito te taaraa ia ˈna e ua hape to ˈna purumu. No te mea ua matau roa oia, ua tere atu oia i to ˈna fare tahito ra!

No reira te ohipa matau e parauhia ˈi i te tahi taime te raveraa i te tahi mea ma te ore e feruri, e mana puai to te reira i nia i to tatou oraraa. I roto i teie auraa e nehenehe ai e faaau i te mau peu i te auahi. E nehenehe te auahi e riro ei maramarama hinaarohia i roto i te poiri, e nehenehe e tamahanahana i to tatou tino e e haaveavea i ta tatou maa. E nehenehe atoa râ te auahi e riro ei enemi rahi roa o te faaore i te ora e te taoˈa. Hoê â huru no te mau peu. Ia faahotuhia ma te tano, e hopoi mai te reira i te mau maitai rahi. E nehenehe atoa râ te reira e vavahi.

 No te taata i faahitihia i te omuaraa, ua pau rii noa to ˈna taime i roto i te honohonoraa pereoo i roto i te oire no ta ˈna peu matau. No nia i te mau mea faufaa ˈtu â, e nehenehe te mau peu e horoa mai i te manuïaraa aore ra e aratai ia tatou i te ati. A rave na i te tahi mau hiˈoraa mau e vai ra i roto i te Bibilia, o te faaite mai nafea te mau peu e nehenehe ai e tauturu aore ra e faataupupu i ta tatou taviniraa i te Atua e to tatou taairaa e o ˈna.

Mau hiˈoraa bibilia o te mau peu maitatai e te mea ino

Ua haamaitai-anaˈe-hia o Noa, Ioba, e Daniela i te hoê taairaa piri e te Atua. Te arue ra te Bibilia ia ratou no “ta ratou ra parau-tia.” (Ezekiela 14:14) E nehenehe e tapaohia e ua faaite te oraraa o na taata e toru atoa ra e ua faatupu ratou i te mau peu maitatai.

Ua faauehia Noa e hamani i te hoê araka, te hoê pahi roa ˈˈe i te hoê tahua tueraa popo e te teitei roa ˈˈe i te hoê fare e pae tahua. Eita e ore e mea teimaha teie opuaraa i te rahi no te hoê taata hamani pahi i mutaa ihora. Aita hoê aˈe tauihaa no teie tau i to Noa e to ˈna na melo utuafare e hitu hamaniraa i te araka. Hau atu â, ua tamau Noa i te poro i te feia o to ˈna ra tau. E nehenehe tatou e tiaturi e ua haapao atoa oia i te mau hinaaro pae tino e pae varua o to ˈna utuafare. (Petero 2, 2:5) No te rave i teie mau mea atoa, mea titauhia ia matau maitai Noa i te rave i te ohipa. Hau atu â, ua papaihia i roto i te Bibilia e “ua au to Noa haerea i te Atua. . . . Ua na reira hoi Noa mai ta Iehova atoa i faaue mai ia ˈna ra.” (Genese 6:9, 22; 7:5) Noa ˈtu e te parau ra te Bibilia e mea “piˈo ore” oia, mea titauhia ia au noa to ˈna haerea i te Atua i muri aˈe atoa i te diluvi e tae noa ˈtu i muri aˈe i te orureraa hau ia Iehova tei tupu i Babela. Oia mau, ua au noa to Noa haereraa i te Atua e tae roa ˈtu i to ˈna poheraa i te 950raa o to ˈna matahiti.—Genese 9:29.

Ua tauturu te mau peu maitatai a Ioba i te faariro ia ˈna ei taata “parau-tia e te paieti.” (Ioba 1:1, 8; 2:3) Ua matau oia i te haa ei tahuˈa o te fetii i roto i te pûpûraa i te tusia no ta ˈna mau tamarii ia oti ta ratou amuraa maa taitahi, peneiaˈe ‘ua hara ratou e ua faaino to ratou aau i te Atua. Ua na reira Ioba i te mau mahana atoa.’ (Ioba 1:5) Aita e feaaraa e i roto i to Ioba fetii, o te mau peu niuhia i nia i te haamoriraa ia Iehova te mea faufaa.

Ua tavini “tamau” Daniela ia Iehova i te roaraa o to ˈna oraraa roa. (Daniela 6:16, 20) Eaha te mau peu pae varua maitatai a Daniela? A tahi, ua pure tamau oia ia Iehova. Noa ˈtu te faaueraa mana a te arii e opani ra i teie ohipa, ‘ua tuu Daniela i tana turi i raro e a toru tuuraa i te mahana hoê, e ua pure e ua haamaitai i tana Atua, mai ta ˈna hoi i na reira noa na.’ (Daniela 6:10) Eita ta ˈna e nehenehe e haapae i ta ˈna peu e pure i te Atua, i te taime atoa e mea atâta te reira. Aita e feaaraa, ua haapaari teie peu ia Daniela i roto i te hoê oraraa o te hapa ore faahiahia roa i te Atua. Eita e ore e e peu maitai atoa na Daniela te haapiiraa e te feruriruri-hohonu-raa i te mau parau fafau faahiahia a te Atua. (Ieremia 25:11, 12; Daniela 9:2) Papu maitai, ua tauturu teie mau peu maitatai ia ˈna ia faaoromai e tae noa ˈtu i te hopea, a horo noa ˈi oia ma te haapao maitai i te hororaa no te ora e tae noa ˈtu i te hopea.

Area o Dina ra, ua û ïa i te hoê ati no te hoê peu ino. Ua ‘[matau] oia i te haere e hiˈo i te mau vahine o te fenua,’ aita hoi e haamori ra ia Iehova. (Genese 34:1; MN) Ua aratai atu teie peu e au ra e mea ino ore i te ati ra. Na mua, ua maferahia oia e Sekema, te hoê taata apî ‘i hau noa i te tura i te fetii o tana metua ra.’ I muri iho, no to raua hinaaro e tahoo, ua taparahi pohe e piti o to ˈna mau tuaana i te mau tane atoa i roto i te oire taatoa. Auê ïa faahopearaa peapea e!—Genese 34:19, 25-29.

Nafea e papu ai ia tatou e e maitaihia tatou, eita râ e inohia, i ta tatou mau peu?

 Te faaohiparaa i te mau peu

“Ua faataa-ê-na-hia te mau peu,” ta te hoê ïa philosopho i papai. E ere râ mai te reira. Te faaite maitai maira te Bibilia e e nehenehe ta tatou e maiti e taui i ta tatou mau peu iino e e faahotu i te mau peu maitatai.

Maoti te mau peu maitatai, e riro mai te huru oraraa o te Kerisetiano ei oraraa papu atu â e te ohie atu â i te atuatu. Te na ô ra o Alex, te hoê Kerisetiano no Heleni, e: “Maoti to ˈu haamatauraa i te pee i te hoê porotarama e faaherehere ai au i te hoê taime faufaa.” Te parau ra o Theophilus, te hoê matahiapo Kerisetiano, e na te haamatauraa i te haamau i te porotarama e tauturu ra ia ˈna ia riro ei mea aravihi. Te na ô ra oia e: “Ua papu roa ia ˈu e eita e noaa ia ˈu i te amo i ta ˈu mau hopoia Kerisetiano ma te manuïa mai te peu e aita vau i matau i te haamau i te hoê porotarama maitai.”

Te faaitoitohia ra tatou, ei Kerisetiano, ia “naho to tatou haerea i roto i te hoê â aveia.” (Philipi 3:16, MN) Te hoê aveia, o te hoê ïa ‘tereraa ohipa matauhia.’ E faufaahia tatou i te mau peu maitatai no te mea eita to tatou taime e pau i te feruriraa i te taahiraa avae taitahi—ua haamau ê na tatou i te hoê hohoˈa maitai ta tatou e pee no te mea ua matau tatou. E nehenehe te tahi mau peu matau-roa-hia e ravehia ma te ore e feruri. E nehenehe te mau peu maitatai e tauturu ia tatou ia rave oioi i te mau faaotiraa tano a tamau noa ˈi tatou i to tatou oraraa Kerisetiano, mai te mau peu maitatai o te faahororaa i te pereoo o te nehenehe e aratai i te hoê taata faahoro ia rave oioi i te mau faaotiraa faaora ia û oia i te ati i nia i te purumu.

Teie ta te taata papai Beretane o Jeremy Taylor e parau ra: “Te mau peu, e hotu ïa o te mau haaraa.” Mai te peu e mea maitai ta tatou mau peu, e nehenehe ïa ta tatou e rave i te mau mea maitatai aita e fifi rahi. Ei hiˈoraa, mai te peu e ua matau tatou, te mau tavini Kerisetiano, i te rave tamau i te ohipa pororaa, mea ohie aˈe e mea oaoa aˈe ia haere i roto i te taviniraa. No nia i te mau aposetolo, te taio nei tatou e “aore e mahana tuua ia ratou i te aˈo, e te haapii atu i te taata, e o Iesu â te Mesia, i roto i te hiero, e i tera fare, i tera fare.” (Ohipa 5:42; 17:2) I te tahi aˈe pae, mai te peu e e haere tatou i roto i te taviniraa i te tahi noa mau taime, e nehenehe tatou e haapeapea, e hinaaro atu â ˈi i te taime ia ore tatou e tâia faahou i roto i teie ohipa Kerisetiano faufaa roa.

Hoê â huru no te tahi atu â mau tuhaa o ta tatou ohipa Kerisetiano matauhia. E nehenehe te mau peu maitatai e tauturu ia tatou ia tamau i te ‘[taio] i te Parau a te Atua i te rui e te ao.’ (Iosua 1:8; MN; Salamo 1:2) Ua matau te hoê Kerisetiano i te taio i te Bibilia mai te 20 e tae atu i te 30 minuti i te maoro hou e taoto ai. Noa ˈtu e ua rohirohi roa oia, ua ite oia e ia haere oia e taoto ma te ore e taio i te Bibilia, eita ta ˈna e nehenehe e taoto maitai. E tia ia ˈna ia tia i nia e ia haamâha i taua hinaaro pae varua ra. Ua tauturu atoa teie peu maitai ia ˈna ia taio i te Bibilia taatoa i te matahiti hoê tau matahiti i te maoro.

Ua matau Iesu Mesia, ei Hiˈoraa no tatou, i te haere i te mau putuputuraa i reira e tauaparauhia ˈi te Bibilia. “Ua tomo maira oia i roto i te sunago i te sabati, o ta ˈna â ïa peu, e ua tia aˈera i nia e taio i te parau.” (Luka 4:16) No Joe, te hoê matahiapo e utuafare rahi to ˈna e o te rave i te ohipa e rave rahi hora i te maoro, ua tauturu te peu ia ˈna ia faahotu i te hinaaro e haere tamau i te mau putuputuraa. Te parau ra oia e: “Te haere noa ra vau i mua maoti teie peu, te horoa maira te reira i te puai pae varua e hinaaro-rahi-hia ia nehenehe  au e faaruru i te mau ohipa fifi e te mau haafifiraa ma te manuïa.”—Hebera 10:24, 25.

Mea faufaa roa taua mau peu ra i roto i te hororaa Kerisetiano no te ora. Teie ta te hoê parau faataa no te hoê fenua i reira i hamani-ino-hia ˈi te nunaa o Iehova, i tapao: “No te feia e mau peu pae varua maitatai ta ratou e o te mauruuru mau ra i te parau mau, e ere ïa i te mea fifi ia mau papu ia tupu te mau tamataraa, area te feia i ‘te hora au’ e mairi ra i te mau putuputuraa, aita e poro tamau ra e e haapiˈo ra i te mau mea iti, e pinepine, e topa ratou ia tupu mai te hoê tamataraa ‘rahi.’”—Timoteo 2, 4:2.

A haapae i te mau peu iino, a faaohipa i te mau peu maitatai

Ua parauhia e ‘e tia ia faahotu te hoê taata i tera noa mau peu ta ˈna e hinaaro ia riro mai ei fatu no ˈna.’ Oia mau, e fatu haavî te mau peu iino. Teie râ, e nehenehe te reira e faaorehia.

No te hoê taime, mea mataitai roa o Stella i te afata teata. Te faˈi ra oia e: “Te vai ra iho â te hoê tumu ‘ino ore’ i topa ˈi au i roto i te mau peu iino atoa.” Mai tera ïa no ta ˈna peu o te mataitai-hua-raa i te afata teata. Ua parau oia ia ˈna iho e e mataitai oia i te afata teata no “te tamǎrû rii” noa ia ˈna aore ra no “te taui i te manaˈo.” Aita râ i noaa ia ˈna i te haavî i ta ˈna peu, ua faaea oia i mua i te afata teata ehia hora i te maoro. “I te pae hopea, ua faataupupu teie peu ino i to ˈu haereraa i mua i te pae varua,” ta ˈna ïa e parau ra. Inaha, ua tutava oia i te faaiti mai i te taime i mua i te afata teata e i te maiti maitai atu â. “E tamata noa vau i te haamanaˈo no te aha vau i hinaaro ai e faaore i teie peu,” ta Stella ïa e parau ra, “e e turui au i nia ia Iehova no te tapea i ta ˈu faaotiraa papu.”

Te faaite ra te hoê Kerisetiano o Charalambos te iˈoa e o te faataimeraa te peu ino o tei faataupupu ia ˈna ia haere i mua i te pae varua. “I te taaraa ia ˈu e mea ino ia faataime i te mau mea, ua haamata vau i te taui i to ˈu oraraa. Ia haamau vau i te mau fa, e faataa maitai au afea e nafea vau e haamata ˈi i te faatupu i te reira. O te faaohipa-tamau-raa i ta ˈu mau faaotiraa e mau opuaraa te ravea, e ua riro noa te reira ei peu maitai e tae roa mai i teie nei.” Oia mau, o te mau peu maitatai te ravea maitai roa ˈˈe no te mono i te mau peu iino.

E nehenehe atoa to tatou mau hoa e turai ia tatou ia faatupu i te mau peu, maitatai aore ra iino. Mea pee te mau peu maitatai, mai te mau peu iino atoa. Mai ‘te mau peu faufaa e ino i te mau amuimuiraa iino,’ e nehenehe te mau hoa maitatai e horoa mai i te mau hiˈoraa o te mau peu maitatai e pee. (Korinetia 1, 15:33, MN) Te mea faufaa roa ˈtu â, e nehenehe te mau peu e haapaari aore ra e haaparuparu i to tatou taairaa e te Atua. Te parau ra Stella e: “Mai te peu e e mau peu maitatai ta tatou, e faaohie atu â te reira i ta tatou tutavaraa i te tavini ia Iehova. Mai te peu e mea ino, e faataupupu ïa te reira i ta tatou mau tutavaraa.”

A haamau i te mau peu maitatai, e a vaiiho e ia aratai te reira ia outou. E riro te reira ei mana puai e te maitai i roto i to outou oraraa.

[Hohoˈa i te api 19]

Mai te auahi, e nehenehe te mau peu e haamaitai aore ra e vavahi

[Hohoˈa i te api 21]

Ua matau Iesu i te haere i roto i te sunago i te Sabati no te taio i te Parau a te Atua

[Hohoˈa i te api 22]

E haapaari te mau peu pae varua maitatai i to tatou taairaa e te Atua