E maoro aˈe i te vairaa i te auro mâ

E TAOˈA imi-rahi-hia te auro no to ˈna haviti e to ˈna vai maoro. E hinaaro-rahi-hia oia no te mea e vai anaana noa oia e e au ra e eita roa ˈtu e marau. No te mea ïa e eita te auro e ino i te pape, te mataˈi ora, te souffre, e fatata i te mau mea atoa. Mea rahi te mau tauihaa hamanihia i te auro i itehia mai i roto i te mau pahi tei tomo e i te tahi atu mau vahi, te anaana noa râ tau hanere matahiti i muri aˈe.

Ma te faahiahia râ, te na ô ra te Bibilia e te vai ra te hoê mea e maoro aˈe i te vairaa e “tei rahi roa te maitai i to te auro moe noa nei, tamata noâ i te auahi.” (Petero 1, 1:7) Ia ‘tamatahia’ te auro, aore ra ia tamâhia, i te auahi e te tahi atu mau ravea, e nehenehe e naea e 99,9 % mâraa. Teie râ, e moe noa atoa te auro tamâhia, aore ra e tahe, ia tuuhia te eau régale (pape arii), te hoê anoiraa e toru tuhaa acide chlorhydrique e hoê tuhaa acide nitrique i nia iho. Ua tano ïa te Bibilia i te pae o te ihi ia parau oia e e ‘moe noa te auro.’

Area râ, ‘e ora te [nephe]’ i te faaroo Kerisetiano mau. (Hebera 10:39; MN) E nehenehe ta te taata e haapohe i te hoê e faaroo puai to ˈna, mai ta ratou i rave i nia ia Iesu Mesia. Ua fafauhia mai râ i te feia e faaroo mau to ratou e: “Mau papu râ oe e tae noa ˈtu i te pohe, e na ˈu e horoa ˈtu i te korona ora no oe.” (Apokalupo 2:10) E vai noa te feia i pohe ma te taiva ore i roto i te manaˈo o te Atua, e e faatia mai â oia ia ratou. (Ioane 5:28, 29) Eita te reira e noaa i te tahi faito auro. I roto i teie tuhaa, mea faufaa mau atu â te faaroo i te auro. Ia faufaa roa râ te faaroo, e tia ia tamatahia. Oia mau, o ‘te faaroo tamatahia’ ta Petero e parau ra e e maitai rahi i to te auro. E oaoa te mau Ite no Iehova i te tauturu ia outou ia haapii i te Bibilia ia faatupu e ia tapea outou i te hoê faaroo puai i te Atua mau ra o Iehova, e i ta ˈna Tamaiti o Iesu Mesia. Ia au ia Iesu, o “te ora mure ore” ïa te reira.—Ioane 17:3.