Eaha te niu o te mea ta outou e tiaturi ra?

Ua faataahia te parau ra e tiaturi mai teie “e farii e mea mau te hoê mea.” E paruru te Déclaration universelle des droits de l’homme a te mau Nunaa Amui i to te taata atoa “tiaraa o te tiamâraa o te manaˈo, te manaˈo haava e te haapaoraa.” To roto atoa te tiamâraa “e taui i ta ˈna haapaoraa aore ra tiaturiraa” ia hinaaro oia, i teie tiaraa.

NO TE aha râ te taata e hinaaro ai e taui i ta ˈna haapaoraa aore ra tiaturiraa? “E tiaturiraa iho â ta ˈu, e te oaoa ra vau i te reira,” tera te parau-rahi-hia mai. Mea rahi o te manaˈo ra e eita te mau tiaturiraa hape e faaino i te taata. Eita te hoê taata o te tiaturi e mea parahurahu te fenua, ei hiˈoraa, e faaino ia ˈna aore ra ia vetahi ê. “E tia noa ia farii tatou e e ere hoê â manaˈo to tatou,” ta vetahi pae ïa e parau. E parau paari noa anei teie? E tapea noa anei te hoê taote i to ˈna manaˈo mai te peu e e tamau te hoê o to ˈna mau hoa ohipa i te tiaturi e e nehenehe ta ˈna e tapea i te mau tino pohe i roto i te hoê fare vairaa taata pohe, e hiˈopoa ˈtu ai i te feia maˈi i roto i te hoê fare maˈi?

No nia i te haapaoraa, ua faatupu te mau tiaturiraa hape i te ino rahi i roto i te tuatapaparaa. A feruri na i te mau ohipa riaria i tupu i to te mau aratai haapaoraa “turairaa i te mau Zélotes Kerisetiano ia rave i te haavîraa uˈana aroha ore” i roto i te mea e parauhia te mau Tamaˈi faaroo Moˈa o te Anotau no Ropu. Aore ra a feruri na i te feia totova “Kerisetiano” no teie tau i roto i te hoê tamaˈi tivira i tupu aita i maoro aˈenei, “e au noa ratou i te mau taata tamaˈi o te Anotau no Ropu, ua papaihia te iˈoa o te mau peata i nia i te tapearaa o ta ratou ˈoˈe, ua tamauhia te mau hohoˈa o te Paretenia i nia i te poro o ta ratou pupuhi.” Ua tiaturi teie mau Zélotes atoa e ua tano ratou. Papu maitai râ, i roto i teie e te tahi atu â mau tamaˈi e mau aroraa faaroo, te vai ra te hoê hape rahi.

No te aha e rahi ai te huananeraa e te tamaˈi? Te pahono ra te Bibilia e te “haavare” ra te Diabolo ra o Satani “i to te ao atoa nei.” (Apokalupo 12:9; Korinetia 2, 4:4; 11:3) Tera noa râ, ua  faaara te aposetolo Paulo e mea rahi te feia faaroo o te “faataahia no te pohe” no te mea e vare ratou ia Satani, o te “rave i te mau semeio e te mau ohipa maere no te haavare.” Ua parau Paulo e e “tapoˈi” taua mau taata ra “i to ratou feruriraa ia ore ratou e hinaaro i te parau mau o te nehenehe hoi e faaora ia ratou” e ‘turaihia ˈtu ai ia tiaturi i te haavare.’ (Tesalonia 2, 2:9-12, The New Testament, a William Barclay) Nafea outou e nehenehe ai e faaiti mai i te ravea e tiaturi ai i te hoê haavare? Inaha, no te aha outou e tiaturi atu ai?

Arataihia no te tiaturi atu?

Peneiaˈe ua arataihia outou i roto i te mau tiaturiraa a to outou fetii. E nehenehe e parauhia e mea maitai te reira. E hinaaro te Atua ia haapii te mau metua i ta ratou mau tamarii. (Deuteronomi 6:4-9; 11:18-21) Ei hiˈoraa, ua maitai-rahi-hia te taurearea ra o Timoteo i te faarooraa i to ˈna mama e to ˈna mama ruau. (Timoteo 2, 1:5; 3:14, 15) Te faaitoito ra te mau Papai i te faatura i ta te mau metua e tiaturi ra. (Maseli 1:8; Ephesia 6:1) Teie râ, ua hinaaro anei to outou Atua Poiete ia tiaturi outou i te mau mea no te mea noa te tiaturi ra to outou mau metua i te reira? Oia mau, e nehenehe te peeraa ma te ore e feruri i te mau mea ta te mau ui na mua ˈtu i tiaturi e i rave e riro ei mea atâta.—Salamo 78:8; Amosa 2:4.

Ua arataihia te hoê vahine Samaria o tei farerei ia Iesu Mesia, ia tiaturi i ta ˈna haapaoraa Samaria. (Ioane 4:20) Ua faatura Iesu i to ˈna tiamâraa e maiti i te mea ta ˈna i hinaaro e tiaturi, ua faaite atoa râ oia ia ˈna e: “Aore outou i ite i ta outou e haamori nei.” Oia mau, mea hape e rave rahi o ta ˈna mau tiaturiraa faaroo, e ua parau Iesu ia ˈna e e tia ia ˈna ia taui i ta ˈna mau tiaturiraa ia farii mai te Atua i ta ˈna haamoriraa—“ma te varua e te parau mau.” E tia ïa ia ˈna e ia vetahi ê mai ia ˈna ia riro i muri aˈe ei feia “faaroo i te parau” tei faaitehia na roto ia Iesu Mesia, eiaha râ e tapea maite i te mau tiaturiraa mea poiherehia.—Ioane 4:21-24, 39-41; Ohipa 6:7.

Haapiihia no te tiaturi atu?

Mea rahi te mau orometua haapii e te feia aravihi i roto i te mau tuhaa taa ê o te ite, o te au ia faatura-rahi-hia. I roto râ i te tuatapaparaa, mea rahi te mau hiˈoraa o te mau orometua haapii tuiroo o tei hape roa. Te vai ra te hiˈoraa o na buka aivanaa e piti tei papaihia e te philosopho Heleni ra o Aristote, ua parau te taata tuatapapa ra o Bertrand Russell e “eita e nehenehe e farii i te hoê noa ˈˈe pereota i roto i nau buka ia hiˈohia te ihi no teie tau.” E pinepine, e huti mai te feia aravihi atoa no teie tau i te mau manaˈo hape roa. “Eita roa ˈtu e tia ia hamani i te mau matini teiaha aˈe i te aore o te tere na te reva,” ta te aivanaa Beretane o Lord Kelvin ïa i parau i te matahiti 1895. No reira, eita iho â te hoê taata paari e tiaturi matapo noa e mea mau te hoê parau no te mea noa tera ta te tahi mau orometua haapii aravihi e parau ra.—Salamo 146:3.

Mea hinaarohia ia haapao maitai atoa tatou i te haapiiraa faaroo. Ua haapii-maitai-hia te aposetolo Paulo e ta ˈna mau orometua haapii faaroo e ‘e itoito rahi roa to ˈna i te mau tutuu a to ˈna hui tupuna.’ Teie râ, ua haafifi mau â to ˈna itoito i te mau tiaturiraa tumu a to ˈna hui tupuna ia ˈna. Ua aratai te reira ia ˈna ia ‘hamani ino i te [amuiraa] a te Atua e ia haapau atu.’ (Galatia 1:13, 14; MN; Ioane 16:2, 3) Te mea ino roa ˈtu â, ua “tue” maoro noa Paulo “i te tara,” ma te patoi atu i te mau mana o te aratai hoi ia ˈna ia tiaturi ia Iesu Mesia. Ua tia ia Iesu iho ia ohipa roa mai no te turai ia Paulo ia faatano i ta ˈna mau tiaturiraa.—Ohipa 9:1-6; 26:14.

Turaihia e te mau vea?

Peneiaˈe, ua ohipa rahi te mau vea i nia i ta outou mau tiaturiraa. Te oaoa ra te rahiraa o te taata i te tiamâraa e paraparau i roto i te mau vea, e fanaˈo ïa ratou i te mau parau apî o te nehenehe e riro ei mea faufaa. Tera râ, te vai ra te mau puai o te nehenehe e ohipa i nia i te mau vea e te tupu pinepine ra te reira. E pinepine, e horoahia te mau parau apî e opuaraa to muri mai o te nehenehe e ohipa ma te haavarevare i nia i to outou feruriraa.

 Hau atu â, no te faaanaanatae aore ra no te huti mai i te taata e rave rahi atu â, mea au na te mau vea e faatianiani i te mau mea faahiahia roa e te taa ê. Ua riro te mau mea eita e nehenehe e parauhia aore ra e neneihia no te taata tau matahiti aˈenei, ei mea matauhia i teie mahana. Noa ˈtu e mea tupu riirii noa, te faainohia ra e te faaitihia mai ra te mau faito papu o te haerea. Te hape riirii noa ra to te taata manaˈo. Te haamata ra ratou i te tiaturi e ‘te ino ra, e maitai ïa, e te maitai ra, e ino ïa.’—Isaia 5:20; Korinetia 1, 6:9, 10.

Te itearaa mai te niu papu no te tiaturi

Te paturaa i nia i te mau manaˈo e te mau philosophia a te taata, e au ïa i te paturaa i nia i te one. (Mataio 7:26; Korinetia 1, 1:19, 20) I nia ïa i te aha e nehenehe ai outou ma te feaa ore e niu i ta outou mau tiaturiraa? I te mea e ua horoa te Atua i te maramarama na outou no te hiˈopoa i te ao e haaati ra ia outou e ia ui i te mau uiraa no nia i te mau mea pae varua, eita anei ïa e tano ia horoa atoa mai oia i te ravea e noaa ˈi ia outou te mau pahonoraa tano i ta outou mau uiraa? (Ioane 1, 5:20) Papu maitai, e! Nafea râ outou e ite ai i te parau mau i te pae o te haamoriraa? E parau matou ma te feaa ore e o te Parau a te Atua, te Bibilia, te ravea hoê no te reira.—Ioane 17:17; Timoteo 2, 3:16, 17.

“Eiaha na râ e ru,” ta vetahi pae ïa e parau, “e ere anei na te feia e Bibilia ta ratou i faatupu i te rahiraa o te aroraa e huananeraa i roto i te ao?” E parau mau e ua faatupu te mau aratai haapaoraa, o te parau ra hoi e te pee ra ratou i te Bibilia, e rave rahi manaˈo huanane e te tuati ore. Inaha, aita hoi ratou i niu i ta ratou mau tiaturiraa i nia i te Bibilia. Ua faataa te aposetolo Petero ia ratou ei “peropheta haavare” e ei “orometua haavare” o tei faatupu i te “hairesi pohe.” No ta ratou mau ohipa, ta Petero ïa i parau, ‘e faainohia te eˈa parau mau ra.’ (Petero 2, 2:1, 2) Ua papai râ Petero e “tei ia tatou atoa te parau a te mau peropheta tia rahi roa ˈtura i teie nei; o te mea maitai ïa ia outou ia haapao i te reira, mai te lamepa e anaana i te vahi pouri ra.”—Petero 2, 1:19; Salamo 119:105.

Te faaitoito ra te Bibilia ia tatou ia hiˈopoa i ta tatou mau tiaturiraa ia au i ta te reira e haapii ra. (Ioane 1, 4:1) E mau mirioni feia taio i teie vea o te nehenehe e haapapu e i to ratou na reiraraa, ua itea mai ia ratou te tumu o to ratou oraraa e te aueue-ore-raa. No reira, a pee i te feia maitai mau no Berea. ‘A imi maite i te parau i papaihia ra i te mau mahana atoa’ hou e faaoti ai eaha te tiaturi atu. (Ohipa 17:11) E oaoa te mau Ite no Iehova i te tauturu ia outou. Parau mau, na outou e faaoti eaha ta outou e hinaaro e tiaturi. Teie râ, e haerea paari ia papu ia outou e na te Parau mau i faaitehia mai a te Atua i tarai i ta outou mau tiaturiraa, eiaha râ na te hinaaro e te paari o te taata.—Tesalonia 1, 2:13; 5:21.

[Hohoˈa i te api 6]

E nehenehe outou ma te feaa ore e niu i ta outou mau tiaturiraa i nia i te Bibilia