Te faatia ra te feia poro i te Basileia

Ua horoi te Atua i to ˈna roimata

E HAAMAITAI-rahi-hia te mau taata e ora ia au i te mau ture e te mau faaueraa tumu a Iehova. Noa ˈtu e e ere iho â i te mea ohie ia rave i te mau tauiraa e titauhia, te vai mau ra te tauturu e te faaitoitoraa. (Salamo 84:11) Te faataa ra te hiˈoraa i muri nei no Asia Apatoa Hitia o te râ i te reira.

A haere ai oia no te tau faafaaearaa, ua paraparau te hoê Ite no Farani i te hoê fatu fare toa o Kim * te iˈoa no nia i te opuaraa a Iehova no te fenua. Ua vaiiho atoa mai oia i te buka ra E nehenehe oe e ora e a muri noa ˈtu i roto i te paradaiso i nia i te fenua nei na Kim. A hurihuri ai oia i te mau api o te buka, ua taio oia i te mau parau ra, “na te Atua e horoi i to ratou roimata atoa.” (Apokalupo 21:4) “Ua haaputapû mau teie irava ia ˈu,” ta Kim ïa e haamanaˈo ra. “Ma te ite ia ˈu ia ataata e ia paraparau i te mahana taatoa i te fare toa, o vai te nehenehe e ite e ua hoˈi anaˈe au i te fare ia po, e taoto vau ma te taˈi?” Ma te faaite i te tumu o to ˈna oto, te na ô ra oia e: “Ua faaea vau i te hoê tane 18 matahiti i te maoro e aita vau i oaoa aˈe no te mea aita oia i hinaaro ia faaipoipo mâua. Ua hinaaro vau e faaore i teie huru oraraa, no te mea râ e mea maoro to ˈu faaearaa ia ˈna, aita to ˈu e itoito.”

Tau taime rii i muri aˈe, ua farii Kim i te hoê haapiiraa bibilia e te hoê Ite no Iehova o Linh te iˈoa. “Ua hinaaro vau e faaohipa i te haapiiraa o te Bibilia,” o ta Kim ïa e parau ra. “Ei hiˈoraa, ua faaea vau i te haamori i to ˈu mau tupuna, noa ˈtu e ua faatupu te reira i te patoiraa a to ˈu fetii. Hau atu â, ua tamata vau i te faatiamâ ia mâua, aita râ to ˈu hoa i hinaaro. I roto i teie tau fifi, ua tamau noa te Ite no Farani i te hapono mai i te mau papai bibilia na ˈu, e ua faaitoito mau Linh ia ˈu. Ua tauturu te faaoromai e te turu î te here o teie nau tuahine ia ˈu ia tamau maite e tae noa ˈtu i te taime i ite ai au i te huru mau o to ˈu hoa. Ua itea mai ia ˈu e e 5 aˈena ‘vahine’ e e 25 tamarii ta ˈna! Na te reira i horoa mai i te itoito no te faarue ia ˈna.

“E ere i te mea ohie ia faarue i te hoê fare rahi nahonaho no te hoê fare nainai. Hau atu â, ua faahepo to ˈu hoa tahito ia ˈu ia faaea faahou ia ˈna ra, ma te haamǎtaˈu atoa mai e faaino oia i to ˈu hohoˈa mata i te oˈava ia patoi noa ˈtu vau. Maoti te tauturu a Iehova, ua nehenehe au e rave i te mea tia.” Ua tamau noa o Kim i te haere i mua e i te pae hopea, ua bapetizohia oia i te avaˈe Eperera 1998. Hau atu â, ua haamata e piti o to ˈna mau tuahine e to ˈna tamaiti apî i te haapii i te Bibilia e te mau Ite no Iehova.

“I matau na vau i te manaˈo e aita iho â to to ˈu oraraa e ravea,” ta Kim ïa e parau ra. “I teie râ mahana, te oaoa nei au, e aita vau e taˈi faahou ra i te po. Ua horoi aˈena Iehova i to ˈu roimata.”

[Nota i raro i te api]