Ua ite anei outou “i te faataa ê i te maitai e te ino”?

“Ia itea ia outou te mea au i te Fatu ra.”—EPHESIA 5:10.

1. Nafea te oraraa i teie tau e nehenehe ai e riro ei mea fifi, e no te aha?

 “UA ITE hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” (Ieremia 10:23) E tano roa ˈtu â te mea ta Ieremia i haroaroa maitai ia tatou i teie tau. No te aha? No te mea te ora nei tatou i “te mau tau ati rahi faaruru atâ,” mai ta te Bibilia i tohu. (Timoteo 2, 3:1, MN) I te mau mahana atoa, te farerei nei tatou i te mau huru tupuraa fifi o te titau ia rave tatou i te mau faaotiraa. Mea rahi anei aore ra mea iti, e nehenehe taua mau faaotiraa ra e ohipa roa ino i nia i to tatou ea—pae tino, pae aau, e pae varua.

2. Eaha te mau maitiraa e parauhia paha e mea faufaa ore, eaha râ te manaˈo o te mau Kerisetiano pûpûhia i te reira?

² Mea rahi te mau maitiraa ta tatou e rave i roto i to tatou oraraa i te mau mahana atoa e parauhia e mea matau-noa-hia aore ra mea huru faufaa ore. I te mau mahana atoa, ei hiˈoraa, e tia ia tatou ia maiti eaha te ahu ta tatou e oomo, te maa ta tatou e amu, o vai ta tatou e haere e hiˈo, e te vai ra ˈtu â. E rave tatou i teie mau maitiraa fatata mai te matini ra, ma te ore e feruri rahi. Mea faufaa ore mau anei râ teie mau mea? Ei Kerisetiano pûpûhia, mea haapao roa na tatou e ia faaite noa ta tatou mau maitiraa i te pae ahuraa e huru rapaeau, amuraa e inuraa, e paraparauraa e haerea e e mau tavini tatou na te Teitei Roa ˈˈe, te Atua ra o Iehova. E haamanaˈohia tatou i te mau parau a te aposetolo Paulo: “Te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua.”—Korinetia 1, 10:31; Kolosa 4:6; Timoteo 1, 2:9, 10.

3. Eaha te mau maitiraa e au mau â ia haapaohia ˈtu?

³ I muri iho, te vai ra te mau maitiraa e au roa ˈtu â ia haapaohia ˈtu. Papu maitai e e faahopearaa rahi e te maoro to te faaotiraa e faaipoipo aore ra e faaea taa noa i nia i te oraraa o te hoê taata. E ere iho â i te ohipa nainai te maitiraa i te taata au e faaipoipo atu, o te riro ei hoa no te oraraa taatoa. * (Maseli 18:22) Hau atu â, e tuhaa rahi to ta tatou maitiraa i te mau hoa e te mau apiti, i te pae haapiiraa, ohipa, e i te pae faaanaanataeraa o te ohipa i nia i to tatou huru pae varua—i nia atoa ïa i to tatou maitairaa mure ore.—Roma 13:13, 14; Ephesia 5:3, 4.

4. (a) Eaha te aravihi e au-roa ˈˈe-hia? (b) Eaha te mau uiraa e tia ia hiˈopoahia?

 ⁴ I mua i teie mau maitiraa atoa, e tia mau â ei aravihi to tatou i te faataa ê i te mea maitai i te mea ino aore ra i te au ra e mea maitai i te mea maitai mau. “E hape â te taata i te eˈa, e e mea tia ïa i to ˈna manaˈo, o te hopea râ o taua eˈa ra, o te pohe ïa,” o ta te Bibilia ïa e faaara maira. (Maseli 14:12) No reira, e ui paha tatou e: ‘Nafea tatou e faahotu ai i te aravihi e faataa ê i te mea maitai i te mea ino? Ihea tatou e imi ai i te aratairaa e hinaarohia no te rave i ta tatou mau faaotiraa? Ua nafea te tahi mau taata, i mutaa iho e i teie tau, i te reira paeau, e eaha te faahopearaa i noaa ia ratou?’

“Te parau paari e te haavare faufaa ore” a to te ao

5. I ora na te mau Kerisetiano matamua i roto i teihea huru ao?

⁵ I ora na te mau Kerisetiano o te senekele matamua i roto i te hoê ao î roa i te mau faufaa e te mau manaˈo Heleni e Roma. I te hoê pae, te vai ra te mau mea faatate o te huru oraraa Roma tei hiˈohia na e te feia e rave rahi mai te hoê mea e tia ia nounouhia. I te tahi aˈe pae, te au roa ra te feia maramarama o taua tau ra eiaha noa i te mau manaˈo philosophia o Platon e o Aristote, i to te feia atoa râ no te mau pǔpǔ philosophia apî aˈe, mai te mau Epikuro e te mau Setoiko. I to te aposetolo Paulo haereraa i Ateno i te piti o to ˈna tere mitionare, ua û atu oia i te mau philosopho Epikuro e Setoiko tei manaˈo na e e hau aˈe ratou i “teie nei vaha pâtêtê,” oia o Paulo.—Ohipa 17:18, MN.

6. (a) Eaha te mea ta te tahi mau Kerisetiano matamua i faahemahia ia rave? (b) Eaha te faaararaa a Paulo?

⁶ E ere ïa i te mea fifi ia taa no te aha te vetahi i roto i te mau Kerisetiano matamua i anaanatae atu ai i te mau haerea e te huru oraraa faateitei o te taata e haaati ra ia ratou. (Timoteo 2, 4:10) E au ra e te fanaˈo ra te feia e parahi papu ra i roto i te faanahoraa, i te mau maitai e rave rahi, e e au ra e mea maitai te mau maitiraa ta ratou e rave ra. E au ra e te vai ra ta to te ao te hoê mea faufaa ia pûpû, area te huru oraraa Kerisetiano ra, aita ïa. Ua faaara râ te aposetolo Paulo e: “E ara o te riro noa ˈtu outou i te parau paari e te haavare faufaa ore a te hoê taata ˈtu, i te parau tutuu a te taata nei, mai te â rii a teie nei ao ra, aore i au i ta te Mesia ra.” (Kolosa 2:8) No te aha Paulo i na reira ˈi i te parau?

7. Eaha mau te faaauraa o te paari o to te ao?

⁷ Ua horoa Paulo i taua faaararaa ra no te mea te taa ra ia ˈna e te vai ra te hoê mea atâta mau i roto i te huru feruriraa o te feia e anaanatae atura i te ao. Mea faahiahia roa to ˈna faaohiparaa i te parau ra “te parau paari e te haavare faufaa ore.” Te auraa o te parau ra “philosophia” i hurihia i ǒ nei ei “parau paari,” o “te hinaaro ïa e te tapiraa i te paari.” E nehenehe te reira e riro ei mea maitai. Inaha, te faaitoito ra te Bibilia, te buka Maseli iho â râ, e tapi i te ite e te paari e tano. (Maseli 1:1-7; 3:13-18) Ua tapiri râ o Paulo i “te parau paari” e “te haavare faufaa ore.” Te auraa ïa, te manaˈo ra o Paulo e mea faufaa ore e mea haavare te paari ta to te ao e pûpû ra. Mai te hoê opupu i puhipuhihia, e huru paari to te reira ia hiˈohia, e au noa râ i te aore. Mea faufaa ore iho â ïa, e mea atâta atoa, ia niu i ta tatou maitiraa i te mea maitai e te mea ino i nia i te hoê mea e au i te aore mai “te parau paari e te haavare faufaa ore” a to te ao.

Te feia e parau ra i “te ino ra, e maitai, e te maitai ra, e ino”

8. (a) Ihea te taata e imi ai i te aˈoraa? (b) Eaha râ te huru aˈoraa e horoahia ra?

⁸ Aita te mau mea i ê roa i teie tau. I roto i te mau tiairaa atoa a te taata, mea rahi te feia aravihi. Ua ineine te feia aˈo i te pae faaipoiporaa e utuafare, te mau papai vea, te feia faahua rapaau maˈi, te feia hiˈo fetia, te feia taura, e te tahi atu â, i te pûpû i te aˈoraa—ma te tamoni. Eaha râ te huru aˈoraa e pûpûhia ra? Mea pinepine, e tuuhia te mau faito morare o te Bibilia i te hiti e e monohia e tei parauhia te morare apî. Ei hiˈoraa, no nia i te patoiraa a te hau faatere e haamana i “te faaipoiporaa i te feia hoê â melo,” ua na ô te hoê tumu parau taa ê i roto i te vea rahi no Kanada (The Globe and Mail)  e: “I te matahiti 2000 nei, mea maamaa ia patoihia te hinaaro rahi roa ˈˈe o na taata e here ra te tahi i te tahi no te mea noa hoê â to raua melo.” Te hinaaro o te taata i teie tau, e farii noa ïa, eiaha e haava. Mea faahuru au noa te mau mea atoa; aita e mea maitai e aita e mea ino faahou.—Salamo 10:3, 4.

9. Eaha ta te feia e faaturahia i roto i te huitaata e pinepine i te rave?

⁹ E fariu te tahi atu i nia i te feia i manuïa i te pae totiare e i te pae o te moni—te feia taoˈa rahi e te tuiroo—ei hiˈoraa na ratou ia rave ratou i ta ratou faaotiraa. Noa ˈtu e mea faaturahia te feia taoˈa rahi e te tuiroo i roto i te huitaata i teie tau, mea pinepine ratou i te paturu i te vaha noa i te mau maitai morare mai te haerea tia e te haavare ore. Ia tapi ratou i te mana e te moni, eita te feia e rave rahi e haapeapea i te faaohipa i te mau ravea piˈo e te ofati i te mau manaˈo tumu morare. Ia titau ratou i te roo, eita te tahi pae e tâuˈa e te turai ra ratou i te mau faufaa e te mau faito i haamauhia i te hiti e mea au aˈe na ratou e pee i te hoê haerea huru ê e te tano ore. Te faahopearaa, o te hoê ïa huitaata e imi noa i te moni, e te faatia haere noa, teie hoi to ratou manaˈo tumu, “E faatiahia te mau mea atoa.” Mea maere anei e aita te taata e taa faahou ra e nafea râ no nia i te mea maitai e te mea ino?—Luka 6:39.

10. Nafea te mau parau a Isaia no nia i te maitai e te ino i te riroraa ei parau mau?

¹⁰ Ua ati roa tatou i te mau faahopearaa peapea mau o te mau faaotiraa paari ore i ravehia na nia i te aratairaa hape—te mau faaipoiporaa e te mau utuafare amahamaha, te rave-hua-raa i te raau taero e te inu-hua-raa i te ava, te mau pǔpǔ taurearea haerea uˈana, te taatiraa pae tino tia ore, te mau maˈi purumu, ei faahitiraa i te tahi noa mau hiˈoraa. Oia mau, nafea tatou e nehenehe ai e tiai i te hoê faahopearaa ê atu ia faarue te taata i te mau faito atoa aore ra i te mau aratairaa atoa e ite ai i te maitai e te ino? (Roma 1:28-32) Ua riro iho â mai ta te peropheta Isaia i parau: “E pohe to ratou to tei parau i te ino ra, e maitai, e te maitai ra, e ino; o tei parau i te pouri ra, e maramarama, e te maramarama ra, e pouri; o tei parau i te maramara ra, e momona, e te momona ra, e maramara. E pohe to ratou, to tei paari i to ratou iho hiˈoraa, e tei haapao maitai i to ratou iho manaˈoraa.”—Isaia 5:20, 21.

11. No te aha e ere ai i te mea maitai ia tiaturi ia tatou iho ia faataa ê tatou i te maitai e te ino?

¹¹ I te mea e ua faahapa te Atua i taua mau ati Iuda i tahito ra tei “paari i to ratou iho hiˈoraa,” mea faufaa roa ˈtu â no tatou eiaha e tiaturi ia tatou iho ia faataa ê tatou i te maitai e te ino. Mea rahi i teie tau o te farii i te manaˈo ra “e pee noa i to oe aau,” aore ra “e rave i ta oe e manaˈo ra e mea maitai.” Mea maitai anei taua huru manaˈo ra? Ia au i te Bibilia, eita, te na ô ra hoi e: “E haavare rahi to te aau i te mau mea atoa nei, e ua ino roa; o vai te ite?” (Ieremia 17:9) E tiaturi anei outou e na te hoê taata haavare rahi e te ino roa e aratai ia outou ia rave outou i ta outou faaotiraa? Eita iho â ïa. Oia mau, e rave  paha outou i te mea ê roa i ta taua taata ra e parau mai. No reira te Bibilia e haamanaˈo mai ai e: “O tei tiaturi i to ˈna iho aau, e maamaa ïa; o tei haapaari maite râ i to ˈna haerea, e ora ïa i te reira.”—Maseli 3:5-7; 28:26.

E haapii anaˈe eaha ta te Atua e farii

12. No te aha tatou e hinaaro ai e tamata tatou iho eaha mau na “te hinaaro o te Atua”?

¹² I te mea e eiaha tatou ia tiaturi i te paari o teie nei ao eiaha atoa i to tatou iho no te faataa ê i te maitai e te ino, e nafea ïa tatou? A tapao na i teie aˈoraa maramarama maitai a te aposetolo Paulo: “Eiaha e faaau faahou atu i teie nei ao; ia taui râ outou na roto i te faaapîraa i to outou maramarama, ia nehenehe outou iho e tamata eaha mau na te hinaaro o te Atua, te maitai, te au e te tia roa.” (Roma 12:2, MN) No te aha tatou e hinaaro ai e tamata tatou iho eaha mau na te hinaaro o te Atua? I roto i te Bibilia, te horoa maira Iehova i te hoê tumu taa maitai e te puai râ, a na ô ai e: “Mai te raˈi nei hoi e teitei rahi to ˈna i to te fenua; oia atoa to ˈu ra haerea, e teitei ïa i to outou ra mau manaˈo.” (Isaia 55:9) No reira, maoti i te tiaturi i to tatou iho haroaroaraa aore ra i to tatou iho manaˈo, te aˈohia ra tatou e: “Ia itea ia outou te mea au i te Fatu ra.”—Ephesia 5:10.

13. Nafea te mau parau a Iesu i roto i te Ioane 17:3 e haapapu ai i te hinaaro e ite eaha ta te Atua e farii?

¹³ Ua haapapu â Iesu i teie hinaaro i to ˈna parauraa e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) E auraa hohonu roa to te parau Heleni tumu i hurihia ei “ite.” Ia au i te titionare a Vine (Vine’s Expository Dictionary), “te faaite ra” te reira “i te hoê taairaa i rotopu i te taata i ite e te mea ta ˈna i ite; i ǒ nei, mea faufaa roa te mea i itehia no te taata i ite, e oia atoa te taairaa i haamauhia.” Te faatupuraa i te taairaa e te hoê taata, e hau atu ïa i te ite-noa-raa o vai taua taata ra aore ra o vai to ˈna iˈoa. E titau-atoa-hia ia ite eaha ta taua taata ra e au e e ore e au, eaha te mea faufaa na ˈna, eaha ta ˈna mau ture—e ia faatura ˈtu.—Ioane 1, 2:3; 4:8.

E haamataro anaˈe i to tatou puai haroaroaraa

14. Ia au ia Paulo, eaha te taa-ê-raa rahi i rotopu i te mau aiû pae varua e te mau taata paari?

¹⁴ Nafea ïa e noaa ˈi ia tatou te aravihi i te faataa ê i te maitai e te ino? Te vai ra te pahonoraa i roto i te mau parau a Paulo i te mau Kerisetiano Hebera o te senekele matamua. Ua papai oia e: “O tei amu atoa hoi i te û anaˈe ra, aore ïa i paari i te parau-tia ra, e aiû hoi oia. Area te maa etaeta ra, na te taata paari ïa, na te feia [i haamataro, na roto i te faaohiparaa, i to ratou puai haroaroaraa i te faataa ê] i te maitai e te ino.” Te faataa ê ra o Paulo i ǒ nei i te “û” ta ˈna i faaau i roto i te irava na mua ˈtu i “te â o te parau a te Atua,” i “te maa etaeta” a “te taata paari” tei ‘haamataro i to ratou puai haroaroaraa i te faataa ê i te maitai e te ino.’—Hebera 5:11-14; MN.

15. No te aha e titauhia ˈi ia haa puai ia roaa mai te ite mau i te Atua?

 ¹⁵ Te auraa ïa, na mua roa, e tia ia tatou ia haa puai ia taa maitai ia tatou te mau ture a te Atua e vai ra i roto i ta ˈna Parau, te Bibilia. Aita tatou e imi ra i te hoê tapura ture o te faataa mai eaha ta tatou e nehenehe aore ra e ore e nehenehe e rave. E ere te Bibilia i te hoê buka mai te reira. Area râ, ua faataa Paulo e: “Te mau Papai atoa, e mea faaurua ïa e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra, ia aravihi roa te taata no te Atua, ia ineine roa no te mau ohipa maitatai atoa ra.” (Timoteo 2, 3:16, 17, MN) Ia faufaahia tatou i taua haapiiraa, faahaparaa, aˈoraa ra, e tia ia tatou ia haamata i te faaohipa i to tatou puai feruriraa. E titau te reira i te tutavaraa, eita râ e mâuˈa ia hiˈohia te faahopearaa—te riroraa ei ‘taata aravihi e te ineine roa no te mau ohipa maitatai atoa ra.’—Maseli 2:3-6.

16. Eaha te auraa e haamataro i to ˈna puai haroaroaraa?

¹⁶ I muri iho, mai ta Paulo i faaite, e “haamataro” te feia paari “i to ratou puai haroaroaraa i te faataa ê i te maitai e te ino.” Tei ǒ nei te manaˈo faufaa o te tumu parau. Te auraa mau o te parau ra “haamataro i to ratou puai haroaroaraa,” e “haamataro ïa i te mau melo o te mau tumu ite (mai te taata faaetaeta tino).” (Kingdom Interlinear Translation) E nehenehe ta te hoê taata faaetaeta tino aravihi e rave i te hoê ohipa vitiviti roa ino e au ra e aita e tâuˈa ra i te puai aratoraa aore ra i te tahi atu â ture o te natura, i nia i te tahi mau ravea maitihia, mai te mau auri aore ra te tahi raau faatarere. E vî maitai ia ˈna te mau melo o to ˈna tino i te mau taime atoa, e ua ite oia fatata ma te feruri ore nafea oia ia hautiuti e manuïa ˈi ta ˈna faaiteraa. E faahopearaa anaˈe tera o te haamataroraa etaeta e te faaineineraa tuutuu ore.

17. Nafea tatou e tia ˈi ia riro mai te taata faaetaeta tino ra?

¹⁷ E tia ia tatou atoa ia haamataro mai te hoê taata faaetaeta tino, i te pae varua, ia hinaaro tatou ia papu e mea maitai noa te mau faaotiraa e te mau maitiraa ta tatou e rave. E tia ia vî noa ia tatou te mau melo o to tatou mau tumu ite e o to tatou tino i te mau taime atoa. (Mataio 5:29, 30; Kolosa 3:5-10) Ei hiˈoraa, e haavî anei outou i to outou mata eiaha ia hiˈo atu i te mau hohoˈa morare ore aore ra i to outou tariˈa eiaha ia faaroo i te mau pehe e te mau paraparau hairiiri? E parau mau e tei te mau vahi atoa taua mau mea maitai ore ra. Teie râ, tei ia tatou noa te vaiihoraa e ia mau te reira i roto i to tatou aau e to tatou feruriraa. E nehenehe tatou e pee i te papai salamo tei parau e: “E ore au e tuu i te hoê mea ino i mua i tau mata; e riri ïa vau i tei rave i te hapa ra; e ore hoi te reira e piri mai ia ˈu nei. . . . O tei parau tana vaha i te parau haavare, e ore ïa oia e mau papu i mua i tau mata.”—Salamo 101:3, 7.

A haamataro i to outou puai haroaroaraa na roto i te faaohiparaa

18. Eaha te manaˈo e vai ra i roto i te parau ra “na roto i te faaohiparaa” i roto i ta Paulo faataaraa no nia i te haamataroraa i to tatou puai haroaroaraa?

¹⁸ A haamanaˈo e mea “na roto i te faaohiparaa” tatou e nehenehe ai e haamataro i to tatou puai haroaroaraa i te faataa ê i te maitai e te ino. Teie ïa te auraa, i te mau taime atoa e tia ˈi ia tatou ia rave i te hoê faaotiraa, e tia ia haapii tatou i te faaohipa i to tatou puai feruriraa no te haroaroa eaha te mau faaueraa tumu bibilia  e haapao e nafea ia faaohipa ˈtu. A haamatau i te rave i te mau maimiraa i roto i te mau papai bibilia i horoahia na roto i “te tavini haapao maitai e te paari.” (Mataio 24:45) E nehenehe iho â ïa ta tatou e imi i te tauturu a te mau Kerisetiano paari. I te pae hopea râ, e haamaitairaa rahi te roaa mai maoti ta tatou tutavaraa i te haapii i te Parau a te Atua, apitihia i te pure ia Iehova no te ani i ta ˈna aratairaa e to ˈna varua.—Ephesia 3:14-19.

19. Eaha te mau haamaitairaa e noaa mai ia tatou ia haamataro mǎrû tatou i to tatou puai haroaroaraa?

¹⁹ A haamataro mǎrû ai tatou i to tatou puai haroaroaraa, te fa, ‘ia ore ïa tatou ia riro faahou mai te aiû e taueue-noa-hia e te are ra e o te pee haere noa i te mataˈi o te mau huru haapiiraa atoa, i te ravea haavare a te taata, i ta ratou ravea maramarama no te faahaperaa.’ (Ephesia 4:14, MN) Area râ, na nia i to tatou ite e to tatou maramarama i ta te Atua e farii, e nehenehe tatou e rave i te mau faaotiraa paari, te mea rahi e te mea iti, o te riro ei mea maitai no tatou, ei mea faaitoito no to tatou mau hoa haamoriraa, e hau atu â i te mau mea atoa, o te faaoaoa i to tatou Metua i te raˈi. (Maseli 27:11) Auê ïa haamaitairaa e parururaa i teie nei tau ati rahi e!

[Nota i raro i te api]

E nehenehe anei ta outou e faataa?

• Eaha te aravihi e hinaarohia no te rave i te mau faaotiraa maitatai?

• No te aha e riro ai ei mea paari ore te fariuraa i nia i te feia tuiroo aore ra te tiaturiraa i to tatou iho mau manaˈo ia faaoti tatou eaha te mea maitai e te mea ino?

• No te aha e tia ˈi ia papu ia tatou eaha ta te Atua e farii ia rave tatou i te mau faaotiraa, e nafea tatou e na reira ˈi?

• Eaha te auraa e ‘haamataro i to tatou puai haroaroaraa’?

[Uiraa haapiiraa]

[Hohoˈa i te api 9]

Mea faufaa ore te imiraa i te aratairaa i ǒ te feia taoˈa rahi e te tuiroo ra

[Hohoˈa i te api 10]

Mai te hoê taata faaetaeta tino, e tia ia vî maitai ia tatou te mau melo atoa o to tatou mau tumu ite e o to tatou tino