Mau uiraa a te feia taio

Eaha te maororaa o to Ioba mauiuiraa?

Te manaˈo ra te tahi mau taata e e rave rahi matahiti to Ioba faarururaa i te mau ati, tera râ, aita te buka a Ioba e faahiti ra i taua mauiui roa ra.

E au ra e mea huru poto te tuhaa matamua o te mau ati o Ioba, oia hoi te poheraa te mau melo utuafare e te ereraa i te mau taoˈa. Te taio nei tatou e: “E tae aˈera i te hoê mahana, te amu ra ta [Ioba] mau tamarii tamaroa e te mau tamarii tamahine i te maa, e te inu ra i te uaina i te fare o to ratou tuaana.” Ua faaitehia ia Ioba e ua pau ta ˈna mau puaatoro, mau asini, mau mamoe, mau kamela, e ua pohe te mau tavini e haapao ra i taua mau animara ra. E au ra e i muri iti noa ˈˈe i te reira to Ioba faarooraa e ua pohe ta ˈna mau tamaiti e mau tamahine, o ‘te amu ra i te maa e o te inu ra i te uaina i te fare o to ratou tuaana.’ E au ra e ua tupu teie mau mea atoa i te hoê noa mahana.—Ioba 1:13-19.

Eita e ore e mea huru roa te tuhaa i muri mai o te mau ati o Ioba. Ua haafatata ˈtu Satani ia Iehova e ua parau oia e e taiva Ioba mai te peu e e haamauiui-roa-hia Ioba—oia hoi to ˈna tino. Ia oti, ua roohia o Ioba i “te maˈi mai te tapuaˈe avae e tae noa aˈera i te tupuai upoo.” Tau taime paha tei mairi i parare ai teie maˈi i nia i to ˈna tino taatoa. E tau taime atoa paha tei mairi i faaroo ai to ˈna mau taata faahua tamahanahana, tei haere hoi e hiˈo ia ˈna, i te parau apî o ‘taua mau ino atoa ra.’—Ioba 2:3-11.

No Temana i te fenua o Edoma o Eliphaza, e no te hoê tuhaa fenua i Arabia apatoerau tooa o te râ o Zophara, e ere ïa to raua tuhaa fenua tumu i te mea atea i to Ioba i Uza, peneiaˈe i Arabia apatoerau. Area o Biladada ra, no Sua ïa, e te manaˈohia ra e te faaea ra to ˈna mau taata i pihai i te anavai Eupharate. Mai te peu e tei ǒ ˈna ra o Biladada i taua taime ra, eita e ore tau hebedoma aore ra tau avaˈe tei mairi i faaroo ai oia i te ati o Ioba e i haere ai oia i Uza. Parau mau, e nehenehe tatou e manaˈo e tei te mau vahi tapiri ia Ioba ratou tootoru i te haamataraa te mauiui o Ioba. Noa ˈtu eaha te tupuraa, i te taeraa mai na hoa e toru o Ioba, ‘ua parahi noa ratou i pihaiiho ia ˈna i raro i te repo, e a hitu aˈera arui a hitu hoi ao’ ma te ore e paraparau atu.—Ioba 2:12, 13.

Tae mai nei te tuhaa hopea o te mau ati o Ioba, e î e rave rahi pene o te buka i te mau parau rii atoa o te reira. Te vai ra te mau anairaa mârôraa a taua feia faahua tamahanahana ra, e e pinepine, ua pahono atu o Ioba. Ia oti te reira, ua pûpû te taata apî ra o Elihu i te avau, e ua faatitiaifaro Iehova ia Ioba mai te raˈi mai.—Ioba 32:1-6; 38:1; 40:1-6; 42:1.

No reira, ua tupu paha te mauiui o Ioba e te faahopearaa o te reira i roto tau avaˈe noa, peneiaˈe aita i raeahia hoê matahiti. Ua ite paha outou na roto i ta outou i farerei e e au ra e e tupu te mau ati i te rahi e a muri noa ˈtu. Eiaha râ tatou e haamoe e e ore te reira, mai to Ioba. Noa ˈtu eaha te maororaa o te mau ati ta tatou e faaruru, e haamanaˈo tatou i te turu a te Atua, mai tei faataahia i roto i teie mau parau faauruahia: “To tatou hoi pohe iti poto mâmâ i teie nei, te faatupu nei ïa i te ora rahi roa teimaha e te mure ore no tatou.” (Korinetia 2, 4:17) Ua papai te aposetolo Petero e: “O te Atua râ no ˈna te mau maitai atoa, o tei parau ia tatou no to ˈna ra ao mure ore ia Iesu Mesia nei, ia maoro iti aˈe to outou pohe, ia haamaitai roa oia ia outou, ia tauturu mai, ia faaetaeta mai, e ia haapapu ia outou.”—Petero 1, 5:10.