Ia mauruuru e ia oaoa

UA NA ô te hoê vea no Kanada, te Calgary Herald e: “O te hinaaroraa i te mauruuru te hoê mea faufaa o te oraraa o te taata.” Ua faahiti te Herald i te tahi mau tamarii haere haapiiraa tuatahi, e iva matahiti to ratou, o tei anihia e ta ratou orometua haapii ia papai i te mau mea atoa ta ratou e mauruuru ra. Ua parau te hoê tamarii e te mauruuru ra oia no to ˈna utuafare ‘no to ratou aupururaa ia ˈna.’ Te mauruuru atoa ra te hoê potii no to ˈna utuafare, ma te parau e: “Te paruru ra raua ia ˈu, te aupuru ra, te haapao ra, te here ra, te faataamaa ra raua ia ˈu, e ahiri e aita to ˈu mau metua, aita ïa vau i ǒ nei.”

E aratai te mauruuru ore i te inoino tamau. Ia au i te philosopho teologia o J. I. Packer, “ua hamanihia tatou no te ora ma te taaihia e te Atua e ma te taaihia e te tahi i te tahi.” Te haamanaˈo maira te reira i te aˈoraa paari o te Bibilia i papaihia tau senekele i teie nei, o te na ô ra e: “Ia mauruuru roa outou.” (Kolosa 3:15) E tauturu te mau faaiteraa i te mauruuru e te aau mehara haavare ore ia vetahi ê i te atuatu i te mau taairaa î i te here.

Hau atu â, na roto i te mauruururaa e te haafaufaaraa te tahi i te tahi, te mauruuru atoa ra tatou ia Iehova, e te ite mai ra oia i te reira. Te na ô ra te Bibilia e: “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Paraleipomeno 2, 16:9) Te haapapu maira te Atua e e haamanaˈo e e poihere oia i te hinaaro o te taata i to ˈna iˈoa. (Hebera 6:10) Oia, e tumu maitai e faaite ai tatou i to tatou mauruuru no te mea mea au na Iehova teie huru maitai, ia faaitehia i te mau mahana atoa, e e faaoaoa te reira ia tatou. Mai ta te Maseli 15:13 e parau ra: “Tei te oaoa o te aau e maitai ai te mata.”