Nafea outou e nehenehe ai e rave i te mau faaotiraa paari

TE TIAMÂRAA e maiti, e ô ïa no ǒ mai i te Atua ra. Aita anaˈe te reira, e au ïa tatou i te mau matini aita e mana i nia i ta tatou mau ohipa. No te mea râ tei ia tatou ra te reira, e faaruru ïa tatou i te mau haafifiraa. No te mea e tiamâraa to tatou e maiti, mea titauhia ïa ia rave tatou i te tahi mau faaotiraa i roto i to tatou oraraa.

Parau mau, mea rahi te mau faaotiraa e ere i te mea faufaa roa. E nehenehe te tahi atu mau faaotiraa, eaha te toroa e maiti aore ra e faaipoipo anei, e ohipa i nia i to tatou oraraa taatoa no a muri aˈe. E ohipa râ te tahi atu mau faaotiraa i nia ia vetahi ê. E faahopearaa hohonu to te tahi mau faaotiraa ta te mau metua e rave i nia i ta ratou mau tamarii. Hau atu â, e titauhia ia faˈi tatou i te Atua eaha te mau faaotiraa e rave rahi ta tatou e rave.—Roma 14:12.

Te hinaaro i te tauturu

Aita e parau maitai to te taata ia rave ratou i te mau faaotiraa. Hoê o te mau faaotiraa ta te taata matamua roa i rave e tei papaihia, mea ino roa ïa. Ua opua o Eva e amu i te maa hotu tei opani-maitai-hia e te Atua. Ua turai ta ˈna maitiraa, niuhia i nia i te hinaaro miimii, i ta ˈna tane ia turu ia ˈna i roto i te faaroo-ore-raa i te Atua, e te faahopearaa, o te mauiui rahi ïa no te huitaata. I roto e rave rahi tupuraa, e niu aˈe te taata i ta ratou mau faaotiraa i nia i te mau hinaaro miimii maoti i nia i te mau faaueraa tumu tia. (Genese 3:6-19; Ieremia 17:9) E ia rave tatou i te mau faaotiraa hoata ore, e pinepine, e itea mai ia tatou to tatou mau taotiaraa.

E ere ïa i te mea maere e imi ai e rave rahi i te tauturu no ǒ mai i te mau tumu teitei aˈe i te taata no te rave i te mau faaotiraa faufaa. Te faatia ra te Bibilia i te hoê taime i titauhia ˈi ia rave o Nebukanesa, i roto hoi i te hoê ohipa a te nuu, i te hoê faaotiraa. Noa ˈtu e e arii oia, ua hinaaro oia ‘e rave i te mau peu tahutahu,’ oia hoi e uiui i te mau varua. Te na ô ra ïa te faatiaraa e: “Ua amui oia i te mau ohe no ˈna ra, e ua ui i te teraphima, ua hiˈo hoi i te paraia.” (Ezekiela 21:21) Oia atoa i teie mahana, mea rahi o te uiui i te feia taura e te feia hiˈohiˈo e o te imi i te tauturu a te mau varua na roto i te tahi atu â mau ravea. Tera râ, mea haavare e mea tano ore te reira.—Levitiko 19:31.

Hoê o te nehenehe roa e tiaturihia e o tei tauturu i te taata ia rave i te mau faaotiraa paari i te roaraa o te tuatapaparaa. Aita ˈtu ïa o te Atua ra o Iehova. Ei hiˈoraa, i mutaa ihora, ua horoa te Atua na to ˈna nunaa o Iseraela i te Urima e te Tumima—peneiaˈe e mau kelero moˈa teie o te tufahia ia û te nunaa i te tahi mau huru tupuraa faufaa roa. Mea na roto i te Urima e te Tumima e pahono tia ˈi Iehova i te mau uiraa e e tauturu ai i te mau matahiapo o Iseraela ia papu ia ratou e ua tu ta ratou mau faaotiraa e to ˈna hinaaro.—Exodo 28:30; Levitiko 8:8; Numera 27:21.

Te vai ra te tahi atu hiˈoraa. I to Gideona faaueraahia e aratai i te mau nuu o Iseraela ia aro i to Midiana, ua tia ia ˈna ia faaoti e e farii anei oia i taua haamaitairaa hanahana ra. Ua ani Gideona i te hoê tapao semeio ia papu ia ˈna e e turu Iehova ia ˈna. Ua pure oia e ia rari te hoê otaa  huruhuru mamoe o te vaiihohia i rapae hoê po taatoa i te hau e ia mǎrô noa te repo e ati noa ˈˈe. I te po i muri mai, ua ani oia e ia mǎrô noa te otaa huruhuru e ia rari te repo e ati noa ˈˈe i te hau. Ua horoa Iehova ma te farii maitai i te mau tapao ta Gideona i ani. Ei faahopearaa, ua rave o Gideona i te faaotiraa tano e, ma te turu a te Atua, ua pau roa te mau enemi o Iseraela.—Mau tavana 6:33-40; 7:21, 22.

E i teie mahana?

I teie mahana, te pûpû noa ra Iehova i te tauturu na ta ˈna mau tavini mai te peu e e tia ia ratou ia rave i te mau faaotiraa faufaa. Nafea? E tia anei ia ani tatou, mai ia Gideona, i ‘te mau tamataraa o te otaa huruhuru mamoe,’ te tahi mau tapao no ǒ mai ia Iehova ra o te faaite mai eaha te faaotiraa tano? Ua uiui te tahi nau taata faaipoipo e e tia anei ia haere raua e tavini i te vahi e hinaaro-rahi-hia ˈi te feia poro i te Basileia. Ei tauturu ia raua ia rave i te faaotiraa, ua faanaho raua i te hoê tamataraa. E hoo raua i to raua fare. Mai te peu e e hoohia te fare i te tahi taio mahana i te hoo i faataahia aore ra hau aˈe, e tapao faaite ïa tera no raua e e hinaaro te Atua ia reva raua. Mai te peu e eita te fare e hoohia, e tapao faaite ïa e eita te Atua e hinaaro ia reva raua.

Aita te fare i hoohia. E tapao faaite anei teie e aita Iehova i hinaaro ia tavini teie nau taata faaipoipo i te vahi e hinaaro-rahi-hia ˈi te tauturu? Parau mau, mea teoteo ia parau roa eaha ta Iehova e rave aore ra e ore e rave no ta ˈna mau tavini. Eita ta tatou e nehenehe e parau e aita roa ˈtu Iehova e ohipa maira i teie mahana no te faaite i to ˈna hinaaro no tatou. (Isaia 59:1) Teie râ, aita to tatou e tiaraa e manaˈo e e ohipa mai te Atua i roto i ta tatou mau faaotiraa faufaa, inaha, e vaiiho e na te Atua e rave i ta tatou faaotiraa. I te pae rahi o to ˈna oraraa, ua titauhia ia rave o Gideona i te tahi mau faaotiraa aita e tapao semeio no ǒ mai ia Iehova ra!

Te na ô ra râ te Bibilia e te vai ra te aratairaa a te Atua. Te tohu ra te Bibilia no nia i to tatou tau e: “E na to outou tariˈa e faaroo i te hoê reo i muri mai ia outou, i te na ôraa e, Teie te eˈa: e na reira i te haere, ia haapehao ê i te pae atau e te pae aui.” (Isaia 30:21) Ia rave tatou i te mau maitiraa faufaa, mea tano roa ia papu ia tatou e ua tu ta tatou mau faaotiraa e to te Atua hinaaro e e faaite te reira i to ˈna paari rahi. Nafea? Na roto ïa i te hiˈopoaraa i ta ˈna Parau e te faariroraa i te reira ei ‘lamepa i to tatou avae, e ei tiarama no to tatou eˈa.’ (Salamo 119:105; Maseli 2:1-6) No reira, mea titauhia ia haamatau tatou i te rave mai i te ite mau no roto mai i te Bibilia. (Kolosa 1:9, 10) Ia rave tatou i te hoê faaotiraa, mea titauhia ia imi maitai tatou i te taatoaraa o te mau faaueraa tumu bibilia no nia i te reira. Maoti taua maimiraa ra e nehenehe ai tatou ‘e hiˈopoa i te mau mea faufaa aˈe.’—Philipi 1:9, 10, MN.

E tia atoa ia tauaparau atu tatou ia Iehova na roto i te pure, ma te tiaturi e e faaroo mai oia ia tatou. Mea mahanahana mau â ia faataa tatou i to tatou Atua î i te here eaha te faaotiraa e tia ia tatou ia rave e te mau ravea ta tatou e manaˈo ra! Ia oti, e nehenehe tatou e ani ma te tiaturi i te aratairaa no te rave i te faaotiraa tano. E pinepine, e haamanaˈo mai te varua moˈa ia tatou i te mau faaueraa tumu bibilia e au ia faaohipahia, aore ra e tauturu ia tatou ia maramarama maitai atu â i te hoê irava o tei taaihia i to tatou huru tupuraa.—Iakobo 1:5, 6.

 E faaohipa atoa Iehova i te feia paari i roto i te amuiraa ta tatou e nehenehe e tauaparau atu no nia i ta tatou mau faaotiraa. (Ephesia 4:11, 12) No te tauaparau râ ia vetahi ê, eiaha tatou e rave mai te tahi pae o te aparau atu i tera taata e i tera taata e tae roa ˈtu i te taime e itea roa mai ai ia ratou te taata o te parau i te mea ta ratou e hinaaro e faaroo. Ia oti, e pee ratou i to ˈna manaˈo paari. E tia atoa ia haamanaˈo tatou i te hiˈoraa o Rehoboama ei faaararaa no tatou. I mua i te hoê faaotiraa hoata ore, ua horoa te mau matahiapo o tei tavini na e to ˈna metua tane i te tahi manaˈo paari maitai roa na ˈna. Aita oia i faaohipa i ta ratou aˈoraa, ua uiui maoti oia i te feia apî hoê â to ratou paariraa mai. A pee ai oia i ta ratou aˈoraa, ua rave oia i te hoê faaotiraa maamaa roa e ei faahopearaa, ua ere oia i te hoê pae rahi o to ˈna basileia.—Mau arii 1, 12:1-17.

No reira, a imi i te aˈoraa a te feia o tei ite eaha te oraraa, tei ite maitai i te mau Papai e o te faatura hohonu i te mau faaueraa tumu tia. (Maseli 1:5; 11:14; 13:20) Ia nehenehe, a rave i te taime no te feruriruri i te mau faaueraa tumu i taaihia e i te mau haamaramaramaraa atoa ta outou i maimi. A hiˈo ai outou i te mau mea ma te maramarama o te Parau a Iehova, e taa maitai atu â paha ia tatou eaha te faaotiraa tano e rave.—Philipi 4:6, 7.

Te mau faaotiraa ta tatou e rave

Te vai ra te mau faaotiraa e mea ohie ia rave. I to ratou faaueraahia e faaea i te poro, ua ite te mau aposetolo e mea titauhia ia tamau ratou i te poro ia Iesu, e ua faaara oioi aˈera ratou i te Sunederi i ta ratou faaotiraa e faaroo i te Atua eiaha te taata. (Ohipa 5:28, 29) No te tahi atu mau faaotiraa, mea hinaarohia paha ia feruri atu â tatou no te mea aita te Bibilia e faataa roa ra i te reira tumu parau. Tera râ, e turama noa te mau faaueraa tumu bibilia i te faaotiraa maitai roa ˈˈe e rave. Ei hiˈoraa, mea rahi te mau huru faaanaanataeraa i teie mahana aita i vai na i te tau o Iesu, tera râ, te vai ra te mau parau bibilia taa maitai no nia i te mea e mauruuru ai Iehova e te mea e ore ai oia e mauruuru. No reira, te mau Kerisetiano atoa e rave ra i te faaanaanataeraa o te faaitoito ra i te haavîraa uˈana, te morare ore, aore ra te orureraa hau, ua rave ïa i te hoê faaotiraa ino.—Salamo 97:10; Ioane 3:19-21; Galatia 5:19-23; Ephesia 5:3-5.

I te tahi taime, mea tano paha e piti faaotiraa. E haamaitairaa taa ê faahiahia te taviniraa i te vahi e hinaaro-rahi-hia ˈi te tauturu e e nehenehe e hopoi mai i te mau maitai rahi. Mai te peu râ e e faaoti te hoê taata no te tahi tumu e faaea mai, e nehenehe noa ta ˈna e haa maitai i roto i ta ˈna iho amuiraa. I te tahi taime, e rave paha tatou i te hoê faaotiraa o te horoa mai i te ravea e faaite ai tatou i te hohonu o to tatou paieti ia Iehova aore ra eaha te mea faufaa roa ˈˈe i roto i to tatou oraraa. No reira, te vaiiho ra Iehova e ia faaohipa tatou i to tatou tiamâraa e maiti no te faaite eaha mau na te huru o to tatou aau.

E pinepine, e ohipa ta tatou mau faaotiraa i nia ia vetahi ê. Ei hiˈoraa, ua oaoa te mau Kerisetiano no te senekele matamua i te mea e ua tiamâ ratou i te mau opaniraa e rave rahi o te Ture. Te auraa ra, e nehenehe ta ratou e farii aore ra e haapae i te maa viivii i raro aˈe i te Ture. Tera râ, ua faaitoitohia ratou e tâuˈa i te manaˈo haava o vetahi ê ia faaoti ratou e faaohipa i teie tiamâraa.  E au te mau parau a Paulo no nia i te reira i te mau faaotiraa e rave rahi ta tatou e rave: “Eiaha outou ei turoriraa.” (Korinetia 1, 10:32) E nehenehe te hinaaro eiaha vetahi ê ia turori e tauturu i te faataa e rave rahi o te mau faaotiraa ta tatou e rave. Hau atu â, o te aroha i te taata-tupu te piti o te ture rahi roa ˈˈe.—Mataio 22:36, 39.

Te faahopearaa o ta tatou mau faaotiraa

Ia maoro, e faahopearaa maitai noa to te mau faaotiraa e ravehia ma te manaˈo haava maitai e tei niuhia i nia i te mau faaueraa tumu bibilia. No te hoê taime, parau mau, e titauhia paha te tahi haapaeraa. I to te mau aposetolo faaiteraa i te Sunederi i ta ratou faaotiraa e tamau noa i te poro ia Iesu, ua rutuhia ratou hou ratou a tuuhia ˈi. (Ohipa 5:40) I to na Hebera e toru—o Sadaraka, o Meseka, e o Abede-nedo—faaotiraa e eita ratou e tipapa i mua i te tii auro a Nebukanesa, ua faaû ratou i te ati. Ua ineine ratou i te faaruru i te faahopearaa e nehenehe e tupu mai no ta ratou faaotiraa, oia hoi to ratou pohe. Ua ite râ ratou e e farii e e haamaitai te Atua ia ratou.—Daniela 3:16-19.

Mai te peu e e farerei tatou i te mau fifi i muri aˈe i te raveraa i te hoê faaotiraa feruri-maitai-hia, aita e tumu e parau ai tatou e mea hape te faaotiraa. E nehenehe te ‘tau e te tupuraa manaˈo-ore-hia’ e ohipa roa i nia i te faahopearaa o te mau faaotiraa atoa tei ravehia ma te manaˈo maitai roa ˈˈe. (Koheleta 9:11, MN) Hau atu â, e vaiiho Iehova i te ati i te tahi taime no te ite e mea mau anei ta tatou i faaau. Hoê po taatoa to Iakobo taputôraa e te hoê melahi hou a fanaˈo ai i te hoê haamaitairaa. (Genese 32:24-26) E tia atoa paha ia tatou ia faaû i te ati, i te taime atoa e te rave ra tatou i te mea maitai. Ia tu râ ta tatou mau faaotiraa e te hinaaro o te Atua, e nehenehe ïa tatou e tiaturi e e tauturu oia ia tatou ia faaoromai e e haamaitai oia ia tatou i te pae hopea.—Korinetia 2, 4:7.

No reira, ia rave outou i te hoê faaotiraa faufaa, eiaha e turui i nia i to outou iho paari. A maimi i te mau faaueraa tumu bibilia e au ia faaohipahia. A paraparau no nia i te reira ia Iehova. Ia nehenehe, a uiui i te mau Kerisetiano paari. Ia oti, a faaitoito. A faaohipa i to outou tiamâraa e maiti no ǒ mai i te Atua ra ma te haapao maitai. A rave i te hoê faaotiraa maitai e a faaite ia Iehova e e aau tia to outou.

[Hohoˈa i te api 28]

A hiˈopoa i te Parau a te Atua hou e rave ai i te mau faaotiraa faufaa

[Hohoˈa i te mau api 28, 29]

A paraparau no nia i te mau faaotiraa ta outou e rave ia Iehova

[Hohoˈa i te api 30]

E nehenehe outou e tauaparau e te mau Kerisetiano paari no nia i ta outou mau faaotiraa faufaa