Eaha te nehenehe mau â e tahoê i te taata?

NOA ˈTU eaha ta outou mau tiaturiraa, e farii iho â paha outou e te vai ra te mau hoa o te parau mau fatata i roto i te mau haapaoraa atoa. E nehenehe e itea mai te feia o te haafaufaa rahi ra i te mea mau e o te ineine i te imi i te reira, i roto i te mau Hindous, te mau Katolika, te mau ati Iuda, e te vai ra ˈtu â. E au ra râ e te faaamahamaha ra te haapaoraa i te taata. Te faaohipa atoa ra te vetahi i te haapaoraa no te mau fa iino. E nehenehe anei te feia haavare ore i roto i te mau haapaoraa atoa o te hinaaro ra i te mea maitai e te mea mau e tahoê? E nehenehe anei ratou e tahoê no te tapi i te hoê â fa?

Mea peapea mau â ia ite e o te haapaoraa te tumu rahi o te amahamaharaa! A hiˈo na i te tahi o teie mau aroraa. Te aro ra te mau Hindous e te mau Bouddhistes i Sri Lanka. Ua haamanii te mau Porotetani, te mau Katolika, e te mau ati Iuda i te toto i roto e rave rau aroraa. Te aro ra “te mau Kerisetiano” i te mau Mahometa i Tchétchénie, i Indonésie, e i Kosovo. E i te avaˈe Mati 2000, e 300 taata no Nigeria tei pohe i roto i te hoê aroraa e piti mahana tei taaihia i te haapaoraa. Oia mau, na te riri faaroo i faatupu i teie mau aroraa riaria.

E pinepine, te peapea ra te feia haavare ore i te mau ohipa iino e ravehia ra i te iˈoa o te haapaoraa. Ei hiˈoraa, mea rahi te feia haere pure o te huru ê ra e te faatia-noa-hia ra te tahi mau ekalesiatiko, o tei rave ino hoi i te mau tamarii, i roto i te tahi mau ekalesia. Te huru ê rahi ra te tahi atu feia faaroo i te mau amahamaharaa i roto i te mau pǔpǔ faaroo iti parau-noa-hia Kerisetiano e rave rahi no nia anei i te peu mahu e te haamaruaraa tamarii. Papu maitai, aita te haapaoraa e tahoê ra i te taata. Te vai ra râ te mau hoa mau o te parau mau i roto i te mau haapaoraa e rave rahi, ia hiˈohia te mau tupuraa i muri nei.

Ua hinaaro ratou i te parau mau

E vahine haamori paieti e te haavare ore o Fidelia i roto i te Ekalesia Katolika no San Francisco i La Paz, i Bolivia. Ua tipapa oia i mua i te hohoˈa o Maria e ua tuu i te mau mori hinu maitai roa ˈˈe ta ˈna e nehenehe e hoo mai i mua i te satauro. I te mau hebedoma atoa, e horoa oia ehia rahiraa maa i te perepitero ra no te opere atu na te feia veve. Tera râ, e pae o te mau aiû a Fidelia tei pohe hou ratou a bapetizohia ˈi. I to te perepitero parauraa ia ˈna e te mauiui ra ratou paatoa i roto i te poiri o te po rimepo, ua ui Fidelia ia ˈna iho e, ‘Eaha ïa, mai te peu e mea maitai te Atua?’

Ua arataihia o Tara, te hoê taote vahine, ei Hindou i Katmandou, i Népal. Ia au i te mau peu ahia senekele a to ˈna mau tupuna, ua haamori oia i to ˈna mau atua i roto i te mau hiero Hindous e e mau idolo ta ˈna i te fare. Ua feaapiti râ o Tara i teie mau uiraa: No te aha te mauiui e rahi roa ˈi? No te aha te taata e pohe ai? Aita i itea mai ia ˈna te mau pahonoraa mauruuru i roto i ta ˈna haapaoraa.

No Panya, ua paari oia ei Bouddhiste i roto i te hoê fare tapiri i te pae pape, i Bangkok, i Thaïlande. Ua haapiihia oia e no te mau ohipa i ravehia i roto i te mau oraraa na mua ˈtu e tupu ai te mauiui e mea na roto i te  haapaeraa i te mau hinaaro atoa e tiamâ mai ai te taata i te reira. Mai te tahi atu â mau Bouddhistes haavare ore, ua haapiihia oia ia faatura hohonu i te paari o te mau monahi ahu rea o te haere i te fare o te taata i te mau aahiata atoa no te mau horoaraa ô na te feia veve. Ua rave oia i te feruri-hohonu-raa e ua haaputu i te mau hohoˈa o te Bouddha ma te manaˈo e e paruru te reira ia ˈna. I muri aˈe i te hoê ati purumu ino o tei haaparuparu ia ˈna mai te opu e haere atu ai i raro, ua haere o Panya e mataitai i te mau fare monahi Bouddhistes, a tiaturi mau ai i te hoê faaoraraa semeio. Aita i itea mai ia ˈna te faaoraraa aore ra te maramarama pae varua. Ua hema maoti oia i te peu tahutahu e ua rave roa ˈtu oia i te reira.

Ua fanauhia o Virgil i te mau Hau Amui no Marite e ua apiti atu oia i te mau Black Muslims i te fare haapiiraa tuatoru. Ua opere oia ma te itoito roa i ta ratou mau papai, o te parau ra e o te popaa te Diabolo. I to ratou manaˈo, tera te tumu i rave ai te mau popaa ehia ohipa riaria i nia i te feia ereere. Noa ˈtu te aau rotahi i roto i ta ˈna mau tiaturiraa, te haapeapea ra o Virgil no te tahi mau uiraa: Eaha ïa, mea ino anei te mau popaa atoa? E no te aha te mau oreroraa parau e rave rahi roa i taaihia ˈi i te moni?

Noa ˈtu e ua paari o Charo i roto i te haapaoraa rahi Katolika no Marite Apatoa, e vahine Porotetani haavare ore oia. Te oaoa ra oia e aita oia e rave ra i te haamoriraa idolo e haaati ra ia ˈna. Mea au na Charo e haere i te pureraa faahoruhoru i te mau Tapati atoa i reira oia e tuô ai e “Haleluia!” e e himene ai i te mau himene faaroo e ori atu ai. Ua tiaturi mau â o Charo e ua faatiamâhia oia i te hara e ua fanau-faahou-hia oia. Ua aufau oia i te tuhaa ahuru o ta ˈna moni ohipa i te ekalesia, e ia ani mai te poro evanelia i roto i te afata teata au roa na ˈna i te tahi ô, e hapono oia i te moni ia ˈna ra no te mau tamarii i Afirika. I to ˈna râ uiraa i ta ˈna orometua no te aha te hoê Atua aroha e haamauiui ai i te mau nephe i roto i te po auahi, ua taa aˈera ia ˈna e aita e auraa to ta ˈna pahonoraa. I muri aˈe, ua itea mai ia ˈna e aita ta ˈna mau ô e faaohipahia ra no te tauturu i te mau tamarii i Afirika.

Noa ˈtu e mea taa ê to ratou huru oraraa, hoê â fa ta teie na taata e pae. Mea au na ratou te parau mau e ua imi ratou ma te haavare ore i te mau pahonoraa mau i ta ratou mau uiraa. Tera râ, e nehenehe mau anei ratou e tahoê i roto i te haamoriraa mau? Na te tumu parau i muri nei e pahono i tera uiraa.

[Hohoˈa i te api 4]

E nehenehe mau anei te taata mea taa ê to ratou huru oraraa e tahoê?

[Faaiteraa i te fatu o te hohoˈa i te api 3]

G.P.O., Jerusalem