Ei “haerea tia” to tatou

‘E MAITAI to te feia parau-tia,’ ta te peropheta Isaia ïa i parau, “e amu hoi ratou i te hopea o ta ratou parau.” Ua parau atoa Isaia e: “E haerea tia mau to te feia parau-tia.” (Isaia 3:10; 26:7) Papu maitai, ia faahotu ta tatou mau parau aore ra raveraa i te hopea maitai, mea titauhia ia rave tatou i te mea tia i te aro o te Atua.

Nafea râ tatou e nehenehe ai e pee i te haerea tia? Eaha te mau maitai ta tatou e nehenehe e tiaturi ia na reira tatou? E nafea vetahi ê e nehenehe ai e faufaahia i to tatou pee-maite-raa i te mau faito parau-tia a te Atua? I roto i te pene 10 o te buka bibilia te Maseli, te horoa ra o Solomona, arii o Iseraela i tahito ra, i te mau pahonoraa i teie mau uiraa e te faataa ê ra oia i te taata parau-tia e te taata paieti ore. No reira, ua faaohipa oia i te parau ra “te [feia] parau-tia” 14 taime. Tei roto hoê ahuru o teie mau parau i te irava 15 e tae atu i te irava 32. E riro ïa te hiˈopoaraa i te Maseli 10:15-32 ei mea faaitoito. *

A tapea maite i te aˈo

E haamahiti Solomona i te faufaaraa o te parau-tia. E na ô oia e: “Te taoˈa a te feia taoˈa rahi ra, o to ˈna ïa pare ati: o te pohe râ o te feia haehaa ra, o to ratou ïa veve. No te ora te ohipa a te feia parau-tia ra, o te taoˈa râ a te paieti ore ia noaa ra, no te hara ïa.”—Maseli 10:15, 16.

E nehenehe te mau taoˈa rahi e riro ei paruru ia tupu mai te tahi mau fifi i roto i te oraraa, mai te hoê noa oire faaetaetahia o te horoa i te tahi panaˈonaˈo ore na te feia e parahi ra i roto. E e nehenehe te veve e faaino ia tupu mai te tahi mau ohipa manaˈo-ore-hia. (Koheleta 7:12) E nehenehe atoa râ te arii paari e faahitihiti i te fifi atâta o te taoˈa rahi e o te veve atoa. E tiaturi roa paha te hoê taata taoˈa rahi i ta ˈna mau faufaa, e manaˈo atu ai oia  e “mai te aua teitei ra” ta ˈna mau taoˈa rarahi. (Maseli 18:11) E e manaˈo paha te hoê taata veve ma te hape e aita e ravea no to ˈna oraraa no a muri aˈe. No reira, eita raua toopiti e haamaitai i to raua roo i mua i te Atua.

I te tahi aˈe pae, e aratai te ohipa tia a te hoê taata parau-tia i te ora, noa ˈtu e mea rahi aore ra mea iti ta ˈna i te pae materia. Nafea? Na roto ïa i te mauruururaa i ta ˈna mau mea. Eita oia e vaiiho e ia haafifi to ˈna huru oraraa i te pae moni i to ˈna tiaraa fariihia e te Atua. Mea taoˈa rahi aore ra mea veve oia, e hopoi mai te huru oraraa o te taata parau-tia i te oaoa i teie nei e i te tiaturiraa o te ora mure ore a muri aˈe. (Ioba 42:10-13) Eita te taata paieti ore e maitaihia noa ˈtu e e noaa mai ia ˈna te faufaa. Eita oia e mauruuru no te faufaaraa paruru o ta ˈna mau taoˈa rahi e e ora ia au i to te Atua hinaaro, e faaohipa maoti oia i ta ˈna mau faufaa no te ora i te hoê oraraa hara.

“O tei tapea i te aˈo ra, tei te eˈa ora ïa,” ta te arii o Iseraela ïa e parau â, “o tei faarue râ i te aˈo ra, ua taiva ïa.” (Maseli 10:17) Te parau ra te hoê aivanaa bibilia e e nehenehe e maramarama i teie irava na roto e piti ravea. A tahi, tei nia te taata o te farii i te aˈo e o te tapi i te parau-tia i te eˈa o te aratai atu i te ora ra, area te taata o te faarue i te aˈo, ua atea ê ïa i taua eˈa ra. E nehenehe atoa te irava e taiohia mai teie, “o tei haapao i te aˈo, e faaite ïa i te eˈa e tae atu ai i te ora [ia vetahi ê no te mea e maitaihia ratou i to ˈna hiˈoraa maitai], o tei ore râ e tâuˈa i te aˈo, e fariu ê ïa ia vetahi ê.” (Maseli 10:17, New International Version) I roto i na tupuraa e piti, mea faufaa mau â ia tapea maite tatou i te aˈo e ia ore e faarue i te avau!

A mono i te riri na roto i te here

E faahiti Solomona i muri iho i te hoê maseli e piti tuhaa hoê â manaˈo to roto, na te piti o te tuhaa e haapapu i te tuhaa matamua. E na ô oia e: “O tei tapoˈi i te riri ra, e vaha haavare to ˈna.” Mai te peu e e riri to te hoê taata i roto i to ˈna aau i te tahi atu e e tapoˈi oia i te reira i te mau parau aminamina aore ra faatietie, te hape ra ïa oia—e “vaha haavare” to ˈna. E parau â te arii paari e: “O tei parau râ i te parau faaino ra, e maamaa ïa.” (Maseli 10:18) Eita te tahi mau taata e huna i to ratou riri, e rave râ ratou i te mau pariraa haavare aore ra e haaparare i te mau parau au ore no nia i te taata ta ratou e riri ra. Mea maamaa te reira no te mea eita mau â te parau haavare e taui i te huru o te taata. Te taata e faaroo i te reira, e haamata ïa i te ite i te ino e i te ore e faatura roa i te taata faaino. No reira, e haamauiui te taata o te afai i te hoê parau ino ia ˈna iho.

Te haerea parau-tia, o te oreraa ïa e faaohipa i te haavare e te faaino. Ua parau te Atua i te mau Iseraela e: “Eiaha oe e riri i to taeae i to aau.” (Levitiko 19:17) E ua aˈo Iesu i te feia e faaroo ra ia ˈna e: ‘E aroha ˈtu i to outou mau enemi; e pure hoi i te feia i hamani ino mai ia outou; ia riro outou ei tamarii na to outou Metua i te ao ra.’ (Mataio 5:44, 45) Mea maitai aˈe ia î to tatou aau i te here eiaha i te riri!

‘A tapea i to vaha’

No te haamahiti i te faufaaraa ia haavî i te arero, e parau te arii paari e: “Te rahi ra te parau ra, eita e ore te hara; i parauhia ˈi e paari to ˈna to tei tapea i to ˈna vaha.”—Maseli 10:19.

“E faarahihia ta te maamaa ra parau.” (Koheleta 10:14) E ‘haamanii noa to ˈna vaha i te parau maamaa.’ (Maseli 15:2) Aita e parauhia ra e e maamaa te taatoaraa o te feia paraparau. Mea ohie râ te hoê taata o te paraparau rahi roa i te riro ei arai e parare ai te parau faaino aore ra te parau i faaroohia! E pinepine, no te parau maamaa i ino ai te roo, i mauiui ai te aau, i fifi ai te mau taairaa e vetahi ê, e i pepe ai te tino. “Te rahi ra te parau ra, eita e ore te hara.” (Maseli 10:19) Hau atu â, mea au ore mai te peu e e parau noa te hoê i to ˈna manaˈo no nia i te mau mea atoa. Eiaha ïa ia rahi ta tatou parau.

Eita noa te taata o te tapea i to ˈna vaha e haapae i te parau haavare, e ohipa oia ma te paari. E feruri oia hou e parau ai. No to ˈna hinaaro mau i te mau faito a Iehova e i te  tauturu i to ˈna taata-tupu, e feruri oia i te faahopearaa o ta ˈna mau parau i nia ia vetahi ê. E mau parau î i te here ta ˈna e te maitai. E feruriruri oia eaha te rave ia riro ta ˈna mau parau ei mea au maitai e te faufaa. Mai “te lemoni auro i roto i te vairaa ario ra” ta ˈna mau parau, mea maramarama e mea tura i te mau taime atoa.—Maseli 25:11.

“E rave rahi tei faaamuhia”

“Te arero o te feia parau-tia ra, mai te ario tamâhia ra ïa,” ta Solomona ïa e parau â, “area te aau o te paieti ore ra, mai te ota mau nei ïa.” (Maseli 10:20) Te parau a te taata parau-tia ra, mea viivii ore ïa—mai te ario maitai roa tei tamâhia, aita e ota. E parau mau iho â no te mau tavini a Iehova a horoa ˈi ratou i te ite faaora i te Parau a te Atua na vetahi ê. Ua haapii to ratou Orometua Rahi Roa, te Atua ra o Iehova, ia ratou e ua ‘horoa atu i te arero o te feia ite, ia tia ia ratou ia parau atu i te parau au i tei rohirohi ra.’ (Isaia 30:20; 50:4) Oia mau, mai te ario tamâhia to ratou arero ia faahiti ratou i te parau mau bibilia. Mea faufaa aˈe ïa ta ratou mau parau no te feia aau haavare ore i te mau hinaaro o te taata paieti ore! Ia hinaaro ïa tatou e faaite i te Basileia e te mau ohipa taa ê a te Atua.

E haamaitairaa te taata parau-tia no te feia e haaati ra ia ˈna. “E rave rahi tei faaamuhia e te vaha o te feia parau-tia ra,” ta Solomona ïa e parau â, “te pohe noa nei râ te maamaa i te ite ore.”—Maseli 10:21.

Nafea ‘te taata parau-tia e faaamu ai i te taata e rave rahi’? Te horoa ra te taˈo Hebera i faaohipahia i ǒ nei i te manaˈo o te “tiairaa.” (Maseli 10:21, nota i raro i te apî a te MN) Te vai ra te manaˈo e aratai e e faaamu, mai te hoê tiai mamoe i tahito ra o te haapao i ta ˈna mau mamoe. (Samuela 1, 16:11; Salamo 23:1-3; Sire a Solomona 1:7) E aratai te taata parau-tia ia vetahi ê na nia i te eˈa o te parau-tia, e faaamu ta ˈna parau i te feia e faaroo atu ia ˈna. Ei faahopearaa, e ora ratou i te hoê oraraa oaoa aˈe, mauruuru aˈe, e e fanaˈo atoa ratou i te ora mure ore.

E te taata maamaa ïa? Ei taata maamaa, e faaite oia e aita to ˈna e manaˈo maitai aore ra eita oia e tâuˈa i te mau faahopearaa o to ˈna haerea. E rave iho â taua huru taata ra i te mau mea atoa ta ˈna e hinaaro, ma te ore e tâuˈa i te mau faahopearaa. No reira, e amo oia i te mau faahopearaa o ta ˈna mau ohipa. E tauturu te taata parau-tia ia vetahi ê ia ora ratou, eita e noaa i te taata maamaa i te faaora ia ˈna iho.

A ape i te peu taiata

E pinepine, e itehia te huru o te hoê taata na roto i ta ˈna mau mea e au e e ore e au. No nia i te reira, e na ô te arii o Iseraela e: “E mea navenave na te maamaa te rave i te [peu taiata]; area te taata ite ra, o te haapao maitai ta ˈna.”—Maseli 10:23; MN.

E ohipa hauti te peu taiata no te tahi pae, e e ohipa “arearea” noa te raveraa i te reira. Eita taua mau taata ra e tâuˈa i te Atua, ia ˈna hoi te taata atoa e faˈi ai i ta ratou i rave, e eita ratou e farii e mea ino to ratou haerea. (Roma 14:12) E ino to ratou feruriraa, e manaˈo atu ai ratou e aita te Atua e ite maira i ta ratou ohipa. Na roto i ta ratou mau ohipa, e parau ratou e: “Aore e Atua!” (Salamo 14:1-3; Isaia 29:15, 16) Auê te maamaa e!

 Area te taata ite ra, ua taa ia ˈna e e ere te peu taiata i te ohipa hauti. Ua ite oia e eita te Atua e au i tera peu e e tuino te reira i te taairaa i rotopu i te hoê taata e te Atua. E haerea maamaa tera no te mea e faaere te reira i te taata i te faatura ia ˈna iho, e faataa i te mau faaipoiporaa, e faaino i te feruriraa e te tino atoa, e e aratai atu i te ereraa i te mauruuru no te mau mea pae varua. E paari to tatou ia ape tatou i te peu taiata e ia faahotu tatou i te hinaaro i te paari mai te hoê tuahine here rahi.—Maseli 7:4.

A patu i nia i te niu tia

No nia i te faufaaraa e patu i to tatou oraraa i nia i te hoê niu e tano, e na ô Solomona e: “E roohia mai te paieti ore e ta ˈna e mǎtaˈu ra; e faatiahia mai râ te hinaaro o te feia parau-tia ra. Mai te puahiohio e pee ra, oia atoa te paieti ore, aita ra ïa; e haamauhia râ te feia parau-tia e a muri noa ˈtu.”—Maseli 10:24, 25.

E nehenehe te taata paieti ore e haamǎtaˈu rahi ia vetahi ê. I te pae hopea râ, e roohia oia i te mea ta ˈna e mǎtaˈu ra. I te mea e aita e niu i nia i te mau faaueraa tumu parau-tia, e au ïa oia i te hoê fare papu ore o te parari ia farara mai te mataˈi rorofai. E hiˈa oia i raro aˈe i te faateimaharaa. Area te taata parau-tia râ, e au ïa i te taata o te ohipa ia au i ta Iesu mau parau. E ‘taata paari oia o tei faatia i to ˈna fare i nia i te pǎpǎ.’ “E,” ta Iesu ïa i parau, “mairi ihora te ûa, e tahe ihora te pape pue, e te mataˈi hoi i te uihiraa mai i nia iho i taua fare ra e aore roa i parari, no te mea e pǎpǎ te tiaraa.” (Mataio 7:24, 25) Mea aueue ore tera huru taata—ua niu-maitai-hia to ˈna feruriraa e ta ˈna mau ohipa i nia i te mau faaueraa tumu a te Atua.

Hou a faataa roa ˈtu ai i te taa-ê-raa i roto i te taata paieti ore e te taata parau-tia, e horoa te arii paari i te hoê faaararaa poto, mea faufaa râ. E na ô oia e: “Mai te vinega i te niho ra, e mai te au auahi i te mata ra, oia atoa te taata faatau i te feia i tono ia ˈna ra.” (Maseli 10:26) E huru ê te niho i te vinega. Mea avaava te oˈava o te vinega i roto i te vaha e e nehenehe te niho e mania. E ǎhu te mata i te au auahi. No reira, te taata o te tihepu i te hoê taata faatau aore ra o te faaohipa ia ˈna ei tia no ˈna, e riro oia i te inoino e i te pau.

“E haapuraa etaeta te eˈa o Iehova”

E parau â te arii o Iseraela e: “Tei te mǎtaˈu ia Iehova e maoro ai to te taata nei pue mahana; e haapotohia râ te matahiti o te paieti ore. Ta te feia parau-tia e tiai ra, e oaoa ïa hopea, o tei tiaturihia râ e te paieti ore ra, e mou ïa.”—Maseli 10:27, 28.

Na te mǎtaˈu i te Atua e aratai ra i te taata parau-tia o te tamata i te faaoaoa ia Iehova maoti to ˈna mau manaˈo, ta ˈna mau parau e mau ohipa. E haapao te Atua ia ˈna e e faatupu i ta ˈna mau tiairaa parau-tia. Area te taata parau-tia ore râ, e ora ïa i te hoê oraraa Atua ore. E tupu paha ta ˈna mau tiairaa i te tahi taime ia hiˈohia, no te hoê noa râ taime poto, e haapoto-pinepine-hia to ˈna mau mahana e te haavîraa uˈana aore ra te hoê maˈi faatupuhia e to ˈna huru oraraa. Ia pohe oia, e mou roa ta ˈna mau tiairaa.—Maseli 11:7.

“E haapuraa etaeta te eˈa o Iehova no te feia parau-tia ra,” ta Solomona ïa e parau, “o te pohe râ to te feia i rave i te parau ino ra.” (Maseli 10:29) Te eˈa o Iehova e parauhia ra i ǒ nei, e ere ïa i te eˈa o te ora e na reira tatou i te haere, o ta te Atua râ ohiparaa e te huitaata. “Oia te Mato, o tei tia roa ta ˈna ohipa ra,” ta Mose ïa i parau, “o tei au atoa to ˈna ra mau haerea.”  (Deuteronomi 32:4) Te mau haerea parau-tia o te Atua, e panaˈonaˈo ore ïa no te taata parau-tia e e ino ïa no te taata paieti ore.

E haapuraa etaeta mau â o Iehova no to ˈna nunaa! “E ore roa te feia parau-tia ra e aueue; e ore râ te paieti ore e parahi i te fenua. Te parau paari tei tuua mai e te vaha o te feia parau-tia ra; o te arero râ o te taata mârô ra, e ooti-ê-hia ïa. Ua ite te vaha o te feia parau-tia ra i te parau e au ai ra; o te vaha râ o te paieti ore ra, e mârô ïa.”—Maseli 10:30-32.

E ruperupe maitai iho â te taata parau-tia e e maitaihia ratou no te mea e haerea tia to ratou. Oia mau, “na Iehova te maitai i taoˈahia te taoˈa; e ore hoi e apiti-atoa-hia mai te ino i te reira.” (Maseli 10:22) Ia haapao maitai ïa tatou i te ohipa ia au i te mau faaueraa tumu a te Atua. Ia tapea atoa tatou i to tatou vaha e ia faaohipa i to tatou arero no te haapii i te parau mau faaora o te Parau a te Atua ia vetahi ê e no te aratai ia ratou na te eˈa o te parau-tia.

[Nota i raro i te api]

[Hohoˈa i te api 26]

E nehenehe te arero e riro mai te “ario tamâhia”