Te faatia ra te feia poro i te Basileia

Te farereiraa i te feia e mea fifi ia farerei

TE TUTAVA ra te mau Ite no Iehova i te faaite i te poroi o te Basileia i te mau taata atoa ta ratou e nehenehe e farerei. I te tahi mau taime, e titauhia te tahi tutavaraa rahi no te farerei i te feia e mea varavara ia itea i te fare. (Mareko 13:10) No nia i te reira, te faatia ra te hoê pionie taa ê i te hoê fenua i Marite Apatoa i te tupuraa i muri nei.

“I te hoê mahana, ua ite au e e tere mai te tavana i te tuhaa fenua i faataahia na mâua ta ˈu vahine. I te mea e o oia te hoê o te feia e mea varavara roa ia farerei i ǒ ratou, ua papai au i te hoê rata ia ˈna e ua tuu atu vau e rave rahi mau papai, tae noa ˈtu te buka rairai Eaha ta te Atua e titau ra ia tatou? e te mau buka L’humanité à la recherche de Dieu e Te ite e aratai i te ora mure ore. Te faataa ra ta ˈu rata i te fa o teie mau papai taitahi.

“No to ˈu hinaaro e ite i to ˈna manaˈo no nia i te mau papai, ua ani au e paraparau ia ˈna. Tau hebedoma i muri aˈe, ua faatiahia vau e farerei ia ˈna e ua rave au i te ripene video ra Les Témoins de Jéhovah—Un nom, une organisation. E piti hora i te maoro te paraparauraa. I muri aˈe i te mataitairaa i te ripene video e te tavana, ua ui au ia ˈna eaha to ˈna manaˈo no nia i te reira. Ua pahono mai oia e: ‘Aita ˈtu e faanahonahoraa i te fenua nei mai ta outou. E hinaaro hoi au i te mau taata mai ia outou o te nehenehe e tauturu ia ˈu ia faatupu i ta ˈu mau opuaraa a te hau!’ Ua ui aˈera oia e ua haere aˈena anei au i te pu rahi o ta tatou faanahonahoraa. Ua parau atu vau ia ˈna e noa ˈtu e tera ta ˈu fa mai te 14raa mai o to ˈu matahiti, aita roa ˈtu vau i nehenehe e haere e mataitai i ta tatou pu rahi i Brooklyn, i New York. O tera te hoê o te mau fa fifi roa ia naea. Ua hiˈo maite mai oia ia ˈu no te hoê taime. I muri iho, ua parau mai oia e te hinaaro ra oia e ia haere au. Ua haapao oia i ta mâua parau faatia e ua horoa mai oia i te mau titeti manureva ei ô na mâua!

“I teie nei, te tae noa mai ra ta te tavana mau vea o Te Pare Tiairaa e A ara mai na! Te tiaturi nei mâua e e fatata e nehenehe mâua e haamata i te hoê haapiiraa bibilia e o ˈna.”