Te tahe ra te pape faaora i te mau Andes

E titapou te anairaa o te mau mouˈa Andes i ropu ia Peru, e vahi atu ai i te fenua ei hiti tuhaa fenua mârô i te pae tooa o te râ e ei uru raau heeuri e te veavea roa i te pae hitia o te râ. I nia i te tupuai mouˈa e noho ai e hau atu i te hoê tuhaa i nia i te toru o na 27 mirioni taata no Peru. To nia ratou i te mau mahora teitei e te hiti o te mau mouˈa Andes aore ra i te mau afaa e au ra e aita e raroraa e te mau peho hotu o taua mau mouˈa ra.

 NO TE mea e mea taratara te anairaa o te mau mouˈa Andes, eita ïa to rapaeau e ô ohie noa ˈtu. No reira, mea moemoe te mau mirioni taata e noho ra i reira, e i te rahiraa o te taime, eita ratou e û atu i te mau tupuraa e te mau haereraa i mua i rapaeau i to ratou tuhaa fenua.

Ua haamauhia te tahi mau oire iti i te hiti anavai no te fanaˈo i te pape e hinaarohia no te faaapu e no te mau nǎnǎ lamas, alpagas, vigognes, e mamoe. Te tahe ra râ te tahi atu â huru pape faufaa roa i te mau Andes—te pape pae varua haumǎrû no ǒ mai ia Iehova ra, “te tumu o te pape ora.” (Ieremia 2:13) Te faaohipa ra te Atua i to ˈna mau Ite no te tauturu i te feia e noho ra i nia i te mau mouˈa o te mau Andes ia noaa ia ratou te ite mau no nia ia ˈna e ta ˈna mau opuaraa.—Isaia 12:3; Ioane 17:3.

I te mea e e hinaaro te Atua “i te taata atoa ia ora, e ia noaa te ite i te parau mau,” te faaitoito rahi ra teie mau tavini i te afai i te poroi faaora o te Bibilia i te mau nunaa taata mea fifi ia farerei atu. (Timoteo 1, 2:4) E poroi hanahana teie i niuhia i nia i te Bibilia e o te horoa mai i te haapiiraa. E faatiamâ teie poroi i te mau taata aau haavare ore no reira i te mau tiaturiraa niu ore, te mau tutuu, e te tahi mau manaˈo e mǎtaˈu ai ratou i te feia pohe, te mau varua iino, e te mau puai o te natura. Te mea faufaa ˈtu â, e horoa teie poroi na ratou i te tiaturiraa hanahana o te ora mure ore i nia i te hoê fenua paradaiso.

Te tutavaraa

E tia i te feia poro i te Basileia o te haere i teie mau tuhaa fenua atea ia rave i te mau faatanoraa e rave rahi. Ia putapû te aau o te taata i te poroi bibilia, mea hinaarohia ia ite rii te mau orometua haapii i te Bibilia i te reo Quechua aore ra te reo Aymara no reira.

E ere i te mea ohie ia tae atu i te mau oire iti i te mau Andes. Aita i rahi te mau pereoo auahi e tere atu i taua mau vahi ra. E ere te faurao i te mea papu no te vero e te hamaniraa matau-ore-hia o te fenua. Nafea ïa te mau Ite e farerei ai i te taata no te faaite atu i te poroi o te Basileia?

Ua farii te tahi feia poro itoito i te parau apî maitai i te faaû i te haafifiraa e i te parau mai te peropheta Isaia e: “Inaha, teie au; o vau ta oe e tono.” (Isaia 6:9) Ua rave ratou e toru fare tavere no te tere atu i te mau tuhaa fenua i te pae apatoerau, i ropu, e i te pae apatoa. Mea rahi te mau afata Bibilia e papai bibilia ta te mau pionie, aore ra tavini taime taatoa itoito roa, i rave e ua ueue ratou i te mau huero o te parau mau bibilia i roto i te feia aau haavare ore, te auhoa, e te farii maitai e noho ra i reira.

Mea atâta roa te mau tipuuraa o te mau purumu o te mouˈa. No te tere na nia i te tahi o teie mau purumu, e tia ia rave i te hoê purumu tioi haere noa. I te hoê taime, ua hiˈo te hoê mitionare e parahi ra i muri i te hoê pereoo uta taata i rapaeau na roto i te haamaramarama e ite atura oia e tei te hiti roa hoê o te mau huira muri i te hoê vahi topatarere e hau atu i te 190 metera i te hohonu! Ua tapiri oia i to ˈna mata e ia tere roa ˈtu te pereoo uta taata i mua.

Ua ino roa te tahi mau purumu e mea pirihao roa. Te pou atura te hoê o te mau fare tavere na nia i te hoê purumu pirihao a paiuma mai ai te hoê camion. Ua tia i te fare tavere ia otohe i te hoê vahi e nehenehe ai te camion e tere atu i nia.

E mau faahopearaa faahiahia râ to taua mau tutavaraa tuutuu ore ra. E hinaaro anei outou e ite hau atu â no nia i taua mau tutavaraa ra?

“Pîpîraa” i te roto Titicaca

I roto i te hoê tuhaa fenua o te mau mouˈa Andes e 3 800 metera i te teitei i nia ˈˈe i te faito o te miti, o Titicaca te roto rahi roa ˈˈe o te ao e nehenehe e tere na nia. Te vai puna o te rahiraa o na 25 anavai e atuatu ra i te roto Titicaca, o te mau tupuai mouˈa ïa tei poˈi i te hiona, e hau atu te tahi i te 6 400 metera i te teitei. No te teitei o te mau mouˈa, mea toetoe te ahuaraˈi, e e tia i te feia e ere no ǒ ia faaoromai ia inoino ratou no te teitei.

Tau taime aˈenei, ua reva te tahi mau pionie o te paraparau i te reo Quechua e te reo Aymara i na motu o Amantani e Taquile i nia i te roto  Titicaca. Ua afai atoa ratou i te hoê pataraa hohoˈa teie te upoo parau, “Hoê faahohonuraa i te mau ekalesia,” e hiˈopoaraa huna ore teie i te mau parau haavare a te Amuiraa faaroo Kerisetiano. Ua farii-maitai-hia te reira. Ua farii popou te hoê taata i te mau taeae e ua pûpû atu i te hoê piha rahi i roto i to ˈna fare i reira ratou e nehenehe ai e faaea e e haapii atu i te Bibilia.

Ua tae mai 100 taata i te putuputuraa matamua i Amantani; 140 taata tei tae mai i te putuputuraa i Taquile. Ua patahia te hohoˈa na roto i te reo Quechua. Teie ta te tahi nau taata faaipoipo, o tei faaea na mua ˈˈe i te fenua rahi, i parau: “Ua tae i te taime e haamanaˈo ai outou te mau Ite no Iehova ia matou. Ua pure matou ia haere mai outou.”

Taa ê atu i teie na motu rahi aˈe e piti, ua poro-atoa-hia te parau apî maitai i nia i te tahi o na 40 motu “e painu ra” i nia i te roto Titicaca. Motu e painu ra? Oia, ua hamanihia teie mau motu i te opaero, e aeho teie e tupu i te tahi mau vahi papaˈu o te roto. E tupu te opaero mai raro mai i te pape e parare atu ai na nia i te pape. No te hamani i te hoê motu, e haafefe te feia no ǒ i te mau aeho e tia noa ra i roto i te pape, e haune atu ai no te hamani i te hoê tahua. Ia oti, e tuuhia te vari na nia iho i te tahua e haapaarihia ˈtu ai i te tahi atu â mau aeho i tâpûhia. E faaea te taata i roto i te mau tiahapa aeho i hamanihia i nia iho.

Ua noaa mai i te mau Ite no Iehova hoê poti no te poro i te feia o te mau motu o te roto Titicaca. E maraa i te poti ia faauta 16 taata. I muri aˈe i te tapiriraa ˈtu i te mau motu e painu ra, e haere te mau Ite na nia i te tahua aeho i tera e tera nohoraa. E parau ratou e e ite ratou ia hauti rii te tahua. E ere teie vahi no te feia e inoino haere ratou ia hautiuti ratou!

Area te huiraatira parau Aymara ra, e parahi ïa ratou i te mau oire e te mau oire iti e rave rahi na te hiti pape e i nia i te mau fenua tuati o te haere roa ˈtu i roto i te pape. Mea ohie aˈe ia haere i taua mau vahi ra na nia i te poti i na te fenua iho. Te manaˈohia ra e piri atu i te 400 000 taata e noho ra i te tuhaa fenua ta taua mau poti ra e tere atu ia faaitehia te poroi o te Basileia. E riro te mau poti i te tere noa no te hoê taime i mua nei.

Haamâharaa i te poihâ pae varua

Te faaea ra Flavio i roto i te oire iti o Santa Lucía, i pihai ia Juliaca, i te mau Andes. I roto i ta ˈna Ekalesia Evanelia, ua haapiihia ia ˈna te parau o te po auahi. Ehia matahiti to ˈna oraraa i roto i te mǎtaˈu i te hoê utua mure ore i roto i te auahi. E pinepine, ua uiui oia nafea te hoê Atua aroha e nehenehe ai e haamauiui i te taata i roto i te auahi e a muri noa ˈtu. I to Tito, te hoê tavini taime taatoa Ite no Iehova, tereraa ˈtu i taua oire iti ra, ua farerei atu oia ia Flavio.

Teie hoê o te mau uiraa matamua a Flavio, “Te haapii ra anei ta oe haapaoraa e e haamauiuihia te taata i roto i te po auahi?” Ua pahono Tito e eita roa ˈtu te Atua Poiete e au i tera huru manaˈo e e faaino te reira i te iˈoa o Iehova, te Atua aroha. Ma te faaohipa i ta Flavio iho Bibilia, ua faaite o Tito ia ˈna e aita roa ˈtu e parau itea a te feia pohe e te tiai ra ratou i te hoê tia-faahou-raa i te fenua nei i raro aˈe i te Basileia o te Atua. (Koheleta 9:5; Ioane 5:28, 29) Ua maramarama aˈera o Flavio. I reira iho, ua farii oia e haapii i te Bibilia e ua riro oioi mai oia ei Kerisetiano bapetizohia.

Hoê oire iti o te faaite i te mauruuru

A feruri na i te oaoa rahi ia faaite atu i te mau Papai i te feia o te oire iti aita i ite aˈenei i te hoê Bibilia aore ra ia poro i te mau oire iti aita te taata i faaroo aˈenei i te parau o te mau Ite no Iehova aore ra i te parau apî maitai ta ratou e poro ra! Tera te tupuraa i farereihia e toru tuahine pionie—o Rosa, o Alicia, e o Cecilia—o tei poro i na oire iti o Izcuchaca e o Conayca, e vai ra i te hoê teiteiraa e hau atu i te 3 600 metera i Peru no ropu.

I to ratou taeraa ˈtu i te oire matamua, aita to ratou e vahi faaearaa. Ua paraparau atu ratou i te  mutoi rahi o te oire iti no te faataa i to ratou tere. Te faahopearaa? Ua faatia oia ia taoto ratou i te po taatoa i te fare mutoi. I te poipoi aˈe, ua noaa mai to te mau pionie mau fare papu atu â o tei riro mai ei pu ohiparaa na ratou.

Ua tae oioi maira te taime o te oroa Haamanaˈoraa matahiti i te poheraa o te Mesia. Ua poro te mau pionie i te mau fare atoa i roto i te oire o Izcuchaca, ua vaiiho e rave rahi Bibilia, e ua haamata i te tahi mau haapiiraa bibilia. Hou te oroa Haamanaˈoraa, ua opere ratou i te mau titau-manihini-raa, ma te faataa eaha te tumu o teie oroa e eaha te auraa o te pane e te uaina e faaohipahia i roto i te oroa Haamanaˈoraa. Ua anihia i te tahi mau taeae ia tauturu mai, e na te hoê o ratou i hohora i te oreroraa parau. Auê te oaoa e e 50 taata o taua oire iti ra tei tae mai i teie oroa taa ê! A tahi ra a taa ˈi ia ratou te auraa mau o te Amuraa maa ahiahi a te Fatu. Mea faufaa atoa noa ratou te tapearaa i te Parau a te Atua i roto i to ratou rima!

Tiamâraa mai i te mau mea teimaha roa

E oaoaraa noa te horoaraa ˈtu i te pape haumǎrû o te parau mau bibilia na te feia e faatîtîhia ra e te haapaoraa hape. E pare o Pisac no te Hau emepera Inca i tahito ra. Ua haapiihia te feia e noho ra i reira i teie mahana i te po auahi, te hoê haapiiraa aita i roto i te Bibilia. Ua parau ta ratou mau perepitero e e nehenehe ratou e haere i nia i te raˈi maoti noa te mau taparuparu a te mau perepitero.

Te taa ra ia tatou e te poihâ ra taua mau taata ra i te pape haumǎrû o te parau mau bibilia. I roto i te pororaa i tera e tera fare, ua nehenehe o Santiago, te hoê tavini taime taatoa Ite no Iehova, e faataa i te hoê taata e ua opuahia e ia ora te feia parau-tia i nia i te hoê fenua paradaiso. (Salamo 37:11) Ua faaite o Santiago na roto i te Bibilia e e faatiahia mai te feia pohe e e haapiihia te huitaata i te mau eˈa tia roa o Iehova ia noaa ia ratou te ora mure ore. (Isaia 11:9) Na mua ˈˈe, e Katolika paieti taua taata ra o tei rave i te peu tahutahu e tei inu hua. I teie nei, e tiaturiraa bibilia to ˈna e e fa ta ˈna i roto i te oraraa—e ora i roto i te Paradaiso. Ua tutui pauroa oia i ta ˈna mau taoˈa tahutahu i te auahi e ua faaea i te inu hua. Ua amui oia i to ˈna utuafare e ua farii e haapii i te Bibilia. I muri aˈe, ua pûpû te utuafare taatoa ia ratou na te Atua ra o Iehova e ua bapetizohia.

Farii maitai i manavahia

Mea farii maitai roa te feia o te mouˈa. Noa ˈtu e e fare au noa to ratou e mea veve ratou, e pûpû te taata i ta ratou mau mea na te mau ratere. Hou a haapii ai i te mau faito teitei o te Bibilia, e nehenehe te hoê fatu fare e pûpû i te mau rauere coca ta te ratere e auau a tauaparau ai raua. Ia riro mai râ oia ei Ite, e pûpû ïa oia hoê punu taipu tihota, tei tuea te hoo e te mau rauere coca i te mau mataeinaa moemoe.

Ua ani te hoê taeae i te hoê mitionare o raua te rave i te hoê farerei-faahou-raa. I muri aˈe i te paiumaraa ma te fifi rahi i te hoê mouˈa topatarere, ua popo raua no te faaara i te fatu fare e ua tae mai raua. Ua titau-manihini-hia raua e tomo i roto i te fare i hamanihia te tapoˈi fare i te papaa iti, e tia ïa ia raua ia piˈo i raro no te tomo atu na te uputa haehaa. Ua haere mǎrû aˈera raua e ati aˈe te apoo ta te mama i heru e i vauvau i te ahu taoto i roto no te tuu atu i ta ˈna aiû. I te mea e eita oia e nehenehe e haere i rapae, e paraparau noa ïa teie aiû ma te oaoa a tauaparau noa ˈi te feia paari. I muri aˈe i to ratou paraparauraa ma te oraora no nia i te mau haamaitairaa a te Basileia, ua tatara maira te vahine i te hoê mohina inu rahi no reira. Aita i maoro, ua pou atu na taeae mai nia mai i te mouˈa no te tahi atu mau farereiraa.

Hoê auhune rahi

I teie nei i teie fenua, te vai ra hoê hanere pǔpǔ moemoe e hau atu i te hoê tausani taata e haapii ra i te Bibilia e te mau Ite no Iehova. Te tonohia ra te mau taeae i faatuitehia i te Haapiiraa faaineineraa no te taviniraa i ǒ no te faariro i taua mau pǔpǔ ra ei mau amuiraa. Ua itea mai i te feia aau tia o tei faatîtî-maoro-roa-hia e te haapaoraa hape e te mau tiaturiraa niu ore, i te tiamâraa na roto i te parau apî maitai o te Basileia! (Ioane 8:32) Te mâha ra to ratou poihâ i te pape o te parau mau.

[Hohoˈa i te api 10]

Pororaa i te mau motu “e painu ra” o te roto Titicaca