E Atua faaoromai rahi o Iehova

“O Iehova, e Atua aroha noa, e te hamani maitai rahi, e te faaoromai rahi, e te maitai rahi.”—EXODO 34:6.

1, 2. (a) O vai tei fanaˈo na i te faaoromai rahi o Iehova i mutaa ihora? (b) Eaha te auraa o te parau ra “faaoromai rahi”?

 TE TAATA i te tau o Noa, te mau Iseraela e haere ra na te medebara e o Mose, te mau ati Iuda e ora ra a tia mai ai Iesu i te fenua nei—ua ora paatoa ïa i roto i te mau huru tupuraa taa ê. Ua fanaˈo paatoa râ ratou i te hoê â huru maitai o Iehova—te faaoromai rahi. No te tahi pae, o to ratou iho ora tera. E nehenehe atoa te faaoromai rahi o Iehova e riro ei ora no tatou.

² Eaha te faaoromai rahi? Eaha te taime e faaohipa ˈi Iehova i te reira, e no te aha? I roto i te parau ra “faaoromai rahi,” te vai ra te manaˈo o te haamahuraa i te hara aore ra i te aaraa ma te faaoromai noa, anoihia e te oreraa e faaea i te tiaturi e e maitai mai te taairaa e fifihia ra. E fa ïa ta teie huru maitai. E haapao te reira i te maitairaa iho â râ o te taata e faatupu ra i te hoê huru au-ore-hia. E ere râ te faaoromai rahi te tapiriraa i te mata i mua i te hara. Ua raea anaˈe te fa o te faaoromai rahi aore ra aita anaˈe e tumu faahou no te faaoromai i te huru tupuraa, e hope te faaoromai rahi.

3. Eaha na te fa o te faaoromai rahi o Iehova, e eaha to te reira otia?

³ E nehenehe ta te taata e faaoromai rahi, o Iehova râ te hiˈoraa rahi roa ˈˈe o teie huru maitai. I te roaraa o te mau matahiti mai te taime mai â i haafifi ai te hara i te taairaa i rotopu ia Iehova e ta ˈna i poiete ei taata, ua faaite to tatou Atua Poiete i te haamahuraa ma te faaoromai e ua horoa mai i te ravea ia nehenehe te taata o te tatarahapa, e haamaitai i to ratou taairaa e oia. (Petero 2, 3:9; Ioane 1, 4:10) Ua raea anaˈe râ te fa o to ˈna faaoromai rahi, e ohipa te Atua i nia i te feia tei rave i te hara ma te hinaaro mau, mou atu ai ïa teie nei faanahoraa ino.—Petero 2, 3:7.

E au noa i te mau ateriputi rahi o te Atua

4. (a) E nafea te manaˈo o te faaoromai rahi ia faataahia i roto i te mau Papai Hebera? (A hiˈo atoa i te nota i raro i te api.) (b) E nafea te peropheta ra o Nahuma ia faataa ia Iehova, e eaha ta te reira e faaite ra no nia i te faaoromai rahi o Iehova?

⁴ I roto i te mau Papai Hebera, e faataahia te manaˈo o te faaoromai rahi na roto e piti taˈo Hebera teie te auraa mau, “roaraa o na apoo ihu” e te hurihia ei “ore e riri vave” i roto i te Traduction du monde nouveau. * I to ˈna faahitiraa i te faaoromai rahi o te Atua, ua na ô te peropheta Nahuma e: “E ore Iehova e ru i te riri, te rahi ra râ to ˈna mana; e ore [roa ˈtu] Iehova e [tapea ia ˈna iho i te faautua].” (Nahuma 1:3; MN) E ere ïa te faaoromai rahi o Iehova i te tapao o te paruparu e e otia to te reira. Te faaite ra te mea e e ore te Atua Mana hope e riri vave e i te hoê â taime e mea rahi to ˈna mana e, e faahopearaa to ˈna faaoromai rahi no to ˈna opuaraa e haavî ia ˈna iho. E mana to ˈna no te faautua, e tapea râ oia ia ˈna iho ma te opua mau eiaha e na reira vave ia nehenehe te taata hara e taui. (Ezekiela 18:31, 32) Ua riro ïa te faaoromai rahi o Iehova ei tapao o to ˈna aroha, e e faaite te reira i to ˈna paari ia faaohipa oia i to ˈna mana.

5. E nafea te faaoromai rahi o Iehova e au ai e to ˈna parau-tia?

 ⁵ E au atoa te faaoromai rahi o Iehova e to ˈna parau-tia e to ˈna titiaifaro. Ua faaite oia ia ˈna iho ia Mose ei “Atua aroha noa, e te hamani maitai rahi, e te faaoromai rahi, e te maitai rahi, e te parau mau.” (Exodo 34:6) Tau matahiti i muri aˈe, ua himene Mose ei arueraa ia Iehova e: “O tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!” (Deuteronomi 32:4) Oia, e ohipa amui anaˈe te aroha, te faaoromai rahi, te parau-tia, e te titiaifaro o Iehova ma te au mau.

Te faaoromai rahi o Iehova hou te diluvi

6. Eaha te haapapuraa taa ê o te faaoromai rahi ta Iehova i faaite i nia i te mau huaai o Adamu raua o Eva?

⁶ No ta Adamu raua o Eva orureraa hau i Edene i mutu ai to raua taairaa faahiahia e to raua Atua Poiete î i te here o Iehova e a muri noa ˈtu. (Genese 3:8-13, 23, 24) E faahopearaa to taua atea-ê-raa ra i nia i to raua huaai tei tufa i te hara, te tia-ore-raa, e te pohe. (Roma 5:17-19) Noa ˈtu e ua opua mau na taata matamua e hara, ua faatia Iehova ia fanau raua i te tamarii. I muri aˈe, ua horoa oia ma te here i te ravea ia faite te mau huaai o Adamu e o Eva ia ˈna. (Ioane 3:16, 36) Ua faataa te aposetolo Paulo e: “Ua faarahi râ te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei. E teie nei, ua tiahia tatou i to ˈna ra toto, e rahi atu ïa to tatou ora ia ˈna ra i te pohe. I faafaitehia hoi tatou i te Atua i to tatou vai-enemi-raa ra i te pohe o ta ˈna Tamaiti; e rahi atu ïa to tatou ora i te faiteraa nei, i to ˈna ra oraraa.”—Roma 5:8-10.

7. Nafea to Iehova faaiteraa i te faaoromai rahi hou te diluvi, e no te aha i tano roa ˈi te haamouraahia te ui no mua ˈˈe i te diluvi?

⁷ Ua itehia te faaoromai rahi o Iehova i te tau o Noa. Ua hau atu i te hoê senekele hou te diluvi, “ua hiˈo ihora hoi te Atua i te fenua nei, e inaha, ua ino roa; ua ino roa te haerea o te taata atoa o te ao nei.” (Genese 6:12) No te hoê râ taime poto to Iehova faaiteraa i te faaoromai rahi i nia i te taata. Ua parau oia e: ‘E ore roa tau varua e mârô i te taata nei e a muri noa ˈtu, e taata hoi oia: e teie nei, o to ratou pue mahana e toe nei, hoê ïa hanere, e piti ahuru i te matahiti.’ (Genese 6:3) Maoti taua na 120 matahiti ra i fanaˈo ai te taata haapao maitai ra o Noa i te taime no te fanau i te hoê utuafare e—i to ˈna faaararaahia no nia i te faaotiraa a te Atua—no te faatia i te hoê araka e te faaara i te feia o to ˈna tau no nia i te diluvi e tae maira. Ua papai te aposetolo Petero e: “Te faaoromairaa roa o te Atua a tiai  ai i te anotau ia Noa ra, i te tarairaa i te pahi ra, i ora ˈi e toofanu pue taata i te moana, oia hoi na taata toovau ra.” (Petero 1, 3:20) Oia mau, “aore roa” te taata no rapaeau i te utuafare piri o Noa “i haapao” i ta ˈna pororaa. (Mataio 24:38, 39, MN) Na roto i te raveraa e ia faatia Noa i te araka e ia tavini peneiaˈe tau ahuru matahiti i te maoro ei “taata i aˈo i te parau-tia ra,” ua horoa Iehova na te feia o te tau o Noa i te ravea ia tatarahapa i ta ratou mau peu uˈana e ia fariu mai e tavini ia ˈNa. (Petero 2, 2:5; Hebera 11:7) Ua tano roa ino te haamouraahia taua ui ino ra i te pae hopea.

Faaoromai rahi taa ê ia Iseraela

8. Mea nafea te faaoromai rahi o Iehova i te faaohiparaahia i nia i te nunaa Iseraela?

⁸ Ua hau roa ˈtu i te 120 matahiti i te maoro to Iehova faaoromai-rahi-raa ia Iseraela. I te roaraa o na hau atu i te 1 500 matahiti o to ratou tuatapaparaa ei nunaa maitihia o te Atua, mea iti roa te mau anotau aita te mau Iseraela i tamata i te faaoromai rahi o te Atua e ia hope. Tau hebedoma noa i muri aˈe i to ratou faaoraraa semeio mai Aiphiti mai, ua fariu atu ratou i te haamoriraa idolo ra, a faaite ai i te faatura ore ino mau i to ratou Faaora. (Exodo 32:4; Salamo 106:21) I te roaraa o te mau ahuru matahiti i muri mai, ua autâ te mau Iseraela no te maa ta Iehova i horoa semeio na ratou i te medebara, ua ohumu ia Mose e ia Aarona, ua faaino ia Iehova, e ua faaturi e te mau etene, e ua apiti atoa i roto i te haamoriraa ia Baala. (Numera 11:4-6; 14:2-4; 21:5; 25:1-3; Korinetia 1, 10:6-11) I tia na ia Iehova ia haamou i to ˈna nunaa, teie râ, ua faaohipa maoti oia i te faaoromai rahi.—Numera 14:11-21.

9. Nafea to Iehova faaiteraa e e Atua faaoromai rahi oia i te tau o te mau tavana e o te mau arii?

⁹ I te tau o te mau tavana, ua topa pinepine te mau Iseraela i roto i te haamoriraa idolo. I to ratou na reiraraa, ua faarue Iehova ia ratou i to ratou mau enemi ra. I to ratou râ tatarahaparaa e tiaororaa ia ˈna e tauturu mai, ua faaohipa oia i te faaoromai rahi e ua tono atu i te mau tavana e faaora ia ratou. (Mau tavana 2:17, 18) I te anotau roa o te faatereraa arii, mea iti te mau arii tei haamori ia Iehova anaˈe. E i raro aˈe atoa i te mau arii haapao maitai, i pinepine na te nunaa i te anoi i te haamoriraa mau e te mea hape. I to Iehova tonoraa i te mau peropheta e faaara no nia i to ratou haapao ore, mea au aˈe na te nunaa e faaroo i te mau tahuˈa piˈo haere noa e te mau peropheta haavare. (Ieremia 5:31; 25:4-7) Oia mau, ua hamani ino te mau Iseraela i te mau peropheta haapao maitai a Iehova e ua haapohe atoa i te tahi o ratou. (Paraleipomeno 2, 24:20, 21; Ohipa 7:51, 52) Teie râ, ua tamau noa Iehova i te faaite i te faaoromai rahi.—Paraleipomeno 2, 36:15.

Aita i ore te faaoromai rahi o Iehova

10. Afea te raearaa te otia o te faaoromai rahi o Iehova?

¹⁰ Te faaite ra râ te tuatapaparaa e e otia to te faaoromai rahi o te Atua. I te matahiti 740 H.T.T., ua faatia oia ia faatahuri to Asura i te basileia o na opu hoê ahuru o Iseraela e ia hopoi tîtî i to reira mau taata. (Mau arii 2, 17:5,  6) E i te hopea o te senekele i muri aˈe, ua vaiiho oia e ia haru to Babulonia i te basileia o na opu e piti o Iuda e ia haamou ia Ierusalema e to ˈna hiero.—Paraleipomeno 2, 36:16-19.

11. Nafea to Iehova faaohiparaa i te faaoromai rahi i to ˈna atoa faatupuraa i te haavaraa?

¹¹ I to ˈna atoa râ faatupuraa i ta ˈna mau haavaraa i nia ia Iseraela e ia Iuda, aita Iehova i haamoe i te riro ei mea faaoromai rahi. Na roto i ta ˈna peropheta o Ieremia, ua tohu Iehova i te hoˈi-faahou-raa o to ˈna nunaa maitihia. Ua parau oia e: “Ia hope na matahiti e hitu ahuru i Babulonia ra, e ite atu ai au ia outou, e faatupu vau i tau parau maitai ia outou i reira, i te aratai-faahou-raa mai ia outou i ǒ nei. . . . E itea vau e outou; . . . e haaputuputu mai au ia outou mai te mau fenua atoa mai, e mai te mau vahi atoa mai i tiahihia ˈtu ai outou e au ra.”—Ieremia 29:10, 14.

12. Nafea te hoˈiraa o te toea ati Iuda i Iuda i te riroraa ei mea tano maitai no te haerea mai o te Mesia?

¹² Ua hoˈi mau â te hoê toea ati Iuda i hopoi-tîtî-hia, i Iuda e ua haapao faahou i te haamoriraa a Iehova i te hiero i patu-faahou-hia i Ierusalema. I roto i te tupuraa o te mau opuaraa a Iehova, e riro taua toea ra mai “te hau no ǒ ia Iehova ra,” o te hopoi mai i te haumârû e te ruperupe. E riro atoa ratou ei mea itoito e te puai mai “te liona i roto i te mau puaa o te aru ra.” (Mika 5:7, 8) Ua tupu paha te parau hopea nei i te tau o te mau Maccabées i to te mau ati Iuda tiahiraa ma te faaterehia e te utuafare Maccabées i to ratou mau enemi mai te Fenua Tǎpǔhia e pûpû-faahou-raa i te hiero tei haaviiviihia. Ua paruruhia ïa te fenua e te hiero e ia nehenehe ta te tahi atu â toea haapao maitai e farii maitai atu i te Tamaiti a te Atua i to ˈna faraa mai ei Mesia.—Daniela 9:25; Luka 1:13-17, 67-79; 3:15, 21, 22.

13. I muri aˈe atoa i to te ati Iuda haapoheraa i ta ˈna Tamaiti, nafea to Iehova tamauraa i te faaite atu i te faaoromai rahi?

¹³ I muri aˈe atoa i to te ati Iuda haapoheraa i ta ˈna Tamaiti, ua tamau â Iehova i te faaite atu i te faaoromai rahi no te hoê tau e toru matahiti e te afa, a horoa ˈtu ai i te ravea ia ratou anaˈe ra ia piihia no te riro ei melo o te huero pae varua o Aberahama. (Daniela 9:27) * Hou e i muri aˈe i te matahiti 36 T.T., ua farii te tahi mau ati Iuda i teie piiraa, e no reira, mai ta Paulo i parau i muri aˈe, “te vai nei te tahi pae no te maitiraa a te aroha mau ra.”—Roma 11:5.

14. (a) I te matahiti 36 T.T., ua horoahia te fanaˈoraa taa ê e riro ei melo o te huero pae varua o Aberahama na vai? (b) Nafea to Paulo faahitiraa i to ˈna manaˈo i te ravea i maiti ai Iehova i te mau melo o te Iseraela pae varua?

¹⁴ I te matahiti 36 T.T., a tahi ra te fanaˈoraa taa ê e riro ei melo o te huero pae varua o Aberahama i horoahia ˈi na te feia e ere i te ati Iuda e e ere atoa i te peroseluto. Ua fanaˈo te taata atoa i farii, i te maitai rahi e te faaoromai rahi o Iehova. (Galatia 3:26-29; Ephesia 2:4-7) I to ˈna faahitiraa i te mauruuru rahi no te paari e te fa o te faaoromai rahi e te aroha o Iehova, maoti hoi te reira e noaa ˈi ia ˈna te taatoaraa o te feia i  piihia no te faatia i te Iseraela pae varua, ua parau Paulo e: “Auê te rahi hau ê atu o te paari e te ite o te Atua e! e te imiraa ore o tana faaauraa, e tana mau haerea i te itea ore ia imi e!”—Roma 11:25, 26, 33; Galatia 6:15, 16.

Faaoromai rahi no to ˈna iˈoa

15. Eaha te tumu matamua o te faaoromai rahi o te Atua, e eaha te tumu parau o te titau i te taime no te faatitiaifaro atu?

¹⁵ No te aha Iehova e faaohipa ˈi i te faaoromai rahi? Na mua roa no te faahanahana i to ˈna iˈoa moˈa e te faatia i to ˈna mana arii. (Samuela 1, 12:20-22) Ua titauhia te taime no te faatitiaifaro i te tumu parau morare ta Satani i faahiti no nia i te huru e faaohipa ˈi Iehova i to ˈNa mana arii, ma te mauruuru i mua i te ao taatoa i poietehia. (Ioba 1:9-11; 42:2, 5, 6) No reira, i to to ˈna nunaa faatîtîraahia i Aiphiti, ua parau Iehova ia Pharao e: “No reira mau â hoi au i vaiiho ai ia oe, ei faaiteraa ˈtu ia oe i to ˈu nei mana, e ia faaitehia to ˈu iˈoa e ati noa ˈˈe te ao atoa nei.”—Exodo 9:16.

16. (a) Nafea, maoti te faaoromai rahi o Iehova, te faaineineraahia te hoê pae taata no to ˈna ra iˈoa? (b) Nafea te iˈoa o Iehova e faaraahia ˈi e to ˈna mana arii e faatiahia ˈi?

¹⁶ Ua faahitihia te mau parau a Iehova ia Pharao i to te aposetolo Paulo faataaraa i te tuhaa a te faaoromai rahi o te Atua i roto i te faahanahanaraa i to ˈNa iˈoa moˈa. I muri iho, papai atura Paulo e: “Eaha hoi te Atua, ia hinaaro i te faaite i to ˈna riri, e ia itea to ˈna mana i te faaoromairaa roa i te mau farii no te riri i faaauhia no te pohe ra: e ia hinaaro hoi oia i te faaite i te rahiraa o to ˈna maitai, i te mau farii o te aroha i faaau-atea-hia e ana no te ao; oia hoi tatou nei, o tei parauhia mai e ana, eiaha o to te ati Iuda anaˈe ra, o to te Etene atoa nei râ. O ta ˈna atoa hoi i parau i te peropheta ra ia Hosea e, O te feia e ere i te taata no ˈu ra, e parauhia ïa e au e, e taata no ˈu.” (Roma 9:17, 22-25) No te mea ua faaohipa Iehova i te faaoromai rahi, ua nehenehe ta ˈna e rave mai mai roto mai i te mau nunaa ‘i te hoê pae taata no to ˈna ra iˈoa.’ (Ohipa 15:14) I raro aˈe i to ratou Upoo, o Iesu Mesia, e feia aiˈa taua “feia moˈa” ra i te Basileia ta Iehova e faaohipa no te faaraa i to ˈNa iˈoa rahi e te faatia i to ˈNa mana arii.—Daniela 2:44; 7:13, 14, 27; Apokalupo 4:9-11; 5:9, 10.

 Maoti te faaoromai rahi o Iehova e noaa ˈi te ora

17, 18. (a) Ia nafea tatou e au ai e te faaino ra tatou ia Iehova ma te opua ore no to ˈna faaohiparaa i te faaoromai rahi? (b) Te faaitoitohia ra tatou e nafea ia hiˈo i te faaoromai rahi o Iehova?

¹⁷ Mai te ati rahi o te toparaa matamua o te taata i roto i te hara mai â e tae roa mai ai i teie nei, ua haapapu Iehova e e Atua faaoromai rahi oia. Auaa to ˈna faaoromai rahi hou te diluvi i fanaˈohia ˈi te taime no te faaara ma te tano e i faatiahia ˈi te ravea no te ora. Ua raea râ i to ˈna faaoromai te otia, e ua tae maira te diluvi. Oia atoa i teie tau, te faaite ra Iehova i te faaoromai rahi, e ua maoro aˈe te reira i ta te tahi pae i manaˈo. E ere râ tera i te tumu no te hepohepo. E au ïa e te faaino ra tatou i te Atua i te faaoromai-rahi-raa. Ua ui Paulo e: “Te vahavaha nei anei oe i te hamani maitai rahi a te Atua, e te faaoromai, e te marû, aitâ i ite e, ei faatupu taua maitai a te Atua ra i to oe tatarahapa?”—Roma 2:4.

¹⁸ Aita hoê i roto ia tatou i ite i teihea faito tatou e hinaaro ai i te faaoromai rahi o te Atua ia papu ia tatou e e farii maitai oia ia tatou e ia ora ˈtu. Te aˈo maira Paulo ia tatou ia “rave faaoti hua i to [tatou] ora ma te mǎtaˈu e te rurutaina.” (Philipi 2:12) Ua papai te aposetolo Petero i te mau hoa Kerisetiano e: “Aore te Fatu i faaroaroa i ta ˈna i parau maira, mai ta te tahi pae i parau ra e, e faaroaroa; e faaoromai rahi râ to ˈna ia tatou, aita roa i hinaaro e ia pohe atu te hoê, ia noaa paatoa râ te tatarahapa.”—Petero 2, 3:9.

19. I teihea tuhaa e fanaˈo ai tatou i te faaoromai rahi o Iehova?

¹⁹ No reira, eiaha tatou ia fiu i te huru e faatitiaifaro ai Iehova i te mau mea. E pee anaˈe râ i te aˈoraa a Petero i muri aˈe ‘e parau i te faaoromai rahi o to tatou Fatu ra e o te ora ïa.’ To vai faaoraraa? To tatou e, oia atoa, to te mau taata eita e tia ia taiohia o te hinaaro râ e faaroo i te “evanelia o te basileia.” (Petero 2, 3:15; Mataio 24:14) E tauturu te reira ia tatou ia mauruuru i te rahi o to Iehova faaiteraa i te faaoromai e e turai ia tatou ia faaoromai rahi i roto i to tatou taairaa e vetahi ê.

[Nota i raro i te api]

E nehenehe anei ta outou e faataa?

• I roto i te Bibilia, eaha te auraa o te taˈo ra “faaoromai rahi”?

• Nafea to Iehova faaiteraa i to ˈna faaoromai rahi hou te diluvi, i muri aˈe i te faatîtîraa i Babulonia, e i te senekele matamua T.T.?

• No teihea mau tumu faufaa i faaite ai Iehova i te faaoromai rahi?

• E nafea tatou ia hiˈo i te faaoromai rahi o Iehova e tia ˈi?

[Uiraa haapiiraa]

[Hohoˈa i te api 9]

Maoti te faaoromai rahi o Iehova hou te diluvi i fanaˈo ai te taata i te ravea no te tatarahapa

[Hohoˈa i te api 10]

I muri aˈe i te toparaa o Babulonia, ua fanaˈo te mau ati Iuda i te faaoromai rahi o Iehova

[Hohoˈa i te api 11]

I te senekele matamua, ua fanaˈo te ati Iuda e tei ere i te ati Iuda i te faaoromai rahi o Iehova

[Hohoˈa i te api 12]

Te faaohipa maitai ra te mau Kerisetiano i teie tau i te faaoromai rahi o Iehova