Aamu

Hoê oraraa ruperupe i roto i te taviniraa ia Iehova

FAATIAHIA E RUSSELL KURZEN

Ua fanauhia vau i te 22 no Tetepa 1907, e hitu matahiti hou te tau e ore e moehia o tei haamata e te tupuraa o te Tamaˈi Rahi Matamua. E fetii ruperupe roa to matou. I to ˈu manaˈo, e farii outou i te reira i muri aˈe i te taioraa i te tahi mau parau rii o to matou aamu.

EI POTII, te imi aˈena ra o Mamaû Kurzen i te parau mau no nia i te Atua. Hou oia a riro mai ai ei taurearea, ua tere oia na roto i te tahi mau ekalesia taa ê i roto i to ˈna oire tumu nehenehe o Spiez, i Herevetia. I te matahiti 1887, tau matahiti i muri aˈe i to ˈna faaipoiporaa, to roto te fetii Kurzen i te feia ěê e tae atura i te mau Hau Amui no Marite.

Ua parahi te fetii i Ohio, e i reira i te area matahiti 1900, ua itea mai ia Mamaû te taoˈa faufaa ta ˈna i imi noa na. Tei roto ïa i te mau api o te buka a Charles Taze Russell Ua fatata te tau na roto i te reo Heremani. Ua taa oioi aˈera ia ˈna e tei roto te maramarama o te parau mau bibilia i te mea ta ˈna e taio ra. Noa ˈtu e aita Mamaû i ite maitai i te taio i te reo Beretane, ua tamatahiti oia ia ˈna i Te Pare Tiairaa na roto i te reo Beretane. Mea na reira oia i ite hau atu â ˈi i te mau parau mau bibilia e i te reo Beretane i te hoê â taime. Aita roa ˈtu Papaû i anaanatae i te mau mea pae varua mai ta ˈna vahine.

I roto i na 11 tamarii a Mamaû Kurzen, e 2 o ta ˈna nau tamaroa, o John raua o Adolph tei poihere i te taoˈa faufaa pae varua tei itea mai ia ˈna. O John to ˈu papa, e ua bapetizohia oia i te matahiti 1904 i te hoê tairururaa a te Feia haapii Bibilia, te mau Ite no Iehova i teie mahana, i tupu i Saint Louis, i Missouri. I te mea e aita i rahi te moni a te rahiraa o te Feia haapii Bibilia, ua faanahohia te tairururaa i te hoê â taime e te Foire  rahi i Saint Louis ia nehenehe ratou e fanaˈo i te mau titeti pereoo auahi mâmâ. I muri aˈe, i te matahiti 1907, ua bapetizohia te taeae o to ˈu papa o Adolph i te hoê tairururaa i tupu i Niagara Falls, i New York. Ua poro to ˈu papa e te taeae o to ˈu papa ma te itoito roa i te mea ta raua i haapii i roto i te Bibilia, e ua riro maira raua toopiti ei tavini taime taatoa (parauhia i teie mahana pionie).

No reira, i to ˈu fanauraahia mai i te matahiti 1907, mea ruperupe aˈena to ˈu fetii i te pae varua. (Maseli 10:22) E aiû noâ vau i te matahiti 1908 i to to ˈu nau metua o John raua o Ida afairaa ia ˈu i te tairururaa “I te upootiaraa ra” i Put-in-Bay, i Ohio. Na Joseph F. Rutherford, te hoê tavini ratere i tera ra tau, i peretiteni i te tairururaa i reira. Tau hebedoma na mua ˈtu, ua tere atu oia i Dalton, i Ohio, ua haere mai oia i ǒ matou e ua horoa i te tahi mau oreroraa parau i mua i te Feia haapii Bibilia no reira.

Parau mau, aita vau iho e haamanaˈo ra i teie mau ohipa, te haamanaˈo ra râ vau i te tairururaa i tupu i Mountain Lake Park, i Maryland, i te matahiti 1911. I reira hoi to mâua Esther, to ˈu teina, farereiraa ia Charles Taze Russell, o tei tiaau na i te mau ohipa pororaa a te Feia haapii Bibilia i te ao atoa nei.

I te 28 no Tiunu 1914, te mahana i topa ˈi te ao i roto i te tamaˈi i te taparahi-pohe-raahia te tamaiti hui arii ra o Ferdinand e ta ˈna vahine i Sarajevo, ua haere au na muri i to ˈu utuafare i te hoê tairururaa hau i Columbus, i Ohio. Mai taua mau matahiti matamua mai ra, ua nehenehe au e haere i te mau tairururaa e rave rahi a te nunaa o Iehova. E ruru mai fatata hoê hanere noa taata i te tahi mau tairururaa. I te tahi atu, mea rahi atu ïa o te ruru mai i nia i te tahi o te mau tahua tuaro rarahi aˈe i te ao nei.

To matou fare i te hoê vahi faufaa mau

Mai te area matahiti 1908 e tae atu i te matahiti 1918, e faatupuhia te mau putuputuraa a te hoê amuiraa nainai a te Feia haapii Bibilia i to matou fare i Dalton, i ropu ia Pittsburgh, i Pennsylvanie, e ia Cleveland, i Ohio. Ua riro to matou fare ei fare fariiraa i te mau taeae orero ratere e rave rahi. E taamu ratou i to ratou pereoo hutihia e te puaahorofenua i muri mai i ta matou fare vairaa puaatoro e e faatia mai ratou i te mau aamu anaanatae e te tahi atu â mau parau mau pae varua i te feia i ruru mai. E mau tau faaitoito mau â tera!

E orometua haapii tamarii o Papa, tera râ, to nia to ˈna feruriraa i te ohipa haapiiraa rahi  roa ˈˈe oia te taviniraa Kerisetiano. Ua haapao maite oia i te haapii i to ˈna utuafare no nia ia Iehova, e i te mau po atoa, e pure matou te utuafare taatoa. I te tau uaaraa tiare i te matahiti 1919, ua hoo atu o Papa i to matou pereoo hutihia e te puaahorofenua, e ua hoo mai i te hoê Ford 1914 no te hoê hoo 175 dala Marite ia nehenehe oia e farerei e rave rahi atu â taata i roto i te ohipa pororaa. I te matahiti 1919 e i te matahiti 1922, ua afai taua pereoo ra i to matou utuafare i te mau tairururaa faahiahia roa a te Feia haapii Bibilia i Cedar Point, i Ohio.

Ua rave to matou utuafare taatoa—o Mama; o Papa; o Esther; to ˈu teina o John; e o vau—i te ohipa pororaa i mua i te taata. Te haamanaˈo maitai ra vau i te taime matamua a ui mai ai te hoê fatu fare i te hoê uiraa bibilia. E hitu noa matahiti to ˈu. “E aiû, eaha te Aramagedo?” ta te taata ïa i ui mai. Ua tauturu rii mai to ˈu papa, e ua nehenehe au e horoa ˈtu i te pahonoraa a te Bibilia.

Te raveraa i te taviniraa taime taatoa

I te matahiti 1931, ua haere to matou utuafare i te tairururaa i tupu i Columbus, i Ohio, i reira to matou oaoaraa i te farii i te iˈoa apî, te mau Ite no Iehova. No to John oaoa i te rahi, ua faaoti oia e e rave mâua i te taviniraa pionie. * Ua na reira mâua, e oia atoa o Mama, o Papa, e o Esther. Auê ïa taoˈa faufaa mau ta matou—te hoê utuafare tahoê i roto i te ohipa oaoa, oia hoi te pororaa i te parau apî maitai o te Basileia o te Atua! Eita roa ˈtu vau e fiu i te haamauruuru ia Iehova no teie haamaitairaa. Mea oaoa roa matou, tera râ, e rave rahi atu â mau ohipa oaoa o te tiai maira ia matou.

I te avaˈe Fepuare 1934, ua haamata vau i te tavini i te pu rahi a te mau Ite no Iehova (parauhia Betela) i Brooklyn, i New York. Ua haere atoa mai o John tau hebedoma i muri aˈe. Hoê â to mâua piha e tae noa ˈtu i to ˈna faaipoiporaa i ta ˈna vahine here ra o Jessie, i te matahiti 1953.

I muri aˈe i to mâua John ôraa i te Betela, ua farii to matou nau metua e tavini ei pionie i te mau vahi rau o te fenua e ua apee o Esther e ta ˈna tane o George Read ia raua. Ua tamau noa to matou nau metua i te tavini ei pionie e hope noa ˈtu ai ta raua hororaa i te fenua nei i te matahiti 1963. Ua aratai o Esther e ta ˈna tane i te hoê utuafare maitai, e ua haamaitaihia vau i te mau tamarii fetii ta ˈu e here roa.

Ohipa e auhoaraa i te Betela

Ua faaohipa o John i to ˈna ite i te anohaa i te Betela e ua haa amui oia e te tahi atu mau melo o te Betela i nia i te tahi mau opuaraa mai te hamaniraa i te mau matini faataˈi pehe mea amo. E mau tausani Ite no Iehova tei faaohipa i te reira i roto i ta ratou taviniraa na te mau fare. Ua tauturu atoa o John i te opuaraa e te hamaniraa i te mau matini no te puohu e no te tapao i te mau vea e haponohia i te feia tei tamatahiti ia ratou.

Ua haamata vau i ta ˈu taviniraa i te Betela i te tuhaa tahoêraa i te mau buka. I taua tau ra, na te tahi atu feia apî e haapao ra i te neneiraa, e te tavini noa nei ratou ma te haapao maitai i te Betela. Te vai ra o Carey Barber e o Robert Hatzfeld. Ta ˈu e haamanaˈo maitai ra, o Nathan Knorr ïa, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, e o John Perry, ua pohe hoi ratou paatoa. Ua rave ratou i te ohipa ma te haapao maitai i tera e tera matahiti, ma te ore roa ˈtu e amuamu aore ra e titau i te hoê “tiaraa teitei.” No te tahi râ o teie mau Kerisetiano taiva ore tei faatavaihia i te varua, ua fanaˈo ïa ratou i te mau hopoia rahi atu â a maraa ˈi te faanahonahoraa. Ua tavini atoa te tahi i roto i te Tino Aratai a te mau Ite no Iehova.

Na roto i te haaraa e teie mau taeae tei rave i te mau haapaeraa, ua huti mai au i te hoê haapiiraa faufaa. I roto i te ao, e aufauhia te mau rave ohipa no ta ratou ohipa i rave. Tera ïa ta ratou haamauruururaa. Area te taviniraa i te Betela râ, e horoa mai ïa i te mau haamaitairaa rahi i te pae varua, e o te mau tane e te mau vahine puai i te pae varua anaˈe te mauruuru no taua mau haamauruururaa ra.—Korinetia 1, 2:6-16.

Na Nathan Knorr, tei ô mai i te Betela i to ˈna  taurearearaa ra i te matahiti 1923, i tiaau i te neneiraa i te mau matahiti 1930. I te mau mahana atoa, e hahaere oia na te vahi neneiraa e e aroha oia i te rave ohipa taitahi. Ua mauruuru matou e mea apî hoi i te Betela no to ˈna haapaoraa mai ia matou. I te matahiti 1936, ua tae mai ta matou matini neneiraa apî no Heremani mai, e ua fifihia te tahi mau taeae apî i te tamauraa i te matini. Ua oomo aˈera o Taeae Knorr i te hoê ahu ohipa e ua haa ˈtura e te mau taeae e hau atu i te hoê avaˈe i te maoro e tae noa ˈtu i te taime a tere ai te matini.

E taata rave puai o Taeae Knorr i te ohipa, eita e noaa i te rahiraa o matou e pee ia ˈna. Ua ite atoa râ oia nafea ia faaanaanatae. I muri aˈe atoa i to ˈna fanaˈoraa i te hopoia e tiaau i te mau ohipa pororaa a te mau Ite no Iehova i te ao atoa nei i te avaˈe Tenuare 1942, e hauti oia i te tahi taime i te base-ball e te mau melo o te Betela e te feia haapii o te haapiiraa mitionare no Gileada i te fare haapiiraa i pihai ia South Lansing, i New York.

I te avaˈe Eperera 1950, ua haere te fetii o te Betela e faaea i roto i to matou fare nohoraa 10 tahua i hamani-apî-hia i te 124 Columbia Heights, i Brooklyn, i New York. E ô roa matou paatoa i roto i te piha tamaaraa apî ia tamaa matou. I te roaraa o na toru matahiti paturaa o teie fare, aita matou i nehenehe e faatupu i ta matou haamoriraa poipoi. Mea oaoa mau â i to matou rave-faahou-raa i taua porotarama ra! Ua haaparahi o Taeae Knorr ia ˈu i pihai ia ˈna i te airaa maa a te peretiteni ia nehenehe au e haamanaˈo ia ˈna i te iˈoa o te mau melo apî aˈe o to matou fetii. E 50 matahiti i te maoro to ˈu parahiraa i taua noâ vahi ra no te haamoriraa poipoi e no te inuraa taofe. E i te 4 no Atete 2000, ua tapirihia taua piha tamaaraa ra, e ua tuuhia vau i roto i te hoê o te mau piha tamaaraa i faaapîhia i te Towers Hotel tahito.

I te hoê taime i te mau matahiti 1950, ua rave au i te ohipa i te neneiraa i nia i te hoê linotype, e faaineine hoi au i te mau lignes-blocs o te amuihia i nia i te mau api, hoê tuhaa teie o te hamaniraa i te mau clichés. Aita vau i au maitai i tera ohipa, no te maitai rahi râ o William Peterson, te taata haapao i te mau matini, i nia ia ˈu, ua oaoa vau i to ˈu haaraa i reira. E i te matahiti 1960, ua hinaarohia te rima tauturu no te peni i te fare nohoraa i hamani-apî-hia i te 107 Columbia Heights. Ua oaoa vau i te tauturu atu i te faaineineraa i teie mau fare apî no to matou fetii o te Betela e rahi maira.

I muri rii noa ˈˈe i te otiraa te fare tahua i te 107 Columbia Heights i te penihia, ua maere au i te horoaraahia mai te ohipa fariiraa i te mau ratere i te Betela. Mea faahiahia mau â na 40 matahiti i mahemo i to ˈu haaraa i te tuhaa fariiraa taata i te Betela. Noa ˈtu e e mau ratere aore ra e mau melo apî o te fetii o te Betela te haere mai e mataitai i te Betela, mea oaoa ia feruri i te mau faahopearaa o ta matou tutavaraa amui e turu i te maraaraa o te Basileia.

Mea au roa na ratou e haapii i te Bibilia

Mea ruperupe to matou fetii o te Betela i te pae varua no te mea e mea au na matou te Bibilia. I to ˈu ôraa mai i te Betela, ua ui au ia Emma Hamilton, te hoê correctrice, ehia taime to ˈna taioraa i te Bibilia. “E 35 taime,” ta ˈna ïa i pahono mai, “e aita vau e numera faahou ra.” Ua matau Anton Koerber, te tahi atu Kerisetiano haapao maitai o tei tavini i te Betela i te hoê â taime e o Emma, i te parau e: “A tuu noa i te Bibilia i te hoê vahi mea ohie ia rave mai.”

I muri aˈe i to Taeae Russell poheraa i te matahiti 1916, na Joseph F. Rutherford i haapao i te mau hopoia i te pae o te faanahonahoraa ta Russell i amo na. E taata orero puai o Rutherford i mua i te taata i to ˈna parururaa i te mau Ite no Iehova a haavahia ˈi ratou i mua i te Tiripuna Teitei o te mau Hau Amui no Marite. I muri aˈe i to Rutherford poheraa i te matahiti 1942, na Taeae Knorr i mono mai ia ˈna e ua haa puai roa oia i te haamaitai i to ˈna aravihi e paraparau i mua i te taata. I te mea e to pihai noa to ˈu piha i to ˈna, e faaroo pinepine au ia ˈna ia faahiti na nia iho noa i ta ˈna mau oreroraa parau. I muri aˈe, maoti ta ˈna mau tutavaraa tuutuu ore, ua riro mai oia ei taata orero aravihi i mua i te taata.

I te avaˈe Fepuare 1942, ua haamau o Taeae Knorr i te hoê porotarama no matou paatoa, te mau taeae i te Betela, no te haamaitai i to matou aravihi e horoa i te haapiiraa e e paraparau. Ua  niuhia te haapiiraa i nia i te maimiraa bibilia e te paraparauraa i mua i te taata. I te haamataraa, ua faataahia e e horoa matou taitahi i te tahi mau tumu parau poto no nia i te tahi mau taata o te Bibilia. Ta ˈu tumu parau matamua, no nia ïa i te taata ra o Mose. I te matahiti 1943, ua haamatahia te hoê â haapiiraa i roto i te mau amuiraa a te mau Ite no Iehova, e te rave-noa-hia ra te reira e tae mai i teie mahana. I te Betela, ua tuuhia te faufaaraa i nia i te titauraa i te ite bibilia e te faaohiparaa i te mau ravea haapiiraa maitatai.

I te avaˈe Fepuare 1943, ua haamata te piha matamua o te haapiiraa mitionare i Gileada. I teie nei, no faatuite-noa-hia ˈtura te 111raa o te piha haapiiraa no Gileada! E hau atu i te 58 matahiti i te maoro, ua faaineine teie haapiiraa e hau atu i te 7 000 taata no te taviniraa mitionare na te ao nei. E tapao tatou e i te matahiti 1943 i te haamataraa te haapiiraa, ua hau rii noa i te 100 000 Ite no Iehova na te ao nei. I teie nei, e hau atu ïa i te 6 000 000 o te poro ra i te parau apî maitai o te Basileia o te Atua!

Mauruuru no ta ˈu tufaa pae varua

Na mua noa ˈˈe i te haamauraahia te haapiiraa Gileada, e toru o matou melo o te Betela tei tonohia i roto i te mau amuiraa e ati aˈe te mau Hau Amui no Marite. E faaea matou hoê mahana, tau mahana, aore ra hoê hebedoma atoa no te faaitoito i teie mau amuiraa i te pae varua. E parauhia matou e mau tavini no te mau taeae, ua tauihia tera iˈoa i muri aˈe ei tavini haaati, aore ra tiaau haaati. I muri rii noa ˈˈe râ i te haamataraa te haapiiraa Gileada, ua anihia mai ia ˈu e hoˈi mai no te faatere i te tahi mau haapiiraa. Ua tavini au ei orometua haapii tamau i te 2raa e tae atu i te 5raa o te mau piha, e ua mono atoa vau i te hoê o te mau orometua haapii no te haapao i te 14raa o te piha. Na roto i te haamanaˈoraa e te feia haapii i te mau ohipa matamua faahiahia i tupu i roto i te tuatapaparaa no teie tau  o te faanahonahoraa a Iehova—mea rahi hoi ta ˈu e nehenehe e faatia no te mea ua farerei au i te reira—ua rahi atu â to ˈu mauruuru no ta ˈu tufaa rahi i te pae varua.

Te tahi atu â haamaitairaa taa ê ta ˈu i fanaˈo i te roaraa o te mau matahiti, o te haereraa ïa i te mau tairururaa nunaa rau a te nunaa o Iehova. I te matahiti 1963, ua haaati au i te ao e e hau atu i te 500 tia no te haere i te mau tairururaa “Parau apî maitai mure ore.” Te tahi atu â mau tairururaa faufaa roa ta ˈu i haere, o tei faatupuhia ïa i Varsovie, i Poronia, i te matahiti 1989; i Berlin, i Heremani, i te matahiti 1990; e i Moscou, i Rusia, i te matahiti 1993. I te tairururaa taitahi, ua nehenehe au e farerei i te tahi o to ˈu mau taeae e tuahine here o tei faaruru i te mau ahuru matahiti hamani-ino-raa i raro aˈe i te faatereraa Nazi, te faatereraa Communiste, aore ra na faatereraa e piti. E mau tupuraa teie o tei haapuai i te faaroo!

E oraraa ruperupe mau â to ˈu i te pae varua i roto i te taviniraa ia Iehova! E ore roa ˈtu te mau haamaitairaa pae varua e pau. E rahi atu tatou i te opere i teie mau taoˈa faufaa roa, e rahi atu â ïa ta tatou faufaa, eiaha râ te mau taoˈa materia. I te tahi taime, e faaroo vau i te tahi pae ia parau e mea au aˈe na ratou eiaha ratou e arataihia ei Ite no Iehova. I to ratou manaˈo, e hau atu â ratou i te poihere i te mau parau mau bibilia ahiri ratou i ora na mua i rapaeau i te faanahonahoraa a te Atua.

E peapea noa vau ia faaroo vau i te feia apî ia faahiti i tera mau parau, no te mea e te na ô ra ïa ratou e mea maitai aˈe ahiri e aita ratou i arataihia i roto i te ite i te mau eˈa o Iehova. A feruri na râ i te mau peu iino atoa e te mau manaˈo viivii e tia i te taata ia haapae ia ite ratou i te parau mau bibilia i muri aˈe i roto i to ratou oraraa. E mauruuru rahi noa vau e ua aratai to ˈu nau metua i ta raua na tamarii e toru na nia i te eˈa o te parau-tia. Ua riro noa o John ei tavini haapao maitai a te Atua e tae noa ˈtu i to ˈna poheraa i te avaˈe Tiurai 1980, e e Ite taiva ore noa o Esther i teie mahana.

E haamanaˈo vau ma te here rahi i te mau auhoaraa maitatai e rave rahi ta ˈu i fanaˈo e te mau taeae e mau tuahine Kerisetiano haapao maitai. E 67 matahiti faahiahia i teie nei to ˈu taviniraa i te Betela. Noa ˈtu e aita roa ˈtu vau i faaipoipo, mea rahi ta ˈu mau tamaiti e mau tamahine pae varua, e mau mootua pae varua atoa. E te oaoa nei au i te manaˈo i te taatoaraa o te mau melo apî here o to matou fetii rahi i te pae varua ta ˈu i farerei, mea faufaa hoi te melo taitahi. Mea tano iho â teie mau parau: “Na Iehova te [haamaitairaa e taoˈahia ˈi tatou].”—Maseli 10:22; MN.

[Nota i raro i te api]

[Hohoˈa i te api 20]

Mai te pae aui i te pae atau: to ˈu papa e to ˈu taeae o John i nia i to ˈna turi, o Esther, o vau, e to ˈu mama

[Hohoˈa i te api 23]

Te haapii ra vau i te hoê piha no Gileada i te matahiti 1945

I nia i te pae atau: Na orometua haapii no Gileada o Eduardo Keller, Fred Franz, o vau, e o Albert Schroeder

[Hohoˈa i te api 24]

Te feruri ra vau i to ˈu oraraa ruperupe i roto i te taviniraa ia Iehova