“Mahana e faatiahia ˈi te mau huru haapaoraa”

NO TO ˈNA maere i to ˈna tauaparauraa e te mau Ite no Iehova, e faataa te vahine faatere o te hoê fare haapiiraa i Poronia i te hoê “mahana e faatiahia ˈi te mau huru haapaoraa” no ta ˈna fare haapiiraa. Ua ani oia e ia faaineine te mau taurearea haere haapiiraa o te hinaaro—te mau Katolika, te mau Bouddhistes, e te mau Ite no Iehova—i te tahi mau vauvauraa poto ia ite te tahi atu mau taurearea haere haapiiraa i ta ratou mau tiaturiraa e mau ohipa. E toru Ite no Iehova apî tei farii oioi i te reira.

A tae ai i taua mahana ra, o Malwina, 15 matahiti, tei paraparau na mua. Teie te tahi mau parau ta ˈna i faahiti: “Mea rahi o outou tei ite o vai matou hou tatou a haamata ˈi i te haere mai i teie fare haapiiraa no te mea ua haere atu matou i ǒ outou ra. E uiui paha outou no te aha matou e tamau noa ˈi i te haere i ǒ outou ra. No te mea ïa e te pee ra matou i te hiˈoraa o Iesu Mesia, na ˈNa hoi i haamau i te Kerisetianoraa. Ua poro oia i te parau apî maitai o te Basileia o te Atua i te mau vahi atoa to reira te taata. Ua rave atoa te mau aposetolo e te tahi atu mau Kerisetiano matamua i teie ohipa. I te mau vahi e rave rahi, te faaruru ra te mau Ite no Iehova i te mau tamataraa fifi i to ratou faaroo, te oaoa nei râ matou e te fanaˈo nei matou i te hau i ta tatou fare haapiiraa, auaa outou paatoa. Mauruuru ia outou no te reira!”

No te faaoti i ta ˈna vauvauraa, ua parau o Malwina e: “Te vai ra te tahi atu â tumu e haere ai matou i ǒ outou ra. Te tapitapi nei matou no outou. Ua parau te Bibilia e e fatata te huitaata i te faaruru i te mau tupuraa o te faaueue i te ao. No reira, ia patoto atu te mau Ite no Iehova i to outou opani, a rave na i te taime no te faaroo ia ratou. E hinaaro matou e faataa ia outou nafea tatou e nehenehe ai e ora amui e a muri noa ˈtu i nia i te hoê fenua paradaiso.”

O Mateusz, 15 matahiti atoa, to muri iho. Ua faataa Mateusz i te taatoaraa e faaroo ra ia ˈna e i te roaraa o te mau matahiti, ua faaohipa te mau Ite no Iehova e rave rau ravea no te haaparare i te parau apî maitai. Ei hiˈoraa, i te matahiti 1914—i te roaraa o te tau o te mau hohoˈa teata vava—ua faaite te mau Ite i te “Photo-Drame de  la Création,” te hoê pataraa hohoˈa teata hautiuti ore ma te mau pehe.

Ua faataa o Mateusz i te tuhaa a te radio i roto i te haaparareraa i te poroi o te Basileia e te ravea otahi roro uira parauhia MEPS ta te mau Ite no Iehova i hamani. Ua faatia atoa oia nafea to te mau Ite no Iehova tautururaa i te mau taote ia ite ratou i te tahi mau ravea rapaauraa aita e pâmuraa toto. “I teie nei, te haapopou ra te mau taote rahi no Poronia i to matou tiaraa, e i te mau matahiti atoa, te rahi noa ˈtura te feia maˈi e ere i te Ite o te tâpûhia ra ma te ore e pâmuhia i te toto,” ta ˈna ïa i parau.

Te parau hopea a Mateusz, o te hamaniraa ïa i te mau Piha a te Basileia e ua na ô oia e: “E hinaaro anei outou e mataitai i ta matou mau piha? E ere i te mea tamoni, e aita e ohiraa moni.” Teie ta Mateusz i parau no nia i te fare tairururaa i Sosnowiec: “E tia ia mataitai outou i teie fare rahi. No te aha tatou paatoa e ore ai e haere i ǒ? E manaˈo to matou, e na to tatou hoa o Katarzyna e faaite atu eaha.”

I muri iho, ua parau o Katarzyna, 15 matahiti, ma te oaoa e: “E farii-popou-hia outou ia haere outou i Sosnowiec no te tairururaa mataeinaa a te mau Ite no Iehova. E hiˈopoahia te mau tumu parau no nia i te feia apî.” Ua faahiti atoa o Katarzyna i te oroa faufaa no te mau Kerisetiano—te oroa Haamanaˈoraa o te poheraa o Iesu Mesia. Ua faaitoito oia i te feia e faaroo ra e: “I te matahiti i mahemo, ua hau atu i te 14 mirioni taata i te ao nei tei haere i taua oroa ra. No te aha outou e ore ai e haere atoa mai i mua nei?”

I muri aˈe i ta ratou vauvauraa, ua pûpû o Malwina, Mateusz, e o Katarzyna na te mau orometua haapii i te buka Les Témoins de Jéhovah: Prédicateurs du Royaume de Dieu e e piti ripene video no nia i te mau tiaturiraa e te mau ohipa a te mau Ite no Iehova. * Ua farii te mau orometua haapii i te reira ma te oaoa e ua parau ratou e e faaohipa ratou i te reira i roto i te mau piha tuatapaparaa.

I te pae hopea, ua hauti o Martyna i te himene ra “Mauruuru, Iehova” no te taatoaraa i putuputu mai. Ua “itoito” teie mau Ite apî ‘i to ratou Atua’ e ua horoa i te hoê faaiteraa maitai. (Tesalonia 1, 2:2) Auê ïa hiˈoraa maitai roa no te mau Ite apî i te mau vahi atoa!

[Nota i raro i te api]

[Hohoˈa i te api 26]

Te maiti ra o Katarzyna i te tahi mau irava no te vauvauraa

[Hohoˈa i te api 26]

Te faaineine ra Malwina i te vauvauraa tau mahana hou e hohora ˈtu ai i te fare haapiiraa