“E farerei tâua i roto i te Basileia o te Atua”

“E to ˈu hoa here Rupert, i teie mahana, ua faautuahia vau i te utua pohe. Eiaha e oto ia ˈu. Te faatae atu nei au i to ˈu aroha ia oe e i te mau taata atoa i roto i te fare. E farerei tâua i roto i te Basileia o te Atua.”

I TE 8 no Tiunu 1942, ua papai Franc Drozg i teie mau parau tau minuti noa a pupuhihia ˈi oia e te mau faehau Nazis. No te aha oia i haapohehia ˈi?

Ia au i te mau haapueraa parau i roto i te Museum of National Liberation i Maribor, i Slovénie, ua patoi teie taata tupai auri e 38 matahiti i te apiti atu i roto i te Wehrmannschaft, te hoê pǔpǔ faehau taa ê a te nuu Heremani i Slovénie, haruhia e te Heremani. E Bibelforscher aore ra e Taata haapii Bibilia oia, te iˈoa ïa o te mau Ite no Iehova i taua fenua ra. Ma te ohipa ia au i te Isaia 2:4, eita oia e turu i te tutavaraa tamaˈi a te Nazi, ma te faaite ia ˈna ei melo huiraatira o te Basileia o te Atua.—Mataio 6:33.

I to ˈna iho oire o Ptuj, ua matauhia Franc mai te hoê taata poro itoito i te parau apî maitai o te Basileia o te Atua. (Mataio 24:14) Noa ˈtu te mau ati e rave rahi, ua poro oia i te parau apî maitai ma te tuutuu ore e tae roa ˈtu i to ˈna haruraahia i te avaˈe Me 1942.

Ua hamani-ino-uˈana-hia te mau Ite no Iehova Slovènes e rave rahi e te mau Nazis. O Franc te hoê o te feia matamua o ratou tei haapohehia no ta ˈna mau tiaturiraa faaroo. Mai te mau Kerisetiano no te senekele matamua, ua haapuaihia oia e teie mau parau: “E na roto tatou i te pohe rahi e ô atu ai i te basileia o te Atua ra.” (Ohipa 14:22) Te ite-maitai-hia ra to ˈna tiaturiraa i te vai-mau-raa o taua faatereraa ra i nia i te raˈi i roto i ta ˈna mau parau hopea, “E farerei tâua i roto i te Basileia o te Atua.”

[Faaiteraa i te fatu o te hohoˈa i te api 32]

Franc Drozg: Photo Archive-Museum of National Liberation Maribor, Slovénie; rata: Ua vaiihohia te rata matamua i roto i te Museum of National Liberation Maribor, Slovénie