E nafea outou i mua i te huru haavare?

I ROTO i te ô i Getesemane, ua haere o Iuda Isakariota ia Iesu ra e “ua hôˈi maira ia ˈna.” Mea matauhia teie faaiteraa i te here. E ravea noa râ teie na Iuda no te faaite o vai o Iesu i te feia i haere mai i te po e haru ia Iesu. (Mataio 26:48, 49) E taata aau haavare o Iuda—e taata o te haavarevare, o te faaite i te hoê huru haavare ore no te huna i to ˈna mau hinaaro iino. Te auraa o te taˈo Heleni i hurihia ei “taata aau haavare,” oia ïa “te hoê o te pahono” e oia atoa te hoê taata hauti teata. I muri aˈe, ua faataa te taˈo i te hoê taata o te haavarevare no te faahema ia vetahi ê.

E nafea outou i mua i te huru haavare? E riri anei outou, ei hiˈoraa, ia hiˈo outou e te faaitoito ra te feia hamani avaava i te puhipuhiraa i te avaava noa ˈtu te haapapuraa a te mau taote e mea atâta te reira? E riri anei outou i te huru haavare o te feia haapao o te rave ino ra i te mau taata ta ratou e haapao ra? E mauiui anei outou ia ite outou e e ere i te hoa haapao maitai te taata ta outou i manaˈo e e hoa mau? Eaha te ohiparaa a te huru haavare faaroo i nia ia outou?

“Auê outou . . . E haavare outou!”

A hiˈo na i te huru faaroo i vai na i to Iesu parahiraa i te fenua nei. Ua parau te mau papai parau e te mau Pharisea e e mau orometua haapii taiva ore ratou i te Ture a te Atua, te tanoraa râ, ua faaî ratou i te feruriraa o te taata i te mau haapiiraa taata o tei tuu i te Atua i te hiti. Ua onoono maite te mau papai parau e te mau Pharisea i nia i te ture, aita râ ratou i tâuˈa i te mau manaˈo tumu faufaa o te faaite ra i te here e te aau aroha. I mua i te taata, ua faahua parau ratou e mea haapao roa ratou i te Atua, o ratou anaˈe râ, mea ino roa ïa ratou. Aita roa ˈtu ta ratou mau ohipa i tuati i ta ratou mau parau. Ta ratou fa i na reira ˈi ratou, ‘ia hiˈohia mai ïa ratou e te taata.’ E au ratou i “te mau vairaa tupapau i faateateahia ra, o tei nehenehe i rapae au aˈe, area o roto ra, ua î ïa i te ivi taata pohe, e te mea faufau.” I to ˈna faaiteraa ma te mǎtaˈu ore i to ratou huru haavare, ua parau pinepine Iesu ia ratou e: “Auê outou, e te mau papai e te mau Pharisea, e haavare outou!”—Mataio 23:5, 13-31.

Ahiri outou i ora na i taua tau ra, eita roa ˈtu paha outou, mai te tahi atu â mau taata aau haavare ore, e au i taua huru haavare faaroo ra. (Roma 2:21-24; Petero 2, 2:1-3) Tera râ, e vaiiho anei outou e ia faainoino roa te huru haavare o te mau papai parau e o te mau Pharisea ia outou e tae roa i nia i te hoê faito e patoi ai outou i te mau haapaoraa atoa, tae noa ˈtu i te haapaoraa i haapiihia e i ravehia e Iesu Mesia e ta ˈna mau pǐpǐ? Eita anei te reira e faaino ia outou?

E nehenehe tatou e au ore i te haapaoraa ia ite tatou i te haerea haavare o te mau taata faaroo. Tera râ, e tapea atoa teie huru ia tatou eiaha e ite maite i te haavare ore o te feia haamori mau. Oia mau, e nehenehe te mau patu iho ta tatou e faatia no te paruru ia tatou i te huru haavare e faaatea ê ia tatou i te mau hoa mau. No reira, ia riro to tatou huru i mua i te huru haavare ei mea tano e te au noa.

“A haapao maitai na”

Na mua, mea titauhia ia haapii tatou i te ite o vai te feia aau haavare. E ere i te mea ohie noa. Ua haapii te hoê utuafare i te reira ma te  haapaeraa rahi. Ua topa te mama i roto i te coma. No te horo i te fare maˈi i te haavaraa no te hape o te rapaauraa, ua tarahu te utuafare i te hoê paruru, e orometua atoa teie paruru i roto i te hoê ekalesia no to ratou oire. Noa ˈtu e ua aufau te fare maˈi e 3,4 mirioni dala Marite, ua rahi atu â te ati o te utuafare. Ua pohe te mama ei vahine veve, e aita e moni no te aufau i to ˈna hunaraa. No te aha? No te mea ua eiâ te paruru i te rahiraa o te moni. Teie te tatararaa a te hoê parau faataa haavaraa no nia i teie paruru: “Mai te peu e te poro ra oia i te huru haerea ta ˈna e pee ra . . . , teie paha ïa ta ˈna poroi: e taviri anaˈe.” Nafea tatou e paruru ai ia tatou i tera mau huru taata?

“A haapao maitai na,” o te manaˈo paari ïa ta Iesu i horoa na te feia i to ˈna ra tau o tei faaruru i te huru haavare faaroo. (Mataio 16:6, MN; Luka 12:1) Oia, e tia ia tatou ia haapao maitai. E faaite haere paha te taata i te tahi mau opuaraa maitai roa ˈˈe ma te haavare ore, tera râ, mea hinaarohia ia vai ara tatou ma te au noa e ia ore e farii oioi i te taata atoa ia au i to ratou huru rapaeau. Eita anei tatou e hiˈopoa maitai i ta tatou moni mai te peu e ua ite tatou e te vai ra te moni haavare?

Ua fa mai te mau taata aau haavare i roto atoa i te amuiraa Kerisetiano mau. Na te pǐpǐ ra o Iuda i faaara mai no nia ia ratou: “E porao ïa ratou i ta outou mau oroa aroha ra; ia amu ratou e outou atoa ra, te amu ra ïa ratou ma te mǎtaˈu ore: mai te ata pape ore ïa ratou i pee haere noa i te mataˈi ra; mai te raau mǎrô ra, aore e hoturaa.”—Iuda 12.

Te auraa e “haapao maitai” tatou, oia ïa e ape tatou i te taata e faahema ia tatou, te hoê o te parau e e taata î oia i te here, te tanoraa râ, e taata miimii ïa oia o te turu ra i te mau manaˈo aita i roto i te Parau a te Atua. Mai te hoê mato oeoe i raro aˈe noa mai i te pape manina, e nehenehe taua taata ra e faairi i te pae varua i te taata aita e vai ara ra. (Timoteo 1, 1:19) E nehenehe te taata aau haavare e tǎpǔ i te tamǎrûraa rahi i te pae varua, area râ, e “ata pape ore” te reira—o te ore e horoa mai i te ûa. Mai te hoê tumu raau hotu ore, aita ta te hoê taata faahema e hotu Kerisetiano mau. (Mataio 7:15-20; Galatia 5:19-21) Oia, mea hinaarohia ia haapao maitai tatou i tera mau taata faahema. E tia râ ia tatou ia na reira ma te ore e manaˈo ino i te taata atoa.

“Eiaha e faaino”

Mea ohie roa no te taata tia ore ia faaite i te mau hape a vetahi ê eiaha ta ratou iho! No teie râ huru e naea-ohie-hia ˈi tatou i te huru haavare. “E tera ra haavare e!” ta Iesu ïa i parau. “E mata na i te iriti i te raau rahi i roto i to oe iho mata; ei reira oe e ite maitai ai ia iriti i te pâpaa iti i roto i te mata o to taeae.” Mea maitai ia pee tatou i ta ˈna aˈoraa: “Eiaha e faaino, ia ore outou ia faainohia mai. O ta outou hoi e faaino ia vetahi ê ra, e faaino-atoa-hia ïa outou i te reira . . . E eaha oe i hiˈo ai i te pâpaa iti i roto i te mata o to taeae ra, e aore oe i ite i te raau rahi i roto i to oe iho mata?”—Mataio 7:1-5.

Ia rave vetahi ê i te tahi taime i te tahi mau mea e au ra e mea haavarevare, e tia ia tatou ia haapao maitai eiaha e parau oioi e e feia aau haavare ratou. Ei hiˈoraa, ua ‘ounu e ua faataa ê’ te aposetolo Petero i te mau hoa faaroo Etene i Anetiohia ia mauruuru te mau  ratere ati Iuda no Ierusalema. Ua ‘riro atoa o Baranaba i taua haavare a Petero e te tahi atu ra.’ Ua na reira Petero noa ˈtu ta ˈna fanaˈoraa taa ê otahi e iriti i te uputa e fariihia ˈi te mau Etene i roto i te amuiraa Kerisetiano. (Galatia 2:11-14; Ohipa 10:24-28, 34, 35) Tera râ, aita teie hape iti i faaau ia Baranaba e ia Petero i te mau papai parau e te mau Pharisea aore ra ia Iuda Isakariota.

“Ei aroha haavare ore” to outou

“Ia hamani maitai oe ia vetahi ê,” ta Iesu ïa i aˈo, “eiaha e tarahu i te hoê taata faaoto i te pu o te na mua ia oe—mai tera mau taata hauti teata i roto i te mau sunago e te mau aroâ o te imi e ia umerehia ratou e te taata.” (Mataio 6:2, Phillips) “Ei aroha haavare ore” to outou, ta te aposetolo Paulo ïa i papai. (Roma 12:9) Ua faaitoito oia i te taurearea ra o Timoteo ia faahotu i ‘te aroha no roto i te aau viivii ore ra, e te faaroo haavare ore.’ (Timoteo 1, 1:5) Mai te peu e to tatou aroha e to tatou faaroo, mea mau—aita i naeahia i te miimii e te haavare—e tiaturi ïa vetahi ê ia tatou. E riro tatou ei haapuairaa e ei faaitoitoraa mau no te taata e haaati ra ia tatou. (Philipi 2:4; Ioane 1, 3:17, 18; 4:20, 21) E te mea faufaa ˈtu â, e farii maitai Iehova ia tatou.

Area te huru haavare râ, o te pohe ïa te faahopearaa no te feia e pee i te reira. I te pae hopea, e faaite-roa-hia mai te huru haavare. “Aore roa hoi e mea tapoˈihia e toe i te faaitehia,” ta Iesu Mesia ïa i parau, “aore roa e mea moe e toe i te itea.” (Mataio 10:26; Luka 12:2) Ua parau te arii paari ra o Solomona e: “E hopoi atoa te Atua i te mau parau atoa i te haavaraa, e te mau mea moe atoa ra, te maitai e te ino atoa ra.”—Koheleta 12:14.

I taua taime atoa ra, no te aha ïa tatou e vaiiho ai e ia ohipa te huru haavare o vetahi ê i nia ia tatou e tae roa i nia i te faito e ere ai tatou i te here mau o te mau hoa mau? E nehenehe tatou e haapao maitai ma te ore e manaˈo ino roa ia vetahi ê. E faaitoito anaˈe ïa i te atuatu i to tatou aroha e to tatou faaroo haavare ore.—Iakobo 3:17; Petero 1, 1:22.

[Hohoˈa i te mau api 22, 23]

E vaiiho anei outou e ia faaatea ê mai te huru haavare o te mau papai parau e te mau Pharisea ia outou ia Iesu Mesia e i ta ˈna mau pǐpǐ?