Te faatia ra te feia poro i te Basileia

“Ua hape oe i te numera niuniu”

I JOHANNESBURG, i Afirika Apatoa, te poro ra Leslie raua o Caroline na roto i te niuniu paraparau i te mau taata e faaea ra i roto i te hoê oire iti no te feia faatuhaahia e mea opanihia te tomoraa. Mea iti te taata ta raua i farerei i ǒ ratou e aita i anaanatae roa i ta raua poroi Kerisetiano, no reira, ua itoitohia o Caroline i to te hoê vahine pahonoraa ˈtu.

“O B— vahine anei tera?” ta Caroline ïa i ui.

“E ere roa ˈtu,” ta te hoê reo auhoa ïa i parau, “o G— vahine au. Ua hape oe i te numera niuniu.”

Ma te tapao i to ˈna reo mahanahana, ua na ô atu Caroline e: “E faataa ˈtu na vau eaha ta ˈu e hinaaro ra e parau ia B— vahine.” Haamata ˈtura oia i te paraparau no nia i te mau haamaitairaa a te Basileia o te Atua e fatata maira. I muri aˈe i te raveraahia te tahi mau faanahoraa no te afai atu i te buka rairai ra Eaha ta te Atua e titau ra ia tatou?, ua ui aˈera o G— vahine e: “Ahani na, eaha ta oe haapaoraa?”

“E Ite no Iehova mâua,” ta Caroline ïa i pahono.

“Auê, eiaha, eiaha roa tena haapaoraa! Eita vau e hinaaro e farerei ia oe.”

“Teie râ, G— vahine,” ta Caroline ïa i taparu, “ua mairi e 20 minuti i to ˈu faaiteraa ˈtu i te tiaturiraa faahiahia roa ˈˈe ia oe, ma te faaite i roto i te Bibilia eaha ta te Basileia o te Atua e fatata i te rave no te taata. Ua oaoa roa hoi oe i te faarooraa i teie mau mea—ua anaanatae atoa—e ua hinaaro oe e ite hau atu â. Eaha ta oe i ite mau no nia i te mau Ite no Iehova? Ia maˈi-noa-hia ˈtu oe, e haere anei oe e hiˈo i te hoê taata tataî pereoo? No te aha e ore ai e faatia ia ˈu ia faaite ia oe eaha ta te mau Ite no Iehova e tiaturi ra?”

I muri aˈe i te hoê taime mamûraa, teie te pahonoraa: “Te manaˈo nei au e ua tano oe. Mea maitai aˈe ia haere mai oe. A haamanaˈo râ e eita roa oe e faataui ia ˈu!”

“E G— vahine, eita roa ta ˈu e nehenehe e faataui ia oe noa ˈtu â ïa te hinaaro ra vau,” ta Caroline ïa e pahono atu. “O Iehova anaˈe te nehenehe e na reira.”

Aita e fifi ia hoˈi atu e horoa i te buka rairai, e ua farii o G— vahine i te tahi atu â farereiraa. I to Caroline hoˈiraa ˈtu, ua parau o Betty e ua paraparau oia i te mau vahine i ta ˈna airaa maa e e mau aparauraa ta ˈna e te mau Ite no Iehova. “Nafea oe e nehenehe ai?” ta ratou ïa i ui atu, ma te amo i to ratou rima i nia. “Eita hoi taua mau taata ra e tiaturi ia Iesu!”

Haamanaˈo oioi aˈera Caroline ia Betty i te hoê manaˈo faufaa i roto i ta raua aparauraa i mahemo no nia i te Basileia o te Atua.

“O vai te Arii?” ta Caroline ïa i ui.

“O Iesu hoi,” ta Betty ïa i pahono.

“Oia mau,” te reo ïa o Caroline. Ua faataa ˈturâ oia e te tiaturi ra te mau Ite no Iehova e e Tamaiti Iesu na te Atua, aita râ oia e aifaito ra i te Atua ei melo o te hoê Toru tahi.—Mareko 13:32; Luka 22:42; Ioane 14:28.

I muri aˈe tau farerei-faahou-raa, ua ite-papu-hia e noa ˈtu e feruriraa maitai to ˈna e te oaoa, te maˈimaˈihia ra Betty. Oia mau, ua roohia oia i te mariri ai taata e te riaria ra oia i te pohe. “Ahiri au i faaroo i teie mau mea e mau matahiti i teie nei e i noaa ia ˈu to oe faaroo, “ ta ˈna ïa i faˈi. Ua tamahanahana Caroline ia ˈna na roto i te faaiteraa ia ˈna i te mau irava o te faataa ra i te pohe mai te hoê taoto hohonu e nehenehe te taata e ara mai i te tia-faahou-raa. (Ioane 11:11, 25) E auraa rahi to te reira no Betty, o te fanaˈo ra i teie nei i te hoê haapiiraa bibilia tamau. O to ˈna ea paruparu anaˈe te haafifi ra ia ˈna ia haere i te mau putuputuraa i te Piha a te Basileia.

Te na ô ra Caroline e: “Mea papu maitai ia ˈu e te aratai ra te mau melahi i teie ohipa. Ua riro o Betty ei ‘numera hape,’ e a feruri noa na, e 89 matahiti to ˈna!”—Apokalupo 14:6.