“O vai au nei i ta te taata nei parauraa?”

TEIE faahou te tau Noela. E maiti te taata na te ao atoa nei i te faatupu i te hoê oroa fanauraa. To vai? To te Tamaiti a te Atua anei aore ra to te hoê noa ati Iuda itoito roa tei opua e haamaitai i te haapaoraa rahi i to ˈna tuhaa fenua i te senekele matamua? O te oroa fanauraa anei o te hoê aito anei tei paruru i te feia veve, to te hoê taata orure hau tei riro ei fifi atâta no te hau emepera Roma e no reira oia i haapohehia ˈi, aore ra to te hoê taata paari paha o tei onoono i nia i to ˈna iho ite e i te hoê ao no roto o te paari? E tano outou ia uiui, ‘O vai mau na Iesu Mesia?’

Ua anaanatae Iesu iho i te pahonoraa a te taata i taua uiraa ra. “O vai au nei i ta te taata nei parauraa?” ta ˈna ïa i ui i ta ˈna mau pǐpǐ i te hoê taime. (Mareko 8:27) No te aha? Mea rahi o tei faaea aˈena i te pee ia ˈna. E au ra e ua feaapiti te tahi atu e ua inoino ratou i muri aˈe i to ˈna patoiraa i ta ratou mau tutavaraa e faaarii ia ˈna. Hau atu â, i to to ˈna mau enemi mârôraa mai ia ˈna, aita Iesu i horoa i te tahi tapao no te raˈi mai no te haapapu atu o vai na oia. No reira, eaha te pahonoraa a ta ˈna mau aposetolo i taua uiraa ra? Ua faahiti ratou i te tahi mau manaˈo i parare i rotopu i te taata: “O Ioane Bapetizo ta vetahi, o Elia ta te tahi pae, o Ieremia hoi, e o te hoê i te mau peropheta ra ta vetahi.” (Mataio 16:13, 14)  Aita ratou i faahiti i te mau parau faaino e rave rahi i parare haere i Paretetina no nia ia Iesu—e taata faaino, taata peu haavare, peropheta haavare, e e taata maamaa atoa.

Te mau huru e rave rahi o Iesu

Mai te peu e e ui Iesu i taua noâ uiraa ra i teie mahana, e na ô paha ïa oia e: “O vai au nei i ta te mau aivanaa nei parauraa?” Teie â paha ïa te pahonoraa: Ua rau te manaˈo. “Ua riro o Iesu ei puaahorofenua ta te taata i faahoro na te mau aveia taa ê e rave rahi,” ta David Tracy no te Fare haapiiraa tuatoru no Chicago, ïa i parau. I te roaraa o te mau senekele i mahemo, ua faaohipa te mau aivanaa e rave rahi ravea taa ê i te pae o te ihi totiare, te ihi taata, e te papairaa no te tamata i te hamani i te mau pahonoraa i te uiraa o vai mau na Iesu. O vai mau atura ïa Iesu i to ratou manaˈo?

No nia i te Iesu o te tuatapaparaa, te tamau noa ra te tahi mau aivanaa i te parau e e peropheta ati Iuda oia o te faahohonu i te hopea o te taata e o te ao e o te faaitoito ra i te tatarahapa. Tera râ, aita ratou e parau ra ia ˈna te Tamaiti a te Atua, te Mesia, e te Taraehara. Te feaa ra te manaˈo o te rahiraa no nia i te aamu bibilia o to ˈna oraraa i nia i te raˈi e o to ˈna tia-faahou-raa. No te tahi atu, e taata noa Iesu e mea na roto i to ˈna oraraa e ta ˈna mau haapiiraa maitai roa i fa mai ai te tahi mau haapaoraa o tei amui atu i te pae hopea i roto i te Kerisetianoraa. E ia au i te Theology Today, ua riro atoa o Iesu no te tahi atu ei “taata tâhitohito, ei taata paari aoaoa, aore ra ei taata faaapu miterio; ei taata faanaho i te nunaa, ei rohipehe hippie o te faaino i te totaiete taata, aore ra ei taata imi peapea overe o te faaite roa mai i to ˈna mau manaˈo a haere ai oia na te mau oire iti no Paretetina moemoe e mea huehue, mea veve, e e riri haere noa te feia no reira.”

Te vai ra ˈtu â te tahi mau manaˈo huru ê. Ua fa taue mai te hohoˈa o te hoê Iesu ereere i roto i te upaupa rap, te mau taoˈa rimaî no te oire, e i roto atoa i te ori. * Ua parau atoa te tahi atu e e vahine o Iesu. I te tau veavea 1993, ua ite atu te mau ratere i te Orange County Fair i Kalifonia i te hoê tii o “Christie,” te hoê “Mesia” vahine vai tahaa noa i nia i te satauro. I taua noâ taime ra i New York, te faaiteitehia ra te hoê “Christa”—te hoê “Iesu” vahine faasataurohia. Ua faatupu teie nau tii i te mârôraa rahi. E i te omuaraa o te matahiti 1999, ua nehenehe te feia e hoo mai e ite i te hoê buka “no nia i te here i rotopu i te tamaroa ra o Iesu e ta ˈna urî ra o Melahi.” Ua faataahia to raua auhoaraa mai te hoê taairaa “putapû i te pae varua o te faaite ra e ua ineine mau â te tamaroa e te urî i te pûpû i to raua ora no te tahi e te tahi.”

Mea faufaa mau anei ia ite o vai na Iesu?

No te aha tatou e anaanatae ai o vai na Iesu e o vai oia i teie nei? No te mea, ia au i te parau a Napoléon, “ua mana mai o Iesu Mesia e ua faatere oia i to ˈNa mau taata noa ˈtu e aita o ˈNa i parahi tino mai i rotopu ia ratou.” Na roto i ta ˈna mau haapiiraa oraora e to ˈna huru oraraa, ua mana Iesu ma te puai i nia i te oraraa o te mau miria taata fatata e piti tausani matahiti i te maoro. Ua tapao te hoê taata papai ma te tano e: “Ia tahoê-anaˈe-hia te mau nuu atoa o tei haere, te mau pahi atoa o tei hamanihia, te mau faatereraa atoa o tei haamauhia, te mau arii atoa o tei faatere mai, aita ïa ratou i ohipa aˈenei ma te puai i nia i te oraraa o te taata i nia i teie fenua.”

Hau atu â, e tia ia outou ia ite o vai na Iesu e o vai o ˈna i teie nei, no te mea e ohipa roa mai oia i nia i to outou oraraa no a muri aˈe. E nehenehe outou e riro mai ei melo huiraatira o te hoê faatereraa i haamauhia i nia i te raˈi—te Basileia o te Atua, o Iesu hoi te Arii. E faanaho-faahou-hia te mea ora huru rau o to tatou paraneta e fifihia ra e te faito-noa-raa o te natura i raro aˈe i te aratairaa a Iesu. Te haapapu maira te mau parau tohu bibilia ia tatou e e faatamaa te Basileia o Iesu i te feia poia, e haapao i te feia veve, e faaora i te feia maˈi, e e faahoˈi mai i te feia pohe i te ora.

E hinaaro iho â paha outou e ite eaha te huru o te taata e arii i roto i taua faatereraa hinaaro-rahi-hia ra. Na te tumu parau i muri nei ïa e faaite mai o vai te Iesu mau.

[Nota i raro i te api]