E mau poro evanelia te mau Kerisetiano mau atoa

“E himene ia Iehova, e haamaitai i to ˈna iˈoa; e faaite i te ora na ˈna eiaha ei mahana tuua.”—SALAMO 96:2.

1. Eaha te parau apî maitai e tia i te taata ia faaroo, e mai te aha te faahiahia to te mau Ite no Iehova haaparareraa i taua parau apî ra?

 I ROTO i te hoê ao i reira te mau ati e tupu ai i te mau mahana atoa, mea mahanahana mau ia ite e, mai ta te Bibilia e parau ra, fatata roa te tamaˈi, te ohipa ino, te pohe poia, e te hamani-ino-raa, i te ore. (Salamo 46:9; 72:3, 7, 8, 12, 16) Oia mau, e ere anei teie i te parau apî maitai e tia i te taata atoa ia faaroo? O te reira te manaˈo o te mau Ite no Iehova. Ua matauhia ratou i te mau vahi atoa mai te feia e poro ra “i te parau oaoa e te maitai.” (Isaia 52:7) Parau mau, mea rahi te mau Ite tei roohia i te hamani-ino-raa no to ratou hinaaro mau e poro i te parau apî maitai. Mea faufaa roa râ na ratou te mau maitai o te taata. E ua tui te roo o te mau Ite ei feia itoito roa e te tuutuu ore!

2. Eaha te hoê tumu e itoito roa ˈi te mau Ite no Iehova?

² E tuea te itoito rahi o te mau Ite no Iehova no teie tau e to te mau Kerisetiano no te senekele matamua. Ua parau te vea Katolika Roma ra L’Osservatore Romano ma te tano no nia ia ratou e: “No te mau Kerisetiano matamua, i to ratou iho â bapetizoraahia, e hopoia na ratou te haaparareraa i te Evanelia. Na roto i te parau vaha, ua hopoi haere te mau tavini i te Evanelia.” No te aha te mau Ite no Iehova, mai taua mau Kerisetiano matamua ra, e itoito roa ˈi mai tera? Na mua roa, no te mea no ǒ mai i te Atua ra o Iehova iho te parau apî maitai ta ratou e poro haere ra. Te vai ra anei te hoê tumu maitai aˈe e itoito roa ˈi? Ua riro ta ratou pororaa ei pahonoraa i te mau parau a te papai salamo: “E himene ia Iehova, e haamaitai i to ˈna iˈoa; e faaite i te ora na ˈna eiaha ei mahana tuua.”—Salamo 96:2.

3. (a) Eaha te piti o te tumu e itoito roa ˈi te mau Ite no Iehova? (b) Eaha to roto i “te ora na [te Atua]”?

³ Te haamanaˈo maira te mau parau a te papai salamo i te piti o te tumu e itoito roa ˈi te mau Ite no Iehova. E poroi o te ora ta ratou e poro ra. Te rave ra te tahi mau taata i te ohipa i roto i te mau tuhaa rapaauraa, totiare, e ihiihi e te tahi atu â no te haamaitai i te huru oraraa o te taata, e mea popou taua mau tutavaraa ra. Mea taotia-roa-hia râ te mau mea atoa ta te hoê taata e nehenehe e rave no te tahi ia faaauhia i “te ora na [te Atua].” Na roto ia Iesu Mesia, e faaora Iehova i te feia mǎrû i te hara, te maˈi e te pohe. E ora te feia e fanaˈo i te reira e a muri noa ˈtu! (Ioane 3:16, 36; Apokalupo 21:3, 4) I teie tau, to roto te ora i te “mau ohipa taa ê” ta te mau Kerisetiano e faatia ia pahono ratou i teie mau parau: “E faaite i to [te Atua] hanahana i roto i te mau etene; e ta ˈna ra mau ohipa taa ê i roto i te taata atoa ra. E rahi hoi Iehova, e ia rahi hoi te haamaitai ia ˈna; e ia rahi hoi to ˈna mǎtaˈuraahia i te mau atua atoa ra!”—Salamo 96:3, 4.

Te hiˈoraa o te Orometua

4-6. (a) No teihea tumu, o te toruraa ïa, e itoito roa ˈi te mau Ite no Iehova? (b) Mea nafea to Iesu faaiteraa i te itoito rahi no te ohipa pororaa i te parau apî maitai?

⁴ Mea itoito roa te mau Ite no Iehova no te toru o te tumu. Te pee ra ratou i te hiˈoraa o Iesu Mesia. (Petero 1, 2:21) Ua farii taua taata tia roa ra ma te aau tae i te hopoia e “faaite i te parau oaoa i te aau mǎrû ra.” (Isaia 61:1; Luka 4:17-21) No reira oia i riro ai ei poro evanelia, ei taata poro i te parau apî maitai. Ua teretere oia na  Galilea e na Iudea i “te aˈoraa i te parau maitai o te basileia.” (Mataio 4:23) E no te mea ua ite oia e mea rahi o te farii i te parau apî maitai, ua parau oia i ta ˈna mau pǐpǐ e: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.”—Mataio 9:37, 38.

⁵ Ia au i ta ˈna iho pure, ua faaineine Iesu ia vetahi ê ia riro ei poro evanelia. I muri aˈe, ua tono oia i ta ˈna mau aposetolo ratou anaˈe e ua haapii atu e: “E poro haere outou, e na ô atu, Te fatata mai nei te basileia o te ao.” Mea au aˈe anei na ratou e haamau i te mau porotarama no te faaiti mai i te mau fifi totiare no taua tau ra? Aore ra mea maitai aˈe anei ahiri ratou i faaô i roto i te poritita no te aro i te haerea piˈo i parare roa i taua tau ra? Eita. Ua haamau râ Iesu i te haerea no te mau poro evanelia Kerisetiano atoa i to ˈna parauraa ˈtu i ta ˈna mau pǐpǐ e: “E poro haere outou.”—Mataio 10:5-7.

⁶ I muri aˈe, ua tono Iesu i te tahi atu pǔpǔ pǐpǐ e poro e: “Te fatata maira te basileia o te Atua.” I to ratou hoˈiraa mai e faatia e mea manuïa to ratou tere pororaa, ua oaoa roa Iesu. Ua pure oia e: “E haamaitai au ia oe, e tau Metua, e te Fatu o te raˈi e te fenua, i te mea, huna ê noâ oe i teie nei mau parau i te feia paari e te ite ra, ua faaite mai oe i te tamarii nei.” (Luka 10:1, 8, 9, 21) Ua riro te mau pǐpǐ a Iesu tei rave puai na i te ohipa ei ravaai, ei feia faaapu e e rave rau atu â, mai te mau tamarii ia faaauhia i te mau aratai haapaoraa o te nunaa tei haere i te haapiiraa teitei. Ua faaineinehia râ te mau pǐpǐ no te poro i te parau apî maitai roa ˈˈe.

7. I muri aˈe i to Iesu maueraa i nia i te raˈi, ua poro na mua ta ˈna mau pǐpǐ i te parau apî maitai ia vai?

⁷ I muri aˈe i to Iesu maueraa i nia i te raˈi, ua tamau noa ta ˈna mau pǐpǐ i te haaparare i te parau apî maitai o te ora. (Ohipa 2:21, 38-40) Ua poro atu ratou ia vai na mua? Ua haere anei ratou i ǒ te mau etene ra tei ore i ite i te Atua? Aita, ta ratou tuhaa taviniraa matamua, o Iseraela ïa, te hoê nunaa i matau ia Iehova ua hau atu i te 1 500 matahiti i te maoro. E tiaraa anei to ratou e poro i te hoê fenua e haamori aˈena ra ia Iehova? E. Ua parau Iesu ia ratou e: “Ei ite hoi outou no ˈu i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua ra.” (Ohipa 1:8) I tia na ia Iseraela ia faaroo i te parau apî maitai mai te tahi atu mau nunaa.

8. E nafea te mau Ite no Iehova no teie tau e pee ai i te mau pǐpǐ a Iesu no te senekele matamua?

⁸ Mea na reira atoa te mau Ite no Iehova e  poro ai na te ao atoa nei i teie tau. E haa amui ratou e te melahi i itehia e Ioane “ma te evanelia e tia i te vairaa ra ei pororaa ˈtu i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa.” (Apokalupo 14:6) I te matahiti 2001, ua poro ratou i na fenua e tuhaa fenua e 235, tae noa ˈtu i te tahi tei matauhia ei mau fenua Kerisetiano. Ua hape anei te mau Ite no Iehova i te pororaa i te mau vahi i reira to te Amuiraa faaroo Kerisetiano haamau-aˈena-raa i ta ˈna mau ekalesia? Te na ô nei te vetahi e ua hape ratou e e parau atoa ratou e e “eiâraa mamoe” taua pororaa evanelia ra. Te haamanaˈo ra râ te mau Ite no Iehova i to Iesu huru aau i nia i te mau ati Iuda haehaa o to ˈna tau. Noa ˈtu e e autahuˈa aˈena ta ratou, aita Iesu i haamarirau i te poro atu i te parau apî maitai. Ua “aroha ˈtura oia ia ratou, no te mea, ua purara ratou e ua faarue-taue-hia, mai te mamoe tiai ore ra.” (Mataio 9:36) Ia itea i te mau Ite no Iehova te taata haehaa aita i ite no nia ia Iehova e to ˈna Basileia, e tia anei ia ratou eiaha e faaite i te parau apî maitai i taua mau taata ra no te mea te parau ra te tahi haapaoraa e e mana to ˈna i nia ia ratou? Ma te pee i te hiˈoraa o te mau aposetolo a Iesu, e pahono matou e eita. E tia ia porohia te parau apî maitai “i te mau fenua atoa,” eiaha ia toe hoê noa ˈˈe.—Mareko 13:10.

Ua poro te mau Kerisetiano matamua atoa i te evanelia

9. I te senekele matamua, o vai i roto i te amuiraa Kerisetiano tei apiti i roto i te ohipa pororaa?

⁹ O vai to te senekele matamua tei apiti i roto i te ohipa pororaa? Te faaite ra te mau tupuraa e ua riro te mau Kerisetiano atoa ei mau poro evanelia. Te tapao ra te taata papai buka ra o W. S. Williams e: “Te rahiraa o te mau faaiteraa, oia hoi ua poro te mau Kerisetiano atoa o te Ekalesia matamua . . . i te evanelia.” No nia i te mau tupuraa i te Penetekose 33 T.T., te na ô ra te Bibilia e: ‘Î aˈera ratou atoa [te mau tane e te mau vahine] i te varua moˈa, e ua parau ihora i te parau ěê, i ta te varua i horoa mai i te parau ia ratou ra.’ I te pae hopea, te vai ra te mau tane e te mau vahine, te feia apî e te mea paari, te tavini e te taata tiamâ i roto i te mau poro evanelia. (Ohipa 1:14; 2:1, 4, 17, 18; Ioela 2:28, 29; Galatia 3:28) I to te hamani-ino-raa faaheporaa i te mau Kerisetiano e rave rahi ia faarue ia Ierusalema, ‘haere atura taua feia ra i purara ê ra e haapii haere i te parau apî maitai e ati noa ˈˈe te fenua atoa.’ (Ohipa 8:4) Ua poro te taatoaraa o “taua feia ra i purara ê ra” i te evanelia, eiaha noa te tahi pae tei nominohia.

10. Eaha te poroi toopiti i haapaohia hou te haamouraa o te faanahoraa ati Iuda?

¹⁰ Mai te reira noa iho â i te roaraa o taua mau matahiti matamua ra. Ua tohu Iesu e: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) I roto i te tupuraa o teie mau parau i te senekele matamua, ua poro-rahi-roa-hia te parau apî maitai hou te nuu Roma a haamou ai i te faanahoraa faaroo e poritita a te ati Iuda. (Kolosa 1:23) Hau atu â, ua haapao te mau pǐpǐ atoa a Iesu i ta ˈna faaueraa: ‘E haere outou e faariro i te mau fenua  atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te varua moˈa; ma te haapii atu ia ratou i te haapao i te mau mea atoa ta ˈu i parau atu ia outou na.’ (Mataio 28:19, 20) Aita te mau Kerisetiano matamua i faaitoito i te feia mǎrû ia tiaturi ia Iesu e i muri iho, vaiiho atu ai ia perehahu noa ˈtu, mai ta te tahi feia poro no teie tau e rave ra. Aita, ua haapii atu râ ratou ia riro mai ei pǐpǐ na Iesu, ua faanaho atu ei amuiraa, e ua faaineine atu e ia nehenehe atu ai ratou e poro i te parau apî maitai e e faariro i te taata ei pǐpǐ. (Ohipa 14:21-23) Te pee ra te mau Ite no Iehova i taua raveraa ra i teie tau.

11. O vai teie e poro ra i te parau apî maitai roa ˈˈe i te huitaata i teie tau?

¹¹ Ua haere te tahi mau Ite no Iehova e tavini ei mitionare i te mau fenua ěê ei peeraa i te mau hiˈoraa no te senekele matamua oia to Paulo, to Baranaba, e to vetahi atu â. Ua riro mau ta ratou ohipa ei mea maitai, i te mea e aita ratou i faaô i roto i te mau ohipa poritita aore ra i faaatea ê, na roto i te tahi atu mau ravea, i tei poroihia ia ratou oia, e poro i te parau apî maitai. Ua faaroo noa ratou i te faaueraa a Iesu: “E poro haere outou.” Teie râ, e ere te mau Ite no Iehova atoa i te mau mitionare i te mau fenua ěê. Mea rahi o te imi ra i te oraraa na roto i te raveraa i te ohipa, e te haere noa râ te tahi atu i te haapiiraa. Te aratai ra te tahi pae i te tamarii. E faaite râ te mau Ite no Iehova atoa i te parau apî maitai ta ratou i haapii ia vetahi ê. Te feia apî e te mea paari, te tane e te vahine, e farii ratou ma te oaoa i teie aˈoraa bibilia: “A poro i te parau, a na reira ma te tuutuu ore i te tau au e te tau au ore.” (Timoteo 2, 4:2, MN) Mai tei na mua ˈtu ia ratou i te senekele matamua, “aore e mahana tuua ia ratou i te [haapii e te faaite i te parau apî maitai no nia i te Mesia ra o Iesu].” (Ohipa 5:42; MN) Te faaite ra ratou i te parau apî maitai roa ˈˈe no te huitaata.

Faatauiraa haapaoraa aore ra pororaa evanelia?

12. Eaha te faatauiraa haapaoraa, e ua faarirohia te reira ei aha?

¹² I teie tau, te parau nei te vetahi e mea ino te faatauiraa haapaoraa. Te parau atoa ra te hoê parau mana neneihia e te apooraa a te mau ekalesia o te ao atoa no nia i “te hara o te faatauiraa haapaoraa.” No te aha? Te na ô ra te hoê vea (Catholic World Report) e: “No te mau autâraa tamau a te Ekalesia Orthodoxe, ua riro te ‘faatauiraa haapaoraa’ ei faatauiraa faahepohia.”

13. Eaha te tahi mau hiˈoraa o te faatauiraa haapaoraa ino?

¹³ Mea ino anei te faatauiraa haapaoraa? I te tahi taime, e. Ua parau Iesu e mea ino te faatauiraa haapaoraa a te mau papai parau e a te mau Pharisea no te feia ta ratou i faataui. (Mataio 23:15) Papu maitai, mea hape te “faatauiraa faahepohia.” Ia au i te taata tuatapapa ra o Josèphe, ei hiˈoraa, i to te Maccabée ra o Jean Hyrcan haavîraa i te mau Iduméens, “ua faatia” oia “ia ratou ia faaea mai i to ratou fenua mai te peu noa e e peritomehia ratou e e ineine ratou i te haapao i te mau ture a te mau ati Iuda.” Mai te peu e te hinaaro ra te mau Iduméens e ora i raro aˈe i te faatereraa ati Iuda, mea titauhia ia pee ratou i te haapaoraa ati Iuda. Te faaite maira te feia tuatapapa e i te senekele 8 T.T., ua haavî o Charlemagne i te mau Saxons etene no Europa apatoerau e ua faahepo ino roa ia ratou ia  taui i te haapaoraa. * Mea haavare ore mau anei te tauiraa o te mau Saxons aore ra o te mau Iduméens? Ei hiˈoraa, mea mau anei te hinaaro o te arii Iduméen ra o Heroda—tei tamata i te taparahi pohe i te tamarii ra o Iesu—i te Ture a Mose i faauruahia e te Atua?—Mataio 2:1-18.

14. E nafea te tahi mau mitionare a te Amuiraa faaroo Kerisetiano ia faahepo i te taata ia taui?

¹⁴ Mea faahepohia anei te tahi mau tauiraa i teie tau? I te hoê pae, e. Ua faatiahia e ua pûpû te tahi mau mitionare a te Amuiraa faaroo Kerisetiano i te tau haapiiraa i te fenua atea na te tahi feia e farii e taui. Aore ra e rave ratou e ia faaroo te hoê taata horo e pohe ra i te poia i te hoê aˈoraa ia noaa ˈtu ai ia ˈna te tahi maa. Ia au i te hoê parau i mahiti i te matahiti 1992 ra i roto i te hoê tairururaa a te mau epikopo Orthodoxe, “i te tahi mau taime, e manuïa te faatauiraa haapaoraa maoti te faatianianiraa materia e i te tahi mau taime na roto i te haavîraa uˈana huru rau.”

15. E rave anei te mau Ite no Iehova i te faatauiraa haapaoraa ia au i te auraa o taua parau ra i teie tau? A faataa na.

¹⁵ Mea hape te faaheporaa i te taata ia taui i ta ratou haapaoraa. Papu maitai, eita te mau Ite no Iehova e na reira. * Eita ïa ratou e rave i te faatauiraa haapaoraa ia au i te auraa o taua parau ra i teie tau. Area râ, mai te mau Kerisetiano no te senekele matamua, te poro ra ratou i te parau apî maitai i te taata atoa. Te titauhia ra te taata atoa e farii ma te hinaaro mau ia fanaˈo i te ite hau na roto i te hoê haapiiraa bibilia. E haapii teie feia anaanatae i te tuu i te tiaturiraa tei niu-maitai-hia i nia i te ite mau i te Bibilia, i nia i te Atua e ta ˈna mau opuaraa. Ei faahopearaa, e tiaoro ratou i te iˈoa o te Atua, o Iehova, e ia ora ratou. (Roma 10:13, 14, 17) E farii anei ratou i te parau apî maitai aore ra eita, e ohipa ïa na ratou iho. Aita e faaheporaa. Ahiri e e, aita ïa e auraa to te tauiraa. Ia fariihia e te Atua, no roto roa mai ïa te haamoriraa i te aau e tia ˈi.—Deuteronomi 6:4, 5; 10:12.

Te pororaa evanelia i teie tau

16. Mea nafea te ohipa pororaa evanelia a te mau Ite no Iehova i te maraaraa i teie tau?

¹⁶ I te roaraa o teie tau, ua poro te mau Ite no Iehova i te parau apî maitai o te Basileia ei tupuraa rahi aˈe o te Mataio 24:14. Te mauhaa faahiahia roa ˈˈe i roto i ta ratou ohipa pororaa evanelia, o te vea ra ïa Te Pare Tiairaa. * I te matahiti 1879, i te neneiraahia te mau numera matamua o Te Pare Tiairaa, i operehia na fatata e 6 000 vea na roto hoê reo. I te matahiti 2001, 122 matahiti i muri aˈe, ua taea i te opereraa e 23 042 000 vea na roto e 141 reo. Ua apeehia teie maraaraa e te maraaraa o te ohipa pororaa evanelia a te mau Ite no Iehova. A faaau na i na tau tausani hora i ravehia i te matahiti hoê i roto i te ohipa pororaa evanelia i te senekele 19 ra e na 1 169 082 225 hora i pûpûhia i roto i te ohipa pororaa i te matahiti 2001. A feruri na i te faito au noa e 4 921 702 haapiiraa bibilia tamoni ore tei faaterehia i te mau avaˈe atoa. Auê ïa  ohipa maitai iti rahi i ravehia! E ua ravehia e na 6 117 666 feia poro i te Basileia itoito.

17. (a) Teihea mau atua hape e haamorihia ra i teie tau? (b) Noa ˈtu eaha to ratou reo, to ratou tiaraa basileia, aore ra to ratou tiaraa totiare, eaha te tia i te taata atoa ia ite?

¹⁷ Te na ô ra te papai salamo e: “Te mau atua atoa o te mau etene, e mau idolo faufaa ore ïa: area o Iehova na ˈna i hamani i te mau raˈi ra.” (Salamo 96:5) I roto i te ao raita no teie tau, ua faarirohia te here aiˈa, te mau taoˈa taipe a te fenua, te mau taata rarahi, e te mau mea materia, e tae noa ˈtu te mau faufaa ei fa o te haamoriraa. (Mataio 6:24; Ephesia 5:5; Kolosa 3:5) Ua na ô o Mohandas K. Gandhi i te hoê taime e: “O to ˈu tiaturiraa papu teie . . . e ua riro o Europa i teie tau ei Kerisetiano i te iˈoa noa. Te haamori mau ra ratou ia Mamona [te mau faufaa].” E tia mau ia faaroohia te parau apî maitai i te mau vahi atoa. E tia i te taata atoa, noa ˈtu eaha to ˈna reo, to ˈna tiaraa basileia, aore ra to ˈna tiaraa totiare, ia ite no nia ia Iehova e ta ˈna mau opuaraa. Te hinaaro nei tatou e ia farii te taatoaraa i te mau parau a te papai salamo: “Ho atu ia Iehova i te hanahana e te puai. Ho atu ia Iehova i te hanahana e au i to ˈna ra iˈoa”! (Salamo 96:7, 8) E tauturu te mau Ite no Iehova ia vetahi ê ia haapii no nia ia Iehova e ia nehenehe ratou e ho atu ma te tano i te hanahana ia Iehova. E e haamaitai-rahi-hia te feia e farii. Eaha te mau haamaitairaa ta ratou e fanaˈo? E tauaparauhia te reira i roto i te tumu parau i muri nei.

[Nota i raro i te api]

E nehenehe anei ta outou e faataa?

• No te aha te mau Ite no Iehova e riro ai ei mau poro evanelia itoito roa?

• No te aha te mau Ite no Iehova e poro atoa ˈi i te mau vahi i reira to te Amuiraa faaroo Kerisetiano haamau-aˈena-raa i te mau ekalesia?

• No te aha e ere ai te mau Ite no Iehova i te feia faataui haapaoraa ia au i te auraa o taua parau ra i teie tau?

• Mea nafea te ohipa pororaa evanelia a te mau Ite no Iehova i te maraaraa i teie tau?

[Uiraa haapiiraa]

[Hohoˈa i te api 9]

I riro na Iesu ei poro evanelia itoito roa e ua faaineine oia ia vetahi ê ia rave i taua atoa ohipa ra

[Hohoˈa i te api 10]

Ua apiti to te amuiraa atoa o te senekele matamua i roto i te pororaa evanelia

[Hohoˈa i te api 11]

Mea hape te faaheporaa i te taata ia taui i ta ratou haapaoraa