Nau taeae—Mea taa ê to raua haerea

E OHIPA iho â te mau faaotiraa a te mau metua i nia i ta ratou mau tamarii. E parau mau te reira i teie mahana mai i mutaa ihora i te ô i Edene. Ua ohipa roa te haerea orure hau o Adamu raua o Eva i nia i te huitaata taatoa. (Genese 2:15, 16; 3:1-6; Roma 5:12) Teie râ, e nehenehe tatou taitahi e faatupu i te hoê taairaa maitai e to tatou Atua Poiete mai te peu e e maiti tatou i te na reira. Na te aamu o Kaina e o Abela, nau taeae matamua i roto i te tuatapaparaa o te taata, e faataa mai i te reira.

Aita te mau Papai e parau ra e ua paraparau te Atua ia Adamu e ia Eva i muri aˈe i to raua tiavaruraahia i rapaeau i te ô i Edene. Teie râ, ua paraparau Iehova i ta raua nau tamaiti. Aita e feaaraa e ua faatia to raua nau metua i te ohipa i tupu ia Kaina e ia Abela. Ua nehenehe raua e ite atu i ‘te mau kerubi ma te ˈoˈe ura e fariuriu haere, ei tiai i te eˈa i te raau ora ra.’ (Genese 3:24) Ua ite mata atoa nau tane i te tanoraa o te parau a te Atua oia hoi e riro te hou e te mauiui ei tupuraa mau o te oraraa.—Genese 3:16, 19.

Eita e ore e ua ite Kaina e o Abela i ta Iehova i parau i te ophi: “E tuu hoi au i te au ore e riri ai ra ia orua o te vahine, e to [huero], e to ˈna ra [huero]; na ˈna e haaparuparu i to afii, e na oe e haaparuparu i to ˈna poro avae.” (Genese 3:15; MN) Na nia i ta Kaina e ta Abela i ite no nia ia Iehova, e nehenehe ïa raua e faatupu i te hoê taairaa fariihia e o ˈna.

Eita e ore e ua feruri Kaina raua o Abela i te parau tohu a Iehova e i to ˈna mau huru maitatai ei Atua haamaitai î i te here, a hinaaro atu ai raua i ta ˈna farii maitai. Teie râ, i nia i teihea faito i faahotu ai raua i taua hinaaro ra? E haapao anei raua i to raua hinaaro natura e haamori i te Atua e e faatupu i to raua ea pae varua i te rahi, e faahotu atu ai raua i te faaroo ia ˈna?—Mataio 5:3.

E pûpû nau taeae i te ô

I te pae hopea, ua pûpû Kaina raua o Abela i te ô na te Atua. Ua pûpû Kaina i te maa o te fenua, e o Abela i te mamoe maitai e te poria o ta ˈna nǎnǎ. (Genese 4:3, 4) Hoê hanere matahiti paha to teie nau tane i taua taime ra, no te mea 130 matahiti to Adamu a fanauhia mai ai o Seta, ta ˈna tamaiti.—Genese 4:25; 5:3.

Te faaite ra ta raua nau ô e ua farii Kaina e o Abela i to raua tiaraa taata hara e ua hinaaro raua i te farii maitai a te Atua. Eita e ore e ua feruri raua i te parau tǎpǔ a Iehova no nia i te ophi e te Huero o te vahine. Aita e parauhia ra ehia maororaa to Kaina e to Abela tutavaraa i te faatupu i te hoê taairaa fariihia e o Iehova. Teie râ, te faaite maira te huru o te Atua i mua i ta raua nau ô i te mau manaˈo hohonu roa ˈˈe o na taeae taitahi.

Te parau ra te tahi mau aivanaa e ua manaˈo Eva e o Kaina te “huero” o te haamou i te ophi, no te mea i to Kaina fanauraahia mai, ua parau Eva e: “E taata ta ˈu i noaa iho nei ia Iehova.” (Genese 4:1) Mai te peu e tera atoa to Kaina manaˈo, ua hape roa ïa oia. Area o Abela ra, ua pûpû ïa oia i ta ˈna tusia ma te faaroo. No reira, “no te faaroo i maitai roa ˈi ta Abela tusia i pûpû i te Atua i ta Kaina.”—Hebera 11:4.

E aau maramarama pae varua to Abela e aita to Kaina, e ere noa râ te reira i te taa-ê-raa i roto i teie nau taeae. Te vai atoa ra te taa-ê-raa i roto  i to raua haerea. No reira, “ite maira Iehova ia Abela e ta ˈna ô; area o Kaina e ta ˈna ô, aore ïa oia i ite mai.” Peneiaˈe aita Kaina i feruri hohonu i ta ˈna ô e ua pûpû oia i te reira ma te faatia ture noa. Aita râ te Atua i farii i te hoê haamoriraa faatia ture noa. Ua faatupu Kaina i te hoê aau ino, e ua ite maite Iehova e e manaˈo ino to ˈna. Na roto i to Kaina huru i te patoiraahia ta ˈna tusia, ua ite-maitai-hia to ˈna huru feruriraa mau. Aita oia i imi i te faatitiaifaro ia ˈna, “riri roa aˈera Kaina, e tuatua ˈtura tana mata.” (Genese 4:5) Ua faaite mai to ˈna haerea i te mau manaˈo e te mau hinaaro iino.

Faaararaa e huru

Ua ite te Atua i to Kaina huru, ua aˈo atu oia ia ˈna e: “Eaha oe i riri ai; e eaha hoi i tuatua ˈi to mata na? Ia rave oe i te parau maitai ra, eita anei e itehia mai? e aore i maitai ra, te vai ra te taraehara i te uputa na. E auraro râ oia ia oe, e ei nia ˈˈe oe ia ˈna.”—Genese 4:6, 7.

Te vai ra te tahi haapiiraa no tatou. I te tanoraa, ua ineine noa te hara i te haharu ia tatou. Teie râ, ua horoa mai te Atua i te tiamâraa e maiti, e e nehenehe tatou e maiti i te rave i te mea tia. Ua titau manihini Iehova ia Kaina ia ‘rave i te mea maitai,’ aita râ Oia i faahepo ia ˈna ia taui. Na Kaina i maiti i to ˈna iho eˈa.

Te na ô â ra te faatiaraa faauruahia e: “Ua parau maira râ Kaina i tana taeae ia Abela, [E haere na tâua i te faaapu] e tae atura raua i roto i taua aua ra, tei nia maira Kaina i tana teina ia Abela, taparahi pohe roa ihora.” (Genese 4:8; MN) Ua riro maira Kaina ei taparahi taata aroha ore e te faaroo ore. Aita roa ˈtu oia i tatarahapa noa ˈˈe i to Iehova uiraa e: “Teihea to teina o Abela?” Ma te etaeta e te maamaa, ua pahono atu Kaina e: “Aore au i ite; o vau anei te tiai i tau teina?” (Genese 4:9) Ua faaite maitai taua haavare ra e te patoiraa i te amo i te hopoia, i te aau aroha ore o Kaina.

Ua faaino Iehova ia Kaina e ua tiavaru ia ˈna i rapaeau i te ô i Edene. E au ra e ua faahiti-faahou-hia te faainoraa i faatae-ê-na-hia i nia i te fenua, i roto i te tupuraa o Kaina, e ia faaapu oia i te fenua, eita te fenua e faatupu mai i te maa. E riro oia ei oere e ei ori haere noa i nia i te fenua. I to Kaina autâraa i te rahi o ta ˈna utua, e tapao faaite ïa e te tapitapi ra oia aˈunei oia e taparahihia ˈi no te tahoo i te pohe o  to ˈna taeae, tera râ, aita oia i faaite i te tatarahapa mau. Ua tuu maira Iehova i “te tahi tapao” ia Kaina ra—peneiaˈe te hoê faaueraa mana matauhia o te itehia e vetahi ê ia ore oia e taparahi-pohe-hia ma te tahoo.—Genese 4:10-15.

Ua “haere ê atura Kaina mai mua ˈtu i te aro o Iehova ra, parahi atura i te fenua ra i Noda, i te pae i te hitia o te râ i Edene ra.” (Genese 4:16) Ua rave oia hoê o to ˈna mau tuahine aore ra mau tamahine fetii ei vahine na ˈna, e ua faatia oia i te hoê oire ta ˈna i mairi o Enoha, te iˈoa o ta ˈna tamaiti matahiapo. Ua riro o Lameha, te tamarii a Kaina, ei taata haavî uˈana mai to ˈna tupuna paieti ore. Tera râ, ua haamouhia te opu fetii o Kaina i roto i te diluvi i tupu i te tau o Noa.—Genese 4:17-24.

Mau haapiiraa no tatou

E nehenehe tatou e huti mai i te haapiiraa na roto i te aamu o Kaina raua o Abela. Ua aˈo te aposetolo Ioane i te mau Kerisetiano ia here te tahi i te tahi, “eiaha mai ia Kaina ra, no taua varua ino ra oia, e taparahi pohe roa ˈtura i to ˈna teina.” E “parau iino ta [Kaina] iho, e e parau-tia ta tana teina.” Te na ô â ra Ioane e: “O tei riri i tana taeae ra, e taparahi taata ïa; ua ite hoi outou e, aore o te taparahi taata ra e ora mure ore e vai i roto ia ˈna ra.” Oia, to tatou huru i nia i to tatou mau hoa Kerisetiano, e ohipa roa ïa i nia i to tatou taairaa e te Atua e i nia i to tatou tiaturiraa no a muri aˈe. Eita tatou e nehenehe e riri i to tatou mau hoa faaroo e e fanaˈo i te farii maitai a te Atua.—Ioane 1, 3:11-15; 4:20.

Eita e ore e hoê â aratairaa ta Kaina e ta Abela i fanaˈo, tera râ, aita Kaina i faatupu i te faaroo i te Atua. Inaha, ua faaite oia i te huru feruriraa o te Diabolo, te ‘taparahi taata e te metua o te haavare’ matamua. (Ioane 8:44) Te faaite maira te haerea o Kaina e e nehenehe tatou paatoa e maiti, e te feia o te maiti i te hara, e atea ê ïa ratou i te Atua, e e haava Iehova i te feia tatarahapa ore.

Area o Abela ra, ua faatupu ïa oia i te faaroo ia Iehova. Oia mau, “no te faaroo i maitai roa ˈi ta Abela tusia i pûpû i te Atua i ta Kaina; i parauhia mai ai oia e, e taata parau-tia, o te Atua i faatia mai i taua taoˈa horoa na ˈna ra.” Noa ˈtu e aita e parau vaha a Abela i roto i te mau Papai, “te parau noa mairâ” oia na roto i to ˈna faaroo maitai roa.—Hebera 11:4.

O Abela te matamua i roto i te tapura roa o te feia i tapea i to ratou hapa ore. Aita to ˈna toto ‘tei pii ia Iehova mai te repo mai,’ i haamoehia. (Genese 4:10; Luka 11:48-51) Mai te peu e e faatupu tatou i te faaroo mai ia Abela, e nehenehe tatou atoa e fanaˈo i te hoê taairaa faufaa e te vai maoro e o Iehova.

[Tumu parau tarenihia i te api 22]

TE TAATA FAAAPU E TE TAATA FAAAMU MAMOE

Te faaapuraa i te fenua e te haapaoraa i te animara, tera te tahi o te mau hopoia matamua ta te Atua i horoa na Adamu. (Genese 1:28; 2:15; 3:23) Ua riro mai ta ˈna tamaiti o Kaina ei taata faaapu, e o Abela ei faaamu mamoe. (Genese 4:2) I te mea e e maa hotu e e maa tupu anaˈe ta te taata e tae roa i muri aˈe i te diluvi, no te aha ïa e faaamu ai i te mamoe?—Genese 1:29; 9:3, 4.

No te rahi mai, e hinaaro te mamoe ia haapao te taata ia ratou. Te haapapu ra ïa ta Abela ohipa e ua faaamu te taata i teie mau animara rata mai te omuaraa mai â o te tuatapaparaa o te taata. Aita te mau Papai e parau ra e ua rave anei te mau taata matamua roa i te û animara ei maa na ratou, tera râ, e nehenehe te feia amu pota e faaohipa i te huruhuru o te mamoe. E ia pohe te mamoe, e ravehia to ratou iri no te mau ohipa faufaa. Ei hiˈoraa no te faaamu ia Adamu e ia Eva, ua hamani Iehova i te “ahu iri” roa no raua.—Genese 3:21.

Noa ˈtu eaha te tupuraa, e au ra e mea tano ia manaˈo e i haa amui na Kaina e o Abela i te omuaraa. Ua rave raua i te tahi mea e hinaarohia e vetahi atu i roto i te utuafare no te faaahu e no te faatamaa ia ratou.

[Hohoˈa i te api 23]

E “parau iino ta [Kaina] iho, e e parau-tia ta tana teina”