O Iehova—Te hiˈoraa rahi roa ˈˈe o te maitai
O Iehova—Te hiˈoraa rahi roa ˈˈe o te maitai
“E haamaitai ia Iehova sabaota ra, e maitai hoi to Iehova!”—IEREMIA 33:11.
1. No te aha tatou e turaihia ˈi ia arue i te Atua no to ˈna maitai?
MEA maitai te Atua ra o Iehova na roto i te auraa tia roa. “I te rahi hoi o to ˈna maitai e!” o ta te peropheta Zekaria ïa i parau. (Zekaria 9:17) Oia mau, e itehia te maitai i roto i te mau mea atoa ta te Atua i rave no te faaineine i te fenua e ia fanaˈo tatou. (Genese 1:31) Eita roa ˈtu e taa ia tatou te mau ture fifi atoa ta te Atua i faaohipa i to ˈna poieteraa i te ao nui. (Koheleta 3:11; 8:17) E turai râ te tuhaa iti ta tatou i ite ia tatou ia arue i te Atua no to ˈna maitai.
2. E nafea outou ia faataa i te maitai?
2 Eaha te maitai? O te tia-roa-raa ïa i te pae morare. E hau atu râ i te ino ore noa. Ua riro te maitai, hoê o te mau hotu ta te varua e faatupu, ei huru faahiahia. (Galatia 5:22, 23) Ua faaohipa tatou i te maitai ua rave anaˈe tatou i te ohipa maitai e te faufaa i nia ia vetahi ê. I roto i teie faanahoraa o te mau mea, ta te tahi pae e parau ra e e maitai, e parau ïa te tahi atu e e ino. Ia hinaaro râ tatou e fanaˈo i te hau e te oaoa, e tia ïa ei hoê noa ture aveia no te maitai. To vai te tiaraa e haamau i taua ture aveia ra?
3. Eaha ta te Genese 2:16, 17 e faaite ra no nia i te ture aveia no te maitai?
3 Na te Atua e haamau i te ture aveia no te maitai. I te omuaraa o te tuatapaparaa o te taata, na Iehova i faaue i te taata matamua e: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Genese 2:16, 17) Oia, e tia i te taata ia fariu i nia i Tei poiete ia ratou no te ite i te maitai e te ino.
Faaiteraa i te maitai aita i au ia tatou
4. Eaha ta te Atua i rave no te taata mai te tau mai i hara ˈi Adamu?
4 Ua haafifihia te tiaturiraa o te taata no te oaoaraa mure ore i roto i te tia-roa-raa i to Adamu hararaa e patoiraa i te tiaraa o te Atua e haamau i te mau ture aveia no te maitai. (Genese 3:1-6) Hou râ to Adamu huaai a fanauhia ˈi ei feia i roohia i te hara e te pohe, ua tohu te Atua e e haere mai te hoê Huero tia roa. O te “ophi tahito ra” o Satani te Diabolo mau ta Iehova e parau atura i te na ôraa e: “E tuu hoi au i te au ore e riri ai ra ia orua o te vahine, e to [huero], e to ˈna ra [huero]; na ˈna e haaparuparu i to afii, e na oe e haaparuparu i to ˈna poro avae.” (Apokalupo 12:9; Genese 3:15; MN) Ua opua Iehova e hoo faahou mai i te taata hara. Na roto i te hoê faaiteraa i te maitai aita i au ia tatou, ua rave mau Iehova i te faanahoraa e faaora i te feia e faaohipa i te faaroo i te tusia hoo o ta ˈna Tamaiti here.—Mataio 20:28; Roma 5:8, 12.
5. Noa ˈtu e ua taeahia tatou e te huru ino o te aau, no te aha tatou e nehenehe ai e faaohipa i te tahi maa maitai?
5 Parau mau, no ta Adamu hara, ua taeahia tatou e te huru ino o te aau. (Genese 8:21) Auaa râ, e tauturu Iehova ia tatou ia faaohipa i te tahi maa maitai. Eita noa te mauraa i te mau mea ta tatou i haapii i roto i ta ˈna mau papai moˈa faahiahia e horoa mai i te ‘paari e tae noa ˈtu i te ora’ e e ‘faaineine ia tatou no te mau ohipa maitatai atoa ra,’ e tauturu atoa mai râ ia rave i te mea maitai i ta ˈna hiˈoraa. (Timoteo 2, 3:14-17, MN) Ia faufaahia râ tatou i te haapiiraa bibilia e ia faaohipa tatou i te maitai, e tia ei hoê â to tatou huru feruriraa e to te papai salamo tei himene e: “E maitai to oe, e Iehova, e te hamani maitai: e haapii mai i ta oe ra mau ture.”—Salamo 119:68.
Faateiteihia to Iehova maitai
6. I muri aˈe i to te arii Davida raveraa e ia afaihia mai te afata o te faufaa i Ierusalema, ua himene te mau ati Levi i te hoê himene ma teihea parau i roto?
6 Ua farii te arii Davida no Iseraela i tahito ra i to te Atua maitai e ua imi i ta ˈNa aratairaa. Ua parau oia e: “Maitai to Iehova e te piˈo ore: e haapii mai ai oia i te feia hara i te eˈatia mau.” (Salamo 25:8) I roto i te haapiiraa ta te Atua i horoa i te mau Iseraela, te vai ra na ture faufaa hoê ahuru—na Ture ahuru—papaihia i nia i na pǎpǎ ofai e piti i haapaohia i roto i te hoê afata moˈa parauhia te afata o te faufaa. I muri aˈe i to Davida raveraa e ia afaihia mai te Araka i te oire pu o Iseraela, oia o Ierusalema, ua himene te mau ati Levi i te hoê himene te vai ra teie parau i roto: “E haamaitai ia Iehova; e maitai hoi to ˈna; e tia hoi to ˈna [aau] aroha i te vai-maite-raa.” (Paraleipomeno 1, 16:34, 37-41; MN) Eaha râ paha te au i te faaroo atu i taua mau parau ra i roto i te vaha o te feia himene ati Levi!
7. Eaha tei tupu i muri aˈe i te hopoiraahia te Araka i roto i te vahi Moˈa Roa e i te otiraa te pure avariraa a Solomona?
7 Ua faahiti-rahi-hia tauâ mau parau arueraa ra i te avariraahia te hiero o Iehova patuhia e te tamaiti o Davida, oia o Solomona. I muri aˈe i te tuuraahia te afata o te faufaa i roto i te vahi Moˈa Roa o te hiero i patu-apî-hia, ua haamata aˈera te mau ati Levi i te arue ia Iehova e, “e maitai hoi to ˈna; e tia to ˈna [aau] aroha i te vai-maite-raa.” I taua taime ra, maoti te hoê semeio, ua î te hiero i te hoê ata e faataipe ra i to Iehova vai-hanahana-raa mai. (Paraleipomeno 2, 5:13, 14; MN) I te otiraa te pure avariraa a Solomona, “ua mairi maira te auahi no te raˈi mai, pau roa aˈera te tusia taauahi, e te mau tusia.” I to ratou iteraa i te reira, ‘ua piˈo ihora te tamarii a Iseraela i to ratou mata i raro i te repo i nia i te tahua ra, e ua haamori e ua haamaitai ia Iehova, na ô aˈera, E maitai to ˈna; e tia to ˈna [aau] aroha i te vai-maite-raa.’ (Paraleipomeno 2, 7:1-3; MN) I muri aˈe i te hoê oroa 14 mahana, ua hoˈi te mau Iseraela i te fare “ma te oaoa, e te rearea o te aau, i te mau maitai a Iehova i faaite mai ia Davida, e ia Solomona, e ia Iseraela atoa i to ˈna ra taata.”—Paraleipomeno 2, 7:10.
8, 9. (a) Noa ˈtu e ua arue te mau Iseraela ia Iehova no to ˈna maitai, eaha te haerea ta ratou i pee i te pae hopea? (b) Eaha tei tohuhia no Ierusalema na roto ia Ieremia, e mea nafea te faatupuraahia taua parau tohu ra?
8 Ma te peapea, aita te mau Iseraela i ora noa ia au i ta ratou mau himene arueraa i te Atua. Ia maoro rii, ua “faatura” to Iuda ia Iehova i “to ratou vaha.” (Isaia 29:13) Aita ratou i au noa i te mau ture aveia a te Atua no te maitai, ua haamata râ i te rave i te mea ino. E eaha taua mea ino ra? Ua harahia ratou i te haamoriraa idolo, te morare ore, te faaheporaa i tei veve, e te tahi atu â mau hara iino! Ei faahopearaa, ua haamouhia Ierusalema e ua hopoi-tîtî-hia to Iuda i Babulonia i te matahiti 607 H.T.T.
9 Ua na reira ïa te Atua i te faatitiaifaroraa i to ˈna nunaa. Na roto râ i te peropheta Ieremia, ua tohu oia e i Ierusalema, e faaroo-faahou-hia te reo o te feia e na ô ra e: “E haamaitai ia Iehova sabaota ra, e maitai hoi to Iehova, e tia hoi to ˈna [aau] aroha i te vai-maite-raa.” (Ieremia 33:10, 11; MN) E mai te reira iho â te tupuraa. I muri aˈe e 70 matahiti vai-ano-raa o te fenua, i te matahiti 537 H.T.T., ua hoˈi te hoê toea ati Iuda i Ierusalema. (Ieremia 25:11; Daniela 9:1, 2) Ua patu faahou ratou i te fata i te vahi o te hiero i nia i te mouˈa Moria e ua pûpû faahou i te tusia i reira. Ua mau te niu o te hiero i te piti o te matahiti i muri aˈe i to ratou hoˈiraa mai. Auê ïa taime oaoa e! “E ia haamau te feia [patu] i te niu o te hiero o Iehova,” o ta Ezera ïa i parau, “ua faanoho ihora te feia tahuˈa i faaahuhia ra, ma te pu atoa, e te mau ati Levi, te mau tamarii a Asapha, ma te sumebalo ei haamaitai ia Iehova, i tei haapaohia e te arii o Iseraela e Davida. Ua himene pǔpǔ ihora ratou, i te arueraa e te haamaitairaa ia Iehova, no te mea e maitai to ˈna, e tia hoi to ˈna [aau] aroha i te vai-maite-raa ia Iseraela.”—Ezera 3:1-11; MN.
10. E haamata e e faaoti te Salamo 118 e teihea parau faufaa?
10 Te vai ra taua huru arueraa ra no nia i to Iehova maitai i roto i vetahi mau salamo. O te Salamo 118 te hoê, tei himenehia e te mau fatu fare Iseraela ei faaotiraa i te oroa Pasa. E haamata e e faaoti taua salamo ra e teie mau parau: “E haamaitai ia Iehova; e maitai hoi to ˈna: e tia to ˈna [aau] aroha i te vai-maite-raa.” (Salamo 118:1, 29; MN) Peneiaˈe e ua riro te reira ei mau parau arueraa hopea ta Iesu Mesia i himene e ta ˈna mau aposetolo haapao maitai i te po hou to ˈna poheraa i te matahiti 33 T.T.—Mataio 26:30.
“E faaite mai oe i to oe huru hanahana”
11, 12. I to Mose ite-rii-raa i to te Atua hanahana, eaha te parau ta ˈna i faaroo?
11 Ua taaihia to Iehova maitai i to ˈna aau aroha no te taime matamua tau senekele hou te tau o Ezera. I muri rii aˈe i to te mau Iseraela haamoriraa i te kafa auro i te medebara e to te feia hara haapoheraahia, ua titau Mose ia Iehova e: “E faaite mai oe i to oe huru hanahana.” A faˈi ai e eita ta Mose e nehenehe e hiˈo i to ˈNa mata e e ora noa ˈi, ua parau Iehova e: “E tuu vau i te maitai atoa na ˈu ra na mua ia oe.”—Exodo 33:13-20.
12 Ua na mua ˈtu to Iehova maitai i te mata o Mose i te poipoi aˈe i nia i te mouˈa Sinai. I taua taime ra, ua ite rii Mose i to te Atua hanahana e ua faaroo i teie parau: “O Iehova, o Iehova, e Atua aroha [hamani maitai], e te [aau maitai], e te faaoromai rahi, e te [î i te aau aroha] e te parau mau; e te vaiiho maite i te [aau] aroha e tausani noa ˈtu te ui; e te faaore i te [hape e te hapa e te hara, teie râ, eita roa ˈtu oia e haapae i te utua, ma te faatae mai i te utua no te hape] a te feia metua i nia i te tamarii, e i nia atoa i te tamarii a taua mau tamarii ra, e tae noa ˈtu i te toru e te maha o te ui ra.” (Exodo 34:6, 7; MN) Te faaite ra teie mau parau e ua taaihia to Iehova maitai i to ˈna aau aroha e i te tahi atu mau huru to ˈna. E tauturu te feruriruriraa i te reira ia tatou ia faaohipa i te maitai. E hiˈo anaˈe na mua i te huru i faahitihia e piti taime i roto i teie parau faahiahia no nia i to te Atua maitai.
“E Atua . . . î i te aau aroha”
13. I roto i te parau no nia i to te Atua maitai, eaha te huru i faahitihia e piti taime, e no te aha e tano ai?
13 “O Iehova, e Atua . . . î i te aau aroha . . . ; e te vaiiho maite i te aau aroha e tausani noa ˈtu te ui.” E au atoa te taˈo Hebera i hurihia ei “aau aroha” i te “aroha taiva ore.” Tera anaˈe te huru i faahitihia e piti taime i roto i ta te Atua parau ia Mose. Mea tano roa, o te aroha hoi te huru rahi roa ˈˈe o Iehova! (Ioane 1, 4:8) E haamahitihiti te arueraa ia Iehova matau-maitai-hia ra “e maitai hoi to ˈna, e tia to ˈna aau aroha i te vai-maite-raa” i teie huru to ˈna.
14. O vai iho â râ te fanaˈo i te maitai e te aau aroha o te Atua?
14 Te hoê faaiteraa o to Iehova maitai, o te mea ïa e ua ‘î oia i te aau aroha.’ E ite-taa-ê-hia te reira i roto i ta ˈna aupururaa î i te here i ta ˈna mau tavini taata haapao maitai e tei pûpûhia. (Petero 1, 5:6, 7) Mai ta te mau Ite no Iehova e nehenehe e haapapu, te ‘vaiiho maite ra oia i te aau aroha’ i te feia e here ra e e tavini ra ia ˈna. (Exodo 20:6) Aita te nunaa o Iseraela pae tino e fanaˈo faahou ra i to Iehova aau aroha, aore ra aroha taiva ore, no te mea ua faarue ratou i ta ˈna Tamaiti. E vai noa râ te maitai e te aroha taiva ore o te Atua e a muri noa ˈtu i nia i te mau Kerisetiano haapao maitai no te mau nunaa atoa.—Ioane 3:36.
O Iehova—E aroha hamani maitai e e aau maitai to ˈna
15. (a) E nafea te parau ta Mose i faaroo i nia i te mouˈa Sinai e haamata ˈi? (b) Ua taaihia te aroha hamani maitai i te aha?
15 E haamata te parau ta Mose i faaroo i nia i te mouˈa Sinai mai teie: “O Iehova, o Iehova, e Atua aroha hamani maitai, e te aau maitai.” E nehenehe te taˈo Hebera i hurihia ei “aroha hamani maitai” e au i “te mau aau” e ua taai-piri-hia i te taˈo i hurihia ei “vairaa tamarii.” Ua taaihia ïa te aroha hamani maitai i te aumauiui î i te here e vai ra i te hohonu-roa-raa o te hoê taata. Te vai ra râ i roto i te aroha hamani maitai hau atu i te aumauiui mau. E tia ia turai te reira ia tatou ia rave i te hoê mea no te haamâha i to vetahi ê mauiui. Ei hiˈoraa, ua ite te mau matahiapo Kerisetiano e mea titauhia ei aroha hamani maitai to ratou i nia i te mau hoa faaroo, ‘a hamani maitai ai ma te aau tae’ ia tano te reira.—Roma 12:8; Iakobo 2:13; Iuda 22, 23.
16. No te aha e nehenehe ai e parau e e aau maitai to Iehova?
16 E faaite-atoa-hia to te Atua maitai na roto i to ˈna aau maitai. Mea haapao roa na te hoê taata aau maitai i to vetahi ê huru aau e e faaite oia i te maitai î i te here i nia iho â râ i tei iti aˈe ia ˈna. O Iehova te hiˈoraa maitai roa ˈˈe o te aau maitai ia haa oia i nia i ta ˈna mau tavini haapao maitai. Na roto i te mau melahi, ei hiˈoraa, ua faaitoito te Atua ma te aau maitai i te peropheta paari ra o Daniela e ua faaara i te potii paretenia ra o Maria e e fanaˈoraa taa ê te tiai maira ia ˈna i te fanauraa mai ia Iesu. (Daniela 10:19; Luka 1:26-38) Ei nunaa o Iehova, mea papu roa e te mauruuru nei tatou no ta ˈna huru faaanaanataeraa mai ia tatou ma te aau maitai na roto i te mau api o te Bibilia. Te arue nei tatou ia ˈna no teie faaiteraa i to ˈna maitai e te tutava nei tatou i te faaohipa i te aau maitai ia haa tatou i nia ia vetahi ê. Ia faatitiaifaro te feia aravihi i te pae varua i te hoê hoa faaroo “ma te aau mǎrû,” e tamata ratou i te riro ei mea mǎrû, e te aau maitai.—Galatia 6:1.
E Atua faaoromai rahi
17. No te aha tatou e mauruuru ai e mea “faaoromai rahi” o Iehova?
17 “E Atua . . . faaoromai rahi.” E haamahitihiti teie mau parau i te tahi atu â tuhaa o to Iehova maitai. Mea faaoromai roa na Iehova to tatou mau hape e e vaiiho mai oia i te taime ia faaruru tatou i te mau paruparu iino e ia haere i mua i te pae varua. (Hebera 5:12–6:3; Iakobo 5:14, 15) E faufaa-atoa-hia te feia aitâ i riro mai ei feia haamori no te Atua i to ˈna faaoromai rahi. E taime â to ratou no te farii i te poroi o te Basileia e te tatarahapa. (Roma 2:4) Noa ˈtu râ e mea faaoromai rahi o Iehova, e turai to ˈna maitai ia ˈna i te tahi mau taime ia faaite i to ˈna riri, mai ta ˈna i rave i to te mau Iseraela haamoriraa i te kafa auro i te mouˈa Sinai. Fatata roa te riri o te Atua i te faaitehia ma te rahi aˈe ia haamou oia i te faanahoraa ino a Satani.—Ezekiela 38:19, 21-23.
18. No nia i te parau mau, eaha te taa-ê-raa i rotopu ia Iehova e te mau aratai taata?
18 ‘E Atua î i te parau mau.’ Mea ê mau Iehova i te mau aratai taata o te fafau i te mau parau rarahi e te ore atu ai e ora ia au i te reira! I te tahi roa ˈˈe pae, e nehenehe ta te feia e haamori ia Iehova e tiaturi i te mau mea atoa i papaihia i roto i ta ˈna Parau faauruahia. I te mea e ua î te Atua i te parau mau, e nehenehe ta tatou e tiaturi noa i ta ˈna mau parau fafau. I roto i to ˈna maitai, e pahono mai to tatou Metua i te raˈi ma te hape ore i ta tatou mau pure no te parau mau pae varua na roto i te horoa-rahi-raa mai i te reira.—Salamo 43:3; 65:2.
19. Eaha te faaiteraa faahiahia roa i te maitai ta Iehova i rave i nia i te feia tatarahapa?
19 “O Iehova, e Atua . . . [o] te faaore i te hape e te hapa e te hara.” I roto i to ˈna maitai, ua ineine Iehova i te faaore i te hara a te feia tatarahapa. Papu maitai, te mauruuru roa nei tatou e ua rave to tatou Metua î i te here i te raˈi e ia fanaˈohia te faaoreraa hara maoti te tusia a Iesu. (Ioane 1, 2:1, 2) Te oaoa mau nei tatou e e nehenehe ta te feia atoa e faaohipa i te faaroo i te hoo e fanaˈo i te taairaa fariihia e Iehova, ma te tiaturiraa o te ora mure ore i roto i ta ˈna ao apî fafauhia. E mau tumu faahiahia mau teie no te arue ia Iehova no to ˈna faaiteraa i te maitai i nia i te taata!—Petero 2, 3:13.
20. Eaha te haapapuraa e vai ra e eita te Atua e tapo i te mata i mua i te haerea ino?
20 “Eita roa ˈtu [Iehova] e haapae i te utua.” Tera te tahi atu tumu e arue ai ia Iehova no to ˈna maitai. No te aha? No te mea, te tahi tuhaa faufaa roa o to ˈna maitai, te mea ïa e eita roa ˈtu oia e tapo i te mata i mua i te haerea ino. Hau atu â, “ia fa mai te Fatu ra o Iesu mai te raˈi mai, ma tana mau melahi mana atoa ra,” e hopoihia mai te tahoo i nia “i te feia aore i ite i te Atua, e tei ore i faaroo i te evanelia.” E ‘faautuahia mai ratou i te pohe mure ore.’ (Tesalonia 2, 1:6-9) E nehenehe atu ai te feia haamori ia Iehova o te ora ˈtu e fanaˈo hope i te ora ma te ore e haapeapeahia e te taata paieti ore o te ‘au ore i te maitai.’—Timoteo 2, 3:1-3.
A pee i to Iehova maitai
21. No te aha e tia ˈi ia tatou ia faaohipa i te maitai?
21 Mea rahi mau â te tumu e arue ai e e haamauruuru ai tatou ia Iehova no to ˈna maitai. Ei tavini na ˈna, eiaha anei tatou ia tutava maite i te faaohipa i taua huru ra? Oia, ua faaitoito hoi te aposetolo Paulo i te mau hoa Kerisetiano e: “Ei pee outou i te Atua mai te tamarii herehia ra.” (Ephesia 5:1) E faaite tamau to tatou Metua i te raˈi i te maitai, ia na reira atoa tatou.
22. Eaha ta tatou e hiˈo mai i roto i te tumu parau i muri nei?
22 Mai te peu e ua pûpû tatou ia tatou iho na Iehova ma te aau tae, aita e feaaraa, te hinaaro mau ra tatou e pee i to ˈna maitai. No te mea e huaai tatou no te taata hara ra o Adamu, e ere i te mea ohie na tatou e rave i te mea maitai. I roto râ i te tumu parau i muri nei, e hiˈo mai tatou no te aha e nehenehe ai ta tatou e faaohipa i te maitai. E hiˈo atoa mai tatou i te mau ravea rau e nehenehe ai e e tia ˈi ia tatou ia pee ia Iehova—te hiˈoraa rahi roa ˈˈe o te maitai.
E nafea outou ia pahono?
• Eaha te maitai?
• Eaha te parau o te Bibilia o te haamahitihiti i te maitai o te Atua?
• Eaha te tahi mau faaiteraa o to Iehova maitai?
• No te aha e tia ˈi ia tatou ia pee i to Iehova hiˈoraa o te maitai?
[Uiraa haapiiraa]
[Hohoˈa i te api 12]
Ua faatitiaifaro Iehova i to ˈna nunaa i tahito ra no te mea aita ratou i ora ia au i ta ratou arueraa
[Hohoˈa i te api 12]
Ua hoˈi te hoê toea haapao maitai i Ierusalema
[Hohoˈa i te api 13]
Ua faaroo Mose i te hoê parau faahiahia no nia i to te Atua maitai
[Hohoˈa i te api 15]
E itehia to Iehova maitai i roto i ta ˈna huru faaanaanataeraa mai ia tatou na roto i te mau api o te Bibilia