Orometua haapii i te Parau a te Atua—Faaitoitohia ia rave i ta ratou ohipa faauehia

TAU hanere tausani orometua haapii tei putuputu ia haapiihia ratou i te mau avaˈe i mairi aˈenei. Ma te haamata i te avaˈe Me i mahemo, ua putuputu mai ratou i na hanere tairururaa mataeinaa “Orometua haapii i te Parau a te Atua,” a te mau Ite no Iehova i te ao nei. Ua faaitoitohia te mau tia ia haapii ia ratou iho, ia riro ei mea aravihi aˈe, e ia rave i ta ratou ohipa faauehia ei orometua haapii.

Ua haere anei outou i te hoê o teie mau tairururaa? Mai te peu e e, papu maitai e ua mauruuru outou no te maa maitai i te pae varua i operehia i teie mau haaputuputuraa ra no te haamori i te Atua mau ra o Iehova. E hiˈo faahou ïa tatou i teie nei i te porotarama haapiiraa o te tairururaa.

Mahana matamua—Mea faufaa te mau Papai faauruahia ei haapiiraa

Ma te mahanahana, ua manava te peretiteni o te tairururaa i te mau tia ma te oreroraa parau “Ia haapiihia outou te mau orometua haapii i te Parau a te Atua.” Ua riro mai Iesu Mesia ei Orometua Rahi no te mea ua haapiihia oia e Iehova te “Orometua Rahi roa ˈˈe.” (Isaia 30:20, MN; Mataio 19:16) Mai te peu e e tia ia tatou ia haere i mua ei orometua haapii i te Parau a te Atua, e tia ïa ia tatou atoa ia haapiihia e Iehova.

“E hotu maitatai to te haapiiraa i te Basileia,” o te tuhaa ïa i muri mai. A uiuihia ˈi te tahi mau orometua haapii aravihi i te Parau a te Atua, ua haamataratarahia te mau oaoa e te mau haamaitairaa o te ohipa faariroraa i te taata ei pǐpǐ.

 Ua hohorahia maira te oreroraa parau faaitoito “Putapûraa i ‘te peu taa ê a te Atua.’” I te senekele matamua, o te turai-atoa-raa te Basileia o te Atua i te taata ia ohipa “te peu taa ê a te Atua.” (Ohipa 2:11) E nehenehe tatou atoa e turai i te taata ia ohipa na roto i te faaite-haere-raa i “te peu taa ê a te Atua” mai te mau haapiiraa bibilia no nia i te hoo, te tia-faahou-raa, e te faufaa apî.

Ua faaitoito te oreroraa parau i muri mai i te taata ia “Oaoa i te parau-tia o Iehova.” (Salamo 35:27) Te tauturuhia ra tatou ia tapi i te parau-tia na roto i te haapiiraa i te hinaaro i te mea parau-tia e i te riri i te mea ino, na roto i te haapiiraa i te Bibilia, na roto i te patoi-uˈana-raa ˈtu i te mau mana iino i te pae varua, e na roto i te faahoturaa i te haehaa. E tauturu taua mau taahiraa avae ra i te paruru ia tatou i te mau amuimuiraa iino, i te mau faufaa materia a teie nei ao, e te mau faaanaanataeraa manaˈo morare ore e te haavî.

Na roto i te oreroraa parau tumu “Faaineine-maite-hia ei orometua haapii i te Parau a te Atua,” ua haamanaˈohia mai tatou e te faariro ra Iehova ia tatou ei mau tavini aravihi na ˈna maoti ta ˈna Parau, to ˈna varua moˈa, e ta ˈna faanahonahoraa i te fenua nei. No nia i te faaohiparaa i te Parau a te Atua, ua aˈo mai te taeae orero ia tatou e: “Ta tatou tapao, o te faaoraoraraa ïa i te parau papaihia e te faaôraa i te reira i roto i te aau o te feia e faaroo ia tatou.”

“Haapiiraa ia tatou iho a haapii ai ia vetahi ê,” tera te oreroraa parau tatuhaahia matamua o te tairururaa. Ua haapapu te tuhaa matamua e e tia ia tatou ia haapao i te hoê â ture aveia teitei o te morare Kerisetiano e ta tatou e haapii ra ia vetahi ê. Ua aˈo mai te tuhaa i muri mai ia tatou ia ‘tia i te tufa i te parau mau ra.’ (Timoteo 2, 2:15) No te haapii ia tatou iho, mea faufaa roa te haapiiraa bibilia taitahi tamau e te hohonu, noa ˈtu ehia maororaa to tatou taviniraa i te Atua. Ua faaite mai te tuhaa hopea o te oreroraa parau tatuhaahia e te hiˈopoa ra te Diabolo ia tatou, te imi ra i tera mau huru mai te teoteo, te feruriraa orure hau, te manaˈo e mea faufaa tatou iho, te pohehae, te feii, te inoino, e te faaino. Mai te peu râ e e patoi uˈana ˈtu tatou i te Diabolo, na ˈna ïa e maue ê atu. No te patoi atu ia ˈna, mea hinaarohia ia haafatata ˈtu tatou i te Atua.—Iakobo 4:7, 8.

Ua faaite mai te oreroraa parau i te taime au “A haafaufau i te mau hohoˈa hairiiri ei ohipa riaria  a teie nei ao,” nafea ia aro atu i taua fifi faufau ra mea atâta no to tatou ea pae varua. Teie ta te peropheta Habakuka i parau no nia ia Iehova: “E ore to oe mata maitai e tia ia hiˈo i te ino, e ore hoi e au ia oe ia hiˈo i te parau ino.” (Habakuka 1:13) E tia ia tatou ia “riaria i te ino.” (Roma 12:9) Ua aˈohia te mau metua ia hiˈopoa i ta ratou mau tamarii ia faaohipa ratou i te Internet e ia mataitai ratou i te afata teata. Ua parau te taeae orero e e tia i te feia mea au na ratou te hohoˈa hairiiri ia imi i te tauturu a te hoê hoa paari i te pae varua. Mea faufaa atoa ia feruriruri e ia tamau aamu i te mau irava mai te Salamo 97:10; Mataio 5:28; Korinetia 1, 9:27; Ephesia 5:3, 12; Kolosa 3:5; Tesalonia 1, 4:4, 5.

Ua tamahanahana mai te oreroraa parau i muri mai “Ia paruru te hau a te Atua ia outou,” ma te haapapuraa e ia teimaha tatou i te ahoaho, e nehenehe tatou e huri i ta tatou hopoia i nia ia Iehova. (Salamo 55:22) Mai te peu e e hohora tatou i to tatou aau i roto i te pure, e horoa mai ïa Iehova i “te hau o te Atua,” te mǎrû e te aehuehu ore o roto mai no ǒ mai i to tatou taairaa faufaa roa e o ˈna.—Philipi 4:6, 7.

Ua hope te mahana matamua i nia i te hoê parau oaoa taa ê e te oreroraa parau “Te faanehenehe ra Iehova i to ˈna nunaa i te maramarama,” o tei faataa i te tupuraa o te Isaia pene 60. I roto i te ao poiri no teie tau, te fanaˈo ra “te taata ê”—te feia rahi roa e au i te mamoe e fa maira—i te maramarama o Iehova e te mau Kerisetiano faatavaihia. Ma te faahiti i te irava 19 e te irava 20, ua faataa mai te taeae orero e: “Eita Iehova e ‘tape’ mai te mahana aore ra e ‘opa’ mai te avaˈe. E tamau noa oia i te faanehenehe i to ˈna nunaa na roto i te turamaraa ia ratou. Auê ïa haapapuraa faahiahia mau no tatou e ora nei i te mau mahana hopea o teie nei ao poiri!” I te hopea o te oreroraa parau, ua faaara mai te taeae orero e ua mahiti mai te buka ra La prophétie d’Isaïe, lumière pour tous les humains, Buka 2. Ua oti anei ia outou i te taio i teie buka apî?

Piti o te mahana—Au maite ia haapii atu ia vetahi ê

I muri mai i te aparauraa o te irava mahana i te piti o te mahana, ua faaroo tatou ma te anaanatae rahi i te piti o te oreroraa parau tatuhaahia o te tairururaa, “Mau tavini maoti ratou e riro ai vetahi ê ei feia faaroo.” Ua haamataratara nau taeae orero o na oreroraa parau e toru tuhaa i na taahiraa avaˈe taitahi no te tauturu i te taata ia riro ei feia faaroo—te haaparareraa i te poroi o te Basileia, te atuaturaa i te anaanatae, e te haapiiraa ˈtu i te feia i anaanatae ia haapao i ta te Mesia i faaue mai. Na roto i te mau uiuiraa e te mau faahiˈoraa, ua nehenehe tatou e ite roa nafea tatou e haapii atu ai ia vetahi ê ia riro mai ei pǐpǐ.

To nia iho te tuhaa i muri mai i te manaˈo tumu ra “A apiti i to outou faaoromai i te paieti.” Ua faaite te taeae orero e o te ‘mau-papu-raa tatou e tae noa ˈtu i te hopea,’ te mea faufaa roa ˈˈe. (Mataio 24:13) E tia ia tatou ia faaohipa i te mau faanahoraa atoa a te Atua—te pure, te haapiiraa taitahi, te mau putuputuraa, e te taviniraa—no te faahotu i te paieti. Mea hinaarohia ia arai tatou eiaha te mau hinaaro e te mau ohipa a teie nei ao ia tinai aore ra ia faaore i to tatou paieti.

 Nafea te taata o te haa puai nei e o te teimaha nei e ite ai i te haumârû i teie mahana? Na te oreroraa parau “Iteraa i te haumârû i raro aˈe i te zugo a te Mesia” i pahono i taua uiraa ra. Ua titau manihini maitai Iesu i ta ˈna mau pǐpǐ ia rave mai i ta ˈna zugo i nia ia ratou e ia haapiihia ratou e ana. (Mataio 11:28-30) E nehenehe tatou e rave mai i ta Iesu zugo i nia ia tatou na roto i te pee-maite-raa i to ˈna hiˈoraa e ora i te hoê oraraa haehaa e te vai faito noa. Ua haamataratarahia te mau manaˈo faufaa o teie oreroraa parau i te uiuiraahia te feia o tei faahaehaa i to ratou oraraa.

O te bapetizoraa o te mau tavini pûpû-apî-hia a te Atua te hoê o te mau taime faufaa o te mau haaputuputuraa rarahi a te mau Ite no Iehova. Ma te mahanahana, ua manava te taeae i hohora i te oreroraa parau “E aratai atu te bapetizoraa i te mau fanaˈoraa taa ê rahi aˈe i te pae haapiiraa,” i te feia e bapetizohia e ua titau manihini oia ia ratou ia farii i te mau fanaˈoraa taa ê rahi aˈe i te pae taviniraa. E nehenehe te mau orometua haapii i te Parau a te Atua, tei bapetizo-apî-hia e o te faaî ra i te mau titauraa bibilia, e hinaaro uˈana i te mau hopoia rau i roto i te amuiraa.

“A pee i te Orometua Rahi,” tera te upoo parau o te oreroraa parau matamua i taua avatea ra. Ehia maororaa to Iesu hiˈopoa-maite-raa e pee-maite-raa i to ˈna Metua, a riro mai ai oia ei Orometua Rahi. I nia i te fenua, ua faaohipa oia i te mau ravea haapiiraa maitatai, mai te haaputapûraa maoti te mau uiraa e te mau faahohoˈaraa ohie, mea oraora râ. Ua niu Iesu i ta ˈna haapiiraa i nia i te Parau a te Atua e ua paraparau oia ma te aau tae, ma te mahanahana, e ma te mana. Aita anei tatou e turaihia ra ia pee i te Orometua Rahi?

Ua faaitoito mai te tahi atu oreroraa parau anaanatae roa, “Ua ineine anei outou i te tavini ia vetahi ê?,” ia tatou ia pee i to Iesu hiˈoraa i roto i te taviniraa ia vetahi ê. (Ioane 13:12-15) Ua faaitoito roa te taeae orero i te mau tane aravihi ia riro mai ia Timoteo i roto i te faaohiparaa i te mau taime maitatai atoa no te tauturu ia vetahi ê. (Philipi 2:20, 21) Ua faaitoitohia te mau metua ia pee ia Elikana e ia Hana i roto i te tautururaa i ta ratou mau tamarii ia rave i te taviniraa taime taatoa. E ua aˈohia te feia apî ia pee i te hiˈoraa o Iesu Mesia e to te taurearea ra o Timoteo na roto i te horoaraa i ta ratou tauturu. (Petero 1, 2:21) Ua putapû atoa tatou i te mau parau a te feia i faaohipa i te mau taime maitatai no te tavini ia vetahi ê.

“Ia faufaahia ˈtu â outou i te haapiiraa teotaratia,” tera te manaˈo tumu o te toru o te oreroraa parau tatuhaahia. Ua haamahitihiti te taeae orero matamua i te faufaaraa ia maoro atu â tatou i te faaroo maitai. Ia naeahia taua tapao ra, e nehenehe tatou e haamata e te mau tuhaa haapiiraa taitahi poto e e tamata i te faaroa ˈtu â. Ua faaitoito atoa oia i te feia e faaroo ra ia hiˈo i te mau irava e ia rave i te mau tapaopaoraa i te roaraa o te mau putuputuraa. Ua faaara mai te piti o te taeae orero i te faufaaraa ia tapea maite i “te hohoˈa parau faaora.” (Timoteo 2, 1:13, 14, MN) No te paruru ia tatou i te mau faaiteiteraa morare ore a te mau vea, te mau philosophia a te taata, te feia faahapa, e te mau haapiiraa apotata, e tia ia tatou ia faaherehere maite i te taime no te haapiiraa taitahi e no te haere i te mau putuputuraa. (Ephesia 5:15, 16) Ua haamataratara te taeae orero hopea o te oreroraa parau tatuhaahia i te faufaaraa ia faaohipa i te mau mea i haapiihia ia faufaahia ˈtu â tatou i te haapiiraa teotaratia.—Philipi 4:9.

Eaha râ tatou i te oaoa i te faarooraa i te oreroraa parau “Mau mea apî i horoahia mai no to tatou haereraa i mua i te pae varua”! Ua oaoa tatou i te faarooraa e e fatata te buka apî Tirez profit de l’École du ministère théocratique i te neneihia. Ua rahi atu â to tatou hinaaro i taua buka ra a tatara ˈi te taeae orero i te mau mea i roto i te buka.  Teie ta ˈna i parau no nia i te tuhaa o te buka e mau aˈoraa no te oreroraa to roto: “Aita teie buka apî i rave mai i te hoê raveraa a teie nei ao no te hohora i na 53 tuhaa o te taio-maitai-raa, te paraparau-maitai-raa, e te haapii-maitai-raa i te taata. Ua niuhia te raveraa i nia i te mau faaueraa tumu bibilia.” E faaite mai te buka nafea to te mau peropheta, to Iesu, e to ta ˈna mau pǐpǐ faaiteraa i te mau aravihi maitatai i te pae haapiiraa. Oia mau, e tauturu iho â teie buka apî e te mau tuhaa apî o te Haapiiraa o te Taviniraa Teotaratia ia tatou ia riro mai ei mau orometua haapii maitai aˈe i te Parau a te Atua.

Toru o te mahana—A riro ei orometua haapii ua navai hoi te maoro

I muri aˈe i te aparauraa o te irava mahana i te mahana hopea, ua faaroo maite te taatoaraa i te oreroraa parau tatuhaahia hopea o te tairururaa, “E faaineine te parau tohu a Malaki ia tatou no te mahana o Iehova.” Ua tohu Malaki fatata hoê hanere matahiti i muri aˈe i to te mau ati Iuda hoˈiraa i ǒ ratou mai Babulonia mai. Ua topa faahou ratou i roto i te ohipa apotata e te ino, a faaino atu ai i te iˈoa o Iehova na roto i te oreraa e tâuˈa i ta ˈna mau ture parau-tia e na roto i te pûpûraa i te mau animara matapo, te pirioi, e te maˈi ei tusia. Hau atu â, ua faataa ratou i ta ratou mau vahine o to ratou apîraa, no te faaipoipo i te mau vahine ěê.

Te haapapu maira te pene matamua o te parau tohu a Malaki e mea here na Iehova to ˈna nunaa. Te haamataratara ra tera pene i te faufaaraa ia mǎtaˈu i te Atua ma te faatura e ia mauruuru no te mau mea moˈa. To Iehova hinaaro, ia horoa tatou i te mea maitai roa ˈˈe na ˈna ma te haamori ia ˈna ma te here miimii ore. Eiaha ta tatou taviniraa moˈa ia riro ei mea faatia ture noa, e e hopoia ta tatou i mua i te Atua.

Ma te faaau i te pene piti o te Malaki i to tatou nei tau, ua ui te piti o te taeae orero o te oreroraa parau tatuhaahia e: “Te ara ra anei tatou e ‘aore e hapa o roto i to tatou utu’?” (Malaki 2:6) E tia i te feia e rave ra i te aratairaa i roto i te haapiiraa ia ite papu e ua niu-maitai-hia ta ratou mau parau i nia i te Parau a te Atua. E tia ia tatou ia riri i te haavare mai te noaaraa mai te faataaraa tano ore.—Malaki 2:14-16.

Ma te hohora i te manaˈo tumu ra “O vai te ora ˈtu i te mahana o Iehova?,” ua tauturu te taeae orero hopea o te oreroraa parau tatuhaahia i te faaineine ia tatou no te mahana o Iehova. “Mea mahanahana mau no te mau tavini a Iehova te iteraa i te tupuraa rahi o te Malaki pene 3, irava 17, i nia ia ratou!” ta te taeae orero ïa i parau. Te na ô ra e: “E riro ratou na ˈu,” ta  Iehova sabaota ïa i parau, “ia tae i te mahana ta ˈu e faataa ra, ei taoˈa maitai roa ra; e na ˈu e faaherehere ia ratou mai te taata e faaherehere i ta ˈna ihora tamaiti ia tavini atu ia ˈna ra.”

Te tahi atu taime faufaa o te tairururaa, o te darama ïa ma te mau ahu no tera tau, “A faatura i te mana o Iehova,” o te faahohoˈa ra i na tamaiti a Kora. Noa ˈtu te haerea orure hau o to ratou metua tane i nia ia Mose e ia Aarona, aita ratou i taiva ia Iehova e i to ˈna mau tia. Ua pohe o Kora e to ˈna mau taata, area na tamaiti a Kora ra, ua ora mai ïa. Ua faaau te oreroraa parau i muri mai, “A auraro ma te taiva ore i te mana o te Atua,” i te aamu o te darama ia tatou taitahi. Ua faaara mai te taeae orero no nia e ono tuhaa aita Kora e to ˈna mau taata i haapao: aita ratou i turu ma te taiva ore i te mana o Iehova; ua vaiiho ratou i te teoteo, te nounou toroa, e te pohehae ia upootia i nia ia ratou; ua tiatonu ratou i te mau huru tia ore o te feia ta Iehova i nomino; ua amuamu ratou; aita ratou i mauruuru no ta ratou mau fanaˈoraa taa ê i te pae taviniraa; e ua haafaufaa aˈe ratou i te mau hoa aore ra te mau taairaa fetii i te taiva ore ia Iehova.

“O vai teie e haapii nei i te parau mau i te mau nunaa atoa?” o te manaˈo tumu ïa o te oreroraa parau no te taatoaraa. Te parau mau i tauaparauhia, e ere ïa te parau mau tei matau-noa-hia, maori râ te parau mau no nia i te opuaraa a Iehova ta Iesu Mesia i faaite haere. Ua faahohonu te taeae orero i te parau mau tei taaihia i te mau tiaturiraa, te parau mau tei taaihia i te huru haamoriraa, e te parau mau no nia i to tatou iho haerea. Na roto i te faaauraa i te mau Kerisetiano no te senekele matamua e te mau Ite no Iehova no teie tau, ua papu roa ˈtu mau â to tatou tiaturiraa e ‘tei rotopu mau â te Atua ia tatou.’—Korinetia 1, 14:25.

I muri aˈe i te haapotoraa o te tumu parau haapiiraa o Te Pare Tiairaa no te hebedoma, ua turaihia te mau orometua haapii atoa i te parau a te Atua i tae mai ia ohipa maoti te oreroraa parau hopea “Te haapaoraa ma te ru i ta tatou ohipa faauehia e haapii i te taata.” Ua tuu te haamanaˈo-poto-raa i te porotarama i te faufaaraa i nia i te faaohiparaa i te mau Papai ia haapii tatou i te taata, i nia i te mau ravea e nehenehe ai tatou e riro mai ei mau orometua haapii aravihi, e i nia i te tiaturiraa i te parau mau ta tatou e haapii ra ia vetahi ê. Ua aˈo mai te taeae orero ia tatou ia ‘faaite i to tatou [haereraa i mua] i te taata’ e ia ‘ara tamau ia tatou e i ta tatou haapiiraa.’—Timoteo 1, 4:15, 16; MN.

Auê ïa oroa tamaaraa pae varua ta tatou i fanaˈo i te tairururaa mataeinaa “Orometua haapii i te Parau a te Atua”! Ia pee ïa tatou i to tatou Orometua Rahi roa ˈˈe ra o Iehova, e to tatou Orometua Rahi ra o Iesu Mesia, i roto i te haapiiraa i te parau a te Atua ia vetahi ê.

[Tumu parau tarenihia/Hohoˈa i te api 28]

Nau papai apî no te haamâha i te mau hinaaro taa ê

Ma te aau tae, ua fanaˈo te mau tia i haere i te tairururaa mataeinaa “Orometua haapii i te Parau a te Atua” e piti papai o te riro ei tauturu rahi i roto i te haapiiraa i te parau mau bibilia i te taata i te tahi mau vahi o te ao. E riro te api parau ra E varua pohe ore anei to outou? ei mauhaa faufaa no te haamata i te mau aparauraa e te feia e faaea ra i te mau fenua aita te mau reo no reira e faataa-ê-raa i te “nephe” e te “varua.” Te faaite maitai ra te api parau apî e mea taa ê te hoê puai varua i te hoê mea ora varua e eita te taata e riro mai ei mau mea ora varua ia pohe ratou.

Ua mahiti mai te buka rairai ra Une vie pleinement satisfaisante: Comment? i te hopea o te piti o te mahana tairururaa. Ua faaineinehia teie buka rairai no te haamata i te mau haapiiraa bibilia e te feia aita e tiaturi ra i te hoê Atua Poiete e huru to ˈna e i te hoê buka i faauruahia e te Atua. Ua nehenehe anei outou e faaohipa i teie nau papai i roto i ta outou taviniraa?

[Hohoˈa i te api 26]

I Milan, i Italia, e i te mau tairururaa i tupu i te ao nei, tau hanere taata tei bapetizohia

[Hohoˈa i te api 29]

Ua putapû te feia e faaroo ra i te darama “A faatura i te mana o Iehova”