Te tumu raau e “tahetahe” e to ˈna “mau roimata” no te mau faaohiparaa rau

‘A rave i te raau [“zuri,” MN] no te mauiui,’ o ta te Ieremia 51:8 ïa e parau ra. No te maimi nohea mai teie raau o te tamǎrû e o te rapaau roa, ua tae roa to matou feruriraa i te motu o Hiu, i te miti Égée.

I TE omuaraa o te tau veavea, e faaineine te feia faaapu no Hiu i te rave i te hoê ootiraa matau-ore-roa-hia. I muri aˈe i te purumuraa i te repo, e tuu ratou i te araea uouo e ati aˈe te mau tumu raau iti o te vai matie noa parauhia tumu raau e tapau mastic to ratou. Ia oti, e tâpû te feia faaapu i te paa ia “tahetahe” te tumu. E haamata te “mau roimata” maheahea o te tapau i te tahetahe. I muri aˈe e piti aore ra e toru hebedoma, e putua te mau topata tapau e e rave mai te feia faaapu i te reira i nia roa anei i te tumu aore ra i raro i nia i te araea. E ravehia teie “mau roimata,” parauhia tapau mastic, no te hamani i te zuri.

Hou râ te ootiraa, mea hinaarohia te faaoromai e te haa puai. Mea taere roa ia tupu mai te tumu raau ohinahina taviriviri. E 40 e tae atu e 50 matahiti te mahemo e paari maitai ai te tumu raau—mai e 2 e tae atu e 3 metera i te teitei.

Taa ê atu i te tâpûpûraa i te tumu e te raveraa mai i te “mau roimata,” e titauhia te tahi atu â ohipa no te hamani i te mastic. Ia oti i te feia faaapu i te ohi mai i te “mau roimata” mastic, e titia, e horoi, e e faataa ratou i te reira ia au i te rahi e te huru maitai. I muri aˈe, e tamâ-faahou-hia te mastic, e nehenehe atu ai e faaohipahia no te mau mea rau.

Te aamu o te hoê raau faufaa roa

Ua taaihia te taˈo Heleni no “mastic” i te hoê taˈo ‘e auau i te niho’ te auraa. Ia au i teie iˈoa, e nehenehe e manaˈohia e mai tahito mai, ua faaohipahia te tapau mastic ei chewing-gum no te faanoˈanoˈa i te vaha.

Te haamaramaramaraa tahito roa ˈˈe no nia i te mastic, na Hérodote ïa, hoê taata tuatapapa Heleni no te senekele 5 H.T.T. Ua faahiti te tahi atu mau taata papai e mau taote—mai ia Apollodore, Dioscoride, Théophraste, e o Hippocrate—i te faaohiparaa i te mastic no te rapaau. Noa ˈtu e e tupu te mau tumu mastic na te pae tahatai o te Mediteranea, fatata e i Hiu noa e hamanihia ˈi te mastic mai te area matahiti 50 T.T. mai. E o te mastic noa ta te feia i haru ia Hiu i hinaaro, mai to Roma, to Gênes, e te mau Ottomans i muri aˈe.

Mastic e faaohipahia no te mau mea rau

I faaohipa na te mau taote Aiphiti i mutaa ihora i te mastic no te rapaau e rave rau maˈi,  mai te hî e te rumati o te puoiraa ivi. I rave atoa na ratou i te reira ei mea noˈanoˈa e no te miri i te tino pohe. No ǒ mai paha te ‘raau no Gileada,’ faahitihia i roto i te Bibilia no ta ˈna mau ravea rapaauraa, faaneheneheraa, e miriraa, i te tumu mastic. (Ieremia 8:22; 46:11) Ua parau-atoa-hia e hoê â noâ te tumu o te horoa mai i te natapha, hoê mea teie e ravehia no te hamani i te mea noˈanoˈa moˈa faataahia no te mau faaohiparaa moˈa anaˈe, e te tumu mastic.—Exodo 30:34, 35.

I teie mahana, e itehia te mastic i roto i te vaniti o te paruru i te peni hinu, te taihaa, e te taihaa faataˈi upaupa. E faaohipahia te reira no te tapea i te maniania e te pape, e hoê teie o te mau taoˈa maitai roa ˈˈe no te haamau roa i te peni i nia i te ahu e te mau hohoˈa peni. E rave-atoa-hia te mastic no te tapiri e no te rapaau i te iri puaa. No to ˈna noˈanoˈa e te tahi atu â mau mea, e tuuhia te mastic i roto i te puˈa, te mau taoˈa faanehenehe, e te monoˈi faanoˈanoˈa.

Ua faataahia te mastic i roto e 25 tapura raau haamanahia i te ao nei. E faaohipa-pinepine-hia te reira i roto i te mau raau rapaau matauhia i te ao Arabia. E ite-atoa-hia te mastic i roto i te pateraa i te niho e i roto i te mau puohu o te tahi mau raau mai te mau gélules.

Ei tumu o te zuri, ua tamǎrû e ua faaora te “mau roimata,” e faaohipahia no te mau mea rau, o te mastic “tahetahe” i te roaraa o te mau senekele. Ua tano iho â te parau tohu a Ieremia i te na ô e: ‘A rave i te raau no te mauiui.’

[Hohoˈa i te api 31]

Hiu

Ootiraa mai i te mastic

E haaputu-maitai-hia te “mau roimata” mastic

[Faaiteraa i te tumu]

Hohoˈa o Hiu e o te ootiraa: Courtesy of Korais Library; te toea: Kostas Stamoulis