Ua noaa anei ia outou “te varua parau mau”?
Ua noaa anei ia outou “te varua parau mau”?
‘E horoa mai te Metua i te tahi [tauturu] ia outou, ia parahi mau oia e a muri noa ˈtu i ǒ outou nei, o te varua parau mau ïa.’—IOANE 14:16, 17; MN.
1. Eaha te parau faufaa ta Iesu i parau atu i ta ˈna mau pǐpǐ i to ˈna mau taime hopea e ratou i roto i te piha i nia?
“E TE Fatu, e haere tia oe i hea?” Hoê tera o te mau uiraa ta te mau aposetolo a Iesu i ui atu ia ˈna i to ˈna mau taime hopea e ratou i roto i te hoê piha i nia i Ierusalema. (Ioane 13:36) A tupu ai te putuputuraa, ua faaara Iesu ia ratou e i teie nei, e tia ia ˈna ia vaiiho ia ratou no te hoˈi i to ˈna Metua ra. (Ioane 14:28; 16:28) Eita ïa oia e parahi tino faahou mai ia ratou ra e haapii ia ratou e e pahono i ta ratou mau uiraa. Ua tamahanahana râ oia ia ratou a na ô ai e: “Na ˈu hoi e ani atu i te Metua ra, e na ˈna e horoa mai i te tahi [“tauturu,” MN] [aore ra, tamahanahana] ia outou, ia parahi mau oia e a muri noa ˈtu i ǒ outou nei.”—Ioane 14:16, nota i raro i te api.
2. Eaha ta Iesu i fafau e tono mai i ta ˈna mau pǐpǐ ra ia haere ê oia?
2 Ua faataa Iesu eaha taua tauturu ra e e nafea te reira ia tauturu i ta ˈna mau pǐpǐ. Ua parau oia ia ratou e: ‘Taua parau ra, aore hoi au i parau atu ia outou i te matamua ra, no te mea tei pihai atoa iho vau ia outou. E teie nei, te haere tia nei au ia ˈna ra i tei tono mai ia ˈu nei ra. E maitai ai outou o vau e haere ê nei; ahiri au aore i haere ê, e ore e tae mai te [tauturu] ia outou nei; ia haere ê râ vau ra, na ˈu ïa oia e tono mai ia outou nei. Ia tae mai râ te varua parau mau ra, na ˈna ïa e aratai ia outou i te mau parau mau atoa ra.’—Ioane 16:4, 5, 7, 13; MN.
3. (a) Inafea ra te tonoraahia “te varua parau mau” i te mau Kerisetiano matamua ra? (b) Eaha te hoê ravea faufaa i riro ai te varua ei “tauturu” no ratou?
3 Ua tupu teie parau fafau i te Penetekose 33 T.T. mai ta te aposetolo Petero i haapapu: “O taua Iesu nei â ta te Atua i faatia aˈenei i nia, o matou atoa nei hoi te ite. E teie nei, ua faateiteihia oia i te rima atau o te Atua, e ua noaa mai i te Metua ra te [varua moˈa] i parauhia maira, ua ninii mai oia i teie ta outou e hiˈo nei, e ta outou e faaroo nei.” (Ohipa 2:32, 33; MN) Mai ta tatou e ite mai, ua faatupu te varua moˈa i niniihia i te Penetekose e rave rahi mau mea no te mau Kerisetiano matamua. Ua fafau râ Iesu e “e faaite faahou mai” “te varua parau mau ra” ‘i te mau parau atoa ta ˈna i parau atu ia ratou.’ (Ioane 14:26) Maoti te reira e nehenehe ai ta ratou e haamanaˈo i te taviniraa e te mau haapiiraa a Iesu, e tae noa ˈtu i te mau taˈo iho ta ˈna i faahiti, e e papai roa ˈtu. E tauturu iho â râ te reira i te aposetolo paari ra o Ioane i te hopea o te senekele matamua T.T. ia haamata oia i te papai i ta ˈna Evanelia, to roto hoi te aˈoraa faahiahia ta Iesu i horoa i to ˈna haamauraa i te oroa Haamanaˈoraa o to ˈna poheraa.—Ioane, mau pene 13-17.
4. Mea nafea to “te varua parau mau” tautururaa i te mau Kerisetiano matamua i faatavaihia?
4 Ua fafau atoa Iesu i taua mau pǐpǐ matamua ra e e “haapii mai” te varua ‘i te mau mea atoa ia ratou’ e e ‘aratai ia ratou i te parau mau atoa ra.’ E tauturu te varua ia taa ia ratou te mau mea hohonu aˈe o te mau Papai e ia tapea i to ratou tahoêraa i te pae manaˈo, maramarama e opuaraa. (Korinetia 1, 2:10; Ephesia 4:3) Ua haamana ïa te varua moˈa i taua mau Kerisetiano matamua ra e haa ei pǔpǔ o te “tavini haapao maitai e te paari” ia horoa ratou i te “maa i te hora mau ra” na te mau Kerisetiano taitahi i faatavaihia.—Mataio 24:45.
E faaite te varua
5. (a) Eaha te tiaturiraa apî ta Iesu i tuu atu i mua i ta ˈna mau pǐpǐ i te po 14 no Nisana 33 T.T.? (b) Eaha te tuhaa a te varua moˈa i roto i te tupuraa o ta Iesu parau fafau?
5 I te po 14 no Nisana 33 T.T., ua faahiti Iesu i mua i ta ˈna mau pǐpǐ e e farii oia ia ratou a muri aˈe e e parahi ratou ia ˈna ra e i to ˈna Metua ra i te raˈi. Ua parau oia ia ratou e: “E rave rahi te parahiraa mau i te fare o tau Metua ra; ahiri aita ra, ua parau atu ïa vau ia outou. Te haere nei au e haamaitai i te hoê vahi no outou. E ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.” (Ioane 13:36; 14:2, 3) E faatere ratou e oia i roto i to ˈna Basileia. (Luka 22:28-30) Ia fanaˈo ratou i teie tiaturiraa i te raˈi, e tia ia ratou ia ‘fanauhia e te varua’ ei tamarii varua a te Atua e ia faatavaihia no te tavini ei arii e ei tahuˈa e te Mesia i te raˈi.—Ioane 3:5-8; Korinetia 2, 1:21, 22; Tito 3:5-7; Petero 1, 1:3, 4; Apokalupo 20:6.
6. (a) Afea ra te haamataraa te parauraa no te raˈi, e ehia te fanaˈo i teie parauraa? (b) Ua bapetizohia tei parauhia i roto i te aha?
6 Ua haamata teie “parauraa no te raˈi” i te Penetekose 33 T.T. e, i te pae rahi, e au ra e ua hope i ropu i te mau matahiti 1930. (Hebera 3:1) Te rahiraa o tei tapaohia e te varua moˈa no te riro ei melo o te Iseraela pae varua, 144 000 ïa ‘i tauihia no roto i te taata nei.’ (Apokalupo 7:4; 14:1-4) Ua bapetizohia ratou i roto i te tino varua o te Mesia, i roto i ta ˈna amuiraa, e i roto i to ˈna pohe. (Roma 6:3; Korinetia 1, 12:12, 13, 27; Ephesia 1:22, 23) I muri aˈe i to ratou bapetizoraa e faatavairaa i te varua moˈa, ua haamata ratou i te hoê oraraa faatusia, oia hoi te hoê oraraa ma te hapa ore e tae noa ˈtu i to ratou poheraa.—Roma 6:4, 5.
7. No te aha e tia ˈi e o te mau Kerisetiano faatavaihia anaˈe te rave i te mau taoˈa taipe i te oroa Haamanaˈoraa?
7 Ei Iseraela pae varua, tei roto teie mau Kerisetiano faatavaihia i te hoê faufaa apî i haamauhia i rotopu ia Iehova e ‘te Iseraela o te Atua.’ (Galatia 6:16; Ieremia 31:31-34) Ua haamanahia te faufaa apî e te toto maniihia o te Mesia. Ua faahiti Iesu i te reira i to ˈna haamauraa i te oroa Haamanaˈoraa o to ˈna poheraa. Te faatia ra Luka e: “Ua rave ihora oia i te pane, haamaitai atura i te Atua, vavahi ihora, tuu atura ia ratou ra, na ô atura, O tau tino teie e horoahia na outou nei, e na reira outou ei manaˈoraa ia ˈu. E ua na reira atoa hoi i te auˈa ia oti aˈe te amuraa, na ô atura, Teie nei auˈa, o te faufaa apî ïa i to ˈu nei toto, e haamaniihia no outou nei.” (Luka 22:19, 20) O te toea o te tino 144 000 e vai noa râ i te fenua nei te tia ia rave i te pane e te uaina taipe i te oroa Haamanaˈoraa i te poheraa o te Mesia.
8. E nafea te feia faatavaihia e ite ai e ua parauhia ratou no te raˈi?
8 E nafea te feia faatavaihia e ite ai e ua parauhia ratou no te raˈi? E faaite te varua moˈa ia ratou ma te hape ore. Ua papai te aposetolo Paulo ia ratou e: ‘O te feia atoa i arataihia e te varua o te Atua ra, e tamarii anaˈe ïa ratou na te Atua. O te varua iho hoi, e to tatou atoa nei varua, o tei faaite ïa e, e tamarii tatou na te Atua. E tamarii ra, e feia tufaa ïa; e feia tufaa i te Atua ra, e feia tufaa tatou e te Mesia; te pohe apipiti nei hoi tatou e oia atoa, ia haamaitai-apipiti-hia tatou e oia atoa.’ (Roma 8:14-17) No te puai o teie faaiteraa a te varua, e tia i te feia e feaa rii noa ˈˈe ra e ua parauhia anei ratou no te raˈi ia faaoti ma te tano e aita ratou i parauhia, e eiaha ïa ratou e rave i te mau taoˈa taipe i te oroa Haamanaˈoraa.
Te varua e te mau mamoe ê atu
9. Eaha na pǔpǔ taa ê i faahitihia i roto i te mau Evanelia e te buka Apokalupo?
9 Ma te manaˈo i te numera taotiahia o te mau Kerisetiano i parauhia no te riro ei Iseraela pae varua, ua faahiti Iesu ia ratou mai te “nǎnǎ iti.” Ua fariihia ratou i roto i te “aua” o te faufaa apî, taa ê atu i te mau “mamoe ê atu” aita i numerahia ta Iesu i parau e e haaputu atoa oia e tia ˈi. (Luka 12:32; Ioane 10:16) E riro to te mau mamoe ê atu e haaputuhia i te anotau hopea ei “feia rahi roa” i faataahia no te ora ˈtu i “te ati rahi” ma te tiaturiraa e ora e a muri noa ˈtu i nia i te fenua paradaiso. Ma te faahiahia, te faataa ê ra te orama i tae mai ia Ioane ra i te hopea o te senekele matamua T.T. i teie feia rahi roa e na 144 000 melo o te Iseraela pae varua. (Apokalupo 7:4, 9, 14) E noaa atoa anei te varua moˈa i te mau mamoe ê atu, e mai te peu e e, e nafea te reira ia ohipa i roto i to ratou oraraa?
10. Eaha te auraa e e bapetizohia te mau mamoe ê atu ‘i te iˈoa o te Metua, e o te Tamaiti, e o te varua moˈa’?
10 E tuhaa faufaa mau ta te varua moˈa i roto i te oraraa o te mau mamoe ê atu. E faataipe ratou i ta ratou pûpûraa na Iehova na roto i te bapetizoraa ‘i te iˈoa o te Metua, e o te Tamaiti, e o te varua moˈa.’ (Mataio 28:19) E farii ratou i te mana arii o Iehova, e auraro i te Mesia ei Arii e ei Taraehara no ratou, e e auraro i te ohiparaa a te varua, aore ra puai ohipa, o te Atua, i roto i to ratou oraraa. I tera e tera mahana, e tutava ratou i te faahotu i roto i to ratou oraraa i “ta te [varua] e faatupu,” oia hoi ‘te [aroha], te oaoa, te hau, te faaoromai, te [aau maitai], te maitai, te faaroo, te [mǎrû], te hitahita ore.’—Galatia 5:22, 23; MN.
11, 12. (a) E nafea te feia faatavaihia ia haamoˈahia na roto i te hoê ravea taa ê roa? (b) E nafea te mau mamoe ê atu ia haamoˈahia?
11 E tia atoa i te mau mamoe ê atu ia vaiiho i te Parau a te Atua e i to ˈna varua moˈa ia tamâ, aore ra ia haamoˈa, ia ratou. Ua haamoˈa-aˈena-hia te feia faatavaihia na roto i te hoê ravea taa ê roa, ua faarirohia ei feia tia e te moˈa ei vahine faaipoipo na te Mesia. (Ioane 17:17; Korinetia 1, 6:11; Ephesia 5:23-27) Te faahiti ra te peropheta Daniela ia ratou mai ‘te feia moˈa no Tei Teitei’ o te farii i te Basileia o “te Tamaiti a te taata,” te Mesia ra o Iesu. (Daniela 7:13, 14, 18, 27) Na mua ˈˈe, na roto ia Mose e ia Aarona, ua parau Iehova i te nunaa Iseraela e: “O vau hoi to outou Atua ra o Iehova; e haamoˈa hoi ia outou iho, ia moˈa outou no te mea te moˈa nei au.”—Levitiko 11:44.
12 Te auraa tumu o te taˈo ra “haamoˈaraa,” o “te ohipa ïa aore ra raveraa e faariro ei moˈa, e faataa ê, aore ra e faataa no te taviniraa i te Atua ra o Iehova; te riroraa ei mea moˈa, aore ra ei mea tamâhia.” Aˈena i te matahiti 1938 ra, ua parau Te Pare Tiairaa e “e tia” i te mau Ionadaba, aore ra te mau mamoe ê atu, “ia ite e mea titauhia te pûpûraa e te haamoˈaraa i te taata atoa e riro ei melo o te feia rahi roa e te ora i nia i te fenua.” I roto i te orama o te feia rahi roa i papaihia i roto i te buka Apokalupo, te faahitihia ra ratou mai te feia tei “horoi i to ratou ahu, e ua teatea, i te toto o te Arenio” e o te “haamori” ra ia Iehova “i te rui e te ao i roto i to ˈna ra hiero.” (Apokalupo 7:9, 14, 15) Ma te tauturu a te varua moˈa, e tutava te mau mamoe ê atu e ia raea ia ratou te mau titauraa a Iehova i te pae o te moˈaraa.—Korinetia 2, 7:1.
Hamani-maitai-raa i te mau taeae o te Mesia
13, 14. (a) Ia au i te parabole a Iesu o te mau mamoe e te mau puaaniho, tei te aha e ora ˈi te mau mamoe ê atu? (b) I teie nei anotau hopea, mea nafea to te mau mamoe ê atu hamani-maitai-raa i te mau taeae o te Mesia?
13 Ua haamahitihiti Iesu i te taairaa piri i rotopu i te mau mamoe ê atu e te nǎnǎ iti i roto i ta ˈna parabole o te mau mamoe e te mau puaaniho e vai ra i roto i ta ˈna parau tohu no nia i “te hopea o te faanahoraa o te mau mea.” I roto i taua parabole ra, ua faaite maitai te Mesia e ua taai-piri-hia te ora o te mau mamoe ê atu i to ratou haerea i nia i te feia faatavaihia ta ˈna i parau “tau mau taeae.” Ua parau oia e: “Ei reira te arii e parau aˈe ai i tei tana rima atau ra, A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te [ao] nei ra. . . . Oia mau ta ˈu e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia ˈu.”—Mataio 24:3, MN; 25:31-34, 40; MN.
14 Te faahiti ra te parau ra “o outou i na reira” i te mau ohipa tauturu î i te here i ravehia no te mau taeae fanauhia e te varua o te Mesia ta te ao a Satani i faariro ei feia ěê, a huri atoa ˈi i te tahi pae i roto i te tapearaa. Ua hinaaro ratou i te maa, te ahu e tano, e ia utuutuhia to ratou maˈi. (Mataio 25:35, 36, nota i raro i te api) I teie nei anotau hopea, mai te matahiti 1914 mai, mea rahi to te feia faatavaihia tei roohia i taua mau huru tupuraa ra. Te haapapu ra te tuatapaparaa no teie tau o te mau Ite no Iehova e ua turuhia ratou e to ratou mau hoa taiva ore, te mau mamoe ê atu, tei turaihia e te varua.
15, 16. (a) I roto i teihea ohipa to te mau mamoe ê atu tauturu-taa-ê-raa i te mau taeae faatavaihia o te Mesia i te fenua nei? (b) Mea nafea to te feia faatavaihia faaiteraa i to ratou mauruuru i te mau mamoe ê atu?
15 Ua fanaˈo taa ê te mau taeae faatavaihia o te Mesia e vai ra i te fenua nei i teie nei anotau hopea, i te turu itoito a te mau mamoe ê atu i roto i te haapaoraa i te faaueraa a te Atua e ‘parau haere i te evanelia o te basileia nei e ati noa ˈˈe teie nei ao, ia ite te mau fenua atoa.’ (Mataio 24:14; Ioane 14:12) A topa noa ˈi te numera o te feia faatavaihia i te fenua nei i te roaraa o te mau matahiti, ua maraa noa to te mau mamoe ê atu e tae roa ˈtu i te mau mirioni. Ua tavini te mau tausani o ratou ei feia poro taime taatoa—ei pionie e ei mitionare—a faatae ai i te parau apî maitai o te Basileia i “te hopea o te fenua ra.” (Ohipa 1:8) E rave te tahi atu i te ohipa faaiteraa ia au i tei maraa ia ratou e e turu ma te oaoa i teie ohipa faufaa i te moni.
16 Auê te mau taeae faatavaihia o te Mesia i te mauruuru i teie turu taiva ore a to ratou mau hoa o te mau mamoe ê atu! Ua faataa-maitai-hia to ratou huru aau i roto i te buka ra Te ino ore no te ao atoa nei i raro aˈe i te Faatereraa a te ‘Tamaiti hui arii no te hau’ ta te pǔpǔ o te tavini i horoa mai i te matahiti 1986 ra. Te na ô ra e: “Mai te Piti o te Tamaˈi Rahi maira, ua tupu te hoê tuhaa rahi o te parau tohu a Iesu no nia i te ‘hopea o te amuiraa o te mau mea nei’ maoti te ohipa i ravehia e te mau melo o te ‘feia rahi roa’ o te mau ‘mamoe ê atu.’ . . . Mauruuru i te ‘feia rahi roa’ . . . no te mau reo atoa e te mau nunaa atoa no te ohipa itoito mau ta ratou i rave i roto i te tupuraa o te parau tohu a [Iesu] i roto i te Mataio 24:14!”
‘Ia ore ia maitai roa maori râ na roto ia tatou’
17. E nafea te feia haapao maitai no tahito ra o te faatiahia i te fenua nei ‘ia ore ia maitai roa maori râ na roto i’ te feia faatavaihia?
17 Ei melo faatavaihia e a faahiti ai i te mau tane e te mau vahine haapao maitai tei ora na hou te Mesia, ua papai te aposetolo Paulo e: “E roo maitai tei noaa ia ratou atoa nei i te faaroo, aita râ i noaa tei parauhia maira: no te mea ua vaiihohia e te Atua te mea maitai rahi atu no tatou [te feia faatavaihia], ia ore [“ratou ia maitai roa maori râ na roto ia,” MN] tatou.” (Hebera 11:35, 39, 40) I roto i te Mireniuma, e haa te Mesia e to ˈna na taeae faatavaihia 144 000 i nia i te raˈi ei arii e ei tahuˈa e e faatae mai ratou i te mau maitai o te tusia taraehara o te Mesia i nia i te fenua nei. E “maitai roa” ïa te mau mamoe ê atu i te pae tino e feruriraa.—Apokalupo 22:1, 2.
18. (a) Eaha ta te mau parau bibilia e tia ia tauturu i te mau mamoe ê atu ia haafaufaa? (b) Te tiai ra te mau mamoe ê atu i “te faaiteraahia mai o te tamarii a te Atua” ma teihea tiaturiraa?
18 Maoti teie mau mea atoa, e tia ia mau maitai i te mau mamoe ê atu no te aha te mau Papai Heleni Kerisetiano e huti rahi ai i te ara-maite-raa i nia i te Mesia e to ˈna mau taeae faatavaihia e ta ratou tuhaa faufaa i roto i te tupuraa o te mau opuaraa a Iehova. No reira, no te mau mamoe ê atu, e fanaˈoraa taa ê te tururaa i te pǔpǔ o te tavini faatavaihia a tiai ai i “te faaiteraahia mai o te tamarii a te Atua” i Aramagedo e i te roaraa o te Mireniuma. E nehenehe ratou e ru e ia “faaorahia” ratou “i te tapea ra o te pohe, ia noaa te tiamâ maitai o te tamarii a te Atua ra.”—Roma 8:19-21.
Tahoêhia e te varua i te oroa Haamanaˈoraa
19. Eaha ta “te varua parau mau” i rave no te feia faatavaihia e to ratou mau hoa, e e nafea ratou e tahoêhia ˈi ma te faahiahia i te ahiahi 28 no Mati?
19 I roto i ta ˈna pure hopea i te po 14 no Nisana 33 T.T., ua parau Iesu e: ‘Te pure nei au ia riro ratou atoa ei hoê; mai ia oe, e tau Metua, i roto ia ˈu nei ra, e mai ia ˈu hoi i roto ia oe na, ia hoê atoa ratou i roto ia tâua, ia faaroo to te ao e na oe au i tono mai.’ (Ioane 17:20, 21) No to ˈna aroha, ua tono mai te Atua i ta ˈna Tamaiti ia horoa oia i to ˈna ora no te faaora i te feia faatavaihia e te ao o te huitaata faaroo. (Ioane 1, 2:2) Ua tahoê “te varua parau mau” i te mau taeae o te Mesia e to ratou mau hoa. I te ahiahi 28 no Mati, i muri aˈe i te toparaa mahana, e putuputu na pǔpǔ e piti no te haapao i te oroa o te poheraa o te Mesia e te haamanaˈo i te mau mea atoa ta Iehova i rave no ratou na roto i te tusia o ta ˈna Tamaiti here, te Mesia ra o Iesu. Ia haapaari to ratou taeraa mai i taua oroa faufaa ra i to ratou tahoêraa e ia faaapî i to ratou faaoti-maite-raa e tamau i te rave i te hinaaro o te Atua, a haapapu ai e te oaoa ra ratou e to roto ratou i te feia ta Iehova e here ra.
Ei hiˈo-faahou-raa
• Inafea ra te tonoraahia “te varua parau mau” i te mau Kerisetiano matamua ra, e mea nafea te reira i te riroraa ei “tauturu”?
• E nafea te feia faatavaihia e ite ai e ua parauhia ratou no te raˈi?
• E nafea te varua o te Atua e ohipa ˈi i nia i te mau mamoe ê atu?
• Mea nafea to te mau mamoe ê atu hamani-maitai-raa i te mau taeae o te Mesia, e no te aha ratou ‘e ore ai e maitai roa maori râ na roto i’ te feia faatavaihia?
[Uiraa haapiiraa]
[Hohoˈa i te api 21]
Ua niniihia “te varua parau mau” i nia i te mau pǐpǐ i te Penetekose 33 T.T.
[Hohoˈa i te api 23]
Ua hamani maitai te mau mamoe ê atu i te mau taeae o te Mesia na roto i te tururaa ia ratou i roto i te haapaoraa i te faaueraa a te Atua e poro