“A faaineine, e nehenehe e mauiui”

AITA anei outou i faaroo aˈenei i tera mau parau? Ua parau mai paha te hoê taote aore ra te hoê tuati i te reira hou a horoa ˈi i te hoê rapaauraa i titauhia.

Aita paha outou i patoi i te rapaauraa no te ape noa i te mauiui e tupu mai. Ua faaoromai râ outou i te mauiui no te fanaˈo i te ea maitai a muri aˈe. I roto i te mau tupuraa fifi roa, e nehenehe te fariiraa aore ra te farii-ore-raa i te rapaauraa au ore e riro ei tumu no te ora aore ra no te pohe.

Noa ˈtu e eita tatou e titau noa i te ara-maite-raa o te hoê taote, e hinaaro tatou, te taata tia ore, i te aˈo, aore ra aˈoraa, noa ˈtu e mea mauiui i te tahi taime. (Ieremia 10:23) No te haamatara i teie hinaaro o te mau tamarii, te na ô ra te Bibilia e: “Ua mau roa te maamaa i roto i te aau o te tamarii; na te papai râ na te aˈo ra e faataa ê atu ia ˈna.”—Maseli 22:15.

I roto i teie hiˈoraa, e taipe te papai no te mana o te metua. Parau mau e mea iti te tamarii e au i te aˈo. Mai te peu e e titau te reira i te tahi huru faautuaraa, e inoino ratou i te reira. Teie râ, eita te mau metua paari e te î i te here e haamau i to ratou feruriraa i nia i te mauiui o te aau o te tamarii, i nia râ i te maitairaa no a muri aˈe. Ua ite te mau metua Kerisetiano e e parau mau te Parau a te Atua ia parau oia e: “Aita roa hoi e aˈo e riro ei mea oaoa i reira ra, e mea oto râ; area i muri aˈe, o te maitai ra ïa o te parau-tia te tupu i taua aˈo ra, i te feia i haamatarohia i te reira.”—Hebera 12:11; Maseli 13:24.

Parau mau, e ere o te mau tamarii anaˈe te hinaaro nei i te aˈo. O te mau metua atoa. Te na ô nei te Bibilia i te mau taata paari ia parau oia e: “E tapea etaeta i te aˈo: eiaha roa e tuua; e vaiiho maite i te reira; o to oe ïa ora.” (Maseli 4:13) Oia, e farii te feia haerea paari—te mea apî e te mea paari—i te aˈo i niuhia i nia i te Parau a te Atua, te Bibilia, no te mea ia na reira ratou, e paruruhia to ratou oraraa i te pae hopea.