Mau uiraa a te feia taio

Mea tano anei ia parau e e tamǎrû te aroha o Iehova i ta ˈna parau-tia?

Noa ˈtu e ua faaohipahia teie parau, mea maitai roa ˈˈe ia ape i te reira i te mea e e au ra e e haamǎrû te aroha o Iehova aore ra e faaiti i ta ˈna parau-tia, mai te mea ra e ua hau aˈe to ˈna aroha i te huru etaeta o te parau-tia. E ere te reira i te mea tano.

Te auraa atoa o te taˈo Hebera i hurihia ei “parau-tia” i roto i te Traduction du monde nouveau, oia ia “haavaraa.” Parau mau e nehenehe te parau-tia a Iehova e titau i te faautuaraa e tano, e nehenehe atoa râ te reira e faaora i te feia e au. (Genese 18:20-32; Isaia 56:1; Malaki 4:2) No reira, eiaha e hiˈohia te parau-tia a Iehova ei mea etaeta aore ra e tia ia haamǎrûhia.

E nehenehe te taˈo Hebera no te parau ra “aroha” e faaohipahia no te tapea i te horoaraa i te hoê haavaraa. E nehenehe atoa te reira e faaohipahia no te hoê faaiteraa itoito i te aumauiui, te tamahanahanaraa i te feia e fifi to ratou.—Deuteronomi 10:18; Luka 10:29-37.

E Atua parau-tia e te aroha o Iehova. (Exodo 34:6, 7; Deuteronomi 32:4; Salamo 145:9) Mea tia roa ta ˈna parau-tia e to ˈna aroha, e e ohipa amui raua ma te au maite. (Salamo 116:5; Hosea 2:19) Mea vai aifaito roa na huru maitatai e piti aore ra e au te tahi i te tahi. No reira, mai te peu e e parau tatou e ua tamǎrûhia to Iehova aroha e ta ˈna parau-tia, e parau atoa ïa tatou e ua tamǎruhia ta ˈna parau-tia e to ˈna aroha.

Ua tohu Isaia e: “E tiai . . . Iehova ia faaite atu ia outou i to ˈna aroha; e ia faateiteihia oia ia faahereherehia outou. E Atua [no te haavaraa] [“parau-tia,” The New English] hoi Iehova.” (Isaia 30:18; MN) Te faaite ra Isaia i ǒ nei e na te parau-tia a Iehova e turai i te mau ohipa o te aroha, eiaha râ na to ˈna aroha e haamǎrû aore ra e faaiti i ta ˈna parau-tia. E faaite Iehova i te aroha no te mea e mea tia oia e no te mea e e mea î oia i te here.

Parau mau, ua papai te taata papai Bibilia o Iakobo e: “E haavi ra te aroha i te faahapa.” (Iakobo 2:13b) Teie râ, i roto i te mau irava tapiri, aita Iakobo e parau nei no Iehova, no te mau Kerisetiano râ o te faaite i te aroha—ei hiˈoraa, i nia i te feia i mauiui e te veve. (Iakobo 1:27; 2:1-9) Ia haavahia teie feia î i te aroha, e haafaufaa Iehova i to ratou haerea e e faaore oia ma te aroha i ta ratou hara i nia i te niu o te tusia a ta ˈna Tamaiti. No reira, e upootia to ratou haerea î i te aroha i nia i te tahi haavaraa au ore o te nehenehe e faataehia i nia ia ratou.—Maseli 14:21; Mataio 5:7; 6:12; 7:2.

E ere ïa i te mea tano ia parau e e tamǎrûhia ta Iehova haavaraa e to ˈna aroha oia hoi e e tia ia haamǎrûhia ta ˈna parau-tia e te aroha. Mea aifaito roa na huru maitatai e piti i roto ia Iehova. E faito noa te tahi i te tahi mai ta raua e faito noa—e e faitohia e—te tahi atu mau huru maitatai o Iehova mai te here e te paari.