Te bapetizoraa o Clovis—1 500 matahiti o te haapaoraa Katolika i Farani

“I TE iˈoa o te pâpa, boom,” tera tei papaihia i nia i te hoê paura hamanihia i itehia i roto i te hoê fare pure i Farani tei terehia ˈtu e te pâpa Ioane Paulo II i te avaˈe Tetepa 1996. Teie te hiˈoraa uˈana roa o te patoiraa e tapao ra i te paeraa o to ˈna tere i Farani iho. Noa ˈtu râ, fatata e 200 000 taata tei haere atu i te oire Farani o Reims i taua matahiti ra no te haamanaˈo e te pâpa i te 1 500raa o te matahiti fariuraa o te arii Franc ra o Clovis i te haapaoraa Katolika. O vai teie arii i parauhia ˈi to ˈna bapetizoraa te bapetizoraa o te fenua Farani? E no te aha te haamanaˈoraa i te reira i faatupu ai i te mârôraa?

Te Hau emepera e hiˈa ra

Ua fanauhia o Clovis i te area matahiti 466 T.T., e tamaiti o ˈna na Childéric I, arii o te mau Francs Saliens. I muri aˈe i to ratou haruraahia e to Roma i te matahiti 358 T.T., ua faatiahia teie opu Heremani e parahi i Beletita mai te peu noa e e paruru ratou i te otia e e horoa ˈtu ratou i te mau faehau na te nuu Roma. Ua aratai atu te taairaa piri roa e te huiraatira Gaulois Roma no reira, i te hoê Faaromaraa mǎrû noa i teie mau Francs. E hoa o Childéric I no to Roma, ma te patoi atu i te mau haruraa a te tahi atu mau opu Heremani, mai te mau Wisigoths e te mau Saxons. Mea na reira oia i fanaˈo ai i te mauruuru o te huiraatira Gaulois Roma.

Te aano o te mataeinaa Roma o Gaule, mai te anavai Rhin ïa i te pae apatoerau e haere roa i te mau Pyrénées i te pae apatoa. I muri aˈe râ i te poheraa o te tenerara Roma o Aetius i te matahiti 454 T.T., aita e mana e faatere ra i te fenua. Hau atu â, ua faatupu te hiˈaraa o Romulus Augustule, te emepera hopea o Roma, i te matahiti 476 T.T., e te hopea o te tuhaa tooa o te râ o te Hau emepera Roma, i te papu-ore-raa poritita rahi i roto i te fenua. E no reira, e au te Gaule i te hoê maa hotu para e tiai noa ra ia pofaihia e te hoê o te mau opu e parahi ra i roto i to ˈna mau otia. E ere ïa i te mea maere e i muri aˈe i to ˈna monoraa i to ˈna papa, ua haamata o Clovis i te imi i te faaaano i te mau otia o to ˈna basileia. I te matahiti 486 T.T., ua pau te tia hopea no Roma i Gaule ia ˈna i roto i te hoê aroraa i pihai i te oire o Soissons. I to ˈna upootiaraa mai, ua faatere oia i te tuhaa fenua taatoa i rotopu i te anavai Somme i te pae apatoerau, e te anavai Loire i te pae ropu e i te pae tooa o te râ o te fenua Gaule.

Te taata o te riro mai ei arii

Ua vai noa te mau Francs ei mau etene, eiaha râ te tahi atu mau opu Heremani. Teie râ, ua ohipa roa to Clovis faaipoiporaa ia Clotilde, te hoê tamahine hui arii no Bourgogne, i nia i  to ˈna oraraa. Ei Katolika rahi, ua imi o Clotilde ma te rohirohi ore i te fariu i ta ˈna tane. Ia au i te tuatapaparaa papaihia i te senekele 6 T.T. e Grégoire de Tours, tei te matahiti 496 T.T., i roto i te hoê aroraa i Tolbiac (Zülpich, Heremani) e te opu Alémanique, to Clovis fafauraa e e faarue oia i te peu etene mai te peu e e faaupootia te Atua o Clotilde ia ˈna. Noa ˈtu e ua fatata roa te mau pǔpǔ a Clovis i te pau, ua taparahihia te arii Alémanique e ua tuu aˈera ta ˈna nuu. Ua manaˈo aˈera o Clovis e ua faaupootia te Atua o Clotilde ia ˈna. Ia au i te tutuu, na Remi “Peata” i bapetizo ia Clovis i roto i te fare pure no Reims, i te 25 no Titema 496 T.T. Teie râ, te manaˈo ra te tahi pae e ua tupu te reira i te hoê taio mahana i muri aˈe, i te matahiti 498/499 T.T.

Aita o Clovis i manuïa i te haru i te basileia no Bourgogne i te pae apatoa hitia o te râ. Ua upootia râ oia i nia i te mau Wisigoths i to ˈna haapauraa ia ratou i Vouillé, i pihai ia Poitiers, i te matahiti 507 T.T., maoti taua upootiaraa ra i noaa ˈi ia ˈna ia faatere i te pae rahi apatoa tooa o te râ o te fenua Gaule. Ei haamauruururaa no teie upootiaraa, ua faatoroa te emepera o te Hau emepera Roma Hitia o te râ o Anastase ia Clovis ei tonitera. Tei nia ˈˈe ïa oia i te taatoaraa o te mau arii no te pae tooa o te râ, e mea mana ta ˈna faatereraa i te aro o te huiraatira Gaulois Roma.

Ma te faatere i te tuhaa fenua o te mau Francs e faaea ra na te hiti o te anavai Rhin e haere roa i te pae hitia o te râ, ua faariro o Clovis ia Paris ei oire pu no ˈna. I te mau matahiti hopea o to ˈna oraraa, ua haapaari oia i to ˈna Basileia na roto i te horoaraa i te hoê pǎpǎ ture mana papaihia, te ture Salique, e na roto i te faatupuraa i te hoê apooraa ekalesia i Orléans no te faataa i te mau taairaa i rotopu i te Ekalesia e te Hau. I to ˈna poheraa, i te 27 no Novema 511 T.T., o o ˈna anaˈe te arii o na 75 % o te fenua Gaule.

Te faataa ra The New Encyclopædia Britannica i te fariuraa o Clovis i te haapaoraa Katolika mai “te hoê taime faufaa roa i roto i te tuatapaparaa o Europa tooa o te râ.” No te aha e mea faufaa roa te fariuraa o teie arii etene? No te mea ïa e ua maiti o Clovis i te haapaoraa Katolika eiaha râ te haapaoraa Arien.

Te mârôraa Arien

I te matahiti 320 T.T., ua haamata o Arius, perepitero no Alesanederia, i Aiphiti, i te haaparare i te mau manaˈo taa ê roa no nia i te Toru Tahi. Ua patoi o Arius i te manaˈo e hoê â huru to te Tamaiti e to te Metua. Eita e nehenehe e parau e e Atua te Tamaiti aore ra e faito raua te Metua, no te mea e haamataraa to ˈna. (Kolosa 1:15) Ua tiaturi o Arius e e taata te varua moˈa e e iti aˈe oia i te Metua e te Tamaiti. Ua faatupu  teie haapiiraa, o tei atutu hoi, i te patoiraa uˈana i roto i te ekalesia. I te matahiti 325 T.T., i te Apooraa no Nicée, ua tiahihia o Arius e ua faahapahia ta ˈna mau haapiiraa. *

Aita râ te reira i faaore i te mârôraa. Ua mârôhia teie haapiiraa fatata e 60 matahiti i te maoro, ua tia ˈtu te mau emepera te tahi i muri i te tahi no te hoê pae aore ra no te tahi atu pae. I te pae hopea, i te matahiti 392 T.T., ua faariro te emepera ra o Théodose I i te haapaoraa Katolika Orthodoxe e ta ˈna haapiiraa o te Toru Tahi ei haapaoraa na te Hau o te Hau emepera Roma. I te hoê â taime, ua fariu te mau Goths i te haapaoraa Arien a te epikopo Heremani ra o Ulfilas. Ua farii oioi te tahi atu mau opu Heremani i teie huru o te “Kerisetianoraa.” *

I te tau o Clovis, te fifihia ra te Ekalesia Katolika i Gaule. Te tamata ra te mau Wisigoths Ariens i te faaore i te haapaoraa Katolika na roto i te patoiraa e ia monohia te mau epikopo i pohe. Hau atu â, tei roto roa te ekalesia i na amahamaharaa ekalesia e piti, ma te mau perepitero no te mau pǔpǔ patoi o te haapohe ra i te tahi i te tahi i Roma. Taa ê atu i teie huananeraa, ua horoa te tahi mau taata papai Katolika i te manaˈo e na te matahiti 500 T.T. e tapao i te hopea o te ao. E no reira, ua faarirohia te fariuraa te taata upootia Franc i te haapaoraa Katolika ei ohipa maitai, o te faaite haere ra i “te mireniuma apî o te mau peata.”

Eaha râ to Clovis hinaaro? Noa ˈtu e eita e nehenehe e tuu i te mau hinaaro faaroo i te hiti, eita e ore e e mau fa poritita to roto i to ˈna feruriraa. Na roto i te maitiraa i te haapaoraa Katolika, ua noaa mai ia ˈna te farii maitai o te huiraatira Katolika rahi Gaulois Roma e te turu a te mau aratai ekalesia mana rahi. Maoti te reira i hau aˈe ai oia i to ˈna mau enemi poritita. Te tapao ra The New Encyclopædia Britannica e “ua riro mai to ˈna haruraa i te fenua Gaule ei tamaˈi no te faatiamâ mai i te zugo o te mau hairesi Ariens au-ore-hia.”

O vai mau na o Clovis?

Na mua ˈˈe i te oroa haamanaˈoraa 1996, ua faataa te arii epikopo no Reims, o Gérard Defois, ia Clovis mai “te taipe o te hoê fariuraa opua-maitai-hia e te hoata ore.” Teie râ te tatararaa a te taata tuatapapa Farani o Ernest Lavisse: “Aita te fariuraa o Clovis i taui i to ˈna huru; aita to ˈna aau i putapû i te morare maitai e te hau o te Evanelia.” Teie ta te tahi atu taata tuatapapa i parau: “Ua tiaoro oia i te Mesia, eiaha râ ia Odin [te hoê atua Nordique] e ua vai noa oia mai tera.”  Ei haamanaˈoraa i te haerea o Constantin i muri aˈe i to ˈna fariuraa parau-noa-hia i te Kerisetianoraa, e haapaari o Clovis i ta ˈna faatereraa na roto i te haapohe-roa-raa i te mau enemi atoa e haru i te terono. Ua haapohe oia i “te taatoaraa o to ˈna mau fetii, te fetii atea atoa.”

I muri aˈe i to Clovis poheraa, ua haamata te aai i te faateitei ia ˈna mai te hoê arii aroha ore o tei riro mai ei peata matauhia. Ua hiˈohia te aamu a Grégoire de Tours, papaihia fatata hoê senekele i muri aˈe, mai te hoê tutavaraa ite maite e faatuati ia Clovis e o Constantin, te emepera Roma matamua i farii i te “Kerisetianoraa.” E na roto i te parauraa e e 30 matahiti to Clovis i to ˈna bapetizoraahia, e au ra e te tamata ra o Grégoire i te faaau ia ˈna i te Mesia.—Luka 3:23.

Ua rave-noa-hia te reira i te senekele 9 e Hincmar, epikopo no Reims. I te hoê tau a imi ai te mau fare pure i te mau taata perenina, ua papai oia i te aamu o Remi “Peata” tei na mua ˈtu ia ˈna, ia tui atu â te roo o ta ˈna ekalesia e ia rahi atu â ta ˈna faufaa. Te faatia ra oia e ua hopoi mai te hoê uupa uouo i te hoê mohina hinu iti no te faatahinu ia Clovis i to ˈna bapetizoraa—e faahitiraa taa maitai teie i te faatavairaahia o Iesu i te varua moˈa. (Mataio 3:16) E no reira o Hincmar i faatuati ai ia Clovis, te oire o Reims, e te faatereraa hui arii e ua tiaturi oia i te manaˈo ra e o te Fatu faatavaihia o Clovis. *

Hoê haamanaˈoraa i mârôhia

I parau na te peretiteni Farani tahito ra o Charles de Gaulle e: “I to ˈu manaˈo, e haamata te tuatapaparaa o te fenua Farani e o Clovis, tei maitihia ei arii no Farani e te opu o te mau Francs, o tei horoa i to ratou iˈoa i te fenua Farani.” Teie râ, e ere o te taatoaraa te farii ra i tera manaˈo. Ua mârôhia te oroa haamanaˈoraa i te 1 500raa o te matahiti bapetizoraa o Clovis. I te hoê fenua e ua taa roa te Ekalesia e te Hau mai te matahiti 1905 mai, mea rahi tei faahapa i to te Hau apitiraa ˈtu i te mea ta ratou i faariro ei oroa haamanaˈoraa faaroo. I to te apooraa oire no Reims faaiteraa i te opuaraa e aufau i te tahua o te faaohipahia ia tere mai te pâpa, ua rave te hoê taiete e ia faaore te tiripuna i te faaotiraa no te mea eita tera faaotiraa e au i te pǎpǎ ture. Te manaˈo ra te tahi pae e te tamata ra te ekalesia i te haamau faahou i to ˈna mana morare e no teie nei ao i nia ia Farani. Te mea i haafifi atu â i te oroa haamanaˈoraa, oia ïa, ua ravehia o Clovis ei taipe no te Front national extrême droite e no te mau pǔpǔ Katolika faatumu.

Ua faahapa te tahi atu i te oroa haamanaˈoraa i te pae tuatapaparaa. Ua parau ratou e aita te bapetizoraa o Clovis i fariu i te fenua Farani i te haapaoraa Katolika, i te mea e ua mau papu aˈena teie haapaoraa i roto i te huiraatira Gaulois Roma. E ua parau ratou e aita to ˈna bapetizoraa i tapao i te faraa mai o te fenua Farani ei nunaa. I to ratou manaˈo, mea tano aˈe ia faaau i te reira i te vahiraahia te basileia o Charlemagne i te matahiti 843 T.T., a faarirohia ˈtu ai o Charles le Chauve ei arii matamua no Farani, eiaha râ o Clovis.

1 500 matahiti o te haapaoraa Katolika

Eaha te huru tupuraa o te haapaoraa Katolika i Farani i teie mahana i muri aˈe e hau atu i te 1 500 matahiti ei “tamahine matahiapo a te Ekalesia”? Ta te fenua Farani te numera rahi roa ˈˈe i te ao nei o te mau Katolika bapetizohia  e tae roa i te matahiti 1938. I teie nei, tei te ono o te parahiraa oia, i muri mai i te mau fenua mai ia Philipino e te mau Hau Amui no Marite. E noa ˈtu e te vai ra e 45 mirioni Katolika i Farani, e 6 mirioni anaˈe o te haere tamau ra i te pureraa. Ia au i te hoê titorotororaa apî i rotopu i te mau Katolika Farani, ua itehia e e 65 % o ratou “aita e tâuˈa ra i te haapiiraa a te Ekalesia no nia i te peu taatiraa,” e e 5 % o ratou tei parau e “mea faufaa ore” o Iesu. Na teie mau manaˈo faatoaruaru i turai i te pâpa ia ui i to ˈna tereraa ˈtu i Farani i te matahiti 1980 ra e: “E Farani, ua nafea ˈtura oe i te mau parau fafau o to oe bapetizoraa?”

[Nota i raro i te api]

[Hohoˈa fenua i te api 27]

(Hiˈo i te papai)

SAXONS

Rhin

Somme

Soissons

Reims

Paris

GAULE

Loire

Vouillé

Poitiers

PYRÉNÉES

WISIGOTHS

Roma

[Hohoˈa i te api 26]

Bapetizoraa o Clovis faataahia i nia i te hoê parau papai no te senekele 14

[Faaiteraa i te tumu]

© Cliché Bibliothèque nationale de France, Paris

[Hohoˈa i te api 28]

Nanaˈoraa o te bapetizoraa o Clovis (hohoˈa i ropu) i nia i te rapaeauraa o te fare pure no Reims, i Farani

[Hohoˈa i te api 29]

Ua tupu te mârôraa i to Ioane Paulo II tereraa i Farani no te haamanaˈo i te bapetizoraa o Clovis