Mau uiraa a te feia taio

Ua faaino anei te huru tia ore o te potii paretenia ra o Maria i te tôraa o Iesu?

No nia i “te fanauraa o Iesu,” teie ta te faatiaraa faauruahia e parau ra: “Te momoˈahia ra tana metua vahine o Maria ia Iosepha; aore râ raua i apiti i hapu ai oia i te [varua moˈa].” (Mataio 1:18; MN) Oia mau, e tuhaa faufaa roa ta te varua moˈa o te Atua i roto i te hapûraa o Maria.

E o Maria ïa? E tuhaa anei ta to ˈna huero ovari i roto i to ˈna hapûraa? Ia au i te mau tǎpǔ ta te Atua i parau ia Aberahama, Isaaka, Iakoba, Iuda, e te arii Davida—to Maria mau tupuna—e riro te tama e fanauhia mai ei huaai mau no ratou. (Genese 22:18; 26:24; 28:10-14; 49:10; Samuela 2, 7:16) Nafea ˈtu â hoi te tama ta Maria e fanau mai e riro ai ei taata aiˈa o taua mau parau tǎpǔ a te Atua ra? E riro oia ei tamaiti mau na ˈna.—Luka 3:23-34.

Ua fa ˈtu te melahi a Iehova i te potii paretenia ra o Maria, ma te parau e: “Eiaha e mǎtaˈu, e Maria, ua herehia mai oe e te Atua. E inaha, e tô oe, e fanau ta oe tamaiti, e na oe e mairi i te iˈoa ia Iesu.” (Luka 1:30, 31) No te tôraa, mea titauhia ia faahotuhia te huero ovari. E au ra e ua faahotu te Atua ra o Iehova i te hoê huero ovari i roto i te opu o Maria, na roto i te tuuraa i te ora o ta ˈna Tamaiti fanau tahi mai te ao varua mai e i nia i te fenua.—Galatia 4:4.

E nehenehe anei te hoê tamarii tôhia mai teie e te hoê vahine tia ore e riro ei mea tia roa e aita e hara i roto i to ˈna tino? Nafea te mau ture o te tapao tupuna e ohipa ˈi ia hoê te huru tia roa e te huru tia ore? A haamanaˈo e ua faaohipahia te varua moˈa no te tuu i te puai ora tia roa o te Tamaiti a te Atua i roto i te opu o Maria, a faatô atu ai ia ˈna. Ua faaore te reira i te huru tia ore atoa e vai ra i roto i te huero ovari o Maria, a horoa mai ai i te hoê hohoˈa tupuna tia roa mai to ˈna haamataraa mai iho â.

Atira noa ˈtu, e nehenehe tatou e tiaturi e ua haapapu te ohiparaa a te varua moˈa o te Atua i taua taime ra i te manuïaraa o te opuaraa a te Atua. Ua faataa te melahi Gaberiela ia Maria e: “E pou mai te [varua moˈa] i nia iho ia oe, e na te mana o te Teitei e tamǎrǔ i nia iho ia oe, e parauhia ˈi hoi tena na tamaiti moˈa, o te Tamaiti na te Atua.” (Luka 1:35; MN) Oia, mai te mea ra e ua hamani te varua moˈa o te Atua i te hoê patu paruru ia ore te huru tia ore aore ra te puai faaino e haaviivii i te embryon e tupu ra i te rahi mai te tôraa mai.

Papu maitai, no ǒ mai to Iesu ora taata tia roa i to ˈna Metua ra i te raˈi, eiaha i te taata. Ua ‘faaau Iehova i te hoê tino’ no Iesu e no reira, mea ‘viivii ore e mea taa ê oia i te feia rave hara’ mai to ˈna iho â tôraa mai.—Hebera 7:26; 10:5.

[Hohoˈa i te api 19]

“E tô oe, e fanau ta oe tamaiti”