A vai ara noa, a haere i mua ma te itoito!

Parau faataa o te tahi mau apooraa taa ê

O VAI te patoi ma te tano e te ora nei tatou i “te mau ati rahi faaruru atâ”? Ei Ite no Iehova, aita tatou i araihia i te mau faaheporaa o te oraraa i te “anotau hopea.” (Timoteo 2, 3:1-5, MN) Ua ite râ tatou e te hinaaro ra te taata i te tauturu. Aita hoi e taa ra ia ratou te auraa o te mau mea e tupu nei i te ao nei. Te hinaaro ra ratou i te tamahanahanaraa e te tiaturiraa. Na mua roa, eaha ta tatou tuhaa i roto i te tautururaa i to tatou taata-tupu?

Ua poroi mai te Atua e e faaite tatou i te parau apî maitai o te Basileia ta te Atua i haamau. (Mataio 24:14) E tia i te taata ia ite e o teie Basileia i te raˈi te tiaturiraa hoê roa no te huitaata. Teie râ, aita ta tatou poroi e farii-maitai-noa-hia ra. I te tahi mau vahi, mea opanihia ta tatou ohipa e te hamani-ino-hia ra to tatou mau taeae. Eita râ tatou e tuu. Ma te tiaturi roa ia Iehova, ua faaoti tatou e vai ara noa e e tamau i te haere i mua ma te itoito, e faaite ai i te parau apî maitai ma te tuutuu ore.—Ohipa 5:42.

Ua itehia taua faaotiraa papu ra i te mau apooraa taa ê i tupu i te avaˈe Atopa 2001. I te Mahana maa 6 no Atopa, ua tupu te apooraa matahiti a te Watch Tower Bible and Tract Society of Pennsylvania i Jersey City, i New Jersey, i te Fare tairururaa a te mau Ite no Iehova i te mau Hau Amui. * I te poipoi aˈe, ua tupu te tahi atu mau apooraa i e maha vahi, e toru i te mau Hau Amui e hoê i Kanada. *

I roto i ta ˈna mau parau omuaraa i te apooraa matahiti, ua faahiti te peretiteni o Samuel F. Herd, melo o te Tino aratai a te mau Ite no Iehova i te Salamo 92:1, 4 e ua parau oia i muri iho e: “E hinaaro tatou e faaite i to tatou mauruuru.” Oia mau, ua faataahia te tahi mau tumu e faaite ai tatou i te mauruuru i roto e pae parau faataa no te ao atoa mai.

Mau parau faataa no te mau vahi atoa

Ua faataa o Taeae Alfred Kwakye i te haereraa i mua o te ohipa pororaa i Ghana, tei matauhia na mua ˈˈe mai te Côte-de-l’Or. Ua opanihia ta tatou ohipa i taua fenua ra tau matahiti i te maoro. Ua ui te taata e: “No te aha i opanihia  ˈi? Eaha ta outou i rave?” Ua horoa mai te reira i te mau taime maitatai no te poro ia ratou, o ta Taeae Kwakye ïa i faataa. I te matahiti 1991, i te faaoreraahia te opaniraa, te vai ra e 34 421 Ite no Iehova i Ghana. I te avaˈe Atete 2001, ua tapaohia e 68 152, te hoê ïa maraaraa e 98 %. Te opuahia ra e hamani 10 000 parahiraa no te Fare tairururaa. Papu maitai, te haafaufaa roa ra to tatou mau taeae pae varua i Ghana i to ratou tiamâraa i te pae haapaoraa.

Noa ˈtu te aehuehuraa poritita, te rave ra to tatou mau taeae i Irelane ma te itoito i te taviniraa, e te faaturahia ra ratou no to ratou tiaraa amui ore. Ua parau te melo o te Tomite a te amaa ra o Peter Andrews e 115 amuiraa to Irelane i roto e 6 tuhaa haaati. Ua faatia o Taeae Andrews i te aamu o Liam, te hoê tamaroa 10 matahiti aita e taiâ ra i te horoa i te faaiteraa i te fare haapiiraa. Ua vaiiho o Liam i Ta ˈu Buka Aamu Bibilia, neneihia e te mau Ite no Iehova, na e 25 o to ˈna mau hoa haapiiraa e na ta ˈna atoa orometua haapii. Ua hinaaro o Liam e ia bapetizohia oia, ua ui râ te tahi taata e e ere anei oia i te mea apî roa. Ua pahono o Liam e: “E ere o to ˈu faito matahiti te hiˈohia, o to ˈu râ here ia Iehova. E faaite to ˈu bapetizoraa e mea here roa na ˈu ia ˈna.” O te riroraa ei mitionare ta Liam fa.

I te matahiti 1968, te vai ra e 5 400 feia poro i te parau apî maitai i Venezuela. I teie nei râ, e hau atu ïa i te 88 000, o ta Stefan Johansson, tiaau o te Tomite a te amaa, ïa i tapao. E e nehenehe e tiai i te tahi atu â maraaraa no te mea ua hau atu i te 296 000 taata i tae mai i te Oroa haamanaˈoraa i te matahiti 2001. I te avaˈe Titema 1999, ua horo te vari no te ûa puai e ua manaˈohia e e 50 000 taata tei pohe, tae noa ˈtu te tahi mau Ite. Ua î te hoê Piha a te Basileia i te vari e tae roa i te 5 metera i te teitei, fatata e naeahia te aroaro. I to te hoê taata parauraa e faarue i te piha, ua pahono te mau taeae e: “Eita ïa! Na tatou teie Piha a te Basileia, e eita tatou e hinaaro e faarue i teie nei.” Ua haamata ˈtura ratou i te iriti mai i te tǎne vari, ofai, e te tahi atu mau huˈahuˈa. Ua tataîhia te piha, e te parau ra te mau taeae e mea nehenehe aˈe te piha i teie nei i na mua ˈˈe a tupu ai te hororaa!

E 87 reo e reo amaa e paraparauhia ra i Philipino, o ta Taeae Denton Hopkinson, tiaau o te Tomite a te amaa, ïa i parau. I te matahiti taviniraa i mahemo, ua mahiti mai Les Saintes Écritures—Traduction du monde nouveau taatoa na roto i na toru reo rahi o te fenua—te Cebuano, te Iloko, e te Tagalog. Ua faatia o Taeae Hopkinson i te aamu o te hoê tamaroa e iva matahiti  o tei taio i te buka Une bonne nouvelle qui vous rendra heureux, neneihia e te mau Ite no Iehova. Ua noaa mai ia ˈna te tahi atu â mau papai no ǒ mai i te amaa ra, o ta ˈna atoa i taio, tera râ, ua patoi to ˈna utuafare ia ˈna. Tau matahiti i muri aˈe, a haere ai oia i te haapiiraa i te pae rapaauraa, ua farerei oia i te amaa e ua ani i te hoê haapiiraa bibilia. Ua bapetizohia oia i te matahiti 1996 e aita i maoro, ua rave oia i te taviniraa taime taatoa. I teie nei, te tavini ra oia e ta ˈna vahine i te amaa.

‘Te “tono” ra o Porto Rico e rave rahi mau “Ite,”’ o ta Ronald Parkin, tiaau o te Tomite a te amaa, ïa i faataa. Te vai ra fatata e 25 000 feia poro i nia i te motu, e tera noa te numera tau matahiti i te maoro. No te aha? Te manaˈohia ra e e “tono” o Porto Rico fatata 1 000 feia poro i te matahiti hoê i te mau Hau Amui, mea rahi o ratou o te reva no te mau tumu i te pae faaravairaa faufaa. Ua faahiti o Taeae Parkin i te hoê faaotiraa faufaa roa a te tiripuna no nia ia Luis, te hoê Ite 17 matahiti e mariri ai toto to ˈna. No te mea ua patoi o Luis i te toto, ua horohia oia i te haavaraa. Ua hinaaro te haava e paraparau roa ia ˈna, e no reira, ua haere oia e hiˈo ia ˈna i te fare maˈi. Ua ui o Luis ia ˈna e: “Ahiri au i rave i te hoê ohipa ino roa, no te aha ïa oe e haava ˈi ia ˈu mai te hoê taata paari, e ia hinaaro râ vau e faaroo i te Atua, e hiˈo ïa oe ia ˈu mai te hoê tamarii aita i naeahia te matahiti?” Ua papu roa i te haava e e feruriraa taata paari to ˈna e e nehenehe ta ˈna e faaoti no ˈna iho.

I muri aˈe i te mau parau faataa no te mau fenua atea mai, ua uiui o Harold Corkern, melo o te Tomite amaa no te mau Hau Amui, i na maha taata poro mea maoro te taviniraa ia Iehova. E 51 matahiti to Arthur Bonno raveraa i te taviniraa taime taatoa e i teie nei, te haa ra oia i roto i te Tomite a te amaa i te Équateur. E 59 matahiti to Angelo Catanzaro raveraa i te taviniraa taime taatoa, ei tiaau ratere i te rahiraa o taua mau matahiti ra. Ua faatuitehia o Richard Abrahamson i te Haapiiraa no Gileada i te matahiti 1953, e na ˈna i tiaau i te ohipa i Danemata e 26 matahiti i te maoro hou a hoˈi ai i te Betela i Brooklyn. I te pae hopea, ua oaoa te taatoaraa i te faarooraa ia Carey W. Barber, e 96 matahiti. Bapetizohia i te matahiti 1921, ua rave o Taeae Barber i te taviniraa taime taatoa e 78 matahiti i te maoro e ua riro oia ei melo o te Tino aratai mai te matahiti 1978 mai â.

Mau oreroraa parau haaputapû

Ua hohorahia te hoê anairaa oreroraa parau o te haaferuri i roto i te apooraa matahiti. Ua hohora o Taeae Robert W. Wallen i te tumu parau “Hoê nunaa no to ˈna iˈoa.” E nunaa tatou no te iˈoa o te Atua, e e itehia tatou i roto e hau atu i te 230 fenua. Ua horoa mai Iehova i “te hoê a muri aˈe e te hoê tiaturiraa.” (Ieremia 29:11, MN) E tia ia tatou ia paturu i te Basileia o te Atua, ma te faaite i te poroi faahiahia o te tamahanahana e o te tamǎrû. (Isaia 61:1) “Ia tamau ïa tatou i tera e tera mahana,” o ta Taeae Wallen ïa parau hopea, “i te ora ia au i to tatou iˈoa, te mau Ite no Iehova.”—Isaia 43:10.

Te tuhaa hopea o te porotarama, o te hoê ïa oreroraa parau tatuhaahia i vauvauhia e e toru melo o te Tino aratai. Teie te upoo parau “Teie te taime no te vai ara noa, no te mau papu, e no te faaitoito.”—Korinetia 1, 16:13.

Na mua, ua hohora o Taeae Stephen Lett i te tumu parau “A vai ara noa i teie hora hopea.” E ô te taoto pae tino, o ta Taeae Lett ïa i faataa. E haapuai faahou te reira ia tatou. Area te taoto pae varua râ, e ere roa ˈtu ïa i te mea maitai. (Tesalonia 1, 5:6) Nafea ïa tatou e vai ara noa ˈi i te pae varua? Ua faahiti o Taeae Lett e toru “raau huero” pae varua: (1) Ia rahi te rave i te ohipa a te Fatu. (Korinetia 1, 15:58) (2) Ia ite i to outou veve pae varua. (Mataio 5:3) (3) Ia faaroo i te aˈoraa bibilia no te haa ma te paari.—Maseli 13:20.

Ua hohora o Taeae Theodore Jaracz i te oreroraa parau haaputapû “Ia mau papu i roto i te tamataraa.” Ma te faahiti i te Apokalupo 3:10 (MN), ua ui o Taeae Jaracz e: “Eaha te ‘hora o te tamataraa’?” E tae mai taua tamataraa ra “i te mahana o te Fatu,” ta tatou hoi e ora nei. (Apokalupo 1:10) Ua taaihia te tamataraa i te uiraa faufaa—te turu ra anei tatou i te Basileia ta te Atua i haamau aore ra i te faanahoraa ino o te  mau mea a Satani? Hou taua hora o te tamataraa ra e hope ai, e faaruru tatou i te mau ati aore ra mau fifi. E tapea noa anei tatou i to tatou taiva ore ia Iehova e ta ˈna faanahonahoraa? ‘E tia ia tatou taitahi ia faaite i taua taiva ore ra,’ o ta Taeae Jaracz ïa i tapao.

I te pae hopea, ua hohora o Taeae John E. Barr i te tumu parau “A faaitoito ei taata maitai i te pae varua.” Ma te faahiti i te Luka 13:23-25, ua tapao oia e e tia ia tatou ia faaitoito hua i “te tomo na te uputa pirihao.” Mea rahi eita e noaa ia ratou no te mea aita ratou e faaitoito roa ra. No te riro ei mau Kerisetiano paari, e tia ia tatou ia haapii i te faaohipa i te mau faaueraa tumu bibilia i roto i te mau tuhaa atoa o te oraraa. Ua aˈo o Taeae Barr e: “Ua papu ia ˈu e e farii outou e teie te taime (1) no te tuu noa ia Iehova na mua roa; (2) no te faaitoito; e (3) no te rohi i te rave i to Iehova hinaaro. Mea na reira e noaa ˈi ia tatou i te tomo na te uputa pirihao o te aratai atu i te ora faahiahia aita e hopea.”

A fatata ˈi te apooraa matahiti i te hope, hoê uiraa aita i pahonohia: Eaha te irava no te matahiti taviniraa 2002? Ua pahonohia taua uiraa ra i te poipoi aˈe.

Apooraa hau

Ua tiai-ru-hia te poipoi Tapati a haamata ˈi te porotarama o te apooraa hau. Ua haamata te reira ma te haapotoraa o te haapiiraa o Te Pare Tiairaa o te hebedoma, i muri iho, ua hohora-poto-hia te tahi mau tuhaa faufaa o te apooraa matahiti. Ia oti, ua oaoa te taatoaraa i te faarooraa i te hoê oreroraa parau no nia i te irava no te matahiti 2002: “E haere mai outou ia ˈu nei, . . . e na ˈu outou e [tamahanahana].” (Mataio 11:28; MN) Ua niuhia te oreroraa parau i nia i na tumu parau haapiiraa i neneihia i muri aˈe i roto i Te Pare Tiairaa o te 15 no Titema 2001.

I muri aˈe i te reira, ua horoa mai te tahi pae o tei haere i te mau tairururaa taa ê “Orometua haapii i te Parau a te Atua” i Farani e i Italia i te avaˈe Atete 2001, i to ratou mau manaˈo. * I te pae hopea, ei taime faufaa o te porotarama o te mahana, e piti oreroraa parau hopea tei hohorahia e te tahi mau taeae orero ratere no te Betela i Brooklyn.

Teie te upoo parau o te oreroraa parau matamua “Te tiaturiraa ma te itoito ia Iehova i teie tau ati rahi.” Ua vauvau te taeae orero i teie mau manaˈo matamua: (1) Ua riro noa te tiaturiraa ma te itoito ia Iehova ei mea faufaa roa no te nunaa o te Atua. Mea rahi te hiˈoraa i roto i te Bibilia o te feia i faaite i te itoito e te faaroo i mua i te patoiraa. (Hebera 11:1–12:3) (2) Te horoa maira Iehova i te niu papu e tiaturi roa ˈi tatou ia ˈna. Na ta ˈna mau ohipa e ta ˈna Parau e haapapu maira e te haapao ra oia i ta ˈna mau tavini e eita roa ˈtu oia e haamoe ia ratou. (Hebera 6:10) (3) E hinaarohia te itoito e te tiaturi i teie iho â râ mahana. Te “ririhia” ra tatou, mai ta Iesu i tohu. (Mataio 24:9) No te faaoromai, mea titauhia ia turui tatou i nia i te Parau a te Atua, ia tiaturi e tei ia tatou ra to ˈna varua, e ia faaitoito i te tamau i te faaite i te parau apî maitai. (4) Mau hiˈoraa e faaite ra e te faaruru nei tatou i te patoiraa i teie nei â. Ua putapû roa te taatoaraa a faatia ˈi te taeae orero eaha ta to tatou mau taeae i faaruru i Aramenia, i Farani, i Géorgie, i Kazakhstan, i Rusia, e i Turkménistan. Oia mau, teie te taime no te faaite i te itoito e te tiaturi ia Iehova!

Ua hohora te taeae orero hopea i te tumu parau “Te haereraa i mua ma te tahoê e te faanahonahoraa a Iehova.” Ua vauvauhia te tahi mau manaˈo tano maitai i roto i te oreroraa parau. (1) Te ite-rahi-hia ra te haereraa i mua o te nunaa o Iehova. Te huti maira ta tatou ohipa pororaa e ta tatou mau tairururaa i te ara-maite-raa  o te taata. (2) Ua haamau Iehova i te hoê faanahonahoraa tahoê. I te matahiti 29 T.T., ua faatavaihia Iesu i te varua moˈa no te faatae mai i “te mau mea atoa”—te feia e tiaturi ra e haere i nia i te raˈi e te feia atoa e tiaturi ra e ora i nia i te fenua—i roto i te utuafare tahoê o te Atua. (Ephesia 1:8-10) (3) E faaiteraa faahiahia te mau tairururaa i te auhoêraa nunaa rau. Ua ite-maitai-hia te reira i te mau tairururaa taa ê i tupu i Farani e i Italia i te avaˈe Atete i mahemo. (4) Ua fariihia te hoê faaotiraa haaputapû i Farani e i Italia. Ua faahiti te taeae orero i te tahi mau tuhaa o te faaotiraa haaputapû. Te vai ra te faaotiraa taatoa i raro nei.

Ei faaotiraa i te oreroraa parau hopea, ua taio te taeae orero ratere i te hoê parau faaite haaputapû i faaineinehia e te Tino aratai. Te na ô ra te tahi tuhaa e: “Teie te taime no te vai ara e no te haapao maitai noa, ia hiˈo tatou i te tupuraa o te mau mea i te ao nei. . . . E hinaaro matou e faaite atu i te anaanatae î i te here o te Tino aratai ia outou e i te toea o te nunaa o te Atua. Ia haamaitai rahi mai ïa oia ia outou a rave ai outou i to ˈna hinaaro ma to outou nephe atoa.” Ua faaoti te nunaa o Iehova i te mau vahi atoa e vai ara noa i teie tau ati rahi e e tamau i te haere i mua ma te itoito e te faanahonahoraa tahoê a Iehova.

[Nota i raro i te api]

[Tumu parau tarenihia/Hohoˈa i te mau api 29-31]

Faaotiraa

I te avaˈe Atete 2001, ua tupu te tahi mau tairururaa taa ê “Orometua haapii i te Parau a te Atua” i Farani e i Italia. I taua mau tairururaa ra, ua vauvauhia te hoê faaotiraa haaputapû. Teie ïa tei papaihia i roto i taua faaotiraa ra.

“EI ITE NO IEHOVA, ua fanaˈo tatou paatoa i putuputu mai i teie tairururaa ‘Orometua haapii i te Parau a te Atua,’ i te haapiiraa maitai roa. Ua faataa-maitai-hia o vai te tumu o teie haapiiraa. E ere no ǒ mai i te taata ra. No ǒ mai râ i Tei faataahia e te peropheta Isaia no tahito ra mai to tatou ‘Orometua Rahi roa ˈˈe.’ (Isaia 30:20, MN) A tapao na i te haamanaˈoraa a Iehova i roto i te Isaia 48:17: ‘O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.’ Nafea oia e rave ai i te reira? Na mua, na roto i te buka huri-roa ˈˈe-hia e te opere-rahi-roa ˈˈe-hia i te ao nei, te Bibilia, o te parau maitai maira e: ‘Te mau Papai atoa, e mea faaurua ïa e te Atua e e mea faufaa.’—Timoteo 2, 3:16, MN.

“I teie mahana, te hinaaro rahi ra te taata i taua haapiiraa faufaa ra. No te aha? Ia hiˈohia te tupuraa tauiui e te feaapiti o teie nei ao, eaha ta te mau taata haroaroa e parau? Teie ïa: Noa ˈtu e e mau mirioni taata tei haapiihia e te mau faanahoraa haapiiraa a te ao, te ere ra ratou ma te peapea i te mau mea faufaa mau e te ite no te faataa i te maitai i te ino. (Isaia 5:20, 21) Mea rahi te taata aita i ite i te Bibilia. Te horoa maira te ihi anohaa i te ravea e fanaˈo ai tatou i te mau haamaramaramaraa na roto i te mau matini roro uira, teie râ, teihea roa te mau pahonoraa i te mau uiraa faufaa roa mai teie, Eaha te tumu o te oraraa? Eaha te auraa o te mau ohipa e tupu ra i to tatou tau? Te vai ra anei te tahi tiaturiraa papu no te tau no a muri aˈe? E tupu mau anei te hau e te panaˈonaˈo ore ia tae i te hoê mahana? Hau atu â, i roto i te mau fare vairaa buka, mea rahi te papai e hohora ra fatata i te mau tumu parau atoa no nia i te tutavaraa a te taata. Teie râ, te tapiti faahou ra te taata i te mau hape tahito. Te maraa oioi ra te ohipa ino. Te tupu faahou ra te mau maˈi i manaˈohia na e ua ore, area te tahi atu râ, mai te maˈi SIDA, te parare ra ïa  ma te riaria. Te ino atura te oraraa utuafare i nia i te hoê faito maere. Te tuino ra te haaviiviiraa i te natura. Te haafifi ra te ohipa totoaraa e te mau mauhaa tamaˈi o te haamou i te taata, i te hau e te panaˈonaˈo ore. Te rahi noa ˈtura te mau fifi aita e ravea. Eaha ta tatou tuhaa tano noa i roto i te tautururaa i to tatou taata-tupu i teie tau ati rahi? Te vai ra anei te tahi haapiiraa o te faataa ra eaha te tumu o te ati o te huitaata, e aita noa e faaite ra i te ravea o te hoê oraraa maitai aˈe i teie nei, o te pûpû atoa mai râ i te hoê tiaturiraa faahiahia e te papu no te tau no a muri aˈe?

“Te poroi maira te mau Papai ia tatou e e ‘haere tatou e faariro i te mau fenua atoa ei pǐpǐ, ma te haapii atu ia ratou i te haapao i te mau mea atoa ta te Mesia i parau mai.’ (Mataio 28:19, 20) Na Iesu Mesia i horoa i teie poroi i muri aˈe i to ˈna poheraa e to ˈna tia-faahou-raa, i te tuuraahia ˈtu ia ˈna ra te mana atoa i nia i te raˈi e i nia i te fenua. E hau ê te reira i te mau ohipa atoa a te taata. I te hiˈoraa o te Atua, o ta tatou ohipa faauehia, oia hoi e haapao i te mau hinaaro pae varua o te feia e hinaaro ra i te parau-tia, te ohipa matamua roa e rave. E mau tumu bibilia papu ta tatou e rave maitai ai tatou i taua ohipa ra.

“Mea titauhia ia rave na mua tatou i taua ohipa ra i roto i to tatou oraraa. Maoti ta te Atua haamaitairaa e ta ˈna turu e tupu ai taua ohipa ra, noa ˈtu te mau mana, te mau haafifiraa o te haapeapea, e te patoiraa a te haapaoraa e a te poritita, o te tapea hoi i teie porotarama haapiiraa rahi eiaha e haere i mua. Te tiaturi nei tatou e e tamau teie ohipa i te ruperupe e tae noa ˈtu i to ˈna hopea rahi. No te aha tatou e tiaturi roa ˈi? No te mea ua tǎpǔ te Fatu ra o Iesu Mesia e ei pihai iho oia ia tatou i roto i ta tatou taviniraa no ǒ mai i te Atua ra e tae noa ˈtu i te hopea o teie nei faanahoraa o te mau mea.

“Te fatata ˈtura te huitaata hepohepo i te hopea. E tia ia tatou ia rave i ta tatou nei ohipa faauehia hou te hopea e tae mai ai. No reira, tatou, ei Ite no Iehova, e faaoti ai e:

“A tahi: Ei mau tavini pûpûhia, te faaoti nei tatou e tuu noa i te mau faufaa a te Basileia i te parahiraa matamua i roto i to tatou oraraa e e haere noa i mua i te pae varua. E no reira, ia tuati ta tatou pure i te mau parau o te Salamo 143:10: ‘E haapii mai oe ia ˈu ia rave au i to oe ra hinaaro; o oe hoi tau Atua.’ Mea titauhia ïa ia riro tatou ei taata haapii maitai, ia faaitoito i te taio i te Bibilia i te mau mahana atoa, ia haapii e ia maimi no tatou iho. Ia ite te taata atoa i ta tatou mau haereraa i mua, e tutava ïa tatou ma te tano noa i te faaineine ia tatou ia faufaa-roa-hia tatou i te haapiiraa teotaratia e horoahia ra i te mau putuputuraa a te amuiraa, i te mau tairururaa haaati, mataeinaa, nunaa, e nunaa rau.—Timoteo 1, 4:15; Hebera 10:23-25.

“A piti: Ia haapiihia tatou e te Atua, e tamaa ïa tatou i ta ˈna anaˈe amuraa maa e e pee maite tatou i te faaararaa bibilia no nia i te mau haapiiraa haavare a te mau demoni. (Korinetia 1, 10:21; Timoteo 1, 4:1) E haapao maitai tatou i te ape i te mau mea atâta, mai te mau parau haavare faaroo, te mau manaˈo faufaa ore, te peu taatiraa haama, te ati o te peu faufau, te faaanaanataeraa manaˈo hairiiri, i te mau mea atoa aita ‘e au ra i te parau maitai.’ (Roma 1:26, 27; Korinetia 1, 3:20; Timoteo 1, 6:3; Timoteo 2, 1:13) Ei faaturaraa i ‘te [mau ô] taata,’ mea aravihi hoi i te haapii i te mea maitai i te taata, e faatura mau ïa tatou i ta ratou mau tutavaraa e e haa amui tatou ma te aau atoa e o ratou i roto i te tururaa i te mau ture aveia mâ e te parau-tia i te pae morare e i te pae varua a te Parau a te Atua.—Ephesia 4:7, 8, 11, 12; MN; Tesalonia 1, 5:12, 13; Tito 1:9.

“A toru: Ei mau metua Kerisetiano, e faaitoito tatou ma te aau atoa i te haapii i ta tatou mau tamarii eiaha noa na roto i te parau, na roto atoa râ i te hiˈoraa. Ta tatou tapitapiraa matamua, o te tautururaa ïa ia ratou mai to ratou tamarii-rii-raa mai â ia ‘ite i te parau moˈa i papaihia ra, e paari ai ratou e tae noa ˈtu i te ora.’ (Timoteo 2, 3:15) E haamanaˈo noa tatou e ia aratai tatou ia ratou i roto i te aˈo e te mau faaararaa a Iehova, e fanaˈo ïa ratou i te ravea maitai roa ˈˈe  no te ite i te parau tǎpǔ a te Atua, oia hoi ‘e maitai ratou e e maoro to ratou parahiraa i te fenua nei.’—Ephesia 6:1-4.

“A maha: Ia ahoaho tatou aore ra ia û i te fifi rahi, na mua roa, e ‘faaite tatou i to tatou hinaaro i te Atua,’ ma te tiaturi e na ‘te hau o te Atua, o tei hau ê atu i te ite taata nei’ e paruru ia tatou. (Philipi 4:6, 7) No te mea e rave mai tatou i te zugo a te Mesia, e ite ïa tatou i te tamahanahanaraa. E no te mea ua ite tatou e te haapao ra te Atua ia tatou, eita ïa tatou e haamarirau i te huri i to tatou ahoaho atoa i nia ia ˈna.—Mataio 11:28-30; Petero 1, 5:6, 7.

“A pae: Ei haamauruururaa ia Iehova no te fanaˈoraa taa ê, oia te riroraa ei orometua haapii i ta ˈna Parau, e faaitoito faahou tatou i ‘te tufa i ta ˈna parau mau ma te tia’ e i ‘te rave faahope roa i ta tatou [taviniraa].’ (Timoteo 2, 2:15; 4:5; MN) No te mea ua ite maitai tatou eaha te titauhia, e hinaaro tatou ma te haavare ore e imi i te feia e au, e faahotu atu ai i te huero i ueuehia. Hau atu â, e haamaitai tatou i ta tatou haapiiraa na roto i te faatere-maitai-raa e rave rahi atu â mau haapiiraa bibilia i te fare. Mea na reira tatou e faaau atu â ˈi i nia i to te Atua hinaaro, oia hoi ‘ia ora te taata atoa e ia noaa te ite i te parau mau.’—Timoteo 1, 2:3, 4.

“A ono: I te roaraa o te senekele i mahemo e i teie nei senekele, ua faaruru te mau Ite no Iehova i te mau fenua e rave rahi, i te patoiraa e te hamani-ino-raa huru rau. Tei pihai râ Iehova ia tatou. (Roma 8:31) Te haapapu maira ta ˈna Parau hape ore e aita ‘e mauhaa i hamanihia’ e haafifi, e faataupupu, aore ra e tapea i ta tatou ohipa pororaa i te Basileia e haapiiraa eiaha e manuïa. (Isaia 54:17) I te tau au aore ra i te tau au ore, eita ta tatou e nehenehe e faaea i te faaite i te parau mau. Ua faaoti tatou e rave i ta tatou ohipa pororaa e haapiiraa ma te ru. (Timoteo 2, 4:1, 2) Ta tatou fa, o te faaite-roa-raa ïa i te parau apî maitai o te Basileia o te Atua i te taata o te mau fenua atoa. E tamau noa ïa ratou i te fanaˈo i te ravea no te haapii no nia i te faanahoraa e noaa mai ai te ora mure ore i roto i te hoê ao apî parau-tia. Ei nahoa tahoê o te mau orometua haapii i te Parau a te Atua, ua faaoti tatou e pee noa i te hiˈoraa o te Orometua Rahi, o Iesu Mesia, e e faaite i to ˈna mau huru maitatai paieti. Ia na reira tatou, e faahanahana e e arue ïa tatou i to tatou Orometua Rahi roa ˈˈe e Tumu o te ora, te Atua ra o Iehova.

“O outou paatoa i tae mai i teie tairururaa e o te farii i teie faaotiraa, a parau na ïa E!”

I te uiraahia ˈtu te uiraa hopea o te faaotiraa i na 160 000 taata i ruru mai i na toru tairururaa i Farani e i na 289 000 taata i na iva vahi i Italia, ua faaroohia te hoê “E” puai na roto i te reo e rave rahi o te feia i tae mai.