Te huru aau hohonu panaˈonaˈo ore i teie nei—Te oraraa panaˈonaˈo ore e a muri noa ˈtu

NO TE aha e pinepine, mea fifi ia itea mai te panaˈonaˈo ore, e ia itea mai anaˈe, eita te reira e vai maoro? E ere anei e ua niuhia to tatou manaˈo i te panaˈonaˈo ore i nia i te feruri-noa-raa, i nia i te mea ta tatou e manaˈo e e raeahia eiaha râ i nia i te mea e raea-mau-hia? E nehenehe e parau i tera manaˈo feruri-noa-hia mai te oraraa i roto i te hoê ao moemoeâ.

E faatia te feruri-noa-raa i te manaˈo ia faarue i te tupuraa mau o te oraraa e to ˈna papu ore e ia ô atu i roto i te hoê huru tupuraa nehenehe, e te papu, ma te ore e tâuˈa i te mau mea atoa e nehenehe e haafifi i te moemoeâ. E pinepine râ, e fa taue mai te mau fifi o te ao mau i roto i teie ao moemoeâ e ma te aroha ore, e faaore te reira i te huru hohonu o te au-maitai-raa, e faaara ˈtu ai i te taata moemoeâ i mua i te tupuraa mau hoata ore.

E hiˈo mai tatou i te hoê tuhaa i reira te taata e imi ai i te panaˈonaˈo ore—te vahi. Ei hiˈoraa, mea huru faahiahia paha te oire rahi, o te faahohoˈa ra i te navenave, te moni ohipa rahi, e te nohoraa unauna. Oia, e au ra e e pûpû mai te reira i te panaˈonaˈo ore i tiai-maoro-hia. E manaˈo tano anei râ teie?

Vahi—oire rahi aore ra moemoeâ rahi?

I te mau fenua e haere ra i mua, te turuhia ra te marei o te oire rahi e te parau tiani o te faatupu i te mau moemoeâ ru. Aita te mau faanahonahoraa i muri mai i tera mau parau tiani e haapao roa ra i to oe panaˈonaˈo ore, maori râ ta ratou mau hooraa. Eita ratou e faahiti i te mau fifi o te ao mau, e faaite râ ratou i te mau tupuraa o te manuïaraa o te faahohoˈa ra i te panaˈonaˈo ore. No reira te panaˈonaˈo ore i taaihia ˈi i ta ratou mau taihaa i faatianianihia e te oire rahi.

A hiˈo na i teie tupuraa. I roto i te hoê oire rahi i Afirika Tooa o te râ, ua pia te tahi mau taata toroa a te hau i te tahi mau parau e faataa ra ma te oraora e hoê â te puhipuhiraa i te avaava e te tutuiraa i te moni i noaa mai ma te fifi i te auahi. E faaararaa teie i te huiraatira no nia i te puhipuhiraa i te avaava. Ua patoi atu te feia hamani e te feia hoo avaava na roto i te piaraa i te mau parau, tei opua-maitai-hia, o te faaiteite ra i te feia puhipuhi avaava i roto i te mau tupuraa oaoa e te manuïa. Hau atu â, ua faaoomo te hoê taiete avaava i te tahi o ta ˈna mau rave ohipa i te mau ahu faaau haviti e te mau taupoo base-ball ieie no te opere i te avaava na te mau taurearea i roto i te aroâ, ma te faaitoito ia ratou paatoa ia “tamata.” No ǒ mai e rave rahi o teie mau taurearea i te mau oire iti e, no te taa ore i te mau ravea faatianiraa patatoa, ua farii ratou i teie titau-manihini-raa.  Ua matau roa ˈtura ratou i te puhipuhi i te avaava. Ua haere mai te mau taurearea o te mau oire iti i te oire rahi e imi i te panaˈonaˈo ore no te faatamaa i to ratou utuafare aore ra no te titau i te manuïaraa i te pae moni. Teie râ, ua hue rahi ratou i te moni, ta ratou hoi e nehenehe e faaohipa no te mau mea maitai aˈe.

E ere te mau parau tiani e faahohoˈa ra i te hoê oraraa manuïa i te oire rahi no ǒ noa mai i te feia hohoo ra. No ǒ mai râ i te feia o tei haere e faaea i te oire rahi e o te haama ra ia hoˈi i to ratou oire iti. No te mea eita ratou e hinaaro ia parauhia mai e aita ratou i manuïa, e faatietie ratou i te faufaa e te mau haaraa manaˈo-noa-hia ta ratou i ite i te oire rahi. Ia hiˈo-maitai-hia râ to ratou mau tiaraa, e itehia e aita to ratou huru oraraa no teie nei i taa ê roa ˈtu i to ratou oraraa i to ratou oire iti tahito; te imi noa ra ratou i te ravea i te pae moni mai te rahiraa o te feia no te oire rahi.

I roto iho â râ i te mau oire rarahi e hema ˈi te feia imi i te panaˈonaˈo ore i tae apî mai, i te feia aroha ore. No te aha? E pinepine roa, aita to ratou e taime no te faahoa roa ˈtu ia vetahi ê e mea atea ratou i to ratou utuafare. Aita ïa e taata no te aˈo e no te tauturu ia ratou ia ape i te mau marei o te oraraa nounou taoˈa o te oire rahi.

Aita o Josué i topa i roto i te marei o te puhipuhi avaava. Hau atu â, ua taa ia ˈna e eita e maraa ia ˈna ia haapao i te mau titauraa o te oraraa o te oire rahi. Te mea noa ta te oire rahi e nehenehe e pûpû atu na ˈna, o te mau moemoeâ rarahi tupu ore ïa. Ua itea mai ia ˈna e aita e panaˈonaˈo ore mau i roto i te oire rahi; e ere oia no ǒ. Ua rahi roa te huru ereraa, te haihai, e te manuïa ore o to ˈna aau, ua faahaehaa aˈera oia ia ˈna e ua hoˈi atura i te oire iti.

Ua taiâ oia e ia faaooohia oia. Ua manava maori râ to ˈna utuafare e to ˈna mau hoa mau ia ˈna ma te aau atoa. Maoti te mahanahana o to ˈna utuafare, te mau vahi matauhia o te oire iti, e te here o to ˈna mau hoa i roto i te amuiraa Kerisetiano, ua ite oioi aˈera oia i te panaˈonaˈo ore rahi aˈe i ǒ nei eiaha râ i te oire rahi, i reira hoi te moemoeâ o te taata e rave rahi e riro ai ei moemoeâ ino. Ua maere oia e mea rahi aˈe te moni i noaa mai ia ˈna e i to ˈna utuafare i to ˈna rave-puai-raa i te ohipa e to ˈna papa i roto i te faaapu, i ta ˈna moni ohipa i te oire rahi.

Te moni—eaha te fifi mau?

E horoa mai anei te moni i te huru panaˈonaˈo ore o te aau? Te na ô ra o Liz no Kanada e: “Ei taurearea, ua manaˈo vau e e faaore te moni i te hepohepo.” Ua here oia i te hoê tane navai i te pae moni. Aita i maoro, ua faaipoipo atura raua. Ua ite anei oia i te panaˈonaˈo ore? Te na ô faahou ra o Liz e: “I to ˈu faaipoiporaa, e fare nehenehe e e piti pereoo to mâua, e no te mea e mea navai mâua i te pae moni, ua nehenehe mâua e fanaˈo fatata i te mau mea atoa i te pae materia, e reva haere, e e faaanaanatae. Te mea maere, ua haapeapea noa vau no te moni.” Te faataa ra oia no te aha: “Mea rahi roa te mau mea e nehenehe mâua e ere. E au ra e e rahi noa ˈtu â ta oe mau taoˈa, e iti noa ˈtu â oe i te ite i te panaˈonaˈo ore. Aita te moni i faaore i te hepohepo aore ra te ahoaho.”

Mai te peu e te manaˈo ra oe e aita e navai ta oe moni no te ite i te panaˈonaˈo ore, a ui ïa ia oe iho e, ‘Eaha te fifi mau? O te ereraa mau â anei i te moni, aore ra o te faaohiparaa i te moni ma te paari ore?’ Ma te feruri i to ˈna oraraa na mua ˈˈe, te na ô ra o Liz e: “Te taa ra ia ˈu i teie nei e te tumu o te mau fifi o to ˈu utuafare i to ˈu tamariiraa, o te faaohiparaa tano ore ïa i te moni. E tarahu matou i te mau mea atoa ta matou e hoo mai, e no reira, e teimaha noa matou i te tarahu. Ua hopoi mai te reira i te ahoaho.”

I teie râ mahana, te ite ra o Liz e ta ˈna tane i te panaˈonaˈo ore rahi atu â, noa ˈtu e ua iti aˈe ta raua moni. I to raua haapiiraa i te parau mau o te Parau a te Atua, ua faaea raua i te faaroo i te mau parau anaanatae no nia i te  moni e ua haamata raua i te faaroo i te paari o te Atua, e teie mau parau atoa: “O tei faaroo mai râ ia ˈu ra, e parahi noa ïa ma te [panaˈonaˈo ore], e faaea noa oia ma te mǎtaˈu ore i te ino.” (Maseli 1:33; MN) Ua hinaaro raua e horoa ˈtu â i te auraa i to raua oraraa i ta te faufaa rahi i te fare moni e nehenehe e horoa mai. I teie nei, ei mitionare i te hoê fenua atea, te haapii ra o Liz e ta ˈna tane i te mau taata taoˈa rahi e te mau taata veve atoa e e fatata te Atua ra o Iehova i te hopoi mai i te panaˈonaˈo ore mau i nia i te fenua atoa. E horoa mai teie ohipa i te mauruuru rahi e te aueue ore maoti te hoê tapao e te mau faufaa hau ê, eiaha râ te moni.

A haamanaˈo i teie parau mau faufaa: Mea faufaa aˈe ia rahi ta tatou taoˈa i te Atua eiaha râ ia rahi ta tatou taoˈa materia. I roto i te mau Papai Moˈa, te tuuhia ra te faufaaraa, eiaha i nia i te fanaˈoraa i te mau taoˈa materia, i nia râ i te fanaˈoraa i te farii maitai a te Atua, ta tatou e nehenehe e tapea na roto i te rave-tamau-raa i to te Atua hinaaro i roto i te faaroo. Ua faaitoito mai te Mesia ra o Iesu ia ‘rahi ta tatou taoˈa i te Atua’ e ia haaputu i te ‘taoˈa i te ao.’—Luka 12:21, 33.

Te tiaraa—te haere nei oe ihea?

Ia manaˈo oe e o te titauraa i te hoê tiaraa teitei aˈe te ravea e itea mai ai te panaˈonaˈo ore,  a ui na ia oe iho e, ‘O vai i nia i tera faito i ite mau â i te panaˈonaˈo ore mau? Eaha te tiaraa e tia ia ˈu ia titau ia itea mai ia ˈu te reira?’ E nehenehe te hoê toroa manuïa e horoa mai i te hoê manaˈo hape o te panaˈonaˈo ore, e faatupu atu ai i te inoino aore ra i te hiˈaraa mauiui, te mea ino roa ˈtu ïa.

Te faaite maira te mau tupuraa mau e e horoa rahi aˈe mai te hoê roo maitai i mua i te Atua, eiaha râ i te hoê roo i mua i te taata, i te panaˈonaˈo ore. O Iehova anaˈe te nehenehe e horoa i te ô o te ora mure ore na te taata. Ia papaihia ïa to tatou iˈoa, eiaha i roto i te tahi buka iˈoa o te mau taata tiaraa teitei, i roto râ i te buka ora a te Atua.—Exodo 32:32; Apokalupo 3:5.

Ia tuu oe i te moemoeâ i te hiti, eaha to oe manaˈo no nia i to oe huru oraraa i teie nei, e eaha ta oe e nehenehe e tiai ma te haavare ore i te tau no a muri aˈe? Aita hoê aˈe e fanaˈo ra i te mau mea atoa. Mai ta te hoê Kerisetiano haerea paari e parau ra, “Ua tia ia ˈu ia haapii e eita oe e fanaˈo i te mau mea atoa i roto i te oraraa, e tia râ ia oe ia maiti.” A faaea na maa taime rii e a taio na i te tumu parau “Faatiahia i Bénin.”

I teie nei, a pahono na i teie mau uiraa: Eaha te fa faufaa i roto i to ˈu oraraa? Eaha te ravea e tae atu ai i reira? Peneiaˈe anei e tei nia vau i te hoê purumu tioioi mea roa e mea papu ore e e nehenehe te mea ta ˈu e hinaaro mau ra e te mea e raea-mau-hia, e noaa mai na nia i te hoê purumu ohie aˈe?

I muri aˈe i to ˈna horoaraa i te aˈoraa no nia i te faufaaraa taotiahia o te mau mea materia ia faaauhia i te faufaaraa o te mau mea pae varua, ua parau Iesu e ia “haehaa” noa aore ra “ia faatano-maitai-hia” to tatou mata. (Mataio 6:22; nota i raro i te api) Ua faataa maitai oia e te mau mea faufaa i roto i te oraraa, o te mau mea e o te mau tapao pae varua ïa i taaihia i te iˈoa o te Atua e to ˈna Basileia. (Mataio 6:9, 10) E te tahi atu mau mea, e ere ïa i te mea faufaa roa aore ra, ei auraa parau, mea mohimohi te reira.

I teie mahana, mea rahi te taviri hohoˈa e faatano mai tera noa i nia i te mau mea atea e te fatata. Mai tera atoa anei oe? Mea “faatano-maitai-hia” anei fatata te mau mea atoa ta oe e hiˈo, te auraa ra, mea faufaa anei, mea hinaarohia e, mea raeahia, ma te tahi moemoeâ nehenehe? Mai te peu e mai te reira rii, e nehenehe te fa faufaa no te mau Kerisetiano, oia te Basileia, e moe i roto i te tahi atu â mau hohoˈa, o te huti mai i to tatou ara-maite-raa. Teie te aˈoraa puai a Iesu: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.”—Mataio 6:33.

Te panaˈonaˈo ore i teie nei e a muri noa ˈtu

E moemoeâ iho â tatou paatoa i te tahi mau mea maitai aˈe no tatou iho e no tei herehia. No te mea râ e mea tia ore tatou, te ora nei tatou i roto i te hoê ao tia ore, e mea poto to tatou oraraa, e faahepohia tatou ia taotia i te mau mea ta tatou e manaˈo ra ma te tano e e naeahia. Ua faataa te hoê taata papai i te Bibilia tau tausani matahiti aˈenei e: “Ua hoˈi atura vau e hiˈo i raro aˈe i te mahana e e ere tei te feia vitiviti te hororaa, e ere tei te feia puai te aroraa, e ere atoa tei te feia maramarama te taoˈa rahi, e ere tei te feia ite te farii maitai; e tau e e tupuraa manaˈo-ore-hia hoi to te taata atoa ra.”—Koheleta 9:11, MN.

I te tahi taime, no te rahi o ta tatou ohipa matauhia i te mau mahana atoa, e moehia ia tatou  ia hiˈo i te mea faufaa aˈe, oia hoi o vai tatou e eaha ta tatou e hinaaro mau ra no te ite i te panaˈonaˈo ore mau. A hiˈo na i teie mau parau paari no tahito ra: “Ia nounou oe i te moni, eita roa ˈtu oe e mauruuru; ia hinaaro oe i te taoˈa rahi, eita roa ˈtu e noaa mai te mea atoa ta oe e hinaaro. Mea faufaa ore. Mea navai paha te maa a te hoê taata rave ohipa aore ra eita, e taoto maitai râ oia i te po. Area te taata taoˈa rahi râ, e ara noa ïa i te hepohepo no te mea e mea rahi ta ˈna.” (Koheleta 5:10, 12, Today’s English Version) Oia, eaha te niu o to oe panaˈonaˈo ore?

Mai te peu e hoê â to oe huru tupuraa e to Josué o tei moemoeâ i te hoê mea e ere i te mea mau, e nehenehe anei oe e taui i ta oe mau opuaraa? E turu mai te feia e here mau ra ia oe, mai ta te utuafare e te mau hoa o Josué i roto i te amuiraa Kerisetiano i rave. E nehenehe e itea mai ia oe te panaˈonaˈo ore rahi aˈe i roto i te mau tupuraa riirii e te feia e here mau ra ia oe, eiaha râ i roto i te oire rahi e te feia e tamata paha i te imi i to ratou maitai i nia i to oe tua.

Mai te peu e e taata taoˈa rahi oe, mai ia Liz e ta ˈna tane, e nehenehe anei oe e faatano i to oe huru oraraa no te faataa e rave rahi atu â taime e te itoito no te tauturu i te taata taoˈa rahi aore ra veve, ia haapii ratou no nia i te Basileia, te ravea e noaa mai ai te panaˈonaˈo ore mau?

Mai te peu e te tamata ra oe i te titau i te tiaraa teitei atu â i roto i te ao aore ra i ta oe vahi raveraa ohipa, e hinaaro paha oe e feruri ma te haavare ore i te mea e turai ra ia oe. Parau mau, e nehenehe te hoê oraraa fanaˈo e faaoaoa ˈtu â i te oraraa. Teie râ, e maraa anei ia oe ia faatano maitai i nia i te Basileia, te ravea mau e raeahia ˈi te panaˈonaˈo ore o te vai tamau? A haamanaˈo na i ta Iesu i parau: “E mea maitai i te horoa ˈtu i te rave mai.” (Ohipa 20:35) Ia apiti oe i roto i te mau ohipa rau i roto i te amuiraa Kerisetiano, e ite oe i te panaˈonaˈo ore hoona.

Te ruperupe ra te feia e tiaturi roa ra ia Iehova e i to ˈna Basileia, i roto i te hoê panaˈonaˈo ore mahanahana i teie nei e te tiai ra ratou i te panaˈonaˈo ore taotia-ore-hia i te tau no a muri aˈe. Teie ta te papai salamo i parau: “Ua tuu vau ia Iehova ei muâ ia ˈu; tei tau rima atau oia, e ore au e aueue. I oaoa ˈi tau aau, e te oaoa nei tau varua; e taoto atoa tau tino nei ma te tiai.”—Salamo 16:8, 9.

[Tumu parau tarenihia/Hohoˈa i te api 6]

Faatiahia i Bénin

Ua faatiahia teie aamu tau tausani taime ma te mau tauiraa e rave rahi. Aita i maoro aˈenei, ua faatia te hoê ruhiruhia o te oire iti i Bénin, i Afirika Tooa o te râ, i te aamu i muri nei i te tahi mau taata apî aˈe.

E hoˈi te taata ravaai i te fare na nia i to ˈna vaa e e farerei atu oia i te hoê taata aravihi ê e haa ra i teie fenua e haere ra i mua. E ui te taata aravihi i te taata ravaai no te aha oia i hoˈi oioi mai ai. E pahono oia e e nehenehe ta ˈna e faaea maoro atu â i tai, tera râ, ua navai te iˈa i noaa mai no te faatamaa i to ˈna utuafare.

“E i teie nei, e nafea oe i to oe taime atoa e toe ra?” o ta te taata aravihi ïa e ui.

E pahono te taata ravaai e: “E taiˈa rii ïa vau. E hauti au e ta ˈu mau tamarii. E taotooto matou paatoa ia veavea. I te ahiahi, e tamaa matou paatoa. Ia oti, e haere au e hiˈo i to ˈu mau hoa no te faataˈi i te upaupa, e te vai ra ˈtu â.”

E tâpû te taata aravihi i te parau e: “A hiˈo na, e parau tuite ta ˈu e ua haapii au i teie mau mea. E hinaaro vau e tauturu ia oe. E tia ia oe ia taiˈa maoro atu â. E rahi atu â ïa ta oe moni e noaa mai e e nehenehe oe e hoo mai i te hoê poti rahi aˈe i teie vaa. E rahi atu â ta oe moni e noaa mai maoti te hoê poti rahi aˈe e e nehenehe ta oe e hamani i te tahi mau chalutiers.”

“E eaha ˈtu ai?” o ta te taata ravaai ïa e ui.

“Eita ïa oe e faaue i te hoê taata e hoo atu i ta oe iˈa, e nehenehe râ oe e faaau roa ˈtu e te tapihaa aore ra e haamata i ta oe iho tapihaa ravaairaa. E nehenehe oe e faarue i to oe oire iti e e reva i Cotonou, aore ra i Paris, aore ra i New York e e haapao i ta oe ohipa mai reira mai. E nehenehe atoa oe e feruri e tuu i ta oe ohipa i nia i te matete i te pae faaravairaa faufaa, e riro mai ai oe ei taata taoˈa rahi.”

“Eaha te maororaa o teie mau mea atoa?” o ta te taata ravaai ïa e ui.

“Peneiaˈe 15 e tae roa e 20 matahiti,” o ta te taata aravihi ïa e pahono.

“E eaha ˈtu ai?” o ta te taata ravaai ïa e ui faahou.

“I reira ïa te oraraa e riro mai ai ei mea anaanatae,” o ta te taata aravihi ïa e faataa. “Ia oti, e nehenehe oe e faatuhaahia. E nehenehe oe e vaiiho i te ohipa rahi tamau o te oire rahi no te haere i te tahi oire iti atea.”

“E eaha ˈtu ai?” o ta te taata ravaai ïa e ui.

“Ia oti, e taime to oe no te taiˈa rii, no te hauti e ta oe mau tamarii, no te taotooto ia veavea, no te tamaa e te utuafare, e no te haere e hiˈo i te mau hoa no te faataˈi i te upaupa.”

[Hohoˈa i te api 7]

E hopoi mai anei te tiaraa teitei i te panaˈonaˈo ore?

[Hohoˈa i te api 8]

Te haapao mau ra to oe mau hoa Kerisetiano i to oe panaˈonaˈo ore