Mau uiraa a te feia taio

I to Ioane iteraa ˈtu i te “feia rahi roa” i te pûpûraa i te taviniraa moˈa i roto i te hiero o Iehova, i teihea tuhaa o te hiero te reira i te raveraahia?—Apokalupo 7:9-15.

E tano ia parau e te haamori ra te feia rahi roa ia Iehova i roto i te hoê o te mau aua i te fenua nei o to ˈna hiero rahi pae varua, te tuhaa iho â râ e tuea i te aua i rapae o te hiero a Solomona.

Na mua ˈˈe, i parauhia na e to roto te feia rahi roa i te hoê aua pae varua, aore ra taipe, o te tuea i te Aua a te mau Etene i vai na i te tau o Iesu. Teie râ, ua faaite te mau maimiraa hau e e pae aˈe tumu e ere ai mai te reira. A tahi, aita to te mau tuhaa atoa o te hiero a Heroda e faaauraa i roto i te hiero rahi pae varua o Iehova. Ei hiˈoraa, te vai ra te hoê Aua a te mau vahine i roto i te hiero a Heroda e te hoê Aua a Iseraela. I nehenehe na te mau tane e te mau vahine atoa e tomo i roto i te Aua a te mau vahine, teie râ o te mau tane anaˈe te faatiahia e tomo atu i roto i te Aua a Iseraela. I roto i te mau aua o te hiero rahi pae varua o Iehova i te fenua nei, aita te mau tane i faataa-ê-hia i te mau vahine i roto i ta ratou haamoriraa. (Galatia 3:28, 29) Aita ïa to te Aua a te mau vahine e te Aua a Iseraela e tuearaa i roto i te hiero pae varua.

A piti, aita e Aua a te mau Etene i roto i te hohoˈa papai o te hiero a Solomona ta te Atua i horoa aore ra i roto i te orama o te hiero a Ezekiela; aita atoa i roto i te hiero i patu-faahou-hia e Zerubabela. No reira, aita e tumu e na ô ai e e tuhaa ta te Aua a te mau Etene i roto i te faanahoraa o te hiero rahi pae varua o Iehova no te haamoriraa, ia hiˈopoahia iho â râ te manaˈo i muri nei.

A toru, na te arii Edoma o Heroda i patu i te Aua a te mau Etene no te faahanahana ia ˈna iho e ia au mai to Roma ia ˈna. Ua haamata o Heroda i te faaapî i te hiero a Zerubabela peneiaˈe i te matahiti 18 aore ra 17 H.T.T. Te faataa ra te Anchor Bible Dictionnary e: “Ia au i to Tooa o te râ [Roma], te hinaaro tahito o te hau emepera, . . . te titauraa ïa i te hoê hiero aano aˈe ia faaauhia i to te mau oire mai te reira no hitia o te râ.” Ua haamau-aˈena-hia râ te mau faitotia o te hiero iho. Te tatara ra te titionare e: “I tia na e ia hoê â te mau faitotia o te hiero e to mua ˈtu [ta Solomona e ta Zerubabela], area te Mouˈa o te Hiero ra, aita ïa i taotiahia to ˈna faito.” No reira, faarahi atura o Heroda i te vahi o te hiero na roto i te paturaa i tei parauhia i teie tau te Aua a te mau Etene. Eaha hoi e riro ai e e faaauraa to te hoê paturaa mai teie i roto i te faanahoraa o te hiero pae varua o Iehova?

A maha, fatata te taata atoa—te matapo, te pirioi, e te mau Etene peritome-ore-hia—tei nehenehe e tomo i roto i te Aua a te mau Etene. (Mataio 21:14, 15) Parau mau, e mea faufaa te aua no te mau Etene peritome-ore-hia e hinaaro ra e rave i te tahi mau pûpûraa na te Atua. E i reira to Iesu paraparauraa ˈtu i te feia rahi i te tahi mau taime e tiahiraa e piti taime i te feia hoo moni e te feia hoo taihaa, ma te parau atu e ua faatura ore ratou i te fare o to ˈna Metua. (Mataio 21:12, 13; Ioane 2:14-16) Teie râ, te parau ra te Jewish Encyclopedia e: “E ere taua aua i rapae ra i te hoê tuhaa o te Hiero. E ere to ˈna repo i te mea moˈa, e e tomohia e te taata atoa.”

A pae, “e au” te taˈo Heleni ra (hi·e·ron’) i hurihia ei “hiero” e i taaihia i te Aua a te mau Etene “i te taatoaraa o te paturaa, eiaha râ i te Hiero  taa noa iho,” o ta te buka ra A Handbook on the Gospel of Matthew a Barclay M. Newman e a Philip C. Stine ïa e parau ra. I te tahi aˈe pae, e mea taa maitai aˈe te taˈo Heleni ra (na·os’) i hurihia ei “hiero” i roto i te orama no te feia rahi roa a Ioane. I roto i te tupuraa o te hiero o Ierusalema, e au pinepine te reira i te vahi Moˈa Roa, te hiero aore ra te aua o te hiero. I te tahi mau taime, e hurihia te reira ei “vahi moˈa.”—Mataio 27:5, 51, MN; Luka 1:9, 21, MN; Ioane 2:20.

E faaohipa te mau melo o te feia rahi roa i te faaroo i te tusia taraehara a Iesu. E mea mâ ratou i te pae varua, ‘ua horoi hoi ratou i to ratou ahu, e ua teatea, i te toto o te Arenio ra.’ No reira, ua tiahia ratou e ia riro mai ei hoa no te Atua e ia ora ˈtu i te ati rahi. (Iakobo 2:23, 25) I roto e rave rahi mau tuhaa, ua riro ratou mai te mau peroseluto i Iseraela o tei auraro i te faufaa o te Ture e tei haamori e te mau Iseraela.

Papu maitai, aita taua mau peroseluto ra i tavini i roto i te aua i roto mai, i reira te mau tahuˈa e rave ai i ta ratou mau hopoia. Aita te mau melo o te feia rahi roa to roto i te aua i roto mai o te hiero rahi pae varua o Iehova, o taua aua ra o te faahohoˈa ra i te tiaraa tamarii a te taata, te tia roa e te parau-tia, o te mau melo o te “autahuˈa moˈa” a Iehova i to ratou vairaa mai i te fenua nei. (Petero 1, 2:5) Teie râ, mai ta te matahiapo i te raˈi i parau ia Ioane, to roto mau te feia rahi roa i te hiero, eiaha râ i rapae au aˈe i te vahi o te hiero, i roto i te hoê huru Aua pae varua a te mau Etene. Auê ïa fanaˈoraa taa ê e! E e haamahitihiti mau te reira i te hinaaro ia atuatu tatou paatoa i te viivii ore pae varua e morare i te mau taime atoa!

[Tapura/Hohoˈa i te api 31]

(Hiˈo i te papai)

Hiero a Solomona

1. Hiero

2. Aua i roto mai

3. Aua i rapae mai

4. Eˈa o te aua o te Hiero