Te taa ra anei ia outou te here o te Atua?

I TE hoê taime, ua faataa o Ioba i te huru tia ore o te taata na roto i teie mau parau: “Area te taata ta te vahine e fanau nei, aita rea o ˈna pue mahana, e te î hoi i te peapea. Te tupu nei oia mai te tiare, e ua motu ihora; te maue nei mai te mǎrû ra, e aore i mau mai.” (Ioba 14:1, 2) Te ora, mai ta Ioba i ora i taua tau ra, ua î ïa i te ahoaho e te oto. Tera atoa anei to outou manaˈo?

Teie râ, noa ˈtu te mau fifi atoa ta tatou e nehenehe e farerei, te vai ra te hoê tiaturiraa papu, hoê i niuhia i nia i te aumauiui e te here o te Atua. Na mua roa, ua horoa mai to tatou Metua aroha i te raˈi ra i te hoê tusia hoo no te faatiamâ i te huitaata o tei topa i roto i te hara. Ia au i te Ioane 3:16, 17, ua parau o Iesu Mesia e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore. Aore hoi te Atua i tono mai i ta ˈna Tamaiti [o Iesu] i te ao nei e faahapa mai i to te ao, ia ora râ to te ao ia ˈna.”

A hiˈo atoa na i te huru feruriraa maitai o te Atua i nia ia tatou te taata tia ore. Ua parau te aposetolo Paulo e: “Na ˈna i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei, e ua haapao i te tau i haapaohia i mutaa ihora, e te otia o to ratou ra parahiraa; ia imi ratou i te Fatu, peneiaˈe o te perehahu atu ratou ia ˈna e itea ˈtu, aita râ oia i atea ê atu ia tatou atoa nei.” (Ohipa 17:26, 27) A feruri na! Noa ˈtu e e taata tia ore tatou, e nehenehe tatou e fanaˈo noa i te hoê taairaa piri e to tatou Atua Poiete î i te here ra o Iehova.

I taua taime ra, e nehenehe tatou ma te tiaturi papu e faaruru i te tau no a muri aˈe, ua ite hoi tatou e te haapao mai nei te Atua ia tatou e te rave nei oia i te mau faanahoraa ma te here no to tatou maitai mure ore. (Petero 1, 5:7; Petero 2, 3:13) Papu maitai ïa e ua rau te tumu e haapii hau atu â ˈi tatou no nia i to tatou Atua î i te here na roto i te hiˈopoaraa i ta ˈna Parau, te Bibilia.