Aamu

Haamaitaihia no te faahoturaa i te paieti

FAATIAHIA E WILLIAM AIHINORIA

Ua faaarahia vau i te tuiraa po e te autâraa pinepine a Papa. Te taviriviri ra oia na raro a tapea noa ˈi i to ˈna ouma. Ua haere atu matou Mama e to ˈu tuaana i pihai ia ˈna. I te oreraa te mauiui, ua parahi atura oia, ua mapu aˈera i te aho, e ua parau maira e: “To te mau Ite no Iehova anaˈe te hau i nia i teie fenua.” Mea maere roa teie parau, ua puta roa râ vau i te reira no te mea aita vau i faaroo aˈenei i te parau o te mau Ite no Iehova. Ua hinaaro vau e ite eaha te auraa o ta ˈna parau.

UA TUPU teie ohipa i te matahiti 1953, e e ono matahiti to ˈu. Mea rahi te vahine a to ˈu papa, e faaea matou i Ewossa, te hoê oire iti faaapu i Nigeria no ropu tooa o te râ. O vau te piti o te tamarii, te tamaiti matahiapo râ i roto i te hoê utuafare rahi, e 3 hoi vahine ta Papa e 13 tamarii. E faaea matou i ǒ Papaû ra e mea hamanihia te tapoˈi fare i te ota e na maha piha i te repo. Te vai atoa ra o Mamaû e e toru taeae o Papa, e to ratou utuafare.

Mea ino roa to ˈu oraraa i to ˈu taurearearaa. No te mea iho â râ e mea maˈimaˈi o Papa. E mamae noa to ˈna ouma e tae roa i to ˈna poheraa e rave rahi matahiti i muri aˈe. Aita to ˈna maˈi matau-ore-hia i afaro i te mau ravea rapaauraa mâmâ atoa no te hoê utuafare faaapu Afirika—mai te mau raau tupu e te mau ravea rapaauraa tumu. Ehia po to matou taˈiraa i pihai ia Papa a taviriviri ai oia na raro no te mamae iti rahi e ao noa ˈtu a totereo ai te moa. No te imi i te ravea no to ˈna maˈi, e pinepine raua Mama i te reva, ma te vaiiho mai ia ˈu e to ˈu mau taeae e tuahine ia Mamaû ra.

Ua ora to ˈu utuafare i te ohipa faaapu e te  hooraa ˈtu i te ufi, te maniota, e te mau huero cola. E hoo atoa matou i te tapau uaua ia rahi rii mai ta matou moni ohipa haihai. O te ufi ta matou maa tumu. E amu matou i te ufi i te poipoi, te ufi pâpâhia i te avatea, e te ufi faahou i te ahiahi. I te tahi taime, e taui rii te maa ia amu matou i te meiˈa roti.

Mea faufaa te haamoriraa i te tupuna i roto i to matou oraraa. E tuu te utuafare i te maa i mua i te mau amaa raau e ua taamuhia te pûpû i nia iho. E haamori atoa o Papa i te hoê idolo o te faaatea ê i te mau varua ino e te mau tahutahu.

I te paeraa o to ˈu matahiti, ua faarue matou no te hoê taime i to matou oire iti no te haere e faaea i te hoê mataeinaa fatata 11 kilometera i te atea. I reira to Papa tupuraahia i te maˈi mariri, mea ê iho â ïa to ˈna maˈi ouma. Eita ta ˈna e nehenehe e rave i te ohipa i te ao, e e mauiui roa o ˈna no te mamae o to ˈna ouma i te po. Ua tupuhia vau i te maˈi utu o te one, hoê huru maˈi typhus. Ei faahopearaa, ua ora matou i te tauturu a to matou fetii rahi. No te ore e pohe i roto i te veve, ua hoˈi matou i to matou oire iti ra o Ewossa. Ua hinaaro Papa e ia noaa mai ia ˈu, ta ˈna tamaiti matahiapo, te hoê ohipa maitai aˈe i te ohipa faaapu, aita hoi i rahi te ravea no te ora. Ua manaˈo oia e maoti te hoê haapiiraa maitai, e nehenehe au e haamaitai i te huru oraraa o te utuafare e e haapao i to ˈu mau taeae e tuahine.

Haamatauraa i te mau haapaoraa taa ê

I to matou hoˈiraa i to matou oire iti, ua nehenehe au e haamata i ta ˈu tau haapiiraa. E no reira, ua haamatau vau i te mau haapaoraa a te Amuiraa faaroo Kerisetiano. I te mau matahiti 1950, mea piri roa te haapiiraa no te pae Tooa o te râ e te haapaoraa a te hau faatere aihuaraau. I te mea e te haere ra vau i te hoê haapiiraa tuatahi Katolika, te auraa ïa e e tia ia ˈu ia riro ei Katolika Roma.

I te matahiti 1966, i te 19raa o to ˈu matahiti, ua ô atu vau i te Pilgrim Baptist Secondary School (haapiiraa tuarua Baptiste) perenina i te oire o Ewohinmi, fatata e 8 kilometera i te atea ia Ewossa. I reira te tauiraa ta ˈu haapiiraa i te pae faaroo. No te mea te haere ra vau i teie nei i te hoê haapiiraa Porotetani, ua opani te mau perepitero Katolika ia ˈu eiaha vau e haere i te pureraa Tapati.

I to ˈu haereraa i teie fare haapiiraa Baptiste, ua haamatau atu vau no te taime matamua i te Bibilia. Noa ˈtu e te haere noa ra vau i te ekalesia Katolika, e taio vau i te Bibilia i te mau Tapati atoa ia oti te pureraa Katolika. Ua au roa vau i te mau haapiiraa a Iesu Mesia, ua hinaaro atura vau e ora i te hoê oraraa paieti e e auraa to te reira. Rahi noa ˈtu â vau i te taio i te Bibilia, e rahi noa ˈtu â vau i te inoino i te huru haavare o te tahi mau aratai haapaoraa e i te huru oraraa morare ore o te feia raita e rave rahi. Te mea ta ˈu i ite i rotopu i te feia e parau ra e e Kerisetiano ratou, mea ê roa ïa i ta Iesu e ta ˈna mau pǐpǐ i haapii e i rave.

Ua huru ê roa vau i te tahi iho â râ mau tupuraa. I te hoê taime, ua haere au i te hoê fare toa katekita no te hoo mai i te hoê korona, e ua ite atu vau i te hoê taritoa e tautau ra i nia i te opani o te fare toa. I te tahi atu taime, ua tamata te taata faatere o te fare haapiiraa Baptiste i te mafera ia ˈu. Ua faaroo vau i muri iho e e mahu oia e ua mafera oia i te tahi atu mau tamarii. Ua feruriruri au i teie mau mea, ma te ui ia ˈu iho e, ‘E farii anei te Atua i te mau haapaoraa e aita to ratou mau melo e aita atoa to ratou mau aratai e faahapehia ra no ta ratou mau hara iino?’

 Tauiraa i te haapaoraa

Ua au roa râ vau i ta ˈu i taio i roto i te Bibilia e ua faaoti au e tamau noa i te taio atu. I reira ïa to ˈu haamanaˈoraa i ta Papa i parau fatata 15 matahiti na mua ˈtu: “To te mau Ite no Iehova anaˈe te hau i nia i teie fenua.” Ua taiâ râ vau no te mea te tâhitohitohia ra te mau Ite apî i ta ˈu fare haapiiraa e i te tahi taime, e faautuahia ratou no to ratou oreraa e apiti mai i ta matou pureraa poipoi. E mea huru ê te tahi o ta ratou mau tiaturiraa. Ei hiˈoraa, mea fifi roa na ˈu ia tiaturi e 144 000 noa taata te haere i nia i te raˈi. (Apokalupo 14:3) I te mea e e hinaaro vau e haere i nia i te raˈi, ua feruriruri au e ua oti anei na 144 000 atoa i te maitihia hou to ˈu fanauraa.

Mea papu maitai e mea ê te haerea e te huru o te mau Ite. Eita ratou e rave i te mau peu morare ore e te mau ohipa haavî uˈana mai te tahi atu feia apî i te fare haapiiraa. No ˈu nei, ua atea ê mau â ratou i te ao, ua taio hoi au i roto i te Bibilia e mea titauhia ia na reira te feia e faaohipa ra i te haapaoraa mau.—Ioane 17:14-16; Iakobo 1:27.

Ua faaoti aˈera vau e faahohonu atu â. I te avaˈe Tetepa 1969, ua noaa mai ta ˈu buka Te parau mau e aratai i te ora mure ore ra. I te avaˈe i muri mai, ua haapii te hoê pionie, oia hoi te hoê tavini taime taatoa a te mau Ite no Iehova, e o vau. Faaitoitohia e ta ˈu haapiiraa matamua, ua haamata vau i te taio i te buka Parau mau i te hoê ahiahi Mahana maa e ua oti i te avatea i muri mai. Ua haamata oioi atura vau i te faaite i te mau mea faahiahia ta ˈu i taio i to ˈu mau hoa haapiiraa. Ua manaˈo te feia haapii e te mau orometua haapii e ua maamaahia vau no to ˈu faaroo ite-apî-hia. Ua ite râ vau e aita vau i maamaahia.—Ohipa 26:24.

Ua faaitehia i to ˈu nau metua e te poro ra vau i te hoê haapaoraa apî. Ua parau maira raua ia ˈu ia hoˈi oioi i te fare, ia ite raua eaha to ˈu fifi. Aita hoi e taata ta ˈu e nehenehe e ani i te aˈoraa, no te mea ua haere te mau Ite atoa i te hoê o ta ratou mau tairururaa mataeinaa i Ilesha. I to ˈu hoˈiraa i te fare, ua uiuihia e ua faainohia vau e to ˈu mama e te tahi atu mau fetii. Ua tamata roa ino vau i te paruru i ta ˈu e haapii ra i roto i te Bibilia.—Petero 1, 3:15.

I muri aˈe i to ˈna tamataraa ma te manuïa ore  i te haapapu e e mau orometua haapii haavare te mau Ite no Iehova, ua tamata to ˈu papa fetii i te tahi atu ravea. Ua taparuparu mai oia ia ˈu e: “A haamanaˈo e te haere ra oe i te haapiiraa ia noaa mai te tahi ite. Mai te peu e e faarue oe i ta oe haapiiraa no te haere e poro, eita roa ˈtu ïa e hope ta oe tau haapiiraa. No te aha ïa oe e ore ai e tiai e ia oti roa ta oe tau haapiiraa, i reira ïa oe e faaohipa ˈi i teie haapaoraa apî.” I taua taime ra, e au ra e e manaˈo tano teie, no reira, ua faaea ˈtura vau i te haapii e te mau Ite.

I te avaˈe Titema 1970, i muri iti noa ˈˈe i to ˈu faatuiteraahia, ua haere roa vau i te Piha a te Basileia, e mai reira mai, ua haere noa vau i te mau putuputuraa a te mau Ite no Iehova. I te 30 no Atete 1971, ua bapetizohia vau ei taipe o ta ˈu euhe i te Atua. Ua hitimahuta to ˈu nau metua e oia atoa te oire iti taatoa. Ua parau ratou e ua faainoino vau ia ratou no te mea o vau te taata matamua i Ewossa aore ra na pihai mai, o tei haere i te haapiiraa a te hau. Mea rahi o tei tiaturi rahi mai ia ˈu. Ua manaˈo ratou e e faaohipa vau i ta ˈu haapiiraa no te haamaitai i te oire iti.

Mau faahopearaa o to ˈu tauiraa i te haapaoraa

Ua tono mai to ˈu fetii e te feia paari o te oire iti i te tahi mau taata no te tamata i te turai ia ˈu ia faarue i to ˈu faaroo. To roto atoa te mau faainoraa i ta ratou mau tutavaraa. “Ia ore oe e faarue i tera haapaoraa,” o ta ratou ïa i parau, “e fifi oe a muri aˈe. Eita e noaa ta oe ohipa. Eita oe e hamani i to oe fare. Eita oe e faaipoipo e e haamau i te hoê utuafare.”

Taa ê roa ˈtu i ta ratou mau tohu haamǎtaˈu, ua noaa mai ta ˈu ohipa ei orometua haapii, hoê ahuru avaˈe i muri aˈe i te otiraa ta ˈu tau haapiiraa. I te avaˈe Atopa 1972, ua faaipoipo vau i ta ˈu vahine here, o Veronica. I muri aˈe, ua faaineine te hau faatere ia ˈu ei tia haapao i te feia faaapu. Ua hoo mai au i to ˈu pereoo matamua, e ua haamata vau i te hamani i to mâua fare. I te 5 no Novema 1973, ua fanauhia mai ta mâua tamahine matamua, o Victory, e i te mau matahiti i muri mai, ua fanauhia mai o Lydia, o Wilfred, e o Joan. I te matahiti 1986, ua fanauhia mai ta mâua tamarii hopea, o Micah. Ua riro ratou paatoa ei mau tamarii herehia, ei tufaa no ǒ mai ia Iehova ra.—Salamo 127:3.

Ia feruri au i to ˈu oraraa, e nehenehe au e parau e ua riro te mau hinaaro iino atoa o te oire iti ei mau haamaitairaa. No reira vau i mairi ai i ta ˈu tamahine matamua o Victory. Aita i maoro aˈenei, ua papai mai te oire iti e: “E e, te hinaaro nei matou e ia hoˈi mai oe e ia turu mai oe i te haereraa i mua o to tatou oire iti, i te mea e te haamaitai ra te Atua ia oe.”

Aratairaa i te mau tamarii i roto i to te Atua mau eˈa

Ua ite mâua ta ˈu vahine e eita mâua e nehenehe e amo i ta mâua hopoia no ǒ mai i te Atua ra, oia hoi e aratai i te mau tamarii, e e tapi i te mau faufaa materia i te hoê â taime. No reira, ua haapii mâua i te ora i te hoê oraraa haehaa. Mea au aˈe na mâua e ora mai teie, eiaha râ e faaruru i te mau faahopearaa e tupu mai ia maiti mâua i te hoê huru oraraa taa ê.

Mea matauhia i to matou tuhaa fenua e ora amui e te tahi atu mau utuafare, ma te faaohipa i te hoê â fare pape, te hoê â fare tutu, e te vai ra ˈtu â. Ua oaoa mâua i te tarahu i to matou iho nohoraa i te mau oire atoa i reira vau e tonohia ˈi e te hau faatere. Parau mau, mea moni tera mau nohoraa, tera râ, eita ta mâua mau tamarii e faaû rahi atu i te mau ohiparaa iino. Ua haamauruuru vau ia Iehova e i te roaraa o te mau matahiti, ua nehenehe mâua e aratai i ta mâua mau tamarii i roto i te hoê huru tupuraa maitai i te pae varua.

Hau atu â, e faaea ta ˈu vahine i te fare no te haapao i ta mâua mau tamarii. Ia oti ta ˈu ohipa, e tamata matou te utuafare i te rave amui i te mau mea. Te mau mea atoa ta matou e rave, e rave amui matou. Te vai ra te haapiiraa bibilia utuafare, te faaineineraa e te haereraa i te mau putuputuraa a te amuiraa, te haereraa i roto i te taviniraa Kerisetiano, e te faaanaanataeraa manaˈo atoa.

Ua tamata mâua i te pee i te aˈoraa i roto i te Deuteronomi 6:6, 7, o te faaitoito ra i te mau metua ia haapii i ta ratou mau tamarii eiaha noa  i te fare, i te mau taime maitatai atoa râ. Ua turai te reira i te mau tamarii ia faahoa ˈtu i te mau Ite eiaha râ i te mau taata no teie nei ao. Maoti to mâua hiˈoraa, ua haapii ratou i te maiti maitai i to ratou mau hoa no te mea eita mâua Veronica e amuimui rahi roa i te feia aita e paturu ra i ta mâua mau tiaturiraa.—Maseli 13:20; Korinetia 1, 15:33.

Parau mau, e ere noa o ta mâua aratairaa e ta mâua haapiiraa tei ohipa maitai i nia i te oraraa o ta mâua mau tamarii. Ua riro noa to matou fare ei vahi fariiraa i te mau Kerisetiano itoito rahi, mea rahi o ratou e mau tavini ratere ïa a te mau Ite no Iehova, e aita te reira i taui. A faaea mai ai teie mau Kerisetiano feruriraa paari i ǒ matou, ua nehenehe ta mâua mau tamarii e hiˈo e e haapii mai na roto i to ratou huru oraraa haapae. Ua haapuai te reira i ta mâua haapiiraa, e ua pee maite te mau tamarii i te parau mau bibilia.

Haamaitaihia no te paieti

I teie mahana, tei roto mâua ta ˈu vahine, e ta mâua na tamarii e maha i te taviniraa taime taatoa. Ua haamata vau i te taviniraa pionie i te matahiti 1973. I te roaraa o te mau matahiti, ua tia ia ˈu ia vaiiho i ta ˈu taviniraa taime taatoa i te tahi taime no te mau fifi i te pae faaravairaa faufaa. I te tahi taime, ua nehenehe atoa vau e faatere i te Haapiiraa o te taviniraa o te Basileia, o te faaineine i te mau tiaau Kerisetiano a te mau Ite no Iehova. I teie nei, te fanaˈo ra vau i te haamaitairaa taa ê e haa i roto i te hoê Tomite tuatiraa e te fare maˈi, e e tavini ei tiaau oire no Uhonmora.

Mea oaoa e ua faaipoipo ta ˈu na tamahine matahiapo, o Victory raua o Lydia, i te tahi nau matahiapo Kerisetiano maitatai. Te tavini ra raua e ta raua tane ei melo o te amaa a te mau Ite no Iehova i Igieduma, i Nigeria. E tavini tauturu ta mâua tamaiti matahiapo, o Wilfred, e e rave tamau ta mâua tamarii hopea ra o Micah, i te taviniraa pionie tauturu. I te matahiti 1997, ua oti ta Joan haapiiraa tuarua e ua rave oia i te taviniraa pionie tamau.

Hoê o te mau mea maitai roa ˈˈe i roto i to ˈu oraraa, o te tautururaa ïa ia vetahi ê ia tavini i te Atua ra o Iehova. I roto ia ratou, te vai ra te tahi mau melo o to ˈu utuafare rahi. Ua faaitoito to ˈu papa i te tavini ia Iehova, no te mea râ e mea rahi ta ˈna vahine, aita oia i haere maitai i mua. Mai to ˈu apîraa mai â, mea au na ˈu te taata. Ia ite au ia vetahi ê ia mauiui, e na ô vau e e ere to ˈu mau fifi i te mea faufaa roa. I to ˈu manaˈo, te ite ra ratou i to ˈu hinaaro haavare ore e tauturu ia ratou, e mea ohie aˈe ïa no ratou ia paraparau mai ia ˈu.

Hoê o te feia ta ˈu i tauturu ia ite i te mau opuaraa a te Atua, o te hoê ïa taurearea o te tarava noa i nia i te roi. I rave na oia i te ohipa i roto i te hoê taiete uira, e ua haruhia oia e te uira i ta ˈna vahi raveraa ohipa e ua haaparuparu roa oia mai te ouma e haere roa i raro. Ua farii oia i te hoê haapiiraa bibilia e ua farii riirii atoa oia i ta ˈna i haapii. I to ˈna bapetizoraahia i te 14 no Atopa 1995, i roto i te hoê anavai iti i pihai mai i to matou fare, a tahi ra ïa oia a faarue ai i to ˈna roi 15 matahiti i muri aˈe. Ua parau oia e o te mahana oaoa roa ˈˈe tera o to ˈna oraraa. E tavini tauturu oia i teie nei i roto i te amuiraa.

E tia ia ˈu ia parau e aita roa ˈtu vau e tatarahapa ra no to ˈu maitiraa a 30 matahiti aˈenei e tavini ia Iehova e to ˈna nunaa tahoêhia e te pûpûhia. Ua ite au i te here mau i rotopu ia ratou. E noa ˈtu paï e aita e tiaturiraa o te ora mure ore i roto i te haamaitairaa a Iehova no ta ˈna mau tavini haapao maitai, e hinaaro noâ iho â vau e ora i te hoê oraraa paieti. (Timoteo 1, 6:6; Hebera 11:6) Na te reira i aratai e i haapapu i to ˈu oraraa, a hopoi mai ai i te popou, te mauruuru, e te oaoa na ˈu e na to ˈu utuafare.

[Hohoˈa i te api 25]

E ta ˈu vahine e ta ˈu mau tamarii i te matahiti 1990

[Hohoˈa i te api 26]

E ta ˈu vahine e ta ˈu mau tamarii e ta ˈu nau hunoa e piti