Hoê hiˈopoa-maite-raa i te tahi mau aai no nia i te pohe

I TE roaraa o te tuatapaparaa, ua feaapiti e ua taiâ te taata no nia i te parau peapea o te pohe. Hau atu â, ua paturu atu te mau manaˈo faaroo hape, te mau peu matauhia, e te mau tiaturiraa i aˈa maitai, i te mǎtaˈu i te pohe. Te fifi ia mǎtaˈu tatou i te pohe, eita tatou e oaoa faahou i te oraraa e e faaino te reira i to tatou tiaturi e e auraa to te oraraa.

O te haapaoraa rahi iho â râ te tano ia faahapahia no to ˈna patururaa i te tahi mau aai i farii-rahi-hia no nia i te pohe. Na roto i te hiˈopoaraa i te tahi o teie mau aai ma te tauturu a te parau mau bibilia, a hiˈo e e nehenehe anei e faataahia to oe iho mau manaˈo no nia i te pohe.

Aai 1: Te pohe, o te hopea iho â ïa o te ora.

“Te pohe . . . e tuhaa rahi ïa o to tatou oraraa,” o ta te buka Death—The Final Stage of Growth ïa e parau ra. Te faaite ra te mau tatararaa mai teie i te tiaturiraa e e tupuraa matauhia te pohe, o te hopea natura ïa o te mau mea ora atoa. E ua atuatu tera tiaturiraa i te hoê philosophia parauhia te nihilisme e te haerea e faaohipa i te mau taime maitatai, i roto i te taata e rave rahi.

O te pohe mau râ anei te hopea natura o te ora? E ere, ia au i te tahi mau taata maimi. Ei hiˈoraa, ua parau o Calvin Harley, taata ihiora tuatapapa i te ruauraa o te taata, i roto i te hoê uiuiraa manaˈo e aita o ˈna e tiaturi ra e “ua porotaramahia” te taata “no te pohe.” Teie ta William Clark, taata ihiparuru i te tino, i parau: “Aita roa ˈtu e tuhaa ta te pohe i roto i te faataaraa o te ora.” E te manaˈo ra o Seymour Benzer, no te pu ihi anohaa i Kalifonia, e “mea tano aˈe ia faataa i te ruauraa mai te hoê nanairaa tupuraa, ta tatou e nehenehe e tiaturi e taui, eiaha râ mai te hoê hora.”

Ia faahohonu te mau aivanaa i te hamaniraa o te taata, e maere ratou. Ua itea mai ia ratou e ua tuuhia mai i roto ia tatou te mau ravea e te mau aravihi o te hau ê i te mau mea e hinaarohia i roto i to tatou oraraa e 70 e tae atu e 80 matahiti i te maoro. Ei hiˈoraa, ua itea mai i te mau aivanaa e e ravea iti rahi to te roro o te taata e haamanaˈo. Te manaˈo ra te hoê taata maimi e e nehenehe to tatou roro e haaputu i te mau haamaramaramaraa “e î ai fatata e piti ahuru mirioni buka, te rahiraa ïa i roto i te mau vairaa buka rarahi roa ˈˈe i te ao nei.” Te tiaturi ra te tahi mau taata ihiroro e i te roaraa o te hoê oraraa i te faito au noa, e faaohipa te hoê taata 1/100 o te 1 % (.0001) o te ravea o to ˈna roro. E tano ïa ia ui e, ‘No te aha i horoahia mai ai te hoê roro e ravea iti rahi hoi to ˈna, mai te peu e e faaohipa tatou hoê tuhaa iti noa o te reira i roto i te oraraa i te faito au noa?’

A hiˈo atoa na i te huru maere o te taata i mua i te pohe! No te rahiraa, o te poheraa o ta ratou vahine, ta ratou tane, aore ra ta ratou tamarii te tupuraa peapea roa ino o te hoê oraraa. E pinepine, e peapea maoro te aau o te taata i muri aˈe i  te poheraa o te hoê taata here-rahi-hia. No te feia atoa e parau ra e e pohe iho â te taata, mea fifi ia farii i te manaˈo e ia pohe ratou, o te hopea ïa o te mau mea atoa. Ua faahiti te British Medical Journal i te “manaˈo matauhia o te feia aravihi e e hinaaro te taata atoa e ora maoro.”

Ia hiˈohia te huru o te taata i mua i te pohe, ta ˈna ravea faahiahia e haamanaˈo e e haapii, e te hinaaroraa to ˈna aau e ora e a muri noa ˈtu, aita anei te reira e faaite maitai maira e ua hamanihia oia no te ora? Oia mau, ua hamani te Atua i te taata, eiaha ma te faahopearaa natura e pohe, ma te tiaturiraa râ e ora e a muri noa ˈtu. A tapao na eaha te oraraa no a muri aˈe ta te Atua i faataa no na taata matamua: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.” (Genese 1:28) Auê ïa oraraa mure ore e te faahiahia no a muri aˈe e!

Aai 2: E afai te Atua i tei pohe i pihai ia ˈna.

Teie ta te hoê mama, e 27 matahiti e fatata ra i te pohe e i te vaiiho mai i ta ˈna na tamarii e toru, i parau i te hoê paretenia Katolika: “Eiaha oe e haere mai i ǒ nei e parau mai e tera to te Atua hinaaro no ˈu. . . . Mea riri roa na ˈu ia parau mai te tahi atu taata i te reira.” Teie hoi te haapiihia ra no nia i te pohe i roto i te mau haapaoraa e rave rahi—e afai te Atua i te taata i pihai ia ˈna.

Mea ino mau â anei te Atua Poiete e haapohe ai oia ia tatou ma te aroha ore, e ma te ite e e mauiui roa to tatou aau? Eita, e ere te Atua o te Bibilia mai tera. Ia au i te Ioane 1, 4:8, ‘e aroha te Atua.’ A tapao na e aita e parauhia ra e e aroha to te Atua aore ra mea aroha te Atua, maori râ e aroha te Atua. No te mea e aroha iti rahi, te viivii ore, e te tia roa te Atua, e no te mea e ite-roa-hia te reira i roto i to ˈna huru e ta ˈna mau ohipa, e tano roa ïa ia parau e o o ˈna iho te aroha. E ere oia i te hoê Atua o te afai i tei pohe i pihai ia ˈna.

No te haapaoraa hape, mea rahi aita e taa faahou ra teihea roa te feia pohe e eaha to ratou huru. Te raˈi, te po auahi, te vahi tamâraa hara, e te rimepo—teie te mau vahi taa ore e te riaria roa, e te vai ra ˈtu â, i reira te feia pohe e haere ai. Area te Bibilia râ, te faaite maira ïa e aita e parau itea a te feia pohe; tei roto ratou i te hoê huru e au roa i te taoto. (Koheleta 9:5, 10; Ioane 11:11-14) No reira, aita e faufaa ia haapeapea tatou no nia i te ohipa e tupu i nia ia tatou i muri aˈe i te pohe, eita hoi tatou e haapeapea ia ite tatou i te hoê taata tei varea roa i te taoto. Ua parau Iesu e ia tae i te hoê mahana, ‘e haere mai te feia atoa i roto i te apoo ra i rapae’ i te ora i nia i te hoê fenua paradaiso.—Ioane 5:28, 29; Luka 23:43.

Aai 3: E rave te Atua i te mau tamarii rii ia riro ratou ei melahi.

Ua faahiti o Elisabeth Kübler-Ross, o tei maimi no nia i te mau taata e maˈi pohe to ratou, i te tahi atu manaˈo matauhia i rotopu i te mau taata faaroo. A faataa ˈi oia i te hoê tupuraa mau, ua parau oia e “mea maamaa ia parau i te hoê tamahine iti, ua pohe hoi to ˈna taeae, e mea here roa na te Atua te mau tamaroa iti, e no reira oia i afai ai ia Johnny iti i nia i te raˈi.” Na roto i tera parau, e hape te manaˈo o te taata no nia i te Atua e aita te reira e faaite ra i to ˈna huru e to ˈna haerea. Ua parau faahou o Taote Kübler-Ross e: “I to teie potii iti riroraa mai ei vahine, aita roa ˈtu to ˈna riri i te Atua i ore, i te pae hopea, ua hepohepo roa to ˈna feruriraa i te poheraa ta ˈna iho tamaroa iti e toru ahuru matahiti i muri aˈe.”

No te aha hoi te Atua e rave ai i te hoê tamarii ia riro oia ei melahi—mai te huru ra e mea hinaaro aˈe na te Atua te hoê tamarii i te mau metua iho? Mai te peu e e rave iho â te Atua i te mau tamarii, e ere anei ïa te auraa e e Atua Poiete aroha ore oia e te miimii? Taa ê roa ˈtu i tera manaˈo, te na ô ra te Bibilia e: ‘No ǒ mai te aroha i te Atua ra.’ (Ioane 1, 4:7) E rave anei ïa te hoê Atua aroha i te hoê mea, o ta te taata iho e maa faito morare to ratou, e ore roa ˈtu e farii?

No te aha ïa te mau tamarii e pohe ai? Ua papaihia  hoê tuhaa o te pahonoraa a te Bibilia i roto i te Koheleta 9:11: “E tau e e tupuraa manaˈo-ore-hia hoi to te taata atoa ra.” (MN) E te na ô maira te Salamo 51:5 e mea tia ore, e mea hara tatou paatoa mai to tatou iho â tôraa mai, e te faahopearaa no te taata atoa i teie nei, o te pohe ïa no te mau tumu rau. I te tahi taime, e tairi mai te pohe hou te fanauraa, e aiû pohe ïa te fanauhia mai. I roto i te tahi atu mau tupuraa, e pohe te mau tamarii no te tahi mau tupuraa riaria aore ra e û ratou i te ati e pohe atu ai. E ere o te Atua te tumu o tera mau ati.

Aai 4: Te haamauiuihia ra te tahi mau taata i muri aˈe i te pohe.

Mea rahi te haapaoraa e haapii ra e e haere te feia iino i roto i te hoê po auahi ura e e haamauiuihia ratou e a muri noa ˈtu. E haapiiraa mau anei teie i niuhia i nia i te mau Papai? E ora te taata e 70 aore ra e 80 matahiti i te maoro. Mai te peu atoa e e faahapahia te hoê taata no te hoê hara rahi i te roaraa o to ˈna oraraa, o te haamauiuiraa mure ore anei te utua e tano? Eita. E ere roa ˈtu ïa i te mea tano ia haamauiui i te hoê taata e a muri noa ˈtu no te mau hara ta ˈna i rave i roto i te hoê oraraa poto.

O te Atua anaˈe te nehenehe e faaite mai eaha te tupu i muri aˈe i te poheraa o te taata, e ua na reira oia i roto i ta ˈna Parau papaihia, te Bibilia. Teie ta te Bibilia e parau ra: “Te pohe nei te [animara], e te na reira atoa nei te [taata] i te pohe; hoê hoi o ratou atoa ra aho . . . Te haere nei ratou i te vahi otahi; no te repo anaˈe ratou e te hoˈi anaˈe nei i te repo â.” (Koheleta 3:19, 20) Aita e parauhia ra i ǒ nei no nia i te hoê po auahi ura. E hoˈi maori râ te taata i te repo—i te vai-ore-raa—ia pohe ratou.

Ia haamauiuihia oia, e ite ïa te hoê taata i te mau mea. E ite anei te feia pohe i te tahi mea? I ǒ nei â, te pahono ra te Bibilia e: “Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe i te fenua nei; ua aramoina hoi ratou.” (Koheleta 9:5) Mai te peu e ‘aita a ratou e parau itea,’ eita ïa tei pohe e ite i te mauiui iti rahi i te tahi vahi.

Aai 5: Te pohe, o te hopea vai tamau ïa o to tatou oraraa.

E faaea tatou i te ora ia pohe tatou, e ere râ te auraa e ua oti ïa parau. Ua ite te taata haapao maitai ra o Ioba e e haere oia i te apoo, i Hade ra, ia pohe oia. A faaroo na râ i ta ˈna pure i te Atua: “Ahiri oe e faatapuni ia ˈu i hade e; ahiri oe e huna ia ˈu, e ia ore to oe riri; ahiri oe e faataa i te  taime, a manaˈo mai ai ia ˈu nei! Ia pohe te taata nei, e ora faahou anei? . . . Na oe e tiaoro mai, e na ˈu e parau atu ia oe.”—Ioba 14:13-15.

Te tiaturi ra o Ioba e mai te peu e eita oia e taiva e tae noa ˈtu i te pohe, e haamanaˈo ïa te Atua ia ˈna e e faatia mai oia ia ˈna i muri aˈe. Tera te tiaturiraa o te mau tavini atoa a te Atua i mutaa ihora. Ua haapapu Iesu iho i teie tiaturiraa e ua faaite oia e e faaohipa te Atua ia ˈna no te faatia mai i te feia pohe. Na te mau parau a te Mesia iho e horoa maira i teie haapapuraa: “Te fatata mai nei hoi te hora e faaroo ai te feia atoa i roto i te apoo ra i [to Iesu] reo, e e haere mai i rapae; e te feia i mau na i te parau maitai ra, e tia mai ïa e rave i te ora; e te feia hoi i mau na i te parau ino ra, e tia mai ïa e rave i te pohe.”—Ioane 5:28, 29.

E fatata roa te Atua i te faaore i te ino atoa e i te haamau i te hoê ao apî i raro aˈe i te faatereraa i te raˈi. (Salamo 37:10, 11; Daniela 2:44; Apokalupo 16:14, 16) Te faahopearaa, e riro te fenua taatoa ei paradaiso o te parahihia e te feia e tavini i te Atua. Te taio nei tatou i roto i te Bibilia e: “Ua faaroo atura vau i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

E tiamâ mai i te mǎtaˈu

E tamahanahana mai te ite no nia i te tiaturiraa o te tia-faahou-raa e te ite i te Tumu o taua faanahoraa ra, ia tatou. Ua fafau Iesu e: “E ite ïa outou i te parau mau, e na te parau mau outou e faatiamâ.” (Ioane 8:32) E faatiamâ atoa te reira ia tatou i te mǎtaˈu i te pohe. O Iehova anaˈe te nehenehe mau â e taui i te ohiparaa a te ruauraa e a te pohe e e horoa mai i te ora mure ore. E nehenehe anei oe e tiaturi i ta te Atua mau parau fafau? E nehenehe, no te mea e parau mau noa iho â te Parau a te Atua. (Isaia 55:11) Te faaitoito atu nei matou ia oe ia haapii hau atu â no nia i ta te Atua mau opuaraa no te huitaata. E oaoa te mau Ite no Iehova i te tauturu ia oe.

[Parau iti faaôhia i te api 6]

Te fifi ia mǎtaˈu tatou i te pohe, eita tatou e oaoa faahou i te oraraa

[Tapura i te api 7]

TE TAHI MAU AAI MATAUHIA EAHA TA TE MAU PAPAI

NO NIA I TE POHE E PARAU RA?

● Te pohe, o te hopea iho â ïa Genese 1:28; 2:17; Roma 5:12

o te ora

● E afai te Atua i tei pohe Ioba 34:15; Salamo 37:11, 29;

i pihai ia ˈna 115:16

● E rave te Atua i te mau Salamo 51:5; 104:1, 4;

tamarii rii ia riro ratou ei Hebera 1:7, 14

melahi

● Te haamauiuihia ra te tahi mau Salamo 146:4; Koheleta 9:5, 10;

taata i muri aˈe i te pohe Roma 6:23

● Te pohe, o te hopea vai tamau Ioba 14:14, 15; Ioane 3:16;

ïa o to tatou oraraa 17:3; Ohipa 24:15

[Hohoˈa i te api 8]

E faatiamâ te parau mau no nia i te pohe ia tatou i te mǎtaˈu

[Faaiteraa i te fatu o te hohoˈa i te api 5]

Barrators—Giampolo/The Doré Illustrations For Dante’s Divine Comedy/Dover Publications Inc.