“Mairi ihora ratou i raro roa”

“Ua tapoˈihia ratou e te moana; e mairi ihora ratou i raro roa i te tai mai te mairi ofai ra.”

MEA na roto i teie mau parau to Mose e to te mau Iseraela arueraa ma te himene i to ratou faaoraraahia mai i te Miti Uteute e te haamouraahia te mau enemi Aiphiti e aˈuaˈu ra ia ratou—o Pharao e ta ˈna nuu faehau.—Exodo 15:4, 5.

No te taata atoa i ite i taua tupuraa faahiahia mau ra, mea maramarama roa te haapiiraa. Aita hoê aˈe taata e manuïa i te aaraa aore ra i te patoiraa i te mana o Iehova e ora mai ai. Teie râ, tau avaˈe noa i muri aˈe, ua aa te tahi mau Iseraela rarahi—o Kora, Datana, Abirama, e e 250 feia turu—i te mana i horoahia mai e te Atua ia Mose e ia Aarona, i mua i te taata.—Numera 16:1-3.

Ia au i te faaueraa a Iehova, ua faaara o Mose i te mau Iseraela ia faaatea ê mai i te mau tiahapa o te mau orure hau. Ua patoi o Datana e o Abirama, amuihia mai e te mau melo o to raua utuafare, i te taui i to ratou huru. I muri iho, ua faaara ˈtu o Mose e mai ta ˈNa i manaˈo, e haapapu maitai o Iehova i te nunaa e “ua faatiˈo” taua mau taata ra “ia Iehova.” I taua taime ra, ua amaha te fenua ia Iehova i raro aˈe i to ratou avae. “O ratou, e to ratou atoa ra tei topa ora noa i raro i te apoo ra; ati faahou aˈera te fenua i nia ia ratou.” Eaha ïa no Kora e no te tahi atu mau orure hau? “Ua puroro maira te auahi mai ǒ mai ia Iehova ra, pau ihora na taata e piti hanere e pae ahuru tei hopoi i te mea noˈanoˈa ra.”—Numera 16:23-35; 26:10.

Ua mou pauroa ratou, o Pharao e ta ˈna nuu, oia atoa te mau orure hau i roto i te medebara no to ratou farii-ore-raa i te mana o Iehova e to ˈna anaanatae i te mau ohipa a to ˈna nunaa. No reira e ohipa ru, no te feia atoa o te hinaaro e ite i te paruru a Iehova i teie mau mahana fifi, ia haapii no nia ia Iehova e ia auraro atu mai “te Teitei ra” e “te Puaihope ra.” Ia na reira ratou, e nehenehe ratou e tamahanahanahia e teie mau parau a Iehova: “E tausani te mairi i to hiti, e ahuru ïa te tausani i te rima atau: e ore râ e fatata mai te pohe ia oe ra. O to mata anaˈe ra te hiˈo, ia ite oe i te utua a te paieti ore ra. No te mea ua faariro oe ia Iehova, tau haapuraa, o Tei Teitei ra, ei parahiraa ora no oe ra.”—Salamo 91:1, 7-9.