Mau uiraa a te feia taio

Mea titauhia anei te taumi-roa-raa i raro i te pape mai te peu e e hinaaro te hoê taata ia bapetizohia o ˈna, teie râ, e huma ino roa oia aore ra e ea paruparu roa to ˈna, o te faariro i te taumiraa i raro i te pape ei fifi mau?

No roto mai te taˈo ra “bapetizo” i te ihoparau Heleni ra baʹpto, te auraa ra “e uhi.” (Ioane 13:26) I roto i te Bibilia, “bapetizo,” hoê â ïa e “taumi i raro i te pape.” No nia i te bapetizoraahia te eunuka Etiopia e Philipa, te na ô ra The Emphasised Bible a Rotherham e: “E haere atura raua i raro i te pape, o Philipa e te eunuka atoa ra,—e taumi atura oia ia ˈna i raro i te pape.” (Ohipa 8:38) No reira, ia bapetizohia te hoê taata, e uhi-mau-hia oia i roto i te pape.—Mataio 3:16; Mareko 1:10.

Ua faaue o Iesu i ta ˈna mau pǐpǐ e: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou.” (Mataio 28:19, 20) No reira, e faanaho te mau Ite no Iehova i te mau bapetizoraa i roto i te vahi hopuraa, te roto, te anavai, aore ra i te tahi atu mau vahi i reira e ravai ai te pape no te faahopu-roa-raa i raro. I te mea e e titauraa a te mau Papai te bapetizoraa na roto i te taumi-roa-raa i raro i te pape, aita to te taata e mana no te faaore i te bapetizoraa i te hoê taata. No reira, ia bapetizohia te hoê taata, noa ˈtu te mau ravea matau-ore-hia e titauhia no to ˈna huru tupuraa. Ei hiˈoraa, ua riro na te mau hopuraa pape aano no te bapetizo i te feia ruhiruhia aore ra i te feia ea paruparu iho â râ ei mea faufaa mau. E nehenehe ei mea mahanahana te pape i roto i te punu, e nehenehe e tuu mǎrû noa e e tuu riirii noa i te taata e bapetizohia ra i roto i te pape, e e bapetizo mau atu ai i te taime e au ai ia ˈna te pape.

E mau taata huma ino roa atoa tei bapetizohia. Ei hiˈoraa, ua taumihia te tahi mau taata tei tâpûhia te uaua hutiraa aho, e ei faahopearaa, e apoo noa ïa to nia i te arapoa, aore ra tei titau i te matini hutiraa aho, i raro i te pape. Parau mau, e titauhia ia rave i te mau faaineine-maitai-raa no taua mau huru bapetizoraa atoa ra. E feruriraa paari atoa te titauraa i te hoê vahine tuati vata noa aore ra i te hoê taote mai te peu e te vai ra. Teie râ, i roto fatata i te mau tupuraa atoa, ia ravehia te mau faanahoraa taa ê, e nehenehe iho â te mau bapetizoraa e tupu. No reira, ia ravehia te mau tutavaraa tano noa no te bapetizo i te hoê taata i roto i te pape mai te peu e tera to ˈna hinaaro mau e mai te peu e e farii oia i te mau fifi e nehenehe e tupu mai.