Tamâhia ei nunaa no te mau ohipa maitatai
Tamâhia ei nunaa no te mau ohipa maitatai
“E tamâ hua tatou ia tatou iho i te mau viivii atoa o te tino e te varua, ma te faatupu hua i te maitai i te mǎtaˈuraa ˈtu i te Atua.”—KORINETIA 2, 7:1.
1. Eaha ta Iehova e titau ra i te feia e haamori ra ia ˈna?
“NA VAI e paiuma i te mouˈa o Iehova? O vai te tia i to ˈna ra vahi moˈa?” Ua faahiti Davida, te arii no Iseraela i tahito ra, i taua uiraa haaferuri ra no nia i te haamoriraa e fariihia e Iehova. Horoa ˈtu ai oia i te pahonoraa: “Te taata rima mâ ra e te aau maitai; o tei ore [i hopoi i to ˈU nephe] i te parau haavare [ra], aore hoi i tǎpǔ ma te haavare.” (Salamo 24:3, 4; MN) Ia fariihia tatou e Iehova, o oia mau hoi te moˈaraa iho, e tia ia tatou ia vai mâ e te moˈa. Na mua ˈtu, ua haamanaˈo Iehova i te amuiraa o Iseraela e: “E haamoˈa hoi ia outou iho, ia moˈa outou no te mea te moˈa nei au.”—Levitiko 11:44, 45; 19:2.
2. Mea nafea to Paulo e to Iakobo haamahitihitiraa i te faufaaraa o te mâraa i roto i te haamoriraa mau?
2 E rave rahi senekele i muri aˈe, ua papai te aposetolo Paulo i te mau hoa Kerisetiano no te oire morare ore ra o Korinetia e: “Tei ia tatou taua mau maitai i parauhia maira, e tamâ hua tatou ia tatou iho i te mau viivii atoa o te tino e te varua, ma te faatupu hua i te maitai i te mǎtaˈuraa ˈtu i te Atua.” (Korinetia 2, 7:1) Te haapapu faahou ra te reira e no te faatupu i te taairaa e te Atua e no te fanaˈo i ta ˈna mau haamaitairaa i fafauhia, e tia ia tatou ia vai mâ e te viivii ore i te pae tino e varua. Oia atoa, i to ˈna papairaa no nia i te haamoriraa e fariihia e te Atua, ua parau te pǐpǐ ra o Iakobo e: “O te [haamoriraa mâ e te viivii ore] i mua i te aro o te Atua, o to tatou Metua ra, o teie ïa, O te hamani maitai i te otare e te mau vahine ivi i to ratou ra ati, e te tiai maitai ia ˈna iho, eiaha ia viivii i teie nei ao.”—Iakobo 1:27; MN.
3. Ia fariihia ta tatou haamoriraa e te Atua, eaha te tia ia tatou ia haapao maitai?
3 I te mea e mea faufaa roa te vai-mâ-raa, te moˈaraa e te viivii ore i roto i te haamoriraa mau, e tia i te taata atoa e hinaaro ra e fanaˈo i te farii maitai a te Atua ia haapao maitai e te raea ra anei ia ˈna taua mau titauraa ra. No te mea râ e e rau roa te mau ture aveia e te mau manaˈo o te taata no nia i te mâraa, e tia ia taa ia tatou eaha ta Iehova e parau e mea mâ e e farii, e ia auraro atu. E tia ia tatou ia imi eaha ta te Atua e titau ra i to ˈna feia haamori i te reira paeau e eaha ta ˈna i rave no te tauturu ia ratou ia mâ mai e ia vai mâ noa e te fariihia e oia.—Salamo 119:9; Daniela 12:10.
Tamâhia no te haamoriraa mau
4. A faataa na i te haapiiraa bibilia o te mâraa.
4 I te rahiraa o te taata, te vai-mâ-raa, te ore-noa-raa ïa i repohia aore ra i viiviihia. I roto râ i te Bibilia, te taahia ra te manaˈo e vai mâ maoti te tahi mau taˈo Hebera e Heleni o te faataa i te mâraa eiaha noa i te auraa pae tino, e pinepine atu â râ, i te auraa morare e pae varua. No reira te hoê faatoro Bibilia e parau ai e: “Mea varavara te mau taˈo ra ‘mâ’ e ‘mâ ore’ i te taaihia i te parau noa o te ihomâ, e pinepine râ, e mau haapiiraa faaroo ïa. No reira, e au te faaueraa tumu o te ‘mâraa’ fatata i te mau tuhaa atoa o te oraraa.”
5. I nia i teihea faito to te Ture a Mose faatureraa i te mâraa i roto i te oraraa o te mau Iseraela?
5 Oia mau, i roto i te Ture a Mose, te vai ra te mau ture rii e te mau faatureraa no nia fatata i te mau tuhaa atoa o te oraraa o te mau Iseraela, o te faataa maitai eaha te mea mâ e te fariihia e eaha te ore. Ei hiˈoraa, i roto i te Levitiko, te mau pene 11 e tae atu i te 15, e ite mai tatou i te mau faaueraa mataratara maitai no nia i te mâraa e te mâ-ore-raa. Mea viivii te tahi mau animara, e aita i tia i te mau Iseraela ia amu i te reira. Ia fanau te hoê vahine i te tamarii, e viivii oia no te hoê tau i faataahia. E viivii atoa te taata ia tupu te tahi mau maˈi o te iri, te lepera iho â râ, e ia tahetahe te melo o te tane e to te vahine. Ua faataa atoa te Ture eaha te tia ia ravehia ua tupu anaˈe te viivii. Ei hiˈoraa, i roto i te Numera 5:2 (MN), te taio nei tatou e: “E parau atu oe i te tamarii a Iseraela, e tuu ratou i te mau lepera atoa, e te feia atoa [ua tahetahe te melo] ra, e te viivii i te taata pohe ra, i rapae au mai i te puhapa ra.”
6. No teihea fa i horoahia ˈi te mau ture no nia i te mâraa?
6 Aita e feaaraa, to mua roa te mau haapiiraa i te pae o te rapaauraa e o te ea e vai ra i roto i teie mau ture e te tahi atu â ta Iehova i horoa ia faaauhia i to taua tau ra, e ua faufaahia te nunaa i to ratou haapaoraa ˈtu. Aita râ taua mau ture ra i horoahia ei pǎpǎ ture no te ea noa aore ra ei aratairaa i te pae rapaauraa noa. E tuhaa te reira no te haamoriraa mau. I te mea e e au te reira i te oraraa o te nunaa i te mau mahana atoa—te amuraa maa, te fanauraa, te taairaa i roto i te faaipoiporaa, e te vai ra ˈtu â—e haapapuraa noa ïa e e tiaraa to to ratou Atua, o Iehova, e faataa no ratou eaha te mea tano e eaha te mea tano ore i roto i te mau tuhaa atoa o to ratou oraraa tei pûpûhia na Iehova anaˈe.—Deuteronomi 7:6; Salamo 135:4.
7. Na roto i te haapaoraa i te Ture, e noaa i te nunaa Iseraela teihea haamaitairaa?
7 Ua paruru atoa te faufaa o te Ture i te mau Iseraela i te mau peu viivii a te mau nunaa tapiri. Na roto i te haapao-maitai-raa i te Ture, tae noa ˈtu te mau titauraa no te vai mâ noa i te aro o Iehova, e au ïa te mau Iseraela no te tavini i to ratou Atua e te fanaˈo i ta ˈna farii maitai. No nia i te reira, ua parau Iehova i te nunaa e: “Ia faaroo mau mai outou i tau reo, e ia haapao maite i ta ˈu ra faufaa, e riro ïa outou ei taoˈa here rahi na ˈu i te mau taata atoa ra. No ˈu noa iho hoi to te ao atoa nei. E riro â outou ei basileia tahuˈa anaˈe na ˈu, ei nunaa moˈa.”—Exodo 19:5, 6; Deuteronomi 26:19.
8. No te aha e tia ˈi i te mau Kerisetiano i teie tau ia haapao maitai i tei parauhia i roto i te Ture no nia i te mâraa?
8 I te mea e ua tuu Iehova i taua mau haamataratararaa i roto i te Ture no te haapii i te mau Iseraela e nafea ia riro ei mea mâ, te moˈa e te fariihia e oia, eita anei e tano ia hiˈopoa maitai te mau Kerisetiano i teie tau e ua raea anei ia ratou teie mau titauraa? Noa ˈtu e aita te mau Kerisetiano to raro aˈe i te Ture, e tia ia ratou ia haamanaˈo e, mai ta Paulo i faataa, “e ata anaˈe” te mau mea atoa i papaihia i roto i te Ture “no te tupu a muri aˈe; area te mea mau ra o te evanelia ïa o te Mesia.” (Kolosa 2:17; Hebera 10:1) Mai te peu e ua faariro Iehova o te parau hoi e “aore o ˈu e huru ê,” i te mâraa e te viivii ore mai te hoê tuhaa faufaa i roto i te haamoriraa mau i taua tau ra, e tia ia tatou i teie tau ia haapao maitai i te parau o te mâraa i te pae tino, morare e varua ia hinaaro tatou ia farii maitai e ia haamaitai oia ia tatou.—Malaki 3:6; Roma 15:4; Korinetia 1, 10:11, 31.
E faaite te mâraa pae tino o vai tatou
9, 10. (a) No te aha e mea faufaa ˈi te mâraa pae tino no te hoê Kerisetiano? (b) Eaha te mau parau e faahiti-pinepine-hia no nia i te mau tairururaa a te mau Ite no Iehova?
9 Te riro noa ra anei te mâraa pae tino ei tuhaa faufaa o te haamoriraa mau? Noa ˈtu e e ere na te mâraa pae tino noa e faariro i te hoê taata ei taata haamori mau i te Atua, e tano mau â ia mâ te hoê taata haamori mau i te pae tino i te mau taime atoa e nehenehe ai. I teie iho â tau i reira te taata e rave rahi e tâuˈa ore ai i te atuatu ia ratou iho, i to ratou ahu, aore ra i to ratou nohoraa, e pinepine te feia o te haapao i te reira i te tapaohia e te taata e haaati ra ia ratou. E nehenehe te reira e faatupu i te mau faahopearaa maitatai, mai ta Paulo iho â i parau i te mau Kerisetiano no Korinetia: “Aore roa i tuu i te turoriraa i te taata atoa, ia ore ia faainohia [ta tatou taviniraa]: te faaite hua nei râ matou ia matou iho e e rave ohipa na te Atua i te mau mea atoa nei.”—Korinetia 2, 6:3, 4; MN.
10 Mea pinepine roa to te mau Ite no Iehova haapopouraahia e te mau tia a te hau no to ratou haerea e ta ratou mau peu matauhia mâ, te nahonaho e te tura, o te itehia iho â râ i roto i ta ratou mau tairururaa rarahi. Ei hiˈoraa, no nia i te hoê tairururaa i tupu i te tuhaa fenua o Savone, i Italia, ua parau te vea ra La Stampa e: “Te mea e ite-oioi-hia ia haere outou na te mau vahi e faaohipahia, o te huru mâ ïa e te naho maitai o te feia e faaohipa ˈtura.” I muri aˈe i te hoê tairururaa a te mau Ite i te tahua tuaroraa i São Paulo, i Beresilia, ua parau te hoê tia no te tahua ra i te tiaau o ta ˈna pǔpǔ feia tamâ e: “Mai teie atu nei, te hinaaro nei matou ia tamâhia te tahua mai ta te mau Ite no Iehova i rave.” Ua parau te tahi atu tia no taua noâ tahua ra e: “Ia hinaaro te mau Ite no Iehova e tarahu i te tahua, e haapeapea noa matou no te mau tapao mahana. Aita ˈtu e mea ta matou e haapeapea.”
11, 12. (a) Eaha te faaueraa tumu bibilia e tia ia tatou ia haamanaˈo no nia i to tatou iho mâraa? (b) Eaha te mau uiraa e tia ia tatou ia ui no nia i to tatou ahu e to tatou huru oraraa?
11 Mai te peu e e riro te mâraa e te nahoraa i roto i ta tatou vahi haamoriraa ei tumu e aruehia ˈi te Atua ta tatou e haamori ra, papu maitai ïa e mea faufaa atoa teie mau huru maitatai i roto i to tatou iho oraraa. Teie râ, i roto i to tatou iho fare, e manaˈo paha tatou e e tiaraa to tatou e tuutuu ia tatou iho e e haa mai ta tatou i hinaaro. E no nia iho â râ i te ahu e te faanehenehe, papu mau e e tiamâraa to tatou e maiti i tei au ia tatou! Teie râ, i nia i te hoê faito rahi, e taotiaraa to to tatou tiamâraa. A haamanaˈo na e a tauaparau ai oia no nia i te maitiraa e amu i te tahi maa, ua faaara Paulo i to ˈna mau hoa Kerisetiano e: “E ara râ i teie nei mea tia noa ia outou, o te riro noa ˈtu ei turoriraa no tei paruparu ra.” Faahiti atu ai oia i te hoê faaueraa tumu faufaa: “E tia te mau mea atoa ia ˈu, eita râ e au paatoa ia rave; e mea tia anaˈe ïa ia ˈu, eita râ te mau mea atoa e faarahi i te maitai.” (Korinetia 1, 8:9; 10:23) E nafea te aˈoraa a Paulo e au ai ia tatou i te pae o te mâraa?
12 E tano iho â ia tiaturi te taata i te hoê tavini a te Atua ia vai mâ e te nahonaho to ˈna huru oraraa. E tia ïa ia papu ia tatou e eita te huru o to tatou fare e o te mau vahi tapiri e faaino i ta tatou e parau ra, oia hoi e tavini tatou no te Parau a te Atua. Eaha te huru faaiteraa ta to tatou fare e horoa ra no nia ia tatou e ta tatou mau tiaturiraa? Te faaite ra anei e te tiai mau ra tatou i te ora i roto i te hoê ao apî parau-tia, te mâ e te naho maitai ta tatou hoi e faatianiani rahi ra ia vetahi ê? (Petero 2, 3:13) Oia atoa, e nehenehe to tatou huru rapaeau—i te taime faafaaearaa anei aore ra i roto i te taviniraa—e haamaitai aore ra e faaiti i te huru anaanatae o te poroi ta tatou e poro ra. Ei hiˈoraa, a tapao na i teie parau a te hoê papai vea no Mexico: “Oia mau, e tuhaa rahi roa te mau taurearea i roto i te Ite no Iehova, e te mea faahiahia, o to ratou ïa huru tâpûraa rouru, to ratou mâraa, e te au o te ahu.” Mea oaoa mau e te vai ra taua huru taurearea ra i roto ia tatou!
13. Eaha te tia ia tatou ia rave e ia mâ e ia nahonaho iho â te mau tuhaa atoa o to tatou oraraa i te mau mahana atoa?
13 Parau mau, mea ohie aˈe te parau i te rave e ia vai mâ noa e ia vai nahonaho noa tatou, ta tatou mau tauihaa, e to tatou fare. Te mea e hinaarohia, e ere ïa ia rahi te tauihaa e te matini fifi e te moni rahi, te hoê râ tapura maitai e te tutavaraa tuutuu ore. E tia ia faataahia te taime no te tamâ i to tatou tino, to tatou ahu, to tatou fare, to tatou pereoo, e te vai ra ˈtu â. E ere no te mea e mea ohipa roa ta tatou i roto i te taviniraa, te haereraa i te putuputuraa, e te haapiiraa ia tatou iho—taa ê atu te haapaoraa i te tahi atu mau hopoia i roto i te oraraa i te mau mahana atoa—eiaha ïa tatou ia vai mâ noa e te fariihia e te Atua e e te taata. E au maite atoa te manaˈo tumu matauhia ra “e tau to te mau mea atoa nei” i teie tuhaa o to tatou oraraa.—Koheleta 3:1.
Te aau viivii ore
14. No te aha e tia ˈi ia parau e mea faufaa ˈtu â te mâraa morare e pae varua i te mâraa pae tino?
14 Noa ˈtu e mea faufaa ia haapao i te mâraa pae tino, mea faufaa ˈtu â ia haapeapea no te mâraa morare e pae varua. Tera ta tatou faaotiraa ia haamanaˈo tatou e ua faarue Iehova i te nunaa Iseraela, eiaha no te mea e mea mâ ore ratou i te pae tino, no te mea râ ua viivii ratou i te pae morare e varua. Na roto i te peropheta Isaia, ua parau atu Iehova ia ratou e no to ratou riroraa ei ‘nunaa hara, ei feia teiaha i te parau piˈo,’ ua riro ta ratou mau tusia, ta ratou haapaoraa i te avaˈe apî e te sabati e tae noa ˈtu ta ratou mau pure, ei mea teiaha na ˈna. Eaha te tia ia ratou ia rave e noaa faahou mai ai te farii maitai a te Atua? Ua parau Iehova e: “E horoi ia outou, e ia mâ outou; e faataa ê outou i te ino ta outou e rave ra i mua i to ˈu nei mata; atira na i te rave i te ino.”—Isaia 1:4, 11-16.
15, 16. Eaha ta Iesu i parau e o te haaviivii ïa i te taata, e e nafea tatou e faufaahia ˈi i ta Iesu mau parau?
15 Ia taa maitai atu â ia tatou te faufaaraa o te mâraa morare e pae varua, e hiˈo anaˈe eaha ta Iesu i parau i to mau Pharisea e te mau papai parau na ôraa e ua viivii ta ˈna mau pǐpǐ no te mea aita ratou i horoi i to ratou rima a tamaa ˈtu ai. Ua faaafaro Iesu i te parau i te na ôraa e: “E ere hoi tei ô atu i roto i te vaha i te mea e viivii ai te taata, o tei na roto mai râ i te vaha ra, e viivii ïa te taata i te reira.” Faataa ˈtura Iesu e: “Ta te vaha e haapuai mai, no roto mai ïa i te aau, o te mea ïa e viivii ai te taata. No roto mai hoi i te aau te manaˈo iino, te taparahi taata, e te faaturi, te poreneia, e te eiâ, te haavare, e te faaino. O te mau mea ïa e viivii ai te taata; area te amu noa ma te rima horoi-ore-hia ra, e ore te taata e viivii i te reira.”—Mataio 15:11, 18-20.
16 Eaha ta tatou e haapii mai na roto i te mau parau a Iesu? Te haapapu ra Iesu e hou te mau ohipa iino, te morare ore e te viivii, te vai aˈena ra te mau manaˈo iino, te morare ore e te viivii i roto i te aau. Mai ta te pǐpǐ ra o Iakobo i parau, “ua haavarehia râ te taata ia faahahau-ê-hia, e ia riro noa ˈtu i to ˈna iho hinaaro tia ore.” (Iakobo 1:14, 15) No reira, aita anaˈe tatou e hinaaro ra e topa i roto i te mau hara iino ta Iesu i faataa, e tia ia tatou ia taihitumu roa i te mau hinaaro atoa e rave i taua mau mea ra e ia ore roa ˈtu ia tupu faahou mai i roto i to tatou aau. E tia ïa ia tatou ia ara maitai i te mea ta tatou e taio ra, e mataitai ra e e faaroo atura. I teie tau, i te iˈoa o te tiamâraa o te parau e o te vaha mona o te feia aravihi, te pûpû ra te mau tapihaaraa o te faaanaanataeraa e o te faatianianiraa i te taˈi e te hohoˈa pau ore o te haamâha i te tino hara. E tia ia tatou ia faaoti maite eiaha e vaiiho i taua mau manaˈo ra ia aˈa i roto i to tatou aau. Te mea faufaa roa, no te faaoaoa i te Atua e ia farii mai oia, e tia ia tatou ia ara tamau noa i te atuatu i te aau mâ e te viivii ore.—Maseli 4:23.
Tamâhia no te mau ohipa maitatai
17. No te aha Iehova i aratai ai i to ˈna nunaa i nia i te hoê tiaraa mâ?
17 E haamaitairaa faufaa mau e e parururaa atoa ia fanaˈo tatou, ma te tauturuhia e Iehova, i te tiaraa mâ i mua ia ˈna. (Korinetia 2, 6:14-18) Teie râ, te taa atoa ra ia tatou e ua aratai Iehova i to ˈna nunaa i nia i te hoê tiaraa mâ no te hoê fa taa maitai. Ua parau Paulo ia Tito e ua “horoa” te Mesia o Iesu “ia ˈna iho no tatou, ia ora tatou ia ˈna i te mau parau ino atoa ra, ia tamâ oia ia tatou ei taata mau no ˈna iho, e te itoito i te mau ohipa maitatai ra.” (Tito 2:14) Ei nunaa i tamâhia, no teihea mau ohipa e tia ˈi ia itoito tatou?
18. E nafea tatou ia faaite e te itoito ra tatou no te mau ohipa maitatai?
18 Na mua roa, e tia ia tatou ia haa puai i te poro i te parau apî maitai o te Basileia o te Atua i te taata. (Mataio 24:14) I te na reiraraa, te pûpû ra tatou i te taata i te mau vahi atoa i te tiaturiraa e ora e a muri noa ˈtu i nia i te fenua e tamâhia i te mau huru viivii atoa. (Petero 2, 3:13) I roto i ta tatou mau ohipa maitatai, te vai atoa ra te faaiteraa i ta te varua o te Atua e faatupu i roto i to tatou oraraa i te mau mahana atoa, a faahanahana ˈi i to tatou Metua i te raˈi. (Galatia 5:22, 23; Petero 1, 2:12) E eiaha tatou ia haamoe i te feia aita to roto i te parau mau e te ino roa i te mau ati natura aore ra i te mau ati e au i te taata. E haamanaˈo tatou i te aˈoraa a Paulo: “E teie nei, te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo ra.” (Galatia 6:10) E au-maitai-hia e te Atua taua mau ohipa atoa ra i ravehia ma te aau mâ e te manaˈo turai anoi ore.—Timoteo 1, 1:5.
19. Eaha te mau mea maitatai e tiai maira ia tatou ia tamau tatou i te atuatu i te hoê faito mâraa teitei—i te pae tino, morare e varua?
19 Ei tavini a te Teitei Roa ˈˈe, e haapao tatou i te mau parau a Paulo: “E au mau taeae ra, te aˈo atu nei au ia outou ma te aroha rahi o te Atua, e ia pûpû atu outou i to outou mau tino ei tusia ora, e te moˈa, e te au hoi i te Atua ra, [te hoê taviniraa moˈa ma to] outou [feruriraa].” (Roma 12:1; MN) Ia tamau tatou i te poihere i te fanaˈoraa taa ê oia te tamâraahia e Iehova e ia tutava hope i te atuatu i te hoê faito mâraa teitei i te pae tino, morare e varua. Ia na reira tatou, eita noa tatou e fanaˈo i te tura e te mauruuru i teie nei, i te tiaturiraa atoa râ e ite atu ia “mou te mau mea tahito ra”—teie nei ïa faanahoraa ino e te viivii—ia “faaapî” te Atua “i te mau mea atoa nei.”—Apokalupo 21:4, 5.
Te haamanaˈo ra anei outou?
• No te aha i horoahia ˈi te mau ture e rave rahi no nia i te mâraa i te mau Iseraela?
• E nafea te mâraa pae tino e haamaitai ai i te huru anaanatae o te poroi ta tatou e poro ra?
• No te aha te mâraa morare e pae varua e faufaa ˈtu â ˈi i te mâraa pae tino?
• E nafea tatou ia faaite e e nunaa “itoito” tatou “i te mau ohipa maitatai”?
[Uiraa haapiiraa]
[Hohoˈa i te api 21]
E haamaitai te mâraa pae tino i te huru anaanatae o te poroi ta tatou e poro ra
[Hohoˈa i te api 22]
Ua faaara Iesu e e faatupu te mau manaˈo iino i te mau ohipa iino
[Hohoˈa i te api 23]
Ei nunaa i tamâhia, e itoito te mau Ite no Iehova no te mau ohipa maitatai