Te Tétragramme i roto i te Septante

E PAPAIHIA te iˈoa o te Atua, o Iehova, na roto i te Tétragramme, oia hoi na reta Hebera e maha יהוה (YHWH). Mea maoro to te taata manaˈoraa e aita te Tétragramme i roto i te mau hohoˈa o te Septante. E no reira i parauhia ˈi e ia faahiti te feia o tei papai i te mau Papai Heleni Kerisetiano i te mau Papai Hebera, aita ratou i faaohipa i te iˈoa o te Atua i roto i ta ratou mau papai.

Maoti te tahi anairaa mea i itea mai i te roaraa o na hanere matahiti i mahemo, ua heheuhia e te vai ra te iˈoa o te Atua i roto i te Septante. Te na ô ra te hoê parau faataa e: “No to ratou hinaaro iti rahi e paruru maite i te iˈoa moˈa o te Atua, ua papai te mau ati Iuda Heleni i na reta iho o te Tétragramme i roto i te papai Heleni, i to ratou huriraa i te Bibilia Hebera na roto i te reo Heleni.”

Te tâpû gima e itehia ra i te pae aui, o te hoê noa ïa o te tahi mau hohoˈa e vai râ. No ǒ mai teie tâpû, tei itehia i Oxyrhynchos, i Aiphiti e tei tapaohia ˈtu te numera 3522, i te senekele matamua T.T. * E 7 i nia 10,5 tenetimetera to ˈna mau faito e te vai ra te irava o te Ioba 42:11, 12 i nia iho. Ua papaihia te Tétragramme, o tei faaohuhia, na roto i na reta Hebera no tahito ra. *

No reira ˈtura, te vai ra anei te iˈoa o te Atua i roto i te mau hohoˈa matamua o te mau Papai Heleni Kerisetiano? Te na ô ra te aivanaa ra o George Howard e: “I te mea e ua papai-noa-hia te Tétragramme i roto i te mau hohoˈa o te Bibilia Heleni [te Septante], tera hoi te mau Papai a te ekalesia matamua, mea tano ïa ia manaˈo e ua paruru maite te feia o tei papai i te Faufaa Apî i te Tétragramme i roto i te papai bibilia, ia faahiti ratou i te Papai.” E au ra e i muri iti noa ˈˈe to te mau papai parau monoraa i te iˈoa o te Atua na roto i te mau iˈoa mono, mai ia Kyʹri·os (Fatu) e The·osʹ (Atua).

[Nota i raro i te api]

[Faaiteraa i te fatu o te hohoˈa i te api 30]

Courtesy of the Egypt Exploration Society