Te faatia ra te feia poro i te Basileia

Te itearaa mai te parau mau i te hoê vahi manaˈo-ore-hia

E HINAARO te Atua “i te [mau huru] taata atoa ia ora, e ia noaa te ite [mau] i te parau mau.” (Timoteo 1, 2:3, 4; MN) Ia raea taua fa ra, ua nenei te mau Ite no Iehova e ua opere e mau mirioni Bibilia e papai haapiiraa bibilia. I te tahi mau taime, ua tauturu teie mau papai i te feia aau haavare ore ia ite i te parau mau na roto i te mau ravea manaˈo-ore-roa-hia. I roto i teie tuhaa, te faatia ra te feia poro i te Basileia i Freetown, i Sierra Leone i te aamu i muri nei.

O Osman te piti o te tamaroa o te hoê utuafare e iva tamarii. A paari noa ˈi oia i roto i te hoê utuafare faaroo, ua haere tamau oia e haamori e to ˈna metua tane. Ua aehuehu roa râ o Osman i te mea ta ta ˈna haapaoraa e haapii ra no nia i te po auahi. Aita oia e maramarama ra nafea te hoê Atua aroha e haamauiui ai i te feia iino na roto i te tutuiraa ia ratou i te auahi. Aita roa ˈtu te mau faataaraa atoa i horoahia no te tauturu ia Osman ia maramarama i te haapiiraa o te po auahi i tamǎrǔ i to ˈna feruriraa.

I te hoê mahana, i te 20raa o to Osman matahiti, ua ite oia i te hoê buka ninamu ua tapoˈihia te afaraa i roto i te farii pehu. I te mea e mea au na ˈna te mau buka, ua rave mai oia i te reira, ua tamâ, e ite aˈera i te upoo parau—Te parau mau e aratai i te ora mure ore ra. *

‘Eaha teie parau mau?’ o ta Osman ïa e ui maere ra. Ua tupu mai to ˈna anaanatae, afai atura o Osman i te buka i te fare e i reira iho, ua taio taatoa i te reira. Auê to ˈna oaoa i to ˈna iteraa e e iˈoa to te Atua—o Iehova! (Salamo 83:18) Ua ite atoa oia e te huru maitai rahi roa ˈˈe o te Atua, o te here ïa, e e mea riri na ˈNa te manaˈo ra e haamauiui i te taata i roto i te hoê vahi auahi ura. (Ieremia 32:35; Ioane 1, 4:8) I te pae hopea, ua taio o Osman e e fatata Iehova i te haamau i te hoê paradaiso i te fenua nei i reira te taata e nehenehe ai e ora e a muri noa ˈtu. (Salamo 37:29; Apokalupo 21:3, 4) Auê ïa parau mau faahiahia no ǒ mai i te hoê Atua î i te here e te aroha hamani maitai e! Ma te aau mehara haavare ore, ua haamauruuru o Osman ia Iehova no te faaiteraa ia ˈna i te parau mau i te hoê vahi manaˈo-ore-roa-hia.

Tau mahana i muri aˈe, ma te tauturu a te tahi mau hoa, ua itea ia Osman te Piha a te Basileia a te mau Ite no Iehova e ua haere oia i te hoê putuputuraa no te taime matamua. I reira, ua ani oia i te hoê Ite ia haapii i te Bibilia e o ˈna. Noa ˈtu te patoiraa uˈana a to ˈna utuafare, ua tamau noa o Osman i te haere i mua i te pae varua e ua bapetizohia oia. (Mataio 10:36) I teie mahana, te tavini ra oia ei matahiapo i roto i te amuiraa. Auê ïa faahopearaa faahiahia i noaa mai na roto i te itearaa mai te hoê papai bibilia i roto i te hoê farii pehu e!

[Nota i raro i te api]