E tae mai te tauturu o te tamǎrû i te oˈe!

‘TEIHEA huru oˈe?’ o ta outou paha ïa e ui. E oˈe o te maa varua! Ua tohu te hoê peropheta Hebera no tahito ra i teie oˈe: “Inaha, te na ô maira te Fatu ra o Iehova, te fatata maira te tau e hopoi atu ai au i te oˈe i nia i te fenua, e ere râ i te oˈe maa ore, e te hiaai i te pape, i te faaroo râ i te parau a Iehova.” (Amosa 8:11) No te tauturu i te tamǎrû i te oˈe pae varua, e tonohia na melo e 48 o te 112raa o te piha a te Haapiiraa bibilia no Gileada a te Taiete Watch Tower, e vai ra i Patterson, i te Hau no New York, i na fenua rau 19 i nia e 5 fenua rarahi e motu.

Eita ratou e haere i ǒ ma te iˈo e te maa huero, ma te ite râ, te aravihi, e te faaineineraa. E pae avaˈe i te maoro to ratou faahohonu-maite-raa i te Bibilia no te haapaari i to ratou faaroo i roto i te taviniraa mitionare i te ara. I te 9 no Mati 2002, te faaroo ra na feia e 5 554 i tae mai i te porotarama faatuiteraa ma te oaoa.

Na Stephen Lett, melo o te Tino aratai a te mau Ite no Iehova, i haamata i te porotarama ma te aau tae. Ua manava taa ê oia i te mau manihini e rave rahi no te mau fenua rau o te ao. I muri iho, ua faaau oia i te mau parau a Iesu, “O outou te maramarama o teie nei ao” i te ohipa a te feia e riro mai ei mitionare. (Mataio 5:14) Ua faataa oia e: ‘I roto i ta outou mau hopoia, e “turama” outou i te mau tuhaa rau o te mau ohipa faahiahia a Iehova, e nehenehe atu ai te feia aau haavare ore e ite i te nehenehe o Iehova e o ta ˈna mau opuaraa.’ Ua faaitoito o Taeae Lett i te mau mitionare ia faaohipa i te maramarama o te Parau a te Atua no te faaite i te poiri o te mau haapiiraa hape e no te aratai i te feia e imi ra i te parau mau.

Mea faufaa roa te hoê haerea e tano no te manuïa

I muri aˈe i te mau parau omuaraa a te peretiteni, ua hohora mai o Baltasar Perla, melo o te Tomite amaa a te mau Hau Amui, i te matamua o te hoê anairaa oreroraa parau i faataahia no te tauturu i te feia faatuitehia ia riro ei mau mitionare o te manuïa. Ua haamataratara oia i te manaˈo tumu “E faaetaeta, eiaha e taiâ, e rave.” (Paraleipomeno 1, 28:20) E hopoia fifi tei horoahia na Solomona, arii o Iseraela i tahito ra, e rave i te hoê mea aita o ˈna i rave aˈenei—e patu i te hoê hiero i Ierusalema. Ua amo o Solomona i ta ˈna hopoia, e ua oti roa te hiero maoti te turu a Iehova. Ma te huti mai i te haapiiraa no te piha, ua parau o Taeae Perla e: ‘Ua horoahia te hoê hopoia apî na outou, te riroraa mai ei mitionare, e mea titauhia ia faaetaeta outou e eiaha e taiâ.’ Papu maitai, ua tamahanahanahia te mau piahi e te haapapuraa e e ore roa ˈtu Iehova e faarue ia ratou a vai piri noa ˈi ratou ia ˈna. Ua putapû te feia e faaroo ra i te mau parau hopea a Taeae Perla: ‘E nehenehe outou e rave i te maitai rahi ei mitionare. Na te mau mitionare i faaite i te parau mau i to ˈu utuafare e ia ˈu nei!’

“A hiˈo ia Iehova no te manuïa,” o te manaˈo tumu ïa o  te oreroraa parau i hohorahia e Samuel Herd, te tahi atu melo o te Tino aratai. Te haamata ra te mau piahi i te hoê toroa i roto i te ohipa mitionare, e tei to ratou taairaa e o Iehova e manuïa ˈi ratou. Ua aˈo o Taeae Herd ia ratou e: ‘Mea rahi te ite o te Bibilia tei noaa mai ia outou maoti ta outou mau haapiiraa i Gileada. Ua farii outou i te reira ma te oaoa. I teie nei râ, ia manuïa mau â outou, e tia ia outou ia horoa i ta outou i haapii mai.’ (Ohipa 20:35) E fanaˈo te mau mitionare i te mau taime maitatai e rave rahi no te reira a “manii” ai ratou ia ratou iho no te maitai o vetahi ê.—Philipi 2:17.

Eaha te aˈoraa hopea ta te mau orometua haapii e horoa na te mau piahi? Ua niu o Mark Noumair i ta ˈna tumu parau i nia i te Ruta 3:18, “A parahirahi iho na ia ite oe i te hopea o te parau nei.” Ma te faaohipa i te hiˈoraa o Naomi raua o Ruta, ua faaitoito te taeae orero i te feia faatuitehia ia tiaturi roa i te mau faanahoraa e ravehia ra e te faanahonahoraa a te Atua i nia i te fenua e ia faatura i te mana faatere teotaratia. Ma te haaputa i te aau o te mau piahi, ua parau o Taeae Noumair e: ‘I te tahi mau taime, eita outou e taa no te aha te hoê faaotiraa o te ohipa i nia ia outou i ravehia ˈi aore ra e puai roa  paha to outou manaˈo e e tia ia ravehia te tahi mea ma te hoê raveraa taa ê. E nafea outou? E tia mai anei outou i nia no te haapao i te mau mea aore ra e “parahirahi” outou ma te turui i nia i te aratairaa a te Atua, a tiaturi ai e e faatupu noa oia i te maitai i muri aˈe?’ (Roma 8:28) Aita e feaaraa, e riro te manaˈo paari e ‘haapao maite i te faahaereraa i te mau faufaa a te Basileia i mua, e tiatonu i ta te faanahonahoraa a Iehova e rave ra eiaha râ te huru o te taata,’ ei mea faufaa roa na te feia e riro mai ei mitionare i roto i ta ratou mau hopoia i te ara.

Na Wallace Liverance, o tei tavini na ei mitionare e o te haa ra i teie nei ei orometua haapii no Gileada, i hohora i te oreroraa parau hopea o te anairaa matamua. Teie te manaˈo tumu o ta ˈna oreroraa parau “A haapao maite noa, a faaea noa i roto i te taviniraa a te Atua.” Ua parau oia e ua haroaroa te peropheta Daniela e ua fatata te mau Iseraela i te tiamâ i te faatîtîraa i to ˈna iteraa i te toparaa o Babulonia e maoti te parau tohu a Ieremia. (Ieremia 25:11; Daniela 9:2) Ua ite maite o Daniela i te tarena a Iehova, e ua tauturu te reira ia ˈna ia haapao maite i te faaite-haere-raa i ta te Atua opuaraa. Area te mau Iseraela i te tau o te peropheta Hagai râ, ua parau ïa e: “Aitâ i tae te taime.” (Hagai 1:2) Aita ratou i haapao i te anotau ta ratou e ora ra, ua haapao râ ratou i to ratou iho maitai e to ratou hinaaro, e ua vaiiho i te ohipa no reira ratou i faatiamâhia ˈi mai Babulonia mai, oia hoi te patu-faahou-raa i te hiero. Teie te parau hopea a Taeae Liverance: “No reira, a haapao maite ma te haamanaˈo i ta Iehova opuaraa i te mau taime atoa.”

Na te orometua haapii no Gileada ra o Lawrence Bowen i peretiteni i te hoê tuhaa e teie te manaˈo tumu “E haamaitai Iehova i te feia e faaohipa i te parau ora.” (Hebera 4:12) No nia teie tuhaa i te mau tupuraa i farereihia e te piha i roto i te pororaa, o te haamahitihiti ra e nafea Iehova e haamaitai ai i te feia e faaohipa i te Bibilia i roto i te pororaa e te haapiiraa i te taata. Ua faaite te peretiteni e ua horoa mai Iesu Mesia i te hoê hiˈoraa maitai na te mau tavini atoa a te Atua: ‘E nehenehe iho â Iesu e parau e e ere na ˈna ta ˈna e haapii ra, e faahiti râ oia i te Parau a te Atua.’ Ua taa i te feia aau haavare ore te parau mau e ua farii maitai atu. (Ioane 7:16, 17) E parau mau atoa i teie mahana.

E faaineine te haapiiraa no Gileada i te hoê no te mau ohipa maitatai atoa

I muri iho, ua uiui o Richard Abrahamson e o Patrick LaFranca, mea maoro to raua taviniraa ei melo o te fetii o te Betela, e ono piahi faatuitehia no Gileada, o te tavini nei i roto i te tahi mau huru taviniraa taa ê ma te taime taatoa. Ua faaitoitohia te feia faatuitehia o te 112raa o te piha i to ratou faarooraa e tau matahiti i muri aˈe, te tamau noa ra ratou e ono, noa ˈtu eaha ta ratou hopoia i teie nei, i te faaohipa i te faaineineraa ta ratou i fanaˈo i Gileada no nia i te haapiiraa bibilia, te mau maimiraa, e te afaroraa e te taata.

Na Theodore Jaracz, melo o te Tino aratai, i horoa i te oreroraa parau tumu o te porotarama. Teie te upoo parau “Te mea e ravehia ra na roto i te faaoromairaa i te riri o Satani.” I te roaraa o na avaˈe e pae i mahemo, ua fanaˈo te mau piahi i te hoê huru tupuraa î i te here e te teotaratia. Mai tei faaitehia râ i roto i ta ratou mau haapiiraa i roto i te piha, te ora nei tatou i roto i te hoê ao enemi. Te arohia nei te nunaa o Iehova e ati aˈe te ao nei. (Mataio 24:9) Ma te faahiti e rave rahi aamu bibilia, ua parau o Taeae Jaracz e ‘o tatou iho â ta te Diabolo e aro. E tia ia tatou ia haapaari i to tatou taairaa e o Iehova e ia faaitoitohia no te faaruru i te mau tamataraa.’ (Ioba 1:8; Daniela 6:4; Ioane 15:20; Apokalupo 12:12, 17) Ua faaoti o Taeae Jaracz e noa ˈtu te riri tamau i te nunaa o te Atua, ‘e ore te mauhaa i hamanihia no te aro ia tatou e tupu, mai ta te Isaia 54:17 e parau ra. Na Iehova e haapao ia tatou ia ora tatou i te taime e ma te ravea ta ˈna i maiti.’

Ma te “ineine roa,” aita e feaaraa e e haa rahi te feia faatuitehia o te 112raa o te piha no Gileada i te tamǎrû i te oˈe o te maa varua i te mau fenua i reira ratou e tonohia ˈi. (Timoteo 2, 3:16, 17, MN) Te tiai ru nei tatou i te mau parau faataa e nafea ratou e faaite ai i te poroi maitai i te taata i tera mau fenua.

[Tumu parau tarenihia i te api 23]

TAPURA O TE PIHA HAAPIIRAA

Rahiraa fenua e tia to ratou: 6

Rahiraa fenua e terehia ˈtu: 19

Rahiraa piahi: 48

Faito matahiti au noa: 33,2

Rahiraa matahiti au noa i roto i te parau mau: 15,7

Rahiraa matahiti au noa i roto i te taviniraa taime taatoa: 12,2

[Hohoˈa i te api 24]

Te 112raa o te piha faatuitehia a te Haapiiraa bibilia no Gileada a te Taiete Watch Tower

I roto i te tapura iˈoa i muri nei, a taio i te mau anairaa mai mua e haere atu i muri, e te mau iˈoa mai te pae aui e haere atu i te pae atau.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.