Mau uiraa a te feia taio

Ia haapohe te hoê taata ia ˈna, e nehenehe anei te hoê tavini Kerisetiano e vauvau i te oreroraa parau hunaraa?

Na te tavini Kerisetiano taitahi e faaoti no ˈna iho ma te manaˈo haava maitai e e vauvau anei oia i te hoê oreroraa parau hunaraa no te taata e au ra e ua haapohe oia ia ˈna. Ia rave oia i te faaotiraa, e tia ia ˈna ia hiˈopoa i te mau uiraa i muri nei: E nafea Iehova e hiˈo ai i te haapoheraa ia ˈna iho? Ua haapohe mau anei te taata ia ˈna? Na te hoê ahoaho i te pae feruriraa anei aore ra o te aau i turai i te taata ia haapohe ia ˈna? E nafea e hiˈohia ˈi te haapoheraa ia ˈna iho i roto i te huiraatira o te vahi iho?

Ei Kerisetiano, te anaanatae ra tatou e nafea Iehova e hiˈo ai i te haapoheraa ia ˈna iho. Mea faufaa e mea moˈa te ora o te taata no Iehova. (Genese 9:5; Salamo 36:9) Te haapoheraa ia ˈna iho ma te hinaaro mau, e taparahiraa taata ïa, e mea au ore iho â te reira i mua i te aro o te Atua. (Exodo 20:13; Ioane 1, 3:15) E tapea anei te reira eiaha e vauvau i te hoê oreroraa parau hunaraa no te hoê taata i haapohe ia ˈna?

A rave na i te hiˈoraa o te arii o Iseraela ra o Saula. I to ˈna taaraa e eita oia e ora mai i te aroraa hopea i te mau Philiseti, maoti i te vaiiho i to ˈna enemi ia hamani ino roa ia ˈna, “ua rave ihora Saula i te tahi ˈoˈe, e ua hiˈa noa ihora oia i nia iho.” I te itearaa i te mau Philiseti to ˈna tino, ua patǐtǐ ratou i te reira i nia i te patu o te oire no Bete-sana. I te itearaa ia ratou te mea i ravehia e te mau Philiseti, ua iriti aˈera te huiraatira no Iabesa-gileada i te tino e ua tutui ihora i te auahi. I muri aˈe, ua rave maira ratou i to ˈna mau ivi e ua tanu ihora. Ua haapae atoa ratou i te maa e hitu mahana, e peu otohaa tera i rotopu i te mau Iseraela. (Samuela 1, 31:4, 8-13; Genese 50:10) I to Davida, tei faatavaihia e Iehova, iteraa eaha ta te huiraatira no Iabesa-gileada i rave, ua na ô oia e: “Ia haamaitaihia mai outou e Iehova; o tei na reira i te hamani maitai i to outou fatu, ia Saula; e ua tanu hoi outou ia ˈna. E teie nei, ia hamani maitai mai Iehova ia outou.” (Samuela 2, 2:5, 6) Aita te buka a te Atua e faaite ra e ua faautuahia te huiraatira no Iabesa-gileada no to ratou faatupuraa i te mea e nehenehe e hiˈohia ei oroa hunaraa o te arii ra o Saula. A faaau na e te tupuraa o te feia aita i hunahia no ta ratou mau ohipa iino. (Ieremia 25:32, 33) E nehenehe te hoê tavini Kerisetiano e hiˈopoa i te aamu no nia ia Saula a faaoti ai oia e e nehenehe anei ta ˈna e vauvau i te hoê oreroraa parau hunaraa no te hoê taata i haapohe ia ˈna.

E hinaaro atoa paha te tavini e hiˈopoa i te fa o te hoê oreroraa parau hunaraa. Taa ê roa i te feia o te tiaturi i te pohe-ore-raa o te nephe, eita te mau Ite no Iehova e faatupu i te mau oroa hunaraa ma te manaˈo hape e e haere te taata i pohe i te tahi atu ao. Maoti i te turu i tei pohe, te fa matamua o te hoê oroa hunaraa, o te tamahanahanaraa ïa i te feia oto e te horoaraa i te hoê faaiteraa no nia i te huru o te taata pohe i te feia i tae mai. (Koheleta 9:5, 10; Korinetia 2, 1:3-5) Te tahi atu tumu faufaa o te hoê oreroraa parau hunaraa, o te tautururaa ïa i te feia atoa i tae mai ia feruriruri i te huru poto o te oraraa. (Koheleta 7:2) E naeahia anei teie mau fa na roto i te faatupuraa i te oroa hunaraa no te taata i haapohe ia ˈna?

Parau mau, e manaˈo paha vetahi pae e ua opua iho â te taata e haapohe ia ˈna, ma te ite maite e ua hara oia ia Iehova. E nehenehe noa anei râ e haapapu i teie manaˈo? E ohipa faaoti-taue-noa-hia anei te reira? E tatarahapa vetahi pae o te tamata i te haapohe ia ratou e eita ratou e tapiti. Eita te hoê taata e nehenehe e tatarahapa i muri aˈe i te poheraa no te mea ta ˈna i rave.

Te tahi atu mea faufaa, o te ahoaho ïa i te pae feruriraa e aau te tumu i haapohe ai e rave rahi ia ratou. E nehenehe mau te reira e parauhia, te mau taata ati i haapohe ia ratou iho. Ia au i te tahi mau numera, e  90 % o te feia i haapohe ia ratou, e fifi ïa to ratou i te pae feruriraa, aau aore ra no te tahi peu matauhia. E faaore anei Iehova i te haapoheraa ia ˈna iho i ravehia e te taata tera te huru feruriraa? Aita to tatou e tiaraa e faataa e ua rave anei te taata i pohe i te hoê hara eita e nehenehe e faaorehia i mua ia Iehova. E nehenehe te hoê tavini Kerisetiano e hiˈopoa i te mau tupuraa e te ea o tei pohe a manaˈo ai oia e faatupu i te hoê oroa hunaraa no te taata ati i haapohe ia ˈna.

Te vai ra ˈtu â te tahi tuhaa e hiˈopoa: E nafea te huiraatira ia hiˈo i te haapoheraa ia ˈna iho e te poheraa o te taata? E au iho â râ te reira no te mau matahiapo, o te tapi ra i te roo o te amuiraa a te mau Ite no Iehova o te vahi iho. Ia au i te huru o te taatoaraa i nia i te haapoheraa ia ˈna iho i te vahi iho, e i nia iho â râ i te tupuraa taa ê o te haapoheraa ia ˈna iho, mea au aˈe paha na te mau matahiapo eiaha e paturu i te hoê oroa hunaraa i mua i te taata aore ra e vauvau i te hoê oreroraa parau i roto i te Piha a te Basileia.

Teie râ, ia anihia te hoê tavini Kerisetiano ia faatere i te oroa hunaraa i faanahohia e te tahi atu mau taata, e nehenehe ta ˈna e manaˈo e na nia i ta ˈna iho faaotiraa (eiaha ei tia no te amuiraa), e nehenehe oia e na reira. Ia faaoti oia e na reira, e tia ia ˈna ia riro ei taata feruriraa paari ma te ore e horoa i te mau parau haapapuraa e te vai ra anei te hoê tia-faahou-raa. Tei roto te tiaturiraa no a muri aˈe o tei pohe i te rima o Iehova, e aita e taata e nehenehe e parau e e faatiahia anei te taata pohe aore ra eita. E nehenehe te tavini e niu i ta ˈna mau parau i nia i te mau parau mau bibilia no nia i te pohe e e pûpû i te tamahanahanaraa na te feia oto.