Eiaha outou ia haavarehia

FATATA hoê â maororaa to te haavare vairaa e to te taata. Hoê o te mau tupuraa matamua i roto i te tuatapaparaa i papaihia, o te hoê ïa ohipa haavare. O to Satani ïa haavareraa ia Eva i roto i te ô i Edene.—Genese 3:13; Timoteo 1, 2:14.

Noa ˈtu e, mai reira mai, aita hoê anotau aita te haavare i parare i te fenua nei, ua rahi roa i teie tau. Ua faaara atea te Bibilia no nia i teie nei tau e: “Te mau taata iino e te feia haavare ra, e tupu â to ratou ino e e rahi atu, i te haavare-noa-raa ˈtu, e te haavareraahia mai.”—Timoteo 2, 3:13.

E haavarehia te taata no te mau huru tumu atoa. E haavare te feia taviri i te taata e ia noaa mai ta ratou moni. E haavare te tahi feia poritita i to ratou feia maiti no to ratou hinaaro rahi e tapea i to ratou tiaraa noa ˈtu te mea e titauhia. E haavare atoa te taata ia ratou iho. Eita ratou e faaû i te mau parau mau au ore, e haapapu râ ratou ia ratou iho e e ere i te mea atâta ia tamau i te rave i te mau peu iino, mai te puhipuhiraa avaava, te rave-hua-raa i te raau taero, aore ra te taatiraa morare ore.

Te vai atoa ra te haavare i te pae faaroo. Ua haavare te mau aratai haapaoraa no te tau o Iesu i te taata. No nia ia ratou, ua na ô Iesu e: “E . . . aratai matapo ïa; e ia aratai te matapo i te matapo ra, e hiˈa apipiti ïa i roto i te pouohu.” (Mataio 15:14) Hau atu â, e haavare te taata ia ratou iho i te pae faaroo. Te na ô ra te Maseli 14:12 e: “E hape â te taata i te eˈa, e e mea tia ïa i to ˈna manaˈo, o te hopea râ o taua eˈa ra, o te pohe ïa.”

Mai i te tau o Iesu, mea rahi i teie tau o te haavarehia i te pae faaroo e e ere i te mea maere! Ua parau te aposetolo Paulo e ‘ua haapouri’ Satani i ‘te aau o te feia faaroo ore ia ore te maramarama o te evanelia hanahana o te Mesia, o te hohoˈa o te Atua ra, ia anaana mai i roto ia ratou.’—Korinetia 2, 4:4.

Ia haavarehia tatou e te hoê taata taviri, e ere tatou i te moni. Ia haavare mai te hoê taata poritita, e ere paha tatou i te tahi maa tiamâraa to tatou ei faahopearaa. Ia haavare mai râ Satani e ia patoi tatou i te parau mau no nia ia Iesu Mesia, eita e noaa ia tatou te ora mure ore! No reira, eiaha outou ia haavarehia. A haamahora i to outou feruriraa e to outou aau i te tumu hoê roa e te papu roa o te parau mau i te pae faaroo, te Bibilia. Aita anaˈe, mea rahi roa te haamaitairaa e erehia.—Ioane 17:3.