Mea maitai anei ta oe haapiiraa ia vetahi ê?

TE MAU metua, te mau matahiapo, te feia poro i te parau apî maitai—mea titauhia ia riro ratou paatoa ei mau orometua haapii. E haapii te mau metua i ta ratou mau tamarii, e haapii te mau matahiapo i te mau melo o te amuiraa Kerisetiano, e haapii te feia poro i te parau apî maitai i te feia no anaanatae noa ˈtura. (Deuteronomi 6:6, 7; Mataio 28:19, 20; Timoteo 1, 4:13, 16) Eaha ta oe e nehenehe e rave ia maitai atu â ta oe haapiiraa? A tahi, e nehenehe oe e pee i te hiˈoraa o te mau orometua haapii aravihi i faahitihia i roto i te Parau a te Atua e ta ratou raveraa. E orometua haapii aravihi o Ezera.

Haapiiraa na roto i to Ezera hiˈoraa

E tahuˈa o Ezera no te huaai o Aarona e i ora na oia fatata a 2 500 matahiti aˈenei i Babulonia. I te matahiti 468 H.T.T., ua haere oia i Ierusalema no te paturu i te haamoriraa viivii ore i rotopu i te mau ati Iuda e faaea ra i reira. (Ezera 7:1, 6, 12, 13) No teie ohipa, ua tia ia ˈna ia haapii i te Ture a te Atua i te nunaa. Eaha ta Ezera i rave ia papu ia ˈna e mea maitai ta ˈna haapiiraa? Ua rave oia i te tahi mau taahiraa faufaa. A tapao na i teie mau taahiraa i roto i te Ezera 7:10:

‘Ua [1] faaineine Ezera i to ˈna aau i [2] te imi i te ture a Iehova e [3] te rave atu e [4] te haapii ia Iseraela i te faaueraa e te parau-tia.’ (MN) E hiˈopoa poto mai na tatou i teie mau taahiraa taitahi e e hiˈo tatou eaha te haapiiraa e huti mai.

‘Ua faaineine Ezera i to ˈna aau’

Mai te hoê taata faaapu o te faaineine na mua i te repo ma te faaohipa i te hoê arote hou a ueue ai i te huero, ua faaineine o Ezera i to ˈna aau, na roto i te pure, i te farii i te parau a te Atua. (Ezera 10:1) Te auraa ra, ua ‘imi to ˈna aau’ i te haapiiraa a Iehova.—Maseli 2:2.

Te parau atoa ra te Bibilia e “ua faaineine” te arii Iehosaphata ‘i to ˈna aau i te imi i te Atua’ mau. (Paraleipomeno 2, 19:3; MN) Area te hoê ui “aau mau ore” o Iseraela râ, ua faataahia ïa mai te hoê ui “etaeta e te haapao ore.” (Salamo 78:8) E hiˈo Iehova i ‘te taata moe o te aau.’ (Petero 1, 3:4) Oia mau, “e haapii mai oia i te feia aau mǎrû i to ˈna iho eˈa.” (Salamo 25:9) E mea faufaa mau â ïa ia pee te mau orometua haapii no teie tau i to Ezera hiˈoraa na roto i te faaineine-na-mua-raa i to ratou aau na roto i te pure!

 “I te imi i te ture a Iehova”

No te riro ei orometua haapii aravihi, ua imi o Ezera i te Parau a te Atua. Ia haere oe e hiˈo i te taote, eita anei oe e faaroo maite e e hiˈo e ua taa maitai anei ia oe ta ˈna mau parau aore ra mau faaueraa atoa? Oia iho â ïa, no te mea te maˈihia ra oe. No reira, ia hau atu â tatou i te haapao maite i te mau mea ta Iehova e parau maira, aore ra e faaue maira, na roto i ta ˈna Parau, te Bibilia, e na roto i “te tavini haapao maitai e te paari.” E au hoi ta ˈna mau aˈoraa i to tatou iho oraraa! (Mataio 4:4; 24:45-47) Parau mau, e nehenehe te hoê taote e hape, ‘te ture râ a Iehova, aita ïa e hapa.’ (Salamo 19:7) Eita roa ˈtu tatou e hinaaro i te tahi atu manaˈo.

Ia au i na buka bibilia Paraleipomeno (ta Ezera i papai na mua ei hoê buka), e piahi haapao maitai mau â o Ezera. No te papai i taua nau buka ra, ua hiˈopoa oia i te mau papai e rave rahi. * Te hinaaro ra te mau ati Iuda no tae noa ˈtura i Babulonia, i te hoê haapotoraa o te tuatapaparaa o to ratou nunaa. Aita ratou i ite maitai eaha te mau oroa a ta ratou haapaoraa, te ohipa e ravehia i te hiero, e te ohipa a te mau ati Levi. Mea faufaa roa te mau tapura ihitupuna na ratou. Ua haapao taa ê o Ezera i taua mau mea ra. Hou te Mesia a haere mai ai, ua tia i te mau ati Iuda ia vai noa ei nunaa ma to ˈna iho fenua, hiero, autahuˈaraa, e tavana. Auaˈe te mau haamaramaramaraa ta Ezera i haaputu mai i paruruhia ˈi te auhoêraa e te haamoriraa mau.

Mai te aha te huru o ta oe mau peu haapiiraa ia faaauhia e ta Ezera? E tauturu te faahohonu-maite-raa i te Bibilia ia oe ia haapii maitai i te Bibilia ia vetahi ê.

‘A imi i te ture a Iehova’ ei utuafare

E ere i roto noa i ta tatou iho haapiiraa e imi ai tatou i te ture a Iehova. E taime maitai roa te haapiiraa utuafare no te reira.

E taio puai o Jan e ta ˈna vahine o Julia, no te mau Pays-Bas, no ta raua nau tamaiti mai to raua iho â fanauraa mai. I teie mahana, 15 matahiti to Ivo, e 14 to Edo. Hoê taime i te hebedoma, e haapiiraa utuafare noa ta ratou. Te faataa ra o Jan e: “Ta mâua fa matamua, e ere ïa te tauaparauraa i nia e rave rahi tumu parau i roto i te haapiiraa, ia taa maori râ i na tamaroa te mea e tauaparauhia ra.” Te parau faahou ra oia e: “E rave na tamaroa e rave rahi maimiraa. E imi raua eaha te auraa o te mau taˈo matau-ore-hia e te mau taata bibilia—afea to ratou oraraa, o vai ratou, eaha ta ratou ohipa, e te vai ra ˈtu â. Mai reira mai, ua haapii raua i te taio, ua hiˈo raua i na buka Étude perspicace des Écritures, te mau titionare, e te mau buka ite rahi. Na te reira i faariro i te haapiiraa utuafare ei mea au roa ˈtu â. E tiai ru noa na tamaroa i te haapiiraa.” Te tahi atu â maitai, i teie nei, mea ite aˈe na tamaroa i to raua mau hoa haapiiraa i te pae o te reo.

Ua haapii o John raua ta ˈna vahine o Tini, no te mau Pays-Bas, e ta raua tamaiti o Esli (e 24 matahiti e e pionie i roto i te tahi atu amuiraa i teie mahana), e ta raua tamahine o Linda (e 20 matahiti e tei faaipoipo i te hoê taeae maitai apî i teie mahana). Aita raua i haapii i te tahi papai ma te mau uiraa e te mau pahonoraa, ua faatano maori râ raua i te haapiiraa utuafare i te faito matahiti e te mau hinaaro o na tamarii. Eaha ta raua raveraa?

Te faataa ra o John e ua maiti ta raua tamaiti e ta raua tamahine i te hoê tumu parau au roa o te “Mau uiraa a te feia taio” (i roto i Te Pare Tiairaa) e “Ia au i te Bibilia” (i roto i te Réveillez-vous!). I muri iho, ua faaite mai raua eaha ta raua i faaineine, o tei riro noa ïa ei mau aparauraa utuafare au roa. Mea na reira nau feia apî i ite ai i te rave i te maimiraa e i te tauaparau i nia i te mau faahopearaa o ta raua haapiiraa. Te ‘imi ra anei outou i te ture a Iehova’ e ta outou mau tamarii? Eita noa te reira e haamaitai i to outou iho aravihi no te haapii, e tauturu atoa râ i ta outou mau tamarii ia riro ei mau orometua haapii maitai aˈe.

“Te rave atu”

Ua faaohipa o Ezera i ta ˈna i haapii. Ei hiˈoraa, a vai ai oia i Babulonia, e oraraa papu paha to  ˈna. Teie râ, i te taaraa ia ˈna e e nehenehe ta ˈna e tauturu i to ˈna nunaa i te ara, ua vaiiho oia i te oraraa fanaˈo o Babulonia no te haere e faaea i te oire atea o Ierusalema, e te vai ra te mau haafifiraa, te mau fifi, e te mau ati. Papu maitai, aita noa Ezera i haaputu i te ite bibilia, ua ineine râ oia i te ohipa ia au i ta ˈna i haapii.—Timoteo 1, 3:13.

I muri aˈe, a faaea ˈi oia i Ierusalema, ua faaite faahou Ezera e te faaohipa ra oia i ta ˈna i haapii mai e e haapii ra ia vetahi ê. Ua ite-maitai-hia te reira i to ˈna faarooraa e ua faaipoipo te mau tane Iseraela i te mau vahine etene. Te faatia maira te Bibilia e ‘ua hahae oia i to ˈna ahu e to ˈna ahu tipona, e ua huhuti i te rouru o to ˈna upoo e to ˈna umiumi, e ua parahi ihora ma te maere e ahiahi noa ˈtura.’ Ua ‘haama atoa oia, ua uteute to ˈna mata i te haama, ia nânâ noa ˈtu’ ia Iehova.—Ezera 9:1-6.

Ua ohipa roa mau â ta ˈna haapiiraa i te Ture a te Atua i nia ia ˈna! Ua ite maitai o Ezera eaha te mau faahopearaa riaria o te faaroo ore o te nunaa. Mea iti te numera o te mau ati Iuda i faahoˈihia i to ratou fenua. Mai te peu e e faaipoipo ratou i te mau taata ěê, e nehenehe ratou i te pae hopea e tahoê atu i te mau nunaa etene tapiri, e e nehenehe te haamoriraa mau e mou i nia i te fenua!

Auaˈe to Ezera hiˈoraa o te mǎtaˈu paieti e te itoito rahi i faatitiaifaro ai te mau Iseraela i to ratou haerea. Ua faahoˈi ratou i ta ratou mau vahine ěê. I roto e toru avaˈe, ua afaro te mau mea atoa. E tuhaa rahi to te taiva ore o Ezera i te Ture a te Atua i roto i te haamaitairaa i ta ˈna haapiiraa.

E parau mau atoa i teie mahana. Teie ta te hoê metua tane Kerisetiano i parau: “Eita te mau tamarii e haa mai ta outou e parau; e haa ratou mai ta outou e rave!” Tera atoa te manaˈo tumu i roto i te amuiraa Kerisetiano. Ia horoa te mau matahiapo i te hoê hiˈoraa maitai, e nehenehe e manaˈohia e e farii te amuiraa i ta ratou mau haapiiraa.

“Te haapii ia Iseraela i te faaueraa e te parau-tia”

Te vai ra te tahi atu â tumu i maitai ai ta Ezera haapiiraa. Aita oia i haapii i to ˈna iho mau manaˈo i te taata, ua haapii râ oia i “te faaueraa e te parau-tia.” Oia hoi te mau faaueraa, aore ra mau ture, a Iehova. Tera ta ˈna hopoia ei tahuˈa. (Malaki 2:7) Ua haapii atoa oia i te parau-tia i te taata, e ua horoa i te hoê hiˈoraa o ta ˈna e haapii ra na roto i te haapaoraa i te mau ture ma te haerea tia e te pae tahi ore, ia au i te hoê ture aveia. Ia faaite te feia e mana to ratou i te parau-tia, e tupu ïa te aueue ore e e mau faahopearaa vai tamau te noaa mai. (Maseli 29:4) Oia atoa, e patu te mau matahiapo Kerisetiano, te mau metua, e te feia poro i te Basileia, o tei matau maitai i te Parau a te Atua, i te aueue ore pae varua ia haapii ratou i te mau faaueraa e te parau-tia a Iehova i roto i te amuiraa, i roto i to ratou utuafare, e i te feia e anaanatae ra.

Eita anei oe e parau atoa e e maitai atu â ta oe haapiiraa ia pee roa oe i te hiˈoraa o te taata haapao maitai ra o Ezera? No reira, ‘a faaineine i to oe aau, a imi i te ture a Iehova, a rave atu, e a haapii i te taata i te faaueraa e te parau-tia a Iehova.’—Ezera 7:10, MN.

[Nota i raro i te api]

[Tumu parau tarenihia/Hohoˈa i te api 22]

MAOTI TE AHA I MAITAI AI TA EZERA HAAPIIRAA?

1. Ua faaineine oia i to ˈna aau

2. Ua imi oia i te Ture a Iehova

3. Ua horoa oia i te hoê hiˈoraa maitai i roto i te faaohiparaa i ta ˈna i haapii

4. Ua rohi oia i te haapii i te manaˈo o te mau Papai ia vetahi ê