Te mau hohoˈa moˈa faaroo no tahito mai

“E ravea te mau hohoˈa moˈa no te apiti atu i te maitai e te moˈaraa o te Atua e to ˈNa mau Peata.”—TUHAA HAAATI ARII EPIKOPO ORTHODOXE HELENI NO AUTERALIA

I TEIE mahana veavea roa no Atete, mea puai roa te mahana i nia i te mau taahiraa tima e tae atu ai i te fare monahi a te “Metua vahine moˈa roa ˈˈe o te Atua,” i nia i te motu o Tínos, i te miti Égée. Aita te ǎhu o te mahana e faaiti ra i te faaotiraa papu a na hau atu i te 25 000 feia perenina paieti no te Ekalesia Orthodoxe Heleni, o te haere mǎrû noa ra e tae atu ai i te hohoˈa moˈa i faaunauna-maitai-hia o te metua vahine o Iesu.

Ma te mauiui papu maitai e te mata peapea, te nee ra te hoê potii pirioi i nia i to ˈna nau turi e tahetahe puai ra te toto. I pihai noa mai ia ˈna, te faaitoito ra te hoê vahine paari, na te tahi pae roa mai to ˈna haereraa mai e tei paruparu roa hoi, i te haere. Ua puru roa te hoê tane hitahita faito matahiti au noa i te hou a tamata ˈi oia ma te ru i te faaô na roto i te nahoa e turairai ra. Ta ratou fa, e apa ïa e e tipapa i mua i te hohoˈa moˈa o Maria.

Aita e feaaraa e te hinaaro mau ra teie mau taata faaroo roa e haamori i te Atua. Ehia râ tei ite e no ǒ mai te faahanahanaraa i te mau hohoˈa moˈa faaroo i te tahi mau peu i ravehia e mau senekele hou te Kerisetianoraa?

Te parareraa o te mau hohoˈa moˈa

I roto i te ao Orthodoxe, tei te mau vahi atoa te mau hohoˈa moˈa. I roto i te mau fare pure, e parahiraa faufaa roa to te mau hohoˈa moˈa o Iesu, o Maria, e o “te mau peata” e rave rahi. E pinepine, e faahanahana te feia faaroo i teie mau hohoˈa moˈa na roto i te aparaa ˈtu, te tutuiraa i te taoˈa hauˈa noˈanoˈa, e te mau mori hinu. Hau atu â, i roto fatata i te mau fare Orthodoxes atoa, te vai ra iho â te tahi poro no te hohoˈa moˈa, i reira te taata e pure ai. E pinepine te mau Kerisetiano Orthodoxes i te parau e ia haamori ratou i te hoê hohoˈa moˈa, e haafatata ˈtu ratou i te Atua. Mea rahi o te tiaturi e ua î te mau hohoˈa moˈa i te maitai rahi e te mana faaora no ǒ mai i te Atua ra.

E riro tera feia tiaturi i te maere ia ite ratou e aita te mau Kerisetiano no te senekele matamua i faaohipa i te mau hohoˈa moˈa i roto i ta ratou haamoriraa. Te na ô ra te buka Byzance e: “Aita te mau Kerisetiano matamua, o tei haapiihia e te haapaoraa ati Iuda ia riri i te haamoriraa idolo, i farii i te mau faahanahanaraa atoa i te hohoˈa o te feia moˈa.” Te na ô ra taua noâ buka ra e: ‘Mai te senekele pae mai â, ua parare roa te mau hohoˈa moˈa aore ra mau hohoˈa i roto i te haamoriraa a te taatoaraa e a te taata taitahi.’ Mai te peu e e ere te faaohiparaa i te mau hohoˈa moˈa faaroo no ǒ mai i te Kerisetianoraa no te senekele matamua ra, nohea mai ïa?

 Te itearaa nohea mai te mau hohoˈa moˈa

Teie ta te taata maimi ra o Vitalij Ivanovitch Petrenko i papai: “Ua haamata te faaohiparaa i te mau hohoˈa e ta ˈna tutuu hou roa te tau Kerisetiano e ‘no ǒ mai te reira i te peu etene ra.’” E tu te manaˈo o te feia tuatapapa e rave rahi e no ǒ roa mai te haamoriraa i te hohoˈa moˈa i te mau haapaoraa Babulonia, Aiphiti, e Heleni i tahito ra. I Heleni i tahito ra, ei hiˈoraa, e mau tii te mau hohoˈa faaroo. Te manaˈohia ra e e mana to tera mau tii mai to te Atua. Ua manaˈo te taata e aita te tahi o teie mau hohoˈa i hamani-rima-hia, mea topa mai râ mai te raˈi mai. Ia tupu te tahi mau oroa taa ê, e afaihia tera mau hohoˈa faaroo i roto i te hoê haereraa moˈa e ati aˈe te oire, e e pûpûhia te tahi mau tusia na te reira. “No te taata paieti, e atua te hohoˈa faaroo, noa ˈtu e ua tamatahia . . . i te faataa ê i te atuaraa i to ˈna hohoˈa,” o ta Petrenko ïa i parau.

Mea nafea tera mau manaˈo e mau peu i te ôraa ˈtu i roto i te Kerisetianoraa? Ia au i taua noâ taata maimi ra, i te mau senekele i muri aˈe i te poheraa o te mau aposetolo a te Mesia, i Aiphiti iho â râ, “ua faaû atu te mau tiaturiraa Kerisetiano i te mau ‘tiaturiraa etene anoi noa’—no roto mai hoi i te mau peu e te mau tiaturiraa Aiphiti, Heleni, ati Iuda, e no te pae Hitia o te râ e Roma, o te faaohipahia ra e ta te mau Kerisetiano.” I te pae hopea, “ua faaau te mau Kerisetiano rimaî i te hoê ravea [no te tahoê i te faaroo] e ua faaohipa i te mau tapao etene, ma te tuu atu i roto i te hoê huru tupuraa apî, noa ˈtu e aita te reira i arai-roa-hia i te mana o te etene.”

Aita i maoro, ua riro mai te mau hohoˈa moˈa ei mea faufaa i roto i te oraraa faaroo o te taata taitahi e o te taatoaraa. I roto i te buka L’âge de la foi, te faataa ra te taata tuatapapa ra o Will Durant mea nafea te reira i te tupuraa: “A rahi mai ai te numera o te mau peata e haamorihia ra, ua tia ˈtura ia faataa ê e ia haamanaˈo ia ratou; ua hamanihia ˈtura to ratou mau hohoˈa e to Maria ehia rahiraa; no te Mesia râ, e ere noa o to ˈNa hohoˈa tei riro mai ei taoˈa faahanahanaraa, o to ˈNa atoa râ satauro—ua riro atoa te reira ei taoˈa manamana no te feia e vare haere noa. No te mea e mea hamani iho â te taata i te manaˈo, ua riro mai te mau taoˈa, te mau hohoˈa, e te  mau tii moˈa ei mau taoˈa haamoriraa; ua tipapa te taata i mua i teie mau mea, ua apa ˈtu, ua tutui i te mau mori hinu e te taoˈa hauˈa noˈanoˈa i mua i te reira, ua faahei atu i te tiare, e ua imi i te mau semeio mai roto mai i to ratou mana miterio. . . . Ua faataa noa te mau Metua e te mau apooraa a te Ekalesia e e ere te mau hohoˈa i te mau atua, e mau haamanaˈoraa noa râ i te reira; aita te taata i hinaaro i taua faataa-ê-raa ra.”

I teie tau, mea rahi atoa o te faaohipa ra hoi i te mau hohoˈa moˈa faaroo, e parau e e mau taoˈa faaturaraa noa te mau hohoˈa—e ere i te mau taoˈa haamoriraa. E parau paha ratou e e mau tauturu tano—te faufaa atoa—te mau hohoˈa faaroo i roto i te haamoriraa i te Atua. Peneiaˈe tera atoa to outou manaˈo. Teie râ te uiraa, Eaha to te Atua manaˈo i te reira? Hoê â iho â anei te faahanahanaraa i te hoê hohoˈa moˈa e te haamoriraa i te reira? Te vai mau ra anei te tahi mau fifi atâta huna i roto i taua mau peu ra?

[Tumu parau tarenihia i te api 4]

Eaha te hoê hohoˈa moˈa?

E ere te mau hohoˈa moˈa i te mau tii (mau hohoˈa e toru faitotia) o te faaohipa-rahi-hia ra i roto i te haapaoraa Katolika Roma, e mau hohoˈa râ e piti faitotia o te Mesia, o Maria, o “te mau peata,” o te mau melahi, o te tahi mau taata e mau tupuraa bibilia, aore ra o te tahi mau tupuraa i roto i te tuatapaparaa o te Ekalesia Orthodoxe. Mea matauhia e e penihia tera mau hohoˈa i nia i te iri raau mea amo.

Ia au i te Ekalesia Orthodoxe, “i nia i te mau hohoˈa moˈa o te mau Peata, e ere te mau hohoˈa mai te mau hohoˈa o te mau taata tino iˈo e te toto.” I nia atoa i te mau hohoˈa moˈa, “e haamata te hohoˈa na muri mai e haere mai ai i mua”—eita te hohoˈa e nainai atu ia hiˈohia i muri roa. Mea matauhia e “aita e maru, aore ra e ravea o te faaite mai i te ao e te rui.” Te manaˈo-atoa-hia ra e e nehenehe te raau e te peni o te hoê hohoˈa moˈa e “î i te vairaa mai o te Atua.”

[Hohoˈa i te api 4]

E itehia te faaohiparaa i te mau hohoˈa i roto i te mau peu etene

[Faaiteraa i te fatu o te hohoˈa i te api 3]

© AFP/CORBIS