Te faatia ra te feia poro i te Basileia

‘E puai rahi to te Parau a te Atua’

I TE motu mahana maitai ra o Jamaïque i te mau Antilles, ua matau te rahiraa o te taata i te Bibilia. Inaha, e nehenehe te King James Version e itehia fatata i roto i te mau fare atoa, e ua ite te tahi pae taata e ‘e mea ora te parau a te Atua, e te puai rahi.’ (Hebera 4:12) E taui teie puai i te taata, mai tei faaitehia e te aamu i muri nei.

No tapae noa ˈtura te hoê taata o Cleveland te iˈoa i te fare mai te ohipa mai i to te hoê Ite no Iehova haereraa mai e farerei ia ˈna. I muri aˈe i te faaiteraa i te tahi mau manaˈo no roto mai i te mau Papai, ua vaiiho atu te Ite i te buka haapiiraa bibilia ra Te ite e aratai i te ora mure ore. Aita o Cleveland i ite e e puai rahi mau â to te Parau a te Atua i roto i to ˈna oraraa.

E pure na o Cleveland e toru taime i te mahana, a ani ai i te Atua e tauturu ia ˈna ia ite i te ravea tano e haamori ai ia ˈNa. Ua papu ia Cleveland e aita to ˈna mau metua e haamori ra ma te tano, i muri aˈe râ i te hiˈopoaraa i te tahi atu mau haapaoraa, ua inoino oia. Noa ˈtu eaha ta ˈna i faaroo no nia i te mau Ite no Iehova, ua feaa oia e tei ia ratou ra anei te parau mau. Noa ˈtu to ˈna feaaraa, ua farii o Cleveland i te haapii i te Bibilia e te Ite o tei haere atu i ǒ ˈna. No te aha? No to ˈna hinaaro e faaite e ua hape te mau Ite!

Aita i maoro, ua haapii o Cleveland e mea au ore na te Atua to ˈna mau taairaa morare ore e na vahine taa ê e piti. (Korinetia 1, 6:9, 10) I muri aˈe e piti noa haapiiraa, ua faaitoito oia i te tâpû i to ˈna mau taairaa e na vahine ra. Ua haamata atoa oia i te haere i te mau putuputuraa Kerisetiano i te Piha a te Basileia. Ua riro râ te reira ei tamataraa ê â.

E itoito iti rahi to Cleveland i roto i te pǔpǔ tue popo no to ˈna tuhaa oire, e e haafifi ta ratou mau tueraa i to ˈna haereraa i te putuputuraa. E nafea oia? Noa ˈtu te faaheporaa uˈana a to ˈna mau hoa tue popo, te taata faaineine, e te mau hoa, ua faaoti o Cleveland e faarue i te pǔpǔ tue popo. Oia, te haamata ra te Parau a te Atua i te mana puai mai, a ohipa ˈi no to ˈna maitai!

Ua ite-faahou-hia te puai o te Parau a te Atua a haamata ˈi o Cleveland i te faaite i to ˈna ite i te Bibilia ia vetahi ê. (Ohipa 1:8) Ei faahopearaa, ua haamata aˈera e piti o to ˈna mau hoa tue popo tahito i te haere i te mau putuputuraa a te mau Ite no Iehova. I muri aˈe i to Cleveland haamataroraa ia ˈna e riro ei taata poro i te parau apî maitai, ua itea mai ia ˈna te oaoa rahi i roto i te taviniraa a faaohipa ˈi i te Parau a te Atua no te tauturu ia vetahi ê.

No te mea ua tamau noa oia i te turaihia e te puai o te Parau a te Atua, i te pae hopea, ua faataipe o Cleveland i ta ˈna pûpûraa ia ˈna na Iehova na roto i te bapetizoraa i roto i te pape e ua horoahia ˈtu te fanaˈoraa taa ê e haa ei tavini taime taatoa e ei tavini tauturu i roto i te amuiraa.

I Jamaïque e na te ao atoa nei, e mau tausani taata tei haapii e “e mea ora” mau â te Parau a te Atua “e te puai rahi.”

[Hohoˈa fenua/Hohoˈa i te api 8]

(Hiˈo i te papai)

JAMAÏQUE

[Faaiteraa i te tumu]

Hohoˈa fenua e fenua: Mountain High Maps® Copyright © 1997 Digital Wisdom, Inc.