Te hoê haapiiraa na roto i te heside

“UA ITE hoi te heside o te raˈi ra i to ˈna mau tau . . . aore râ to ˈu ra mau taata i ite i te parau-tia a Iehova.” (Ieremia 8:7) Mea na roto i teie mau parau to te peropheta Ieremia faaiteraa i te haavaraa a Iehova i nia i te mau taata apotata no Iuda, o tei faarue i to ratou Atua ra o Iehova e o tei haamori i te mau atua ěê. (Ieremia 7:18, 31) No te aha o Ieremia i maiti ai i te heside no te horoa i te hoê haapiiraa i te mau ati Iuda taiva?

No te mau Iseraela, e manu matauhia te heside, e te heside uouo iho â râ, a ratere ai oia na te mau fenua bibilia. Te iˈoa o teie manu rahi e te avae roa, o te taˈo ovahine Hebera ïa teie te auraa “tei taiva ore; e aau aroha to ˈna.” E mea tano te reira, no te mea taa ê atu i te rahiraa o te tahi atu mau manu, e ora amui te mau heside uouo oni e te ufa no te oraraa taatoa. I muri aˈe i te tau toetoe i te mau vahi veavea, e pinepine e hoˈi te rahiraa o te mau heside, i te mau matahiti atoa, i taua noâ ofaaraa ra ta ratou i faaohipa na mua ˈˈe.

Te faahohoˈa ra te huru faataa-aˈena-hia o te heside i te taiva ore na roto i te tahi atu â mau ravea faahiahia. Na te manu oni e te ufa e haapata i te mau huero heside e e faaamu i te mau fanauˈa. Te faataa ra te buka Our Magnificent Wildlife e: “Ei metua, mea taiva ore roa te mau heside. I Heremani, ua rere te hoê heside oni i roto i te mau niuniu uira e ua haruhia oia e te uira. Ua tamau noa te ufa i te haapata i te mau huero o o ˈna anaˈe e toru mahana i te maoro, i reira hoê noa taime to ˈna faarueraa i te ofaaraa no te hoê taime poto no te paimi i te maa. . . . I roto i te tahi atu hiˈoraa, i te pupuhiraahia te hoê heside ufa, na te oni i faaamu i te fanauˈa.”

Oia mau, na roto i te haapao-maitai-raa ma te feruri ore i to ˈna apiti no te oraraa taatoa e te aupururaa i ta ˈna fanauˈa, te faatupu ra ïa te heside i te auraa o to ˈna iˈoa—“tei taiva ore.” No reira, ua riro te heside ei haapiiraa puai no te mau Iseraela taiva e te orure hau.

I teie mahana, e rave rahi taata e parau ra e e mau manaˈo tahito te taiva ore e te haapao maitai—mea maitai roa e ere râ i te mea faufaa. Na te rahiraa o te faataaraa, te haapaeraa, te taviriraa i te moni e te tahi atu mau huru haavareraa e faaite ra e aita te taiva ore e haafaufaa-faahou-hia ra. Area râ, e haafaufaa rahi te Bibilia i te taiva ore e turaihia ra e te aroha e te aau maitai. Te faaitoito roa ra te Bibilia i te mau Kerisetiano “ia ahu i te huru taata apî o tei poietehia ia au i te hinaaro o te Atua i roto i te parau-tia e te taiva ore mau.” (Ephesia 4:24, MN) Oia, e tauturu te huru taata apî ia tatou ia ore e taiva, e nehenehe atoa râ tatou e huti mai i te haapiiraa no nia i te taiva ore na roto i te heside.