Aamu

Te ruhiruhia e te rahi roa te matahiti

FAATIAHIA E MURIEL SMITH

Te patoto-puai-hia maira i to ˈu opani i mua. No hoˈi noa maira vau i te fare no te amuraa avatea i muri aˈe i te hoê poipoi ohiparaa i roto i te pororaa. Mai tei matauhia e au, te haapihaa ra vau i te pape no te hoê tata ti e te haamata ra vau i te rave i ta ˈu afa hora faafaaearaa. Mea onoono te patotoraa, e a haere atu ai au i te opani ra, te maere ra vau o vai mau râ tera e haere maira i teie taime. Aita i maoro to ˈu iteraa. Ua faaite mai na taata e tia ra i to ˈu pae opani e e mutoi raua. Ua na ô mai raua e to ǒ nei raua no te paheru i roto i to ˈu fare i te mau papai a te mau Ite no Iehova—te hoê faanahonahoraa i opanihia.

No te aha te mau Ite no Iehova i opanihia ˈi i Auteralia, e mea nafea to ˈu riroraa mai ei hoê o ratou? Ua haamata te mau mea atoa i to to ˈu mama horoaraa mai i te hoê ô i te matahiti 1910 ra, i te 10raa o to ˈu matahiti.

TE FAAEA ra to ˈu utuafare i roto i te hoê fare iri i te tuhaa oire o Crows Nest i Sydney Apatoerau. I to ˈu hoˈiraa mai i te fare i muri aˈe i te haapiiraa i te hoê mahana, ua ite au i to ˈu mama e paraparau ra i te hoê taata i te opani i mua. Te maere ra vau o vai teie taata huru ê e pereue to ˈna e e pute î i te buka. Ma te mamahu, ua vaiiho vau ia raua e ua haere atu i roto i te fare. Teie râ, tau minuti noa i muri iho, ua pii mai o Mama ia ˈu. Ua na ô mai oia e: “E maa buka au roa ta teie taata, e no nia anaˈe i te mau Papai. I teie nei, i te mea e ua fatata to oe mahana fanauraa, e  nehenehe ta oe e fanaˈo i te hoê ahu apî aore ra i teie mau buka. Teihea ta oe e hinaaro?

“Auê Mama e, e rave au i te mau buka, mauruuru,” o ta ˈu ïa i pahono atu.

I te 10raa o to ˈu matahiti, ua noaa ïa ia ˈu na buka matamua e toru o te Études des Écritures, a Charles Taze Russell. Ua faataa te taata e tia ra i te pae opani i to ˈu mama e e tia ia ˈna ia tauturu mai ia ˈu ia taa ia ˈu te mau buka, no te mea e papu e mea hohonu roa no ˈu. Ua parau o Mama e e oaoa oia i te na reira. Ma te peapea, aita i maoro i muri aˈe i taua tupuraa ra, ua pohe o Mama. Ua haapao o Papa ia matou to ˈu taeae, to ˈu tuahine, e o vau, ma te itoito, i teie nei râ, te vai ra te mau hopoia hau te tia ia ˈu ia amo, e e au ra e ua rahi roa no ˈu. Teie râ, te fatata maira te tahi atu ati.

Ua tupu te tamaˈi rahi matamua i te matahiti 1914, e hoê noa matahiti i muri aˈe, ua taparahihia to matou papa here. I teie nei e e otare matou, ua hopoihia to ˈu taeae e tuahine i te mau fetii ra, e o vau ra, i te hoê ïa fare haapiiraa Katolika e taotoraa to reira. I te tahi taime, e pohehia vau i te moemoe. Teie râ, te mauruuru ra vau e ua nehenehe ta ˈu e haamâha i to ˈu hinaaro e faataˈi i te upaupa, i te piana iho â râ. Ua mairi te mau matahiti, e ua faatuitehia vau i taua haapiiraa ra. I te matahiti 1919, ua faaipoipo vau ia Roy Smith, te hoê taata hoo i te mau upaupa. I te matahiti 1920, ua fanau mâua i te hoê tamarii, e era faahou aˈera vau i roto i te mau tapitapi o te oraraa i tera e tera mahana. Eaha ˈtura no taua mau buka ra?

E faaite mai te hoê vahine tapiri i te parau mau pae varua

I te roaraa o taua mau matahiti ra, ua rave noa vau i te mau “buka bibilia” na muri ia ˈu. Noa ˈtu e aita vau i taio mau aˈenei i te reira, ua ite au i te hohonuraa o to ˈu aau e mea faufaa te poroi e vai ra i roto. E, i te hoê mahana, fatata i te matahiti 1930, ua haere mai o Lil Bimson, hoê o to matou feia tapiri, i ǒ matou. Ua haere mâua i roto i te piha faafaaearaa, parahi ihora, e inu atura i te tahi maa ti.

“Ei, te vai ra ta oe tera mau buka!” o ta ˈna ïa i parau taue mai.

“Teihea mau buka?” o ta ˈu ïa i ui ma te maere.

Ua toro oia i te rima i nia i te Études des Écritures e vai ra i nia i te vairaa buka. Ua ani mai o Lil i te reira e ua hopoi atu i te fare i taua mahana ra e ua taio atura ma te aau tae. Aita i maoro te ite-maitai-raahia to ˈna anaanatae rahi i ta ˈna e taio ra. Ua roaa ia Lil i te mau papai hau i te Feia haapii Bibilia ra, mai tei matauhia te mau Ite no Iehova i taua tau ra. Hau atu â, aita ta ˈna i nehenehe eiaha e faaite mai i te mau mea atoa ta ˈna e haapii ra. Hoê o te mau buka i noaa ia ˈna, o te buka ra ïa La Harpe de Dieu, e aita i maoro te reira i te taeraa mai i roto i to matou fare. I te pae hopea, ua haamata to ˈu oraraa i roto i te taviniraa ia Iehova i to ˈu faataaraa i te taime no te taio i teie papai niuhia i nia i te Bibilia. Ia maoro aˈe, ua itea mai ia ˈu te mau pahonoraa i te mau uiraa faufaa aita i tia i ta ˈu ekalesia ia horoa mai.

Auaa râ no ˈu, ua haapao maitai o Roy i te poroi o te Bibilia, e ua riro mai mâua atoa ra ei feia haapii Bibilia hinaaro tae. Na mua ˈˈe, e melo o Roy no te mau Francs-maçons. I teie nei, ua tahoê to matou utuafare i roto i te haamoriraa mau, e e piti taime i roto i te hebedoma, i faatere na te hoê taeae i te hoê haapiiraa bibilia e te utuafare taatoa. Ua noaa mai te faaitoitoraa hau i to matou haamataraa i te haere i te mau putuputuraa e faaterehia ra e te Feia haapii Bibilia. Te vahi putuputuraa i Sydney, o te hoê ïa piha nainai tarahuhia  i te tuhaa oire o Newtown. I taua tau ra, to raro mai te mau Ite i te 400 i te taatoaraa o to matou fenua, no reira, no te rahiraa o te mau taeae, e titauhia ia tere atea roa no te haere i te mau putuputuraa.

No to matou utuafare, no te haere i te mau putuputuraa, e titauhia ia na roto atu i te tapaeraa pahi no Sydney. Hou te eˈaturu o te tapaeraa pahi no Sydney i patuhia ˈi i te matahiti 1932, mea na nia noa ïa i te pahi ia haere atu i ǒ mai. Noa ˈtu te taime e te haamâuˈaraa e titauhia no taua tere ra, i tutava na matou eiaha ia mairi i te hoê noa ˈˈe amuraa maa pae varua ta Iehova e horoa ra. Aita i mâua te tutavaraa e haapaari maitai ia matou iho i roto i te parau mau, no te mea te haamǎtaˈu maira te piti o te tamaˈi rahi, e e faaû tia ˈtu to matou utuafare i te tumu parau o te tiaraa amui ore.

Te hoê tau tamataraa e haamaitairaa

Ua riro te omuaraa o te mau matahiti 1930 ei mau taime oaoa iti rahi no ˈu e to ˈu utuafare. Ua bapetizohia vau i te matahiti 1930, e i te matahiti 1931, ua tae au i te tairururaa faahiahia roa i reira to matou paatoa tiaraa mai i nia e fariiraa e rave i te iˈoa nehenehe ra te mau Ite no Iehova. Ua tutava mâua o Roy i te ora ia au i taua iˈoa ra na roto i te haereraa i roto i te mau huru pororaa e porotarama taa ê atoa ta te faanahonahoraa i faaitoito. Ei hiˈoraa, i te matahiti 1932, ua rave matou i te hoê porotarama taa ê opereraa i te hoê buka iti, te fa, o te mau nahoa taata ïa tei haere mai e mataitai i te avariraa i te eˈaturu o te tapaeraa pahi no Sydney. Te hoê taime taa ê no matou, o te faaohiparaa ïa i te mau pereoo ua tamauhia te mauhaa haapurororaa i nia iho, e ua fanaˈo matou i te mea e ua na reirahia te pereoo o to matou utuafare. Maoti teie ihi anohaa, ua vevo ia matou te mau purumu o Sydney i te mau oreroraa parau bibilia i haruharuhia a Taeae Rutherford.

Teie râ, te taui faahou ra te mau huru tupuraa e te fifi noa ˈtura. I te matahiti 1932, ua teimaha roa Auteralia i te toparaa rahi i te pae ihiihi, no reira mâua o Roy i faaoti ai e haamâmâ mai i to matou oraraa. Te hoê ravea, o te tapiriraa mai ïa i te nohoraa i te amuiraa, topa rahi mai nei te haamâuˈaraa no to matou mau tere. E ere râ te mau hepohepo i te pae ihiihi i te mea peapea roa ˈˈe ia faaauhia i te mehameha no te Piti o te Tamaˈi Rahi e roohia ˈi te ao atoa.

No to ratou auraroraa i te faaueraa a Iesu eiaha e riro ei to teie nei ao, ua hamani-ino-hia te mau Ite no Iehova na te ao atoa nei, e aita o Auteralia i haapaehia. Ma te turaihia e te riri aoaoa i faatupuhia e te tamaˈi, ua parau te tahi pae e e Communistes matou. Ua pari hape teie feia patoi e te faaohipa ra te mau Ite no Iehova i na pu radio e maha ta ratou i Auteralia no te faatae i te mau poroi na te nuu Tapone.

Ua faaû te mau taeae apî e titauhia ra e faaô i roto i te nuu, i te faaheporaa rahi e fati. Te oaoa nei au i te parau e ua haapao maitai na tamaiti e toru atoa to mâua i ta ratou mau tiaturiraa e ua tapea i to ratou tiaraa amui ore. Ua faautuahia to mâua tamaiti matahiapo, o Richard, 18 avaˈe tapearaa. Ua faatiahia te tiaraa taata patoi no te manaˈo haava o Kevin, te piti o to mâua tamaiti. Ma te peapea râ, ua pohe te hopea, o Stuart, i roto i te hoê ati purumu a haere ai oia na nia i te pereoo huira piti i te tiripuna e vauvau i ta ˈna parururaa no to ˈna tiaraa amui ore. Mea ahoaho mau â teie ati. Auaa râ to matou haamauraa i te feruriraa i nia i te Basileia e te parau fafau a Iehova no nia i te tia-faahou-raa i faaoromai ai matou.

Ua ere raua i te re mau

I te avaˈe Tenuare 1941, ua opanihia te mau Ite no Iehova i Auteralia. Mai te mau aposetolo râ a Iesu, ua auraro mâua o Roy i te Atua ei faatere eiaha i te taata, e e piti matahiti e te afa i te maoro to mâua tamauraa i te ohipa ma te huna. Tei taua tau ra te patotoraa mai na mutoi aita i ahu i te ahu mutoi ta ˈu i faahiti atu i nia ˈˈe, i to ˈu opani. Eaha tei tupu?

Inaha, ua titau atu vau e tomo mai. A tomo mai ai raua, ua ui au e, “E haapeapea anei orua ia haapau vau i ta ˈu tata ti hou orua a paheru ai i te fare?” Ma te maere, ua farii raua, e ua haere au i roto i te piha tutu e pure ia Iehova e e faaafaro i to ˈu mau manaˈo. I to ˈu hoˈiraa ˈtu, ua haere te hoê mutoi i roto i ta matou piha haapiiraa e ua rave i te mau mea atoa ta ˈna i ite e te vai ra te tapao Watchtower i nia iho, tae noa ˈtu i te mau papai i roto i ta ˈu pute pororaa e ta ˈu Bibilia.

 “Ua papu ia oe e aita ˈtu ta oe e papai tei hunahia i roto i te tahi mau afata?” o ta ˈna i ui mai. “Ua parauhia mai e e haere oe i te putuputuraa i te mau hebedoma atoa i roto i te hoê piha i te hopea o teie purumu e e afai mai oe i te papai e rave rahi i ǒ nei.”

“E parau mau te reira,” o ta ˈu ïa i pahono atu, “aita faahou râ to ǒ nei i teie nei.”

“E, ua ite matou, e Smith Vahine,” o ta ˈna ïa i parau mai. “Ua ite atoa matou e e haapuehia te mau papai i roto i te mau fare o te taata na te mataeinaa atoa.”

I roto i te piha o to mâua tamaiti, ua itea mai ia raua e pae afata e mau buka iti ra Liberté ou Romanisme to roto.

“Ua papu ia oe e aita ˈtu â i roto i te vairaa pereoo?” o ta ˈna ïa i ui mai.

“Aita, aita hoê aˈe i reira,” o ta ˈu ïa i parau atu.

Iriti atura oia i te hoê afata vairaa auˈa i roto i te piha tamaaraa. Ua itea maira ia ˈna te tahi mau api parau aita i papaihia o te faaohipahia no te faaî i te tapura a te amuiraa. Ua rave oia i te reira e ua onoono e hiˈo i roto i te vairaa pereoo.

“A haere mai ïa na ǒ nei,” o ta ˈu ïa i parau atu.

Ua na muri mai raua ia ˈu i te vairaa pereoo ra e ia oti ia raua i te hiˈopoa ˈtu, haere atura raua.

Inaha, ua manaˈo taua na mutoi ra e ua noaa ia raua te hoê re faahiahia e na afata e pae ra! Teie râ, ua vaiiho mai raua i te re mau i muri. Te ite ra outou, i taua mau mahana ra, te tavini ra vau ei papai parau o te amuiraa, e tei ia ˈu ra te tapura o te feia poro e te tahi atu mau parau faufaa, i roto i te fare. Auaa râ, ua faaara mai te mau taeae e faaineine no taua mau paheruraa ra, e ua huna maitai au i taua mau parau ra. Ua oomo vau i te reira i roto i te mau vehî e ua tuu atu i roto i ta ˈu mau afata ti, tihota e faraoa ota. Ua vaiiho atoa vau i te tahi i roto i te afata manu i pihaiiho i te vairaa pereoo. Ua na pihaiiho noa ˈtu ïa te mau mutoi i te mau parau iho ta ratou e hinaaro ra.

Haamataraa i te taviniraa taime taatoa

I te matahiti 1947, ua haamau to mâua mau tamarii paari aˈe i to ratou iho utuafare. I taua taime ra, ua faaoti mâua o Roy e e tae ia mâua e rave i te taviniraa taime taatoa. Te vai ra te hinaaro i roto i te tuhaa taviniraa o Auteralia Apatoa, no reira mâua i hoo atu ai i to mâua fare e i hoo mai ai i te hoê pereoo tavere ta mâua i mairi i te iˈoa ra Mizpah, oia hoi “Pare tiairaa.” Maoti teie huru oraraa i nehenehe ai mâua e poro i te mau vahi atea. I pinepine na mâua i te ohipa i roto i te mau tuhaa fenua mataeinaa aita i horoahia. Mea rahi te mau haamehararaa no taua tau ra ta ˈu e poihere. Hoê o te mau haapiiraa ta ˈu i faatere, e te hoê ïa vahine apî o Beverly te iˈoa. Hou oia a haere ai i mua i te bapetizoraa, ua faarue oia i te tuhaa fenua ra. A feruri na i to ˈu oaoa i to te hoê tuahine tapiriraa mai ia ˈu e rave rahi matahiti i muri aˈe i te hoê tairururaa e parauraa mai e o Beverly oia! Auê au i te oaoa i te iteraa e, i muri aˈe i taua rahiraa matahiti ra, te tavini ra oia ia Iehova e ta ˈna tane e ta ˈna mau tamarii.

I te matahiti 1979, ua fanaˈo taa ê au i te haereraa i te Haapiiraa no te taviniraa pionie. Hoê o te mau mea i haamahitihitihia i taua haapiiraa ra, oia hoi e no te tamau noa i roto i te taviniraa pionie, e tia ia faanaho i te hoê porotarama maitai haapiiraa tamau ia ˈna iho. Ua itea mau mai ia ˈu e e parau mau roa te reira. Te haapiiraa, te mau putuputuraa, e te taviniraa, o to ˈu ïa oraraa taatoa. E faariro vau ei fanaˈoraa taa ê to ˈu taviniraa ei pionie tamau ua hau atu i te 50 matahiti i te maoro.

 Faarururaa i te mau fifi o te ea

Ua riro râ na tau ahuru matahiti i mairi ei tautooraa taa ê no ˈu. I te matahiti 1962, ua iteahia mai e ua roohia vau i te maˈi mata ra glaucome. I taua tau ra, mea huru taotiahia te rapaauraa, e ua ino oioi noa ˈtu â to ˈu mata. Ua ino atoa mai te ea o Roy, e i te matahiti 1983, ua roohia oia i te hoê maˈi ino o te roro e ua paruparu te hoê pae to ˈna e aita oia i paraparau faahou. Ua pohe oia i te matahiti 1986. Mea faufaa roa to ˈna turu-rahi-raa mai ia ˈu i roto i ta ˈu taviniraa taime taatoa, e te mihi mau nei au ia ˈna.

Noa ˈtu taua mau fifi ra, ua tutava vau i te tapea i te hoê tereraa matauhia maitai i te pae varua. Ua hoo mai au i te hoê pereoo paari e tano no te taviniraa i roto i to matou tuhaa fenua mataeinaa, e ua tamau vau i ta ˈu taviniraa pionie ma te tauturu a ta ˈu tamahine o Joyce. Ua ino mǎrû noa ˈtu â to ˈu mata e ia ore roa te hoê mata to ˈu ia ite faahou. Ua mono te mau taote i te reira e te hoê hiˈo. Noa ˈtu râ, maoti te faaohiparaa i te hoê hiˈo faarahi e te mau papai leta rarahi, ua nehenehe au e rave e toru e tae noa ˈtu e pae hora i te mahana no te haapiiraa a faaohipa ˈi i te maramarama iti e toe râ i roto i te hoê mata to ˈu.

Ua riro noa iho â te taime haapiiraa ei mea faufaa na ˈu. E nehenehe ïa ta outou e feruri i te peapea iti rahi i te taa-taue-raa ia ˈu i te hoê avatea a haapii ai au e aita roa ˈtu vau e ite faahou ra. Mai te huru ra e ua tupohe te hoê taata i te mori. Aita roa ˈtu vau e ite faahou ra. Mea nafea to ˈu tamauraa i te haapii? Noa ˈtu e ua fatata vau i te turi i teie nei, e turui au i nia i te mau ripene e te tauturu î i te here a to ˈu fetii no te atuatu i to ˈu itoito pae varua.

Faaoromairaa e tae noa ˈtu i te hopea

I teie nei e ua hau atu to ˈu i te 100 matahiti, te ite nei au i te tahi mau fifi hau i te pae o te ea, e ua titauhia ia haere mǎrû roa vau. I te tahi taime, e arepurepu rii au. Oia mau, i teie nei e eita vau e ite faahou, i te tahi taime, e moe mau vau! Te hinaaro nei au e faatere faahou i te tahi mau haapiiraa bibilia, no te huru râ o to ˈu ea i teie nei, eita ta ˈu e nehenehe faahou e haere i rapae e imi atu. I te omuaraa, ua hepohepo vau no te reira. Ua titauhia ia haapii au i te farii i to ˈu mau taotiaraa e ia ohipa ia au i te reira. Aita te reira i riro ei mea ohie. Teie râ, e fanaˈoraa taa ê mau e, i te mau avaˈe atoa, te tapura ra vau i te tahi maa taime paraparauraa no nia i to tatou Atua rahi o Iehova. Ia nehenehe ta ˈu e paraparau no nia i te Bibilia, oia hoi ia haere mai te mau tuati, te feia tapihoo, e vetahi atu, e rave au i tera mau taime maitatai no te paraparau atu—ma te haapao maitai iho â ïa.

Hoê o te mau haamaitairaa ta ˈu e mauruuru roa ˈˈe, o te iteraa ïa e maha ui o to ˈu fetii e haamori ra ia Iehova ma te haapao maitai. Ua faaitoito te vetahi i te tavini ei pionie i te mau vahi mea rahi te hinaaro, te vetahi ei matahiapo aore ra ei tavini tauturu, e i te Betela. Parau mau, mai te feia e rave rahi o to ˈu ui, ua manaˈo aˈena vau e e tae oioi roa mai te hopea o teie faanahoraa. Auê râ ïa maraaraa ta ˈu i ite i te roaraa o na hitu ahuru matahiti taviniraa! Te mauruuru rahi roa nei au e ua haa amui au i roto i te hoê mea mai tera i te rahi.

Ua parau te mau tuati o te haere mai e hiˈo ia ˈu e no to ˈu paha faaroo e ora noa ˈi au. Te manaˈo nei au mai ia ratou. E horoa mai te vai-itoito-raa i roto i te taviniraa ia Iehova i te oraraa maitai roa ˈˈe. Mai te arii Davida, e nehenehe mau ta ˈu e parau e ua ruhiruhia vau e ua hope to ˈu pue matahiti.—Paraleipomeno 1, 29:28.

(Ua pohe o Tuahine Muriel Smith i te 1 no Eperera 2002 a papai-maitai-hia ˈi teie tumu parau. Hoê noa avaˈe hou te 102raa o to ˈna matahiti, ua riro mau oia ei hiˈoraa maitai i te pae o te haapao maitai e te faaoromai.)

[Hohoˈa i te api 24]

E pae matahiti mai tera to ˈu i ǒ nei e 19 matahiti to ˈu i to ˈu farereiraa i ta ˈu tane o Roy

[Hohoˈa i te api 26]

To mâua pereoo e te pereoo tavere ta mâua i mairi i te iˈoa o Mizpah

[Hohoˈa i te api 27]

E ta ˈu tane o Roy i te matahiti 1971